Петров Вадим Генрихович

Вордскыны инты ум утчаське

В.Г. Петров

Вадим Петров 26 аресаз луиз химия наукаосъя кандидат, 44-яз доктор. Пыр-поч эскериз уранэз, сое атом электростанциосын но ож тӥрлыкын кутонэз. Чернобыльысь пуштэм атом станциез кысонэ но пыриськиз.

Али дышетэ Россиысь Наукаосъя академилэн Урал ёзэтэзлэн прикладной механикая институтаз, татысь лабораториен кивалтэ. 1994-тӥ-1995-тӥ аръёсы Россилэн Президентэз солы нимысьтыз премия но юнматъяз, егитэз тодосчи шуыса.

Вадим Петров – Удмуртиысь наука удысысь дано ужась. Солэн 200-лэсь ятыр научной статьяосыз. Химия ож тӥрлыкез быдтонын выль амалъёс утча-шедьтэ.

- Вадим Генрихович, вордӥськемын тӥ Ижын, йылпумъямын Москваысь Д. Менделеев нимо химияя но технологияя институтэз. Ку, кытысен пыӵамын тӥледлы удмурт сям? - Алнаш ёросысь Гондыргуртысь песянай-песятаелэсь паласькиз, вылды. Мон выныным вань гужемъёсты отын шутэтскылӥ. Анай-атае Ижысь гурт удысъя академиысь ӧз ваньмылэ. Муми Галина Константиновна – подготовительной отделенилэн кивалтӥсез вал. Буби Генрих Яковлевич – доцент. Саша выныным Гондыргуртэ вуиськом но вань ужез ас выламы эскериськомы вал. Ӧм пыраллялэ пастуханысь, чорыганысь, губиянысь. Быгатӥськомы-а, ум-а, гуртысь пиналъёсын удмурт сямен лабыртӥськом. Тодэм потэ ук, мар сярысь куспазы верасько гондыргуртъёс. Ма, анай-атае но, милесьтым маке ватоно ке, удмуртэ потылӥзы. Бӧрысь валазы: пиос азьын мултэс уд вераськы ни – валало.

Городэ вуыса но, удмурт кылме уг вунэтӥськы вал. Эшъёсы йырме кур карыкузы, удмурт сямен тышкаськисько ук соосты! Номырзэ уг валало. Долкало но кизэс шонтыса ик кошко. Атасъяськисьёсты ворми шуыса, асэным данъяськылӥ.

Кепыран сямме вормыны отӥязгес юрттӥз химия олимпиадаосын нырысетӥ интыосты басьтылыны кутскеме но. Россиысь ӵошатсконэ но вуи. Соин ик, Ижысь 30 номеро школаез йылпумъякум, малпай: оло, та удысэн ик азьлань улонме но герӟано. Нош кытчы мыноно? Эшъёс ваньзы я Москвае, я Санкт-Петербурге кошко. Маин мон пӧртэм? Кисыын зарни медаль.

Кылӥськиз: Москваысь Д. Менделеев нимо химияя но технологияя институтэ сюрон понна экзамен сётоно математикаез но химиез гинэ. Сочинение гожъяно ӧвӧл шуыса, отчы шонтӥ. Таиныз мон школаын «кыкъёс» басьялляй уго (серекъя).

- Москвае ӝабырскыны быгатэм муртэ кызьы ас палаз берыктыны пӧрмытӥз на Иж?

- Москвае кыльыны дэмласьёс уно вал. Кандидат ужме утеме бере уката ик. Со вал 1989-тӥ ар. Кунлы номыр кулэ ӧвӧл. Котыр ваньмыз куашка, троссэ эшъёсме кыскизы Глазовысь механикая Чепца заводэ. Уранлэсь технологизэ рос-прос дышетэм муртэ монэ но отчы ӧтё вал. Малпай: нош тон уксё дурыны быгатӥсь-а? ӧвӧл. Озьыен, мар тон заводын карод? Ож тӥрлыкен вуз карыны мылкыд карисьёс лачак. Тодосчиос соослы люкето гинэ. Ма, асьсэ кисыязы коньдон кыскыны яратӥсьёслы ку кулэ луизы ни трос тодӥсь муртъёс? Сотэк-а уноез учёнойёсмы кунгож сьӧры кошкылэмын? Та малпанъёсын сэрен ик заводэ ӧй мыны. Лыдъяй: прикладной механикая институтын тросгес пайда ваё.

Зэм, туннэ кун вала ни: учёнойёстэк нокызьы уг луы. Ма, сотэк-а нанотехнологиосы но кыскизы экономика наукаосъя кандидатэз Анатолий Чубайсэз? Нош 1990-тӥ аръёслэн кутсконазы кунлы ож тӥрлык поттӥсь заводъёс нокыӵе ӧз потэ ни – кивалтӥсьёс улӥзы мукет сюлмаськонъёсын. Туэ Пугачёвоямы кылдэм югдур но – со вакытысь гудыртэм куара. Туж трос кылемын ож тӥрлык. Военнойёслы уксё тырмыт висъямысь пумен дугдӥзы уго перестройка дыръя. Рос-прос ужамзы ӧз поты ни. Уноез кизэс лэзьязы: тазьы но ярам, уг пушты ук. Пуштӥз.

Жаляса верано: асьмелэн вирамы пыӵамын ни, Иж – военной город шуыса. Талы асьмеос юн дышемын. Кык полэс чакласьконо шуыса, тодамы но уг лыкты ни. Соин ик Пугачёвоын но пуштӥз.

- Оло, Глазовлэсь мукет мугъёсын палэнскиды? Отысь механикая Чепца заводлэн радиоактивной отходъёсыз трос люкаськемын, шуо. Макем талы осконо?

- Лыдӟисьёслы валамон мед луоз шуыса, кутско тани мар бордысен. Инкуазьын уран рудаос вань. Но со ож тӥрлык лэсьтонын но, электрокужым поттонын атом реакторъёслы кулэ луись топливо чот уг мыны. Соизлы но, таизлы но мед ярамон луоз шуыса, уранэз пӧртэм тырметъёсын узырмытоно. Механикая Чепца завод ӵапак таин выре. Но со уранэз рос-прос «улӟытыны» уг быгаты. Таиныз выро палэнысь заводъёс. Котьма ке но Глазовын уранэз умоятонын урод палыз но вань: пушкысьтыз пото радиоактивной веществоос (отходъёс). Соос лябесь ке но, завод соосты люка нимысьтыз корт бекчеосы. Кытчы ваньмыз со кошке отӥяз – шугъяськисько вераны.

Ми ӵектӥськомы вал: реактивной веществоосты бетон блокъёсы тырыса, музъеме согоно. Радиация бетон пушкысь уг поты. Нош корт пасяськыны но быгатоз, кема улӥсь радиация омыре кисьтӥськоз. Жаляса пусъёно, дэмланмы дэмланэн ик кылиз.

Физик Вильгельм Рентген радиациез усьтэм дырысен ог 100 ар гинэ ортчиз ай. Озьыен, пумозяз рос-прос тодмо ӧвӧл, кызьы со адямиез шукке. Огзэ со ӝог сутэ, музонзэ небытак гинэ веша. Аракы музэн ик. Одӥгез литр курытсэ ӟамыртыса но, пыд йылаз возиськыны пӧрмытэ, мукетыз зынызлэсь гинэ но онгыра.

Радиацилэсь кышкасал ке, Чернобыльысь пуштэм атом станциез кысонэ ӧй пыриськысал. Мон тодӥсько вал, мар монэ возьма кышкыт Украинаын. Быдэс кандидат диссертацие уранлы сӥземын ук. Сое котыр ласянь узырмытон пумысен йырме тӥяй. Выль соединениоссэ дышетӥ, мар соос карыны быгато, валай. Ваньмыз со сярысь докладъёс дасяй. Но та усьтонъёс туннэ ке но калык синлэсь ватэмын. Ужъёсы кутӥсько уго военной промышленностьын.

Соин ик Чернобыльын пуштэм сярысь кылэме бере син шорам яркыт пуксиз Д. Менделеевлэн таблицаез. Авария луэм дырысен ортчемын 2 толэзь гинэ. Но егит мылкыд вормиз, лэся, вань кышканэз. Ма, атайёсмы кадь сэзь луыны быгатӥськомы шуыса но возьматэм потӥз, лэся. Песятайёсмы Быдӟым оже пыриськемын, ёзъёсмы Афганистанысь югдурез утёнэ вуылэмын. Школаын музэн ик, малпан маза ӧз сёты: маин мон пӧртэм, мон шаермес утьыны уг пӧрмыты шат?

Выпускысьтымы 10 кузя ӝутӥськимы но кошкимы. Ми азе пуктэмын вал ужпум: станция котырысь радиациез эскероно. Дӥсь сётӥзы. Химиез тодӥсьтэмъёс оскизы: таид радиацилэсь утёз. Ми куспамы сыӵе нодтэмъёсты жалямы но, серекъямы но. Радиоактивной веществоос куинь пумо: альфа, бета, гамма. Берло кыкезлэсь басма дӥсь ноку нокинэ ӧз утьы на. Нош альфа-частицаос – со тузон выллем. Таизлэсь утиз ик. Вылэ трос пуксе вал бере, дӥсез арнялы кык пол но вошъязы. Вужзэ сутылӥзы. Берло тодӥмы – суто вал сое омырын, нош кулэ – пытсам азьын. Озьыен, ваньмыз со, пеньлы пӧрмыса, тӧлъя-буръя нош ик пуксьылӥз выламы, пырылӥз шокан ёзвиосамы.

Ярано коть, станцилэсь 30 иськемын улӥсьёсты палэнэ нуизы. Но со кивалтӥсьёслэн гинэ косонзы. Со ужпумез вырӟытыкузы, нокинлэн но тодаз ӧз лыкты: мар вера со ласянь наука? Радиация быдэс 30 иськемез гинэ ӧз шобырты. Со, дырын-дырын кыдырась зор кадь, интыен-интыен пазьгиськиз, 30 иськемлэсь палэнэ но вуиз. Кылсярысь, зол йӧтӥз Белоруссиысь Могилёв улослы. Вутскиз со Россилэн Брянск палаз но. Татысь скалъёслэсь йӧлзэс али ке но уг юо – пушказ турынэн ӵош пыӵа цезий. Нош станция бордысь ик Припять городын ик воксё чылкыт интыос но сюрылӥзы.

- Туннэ ӵемгес но ӵемгес чузъяське: пуштэм бервылэ нуллыны кутскозы туристъёсты…

- Ма, соос отын часъёсын-часъёсын уз улэ ук. Мон ӧй верасал, Чернобыль тазалыкме куашкатӥз шуыса. Мон уго тодӥ, кытын чакласьконо, кытчы пыдэз но лёгыны уг яра, лёгид ке, мар кароно. Отчы специалистъёсты тросгес ыстысалзы ке, кулӥсьёс ӧжытгес луысалзы. Нош келязы олокинэ но.

Авария но ӧй луысал, адямиос эксперимент лэсьтыны, соин валче уксё дурыны ӧй малпасалзы ке. Ужасьёс лыдъязы: станциысь реакторъёсты вань кужмысь ужатом но электрокужым тросгес поттом. Тодазы ӧз лыкты: югдурез чаклась система солы чик дась ӧвӧл. Ӟырдам омырез, бугырскем реактивной суретэз ӧз вормы но тӥяськиз, пуштӥз.

- Куашкам станция ӵоксамын бетонлэсь саркофаген. Со пилиськылэмын ни, шуо.

- Чернобыльын ужакумы, тодмо вал: чакламын со 10 арлы гинэ, та дыр ортчем бере вылаз одно кисьтоно выльзэ. Но 1996-тӥ арын нокинлы номыр кулэ ӧй вал. Со дыре ик Украина узырмыны малпаз. Курдатъяны ӧдъяз: татын ваньмыз выльысь пуштоз. Талэсь утиськон вылысь, Евросоюзлэсь уксёзэ ялан кыскиз, сое аслаз кисыяз тыриз. Саркофагез выльдон тодаз но ӧз лыктылы.

Туннэ авария луэм дырысен 25 ар ортчиз ни. Выль саркофаг кемалась кулэ. Но кин мыноз сое кисьтыны? Кузь коньдон сӥзизы ке шат. Японъёс ушъясько: Фукусимаысь пуштэм станциез утялто мылкыд карись муртъёс гинэ. Талы уггес оскиськы – соослы кузь коньдон тыро, луоз. Туала арын адямиос шузиесь ӧвӧл ни – дунтэк сыӵе кышкыт азьын уз тырше. Туннэ мон но Чернобыле ӧй мынысал ни.

- Ӧй мынысал ни шуиськоды ке но, туннэ но ужаськоды химической оружиез кызьы ӟечгес быдтон бордын.

- Кызьы уд сюлмаськы? Кунъёс куспазы вераськизы: химия ож тӥрлыкез быдтомы 2012-тӥ арозь. Но коньдон ӧвӧлэн та уж олокӧня ар кыстӥськоз ай.

Зэм, туэ лыдпусъёсты учконо ке, США-ын 80 процентэз кышкыт ватоссы быдтэмын ни. Нош нырысь-валысь вал со 31,5 сюрс тонна тыр. Россиын 50 процентэз химия утялтэмын. Кышкыт ватос вал 40 сюрс тонна. 30 процентэз интыямын Удмурт шаерын. Собере, кышкыт ватосъёс вань на мукет кунъёсын. Кылсярысь, Китае снарядъёсын ипритэз (горчичной газ) вуттӥз Япония. Таос 1 миллион мында лыдъясько. Химиез быдтон сярысь конвенция улэ ӧз гожтӥське Ангола, Египет, Израиль, Мьянма, Уйпал Корея, Сомали но Сирия. Сирия но Египет ватоссэс возё, Израиль вылазы медаз урдскы шуыса. Сомалиын но Кореяын кивалтӥсьёссы рос-просэсь ӧвӧл. Соин ик кин тодэ, мар карыны быгатозы та кунъёс асьсэ ватосъёсынызы. Террористъёс сярысь вунэтоно ӧвӧл. 1995-тӥ арын Токиоысь метрое соос вуттылӥзы ук химиез.

Ярам, Камбаркаын люизитэз быдтон уж йылаз-пумаз вуттэмын. Но отчы кылемын туж трос реакционной массаос – мышьякен тырмытэм сылалъёс. Соосты нуыны туртто вал Саратов улосэ. Отын асьмелэн кадь завод вань. Но саратовъёс пумит султӥзы: малы, пе, милемлы мултэс уж? Кылиз дорамы ик. Ӵапак со сылалъёслэсь кужымзэс быдтон пумысен ик сюлмаськыны кулэ асьмеос. Институтмы ӵектэ: сое рудалы пӧрмытоно. Но милемыз кылэм уг каро на.

Огезлэсь кышкасько: военнойёс со объектэз медаз куштэ вал. Огшоры калыклы сое чакланы сётӥзы ке, уксё тыремысь рос-прос дугдозы. Корт бекчеос кыре кылёзы. Нош зор-кот улын соос дасо ар но уз чидалэ – сыномозы, сисьмозы но пасяськозы. Озьыен, сылал музэ вуоз, нош со зор улын ӝог сылме. Котмем мышьяк вуэ сюриз ке, адямиос дорозь одно ик вуоз.

-Нюръяськыны яратӥськоды, шӧдске. 2001-тӥ арын пумит султӥллямды Воткаын твёрдо-топливной ракетаосты быдтонъя завод усьтонлы.

- Пумитъяськисьёс ми ог сю кузя вал. Но кылимы мон но химия наукаосъя доктор Лев Фёдоров. Мукетъёсыз кышказы, лэся, кивалтӥсьёслы тушмон луыны. Зэм, пумитъяськеме ӟече ӧз вутты – туннэ ке но шорам кырыж учкылӥсьёс вань. Но мон уг жаляськы.

Россия твердо-топливной ракетаоссэ быдтыны кулэ шуыса, валасько. Но адямиослэн тазалыксы сярысь но малпаны кулэ ук! Ми юамы: малэсь лэсьтэмын ракетаосы мынӥсь эстӥськон? Документъёссэс ӧз возьматэ. Секрет, пе. Но ми шедьтӥмы ик – визьмо книгаос быриллямтэ на. Отын тӧдьыен-сьӧдэн гожтэмын: ракетаосты быдтыку, омыре потэ туж кышкыт арбери – диоксин. Мугоре сюремез бере адямиез пумен сисьтэ, СПИД сямен. Сыӵе кышкыт заводэз Воткае пуктыны туртто вал. Кызьы мон пумит ум султы? Судэ вазиським но вормим. Заводэз ӝутӥзы Перме.

Зэм, кыӵе пӧртэмез, Россилэн кыӵе сэрегаз сое пуктозы – котькытын асьме адямиос уло. Америкаын ракетаоссэс пустыняын суто. Кин но со юа: мукет сямен соосты быдтыны уг луы шат? Луэ. «Курск» подводной лодкаез ӝутӥзы, ӝог но зол бызись вуэн пасяса. Ӟучъёс сое «гидроразрыв» шуо. Ракетаосты но озьы ик куасаны луэ. Сыӵе дыръя диоксин омыре уг поты.

- Тае ваньзэ кылыса, улыны кышкыт.

- Быдэс дуннеез учконо ке, асьме дорын сокем ик кышкыт ӧвӧл. Удмуртия понна военной заводъёс но ож тӥрлык, оло, трос ик, нош быдэс кун понна – ӧжыт. Асьмеос Россилэн вань кунгожъёсызлэсь палэнын. Шорамы ракета ыстӥзы ке но, сое уськытыны вуттозы. Ма, республикамы шоры мертаськонлэн но толыкез вань на меда? Военной заводъёсмы оломае ик уг потто ни. Соин ик асьме дорын али ӵапак улоно кадь. Кызь пӧртэм кунэ научной конференциосы вуылыса вылысь, доразы кыльыны косыса курыкузы но, Иже ик берытски. Татын кышкыт луысал ке, пегӟысал, дыр.

Источник:

Петров В. Г. Вордскыны инты ум утчаське / В. Г. Петров ; записала Елена Сараматова // Удмурт дунне. - 2011. - 11 нояб. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"