Тронин Георгий Геннадьевич

Верамез вешам кадь

Тронин Г. Г.

Георгий Геннадьевич Тронинэз Дэри черкогуртын но ёросын тодӥсьтэмез ӧвӧл. Татын со куамын арлэсь кема улэ ни. Трос кужымзэ сётӥз ёросэз азинтонлы: кивалтӥз районысь дышетонъя управлениен, бӧрысь юнматӥзы ёрос йырлы воштӥсе. Георгий Геннадьевич - калыкез дышетон удысысь отличник. 2005-тӥ арын Георгий Тронин луиз Завьяловское гурт поселенилэн йырыз. Татчы пыро Дэри черкогурт но солы матысь укмыс гурт. Кивалтӥсь азяз таӵе ужпум пуктэ: котькыӵе вакытэ адямилы юрттыны быгатоно.

Азьмынӥсь Герчик

Тронинъёслэн выжызы Эгра ёросысь потэмын. Анаез Анна Никитична вордскемын Мазьги гуртын. Атаез Геннадий Иванович - Эгралась. Кыкназы ик бухгалтере дышетскемын. Егитъёс ог-огзэс шедьтӥзы Эгралан. Татын вордскизы Галя но Гера нылпиоссы. Геннадий Иванович туж гажа вал Георгий Жуков маршалэз. Соин пиезлы солэсь нимзэ сётӥз. Но Гераезлы военнойлэсь удыссэ ӧз сӥзьы: тужгес усто ужез инженерлэн, шуылӥз. Нылызлы веранэз мукет вал - эмъясе, пе, мыноно.

Ачиз Гера пичиысен синмаськиз журналистлэн удысэзлы. Эгралась 2 номеро шор ёзо школаын тодон-валан люкакуз, удалтӥз ӟуч кылъя но литературая дышетӥсен. Соин урокъёсы мыло-кыдо ветлӥз, трос гожъяськиз, лыдӟиськиз - Тронинлэн сочинениосыз районын тужгес устоен лыдъяськизы. Мумы-бубыосыз ялан сюлмаськизы нылпиоссылы котыр ласянь тодон-валан сётыны. Витетӥ классын дышетскись Гералы атаез арган басьтӥз. Берлогес пияш кияз кутӥз гитара. Крезьгурен валче ӧз вунэты тазалыксэ кыдатон сярысь но. Ӵужкушман кадь пиш-пиш йырсиё, очкиен ветлӥсь востэм Тронин школаын азьмынӥсь, ӟеч дышетскись радэ потӥз. Со ик кырӟась, эктӥсь, пионер дружиналэн тӧроез, собере - комсомол огазеяськонлэн секретарез. Мусояса пияшез школаын Герчик нимазы. «Витьёслы» дышетскемез но котькыӵе ужрадъёсы мыло-кыдо пыриськемез понна Гералы Туапсе городысь «Орлёнок» лагере путёвка сётъязы.

1968-тӥ арын Гера Глазысь пединститутэ филологияя факультетэ пыре. Глазын сяна, солы республикаысь вузъёс куспын спорт ӵошатсконъёсы пыриськоно: волейбол, футбол, копьё, диск лэзьян, выллане тэтчан но мукет.

Спортэз гажамез дышетсконаз но шӧдӥськытэк ӧз кыльы. Тронин курсовой ужзэ сӥзе спортэн герӟаськем кылъёс пӧлысь синонимъёсты люканлы.

Зарни пи

Егит мурт вала: анай-атаез арлыдоесь ни. Ма, со ачиз но йыг-йыг воргорон. Соин астэ ачид сюдыны-дӥсяны пӧрмытоно. Гужем Тронин мылысь-кыдысь ужаз институтлэн стройотрядаз.

- Милемыз Якшур-Бӧдьяла келязы. Татын скал гид ӝутӥм. Нырысетӥ уждунэным анаелы зарни зундэс басьтӥ. Макем со шумпотӥз. Атае таӵе кузьымен сое ноку ӧз лӧпкытъя.

Стройотрядысь егитъёсты райкомын ужасьёс куро гуртъёсын концертъёс, шутэтскон ӝытъёс ортчытъяны. Татын нош ик висъяське Георгий. Калыкез шулдыртэ арганэн но гитараен, эктэ.

1972-тӥ арын, институтэз йылпумъяса, Георгий Тронинэз ӵош дышетскем эшеныз Виктор Чирковен лэзё Сюмси районысь Гура черкогуртэ. Тулыс но сӥзьыл сюресъёс татын ӧй вал - «кукурузник» шуон самолётэн гинэ лобаллязы. Соин Гура школаын дышетӥсьёссы ӧз тырмылэ. Тронинэн Чирковлы пӧртэм предметъёсты нуоно луиз. Кылсярысь, Георгийлы историез но географиез оскизы. Эшезлы немец кылэз дэмлазы.

Та интыосты воргорон али но сюлмаз возе. Инкуазь - йӧтылымтэ, зыл-зыл кошке Калмез шур. Но дэриез но тырмыт.

- Августэ лэзизы Сюмсие - дышетӥсьёслэн конференциязы. Отчы, тракторен сяна, номырин уд поты. Ульчаын жаль зоре. Трактор уробое интыяським. Нылкышноос азяз кариськизы, ми - бераз. Сюмсие вуытозямы, нӧдэн пазяськем дӥсьмы но, тусъёсмы но тодмантэм луизы, - дышетон аръёссэ пальпотыса тодаз вае Георгий Геннадьевич.

Кузпалъяз… картофка

Службаез бере Георгий малпаз Сюмси ёросысь школае берытскыны. Но мумы-бубыез улон интызэс воштыса вуизы, пизэс но бордазы Иже интыяськыны куризы. Тронин кема ӧз малпаськы - «Советской Удмуртия» газетэ йыгаськиз. Но пыд пуктӥз удмурт кылэз дышетымтэез. Школаын тодон-валан люкакуз, та предмет программае пыртымтэ вал.

- Ми кутӥськомы удмурт кылын ӟеч гожъяськисьёсты гинэ, - вераз валтӥсь редактор Василий Михайлов.

Егит мурт ӧз ӧпкельы - Ижысь радиозаводлэн газетаз мынӥз. Интыяськыса вуиз гинэ - эшез лӧпкытӥз Дэри черкогуртысь школаын ужаны. Тронин нош ик капчиен удыссэ воштӥз. Ӟуч кыл но литература борды Георгий Геннадьевичлы оскизы завучлэсь ужзэ но.

Кылдэмлэсь уд пегӟы, шуо калыкын. Кузпалыз но Тронинлы Глазын ик дасямын ни вылэм. Но дышетскон вакытаз синйылтыса ӧз ву. Пумиськизы ини Ижысен. Школаын ужась Тронинлы ивор вуиз: Ижысь огаз ресторанэ люкаськозы Глаз пединститутэз йылпумъямъёс. Ӝӧк сьӧры Георгий ваче син тупаз чебер нылашен. Нимы, пе, Татьяна. Озьы егит воргорон аслэсьтыз зэмос яратонзэ, вуоно кузпалзэ пумитаз.

Татьяна Николаевна ӟуч кылъя но литературая дышетӥсь луыса куамын куать ар тыршиз Дэри школаын. Со - калыкез дышетон удысысь отличник, вылӥ категориен дышетӥсь. Ог-огзэс гажась но дунъясь кузпалъёс кык пинал будэтӥзы.

Политикалэн тулкымаз

Дэри шор ёзо школаысь шаплы завучез ужаны ӧтизы ёросысь дышетонъя отделэ, инспекторлэсь удыссэ оскизы. Вань ужез - сюрес вылын. Ёросысь школаосыз арняен-арняен эскерыны поталляз. Соку Тронинэз синйылтӥзы райкомын ужасьёс. Георгийлы оскизы партилэн райкомезлэн пропагандая но агитацияя люкетэныз кивалтыны. 1987-тӥ арын Тронин идеологияя секретарь луэ. Кык ар ортчыса, сое партилэн Удмурт обкомаз инструкторе ӵектыны ӧдъязы. Но сюлэмыз висиз мукетыз понна: Дэри ёросысь дышетонъя отделэн кивалтӥсьёс ӵемысь вошъяськизы.

- Дорам вить школалэн директорез вуиз: ми, пе, тонэ кивалтӥсен адӟиськомы, - тодаз вае Георгий Геннадьевич. - Обком талы пумит луиз. Партилэн косэмезъя мон Дэри ёросын пуктэмын вал турын люкан понна кыл кутӥсе. Роноын ужасьёс дорам возь вылэ но вуизы. Йырме урдыны выром на шат - соглаш луи ни. Эшшо ке дышетӥсьлэн ужез мыным котыр ласянь тодмо. Августэ дышетӥсьёслэн ёрос конференциязы кивалтӥсе бырйизы. Саклык нырысь ик висъямы гуртысь пиналъёслы. Перестройкалэсь азьвыл шор ёзо школа усьтӥмы Кияикын, укмыс классъем - Пальникын. Пичи классъёслы чаклам 39 школа пӧлысь огзэ но ӧм ворсалэ. Берло аръёсты верано ке, гуртъёсысь школаос тросэз пытсаськизы. Пичи классъёслы чакламъёсыз но дасо пала гинэ кылизы. Роноен кивалтонэз ӵапак тупаз воштӥськонъёс ортчон вакытэн. Дэри ёрослы йыре бырйизы Галина Баталоваез. Солы нырысетӥ воштӥсе ӵектӥзы Георгий Тронинэз.

Дэри ёрос Ижлы матын бере, улӥсьёслэн куронъёссы но вылӥын. Выль кивалтӥсьёс сое ӟеч валазы. Кутскизы бадӟым ужъёс: выльдӥськиз райцентрысь культурая юрт, ёрос больница. Италмас посёлокын ӝутскиз шор ёзо школа. Дэри шор ёзо школа вӧзы Удмуртиысь Президентлэн программаезъя бадӟым спортзал лэсьтӥзы. Пыӵанка гуртын, вуж школаез рос-прос тупатъяса, усьтӥзы шутэтскон сэрег но пиналъёслы библиотека. Таӵе азинсконъёслы луыса ёросын куинь пол радъяськылӥзы республикаысь Гурт шудонъёс.

Вормонъёс

2004-тӥ арлы уката бадӟым ужрадъёс чакламын вал. Соку Дэри черкогурт 255 ар тырмонзэ пусйыны дасяськиз. Соин тужгес бадӟым лэсьтӥськон кутскиз 2002-тӥ-2003-тӥ аръёсы.

Выльдӥськизы пыдын ветлон сюресъёс, шутэтскон, нылпиослы шудон интыос. Ульчаосты югдытӥзы тылъёс. Тяма но Молдавской тыметъёсты рос-прос тупатъязы, чылкытатӥзы гужем пыласькон интыосты. Чеберскизы Дэри черкогуртысь ляб нылпиослы школа, Пыӵанка но Тяма гуртъёсысь нылпи садъёс. Дэриысь нылпи садлэсь вуж юртсэ тупатъяса, пиналъёслэсь тодон-валанзэс азинтонъя центр усьтӥзы. Черкогуртын улӥсьёслы йӧн-йӧн саклык висъяськиз. Син шорын котьку возиськиз уже интыянъя югдур но. Трослы кулэсмиз ужтэк кылемъёслэн лыдзы. Палэнэ ӧз кельтэ мӧйыосты но. Ёрос кивалтӥсьёс котьку юрттылӥзы ветеранъёслэн огазеяськонзылы.

- Ми солы ӵем вазиськиськомы. Малы ке шуоно со адямиез вала, тырше юрттыны. Удмурт сямен вераськыны шугъяське ке но, пересьёсын анай кылын кенешыны тырше. Вӧзаз ужасьёсыз но шуо: солэн тышкаськемез но вешам кадь, - Георгий Тронин сярысь мылкыдзэ вера Дэриысь гажано нылкышно, ужысь ветеран, гурт удысысь дано ужась Раиса Константиновна Моторина.

2005-тӥ арын Георгий Геннадьевичез Завьяловское гурт поселенилы йыре бырйизы. Кузёлэн сюлмаськонъёсыз йылӥзы. Берло аръёсы быдэстэмын трос бадӟымесь ужъёс. Ёрос центре пырон азьысь черкогуртлэн нимыныз стелла выльдӥськиз, Тяма но Пыӵанка гуртъёсы Быдӟым ожын быремъёслы памятникъёс пуктӥзы. Дэри черкогурт син куспын чылкытгес но узыргес луиз кадь. Табере татын улӥсьёс арлы быдэ гуртсэс сузяло-утялто, устооссэ администрация кузьымъёсын пусъё.

Тронин туж бадӟым саклык висъя кык ӧрлы: удмурт кылэз но культураез пыӵатонлы но тазалыкез юнматонлы.

- Георгий Геннадьевич ноку уг вунэты удмурт Тяма но Пыӵанка гуртъёсты. Огаз 794 адями улэ, мукетаз - 626. Городлы матын бере, татын уката сюлмаськоно анай кылмес но культурамес утён сярысь, ӟучомонлы сётсконо ӧвӧл. Кыӵе гинэ ужпумъёсын ум вазиськиське, ноку «уг» шуэмез ӧвӧл, - вера Тяма гуртысь культурая юртлэн кивалтӥсез Елена Кириллова. - Тани клубез рос-прос тупатыны коньдон висъяз. Табере Пыӵанка гуртын но газ пыртэмын, кылем арын арганлы, крезьгуро аппаратуралы но компьютерлы коньдон висъяз. Та гуртъёсысь фольклор коллективъёслы выль костюмъёслы уксё вуиз.

Георгий Геннадьевич, пичи дырысеныз ик спортэн эшъяське бере, вала: будӥсь нылпиослэсь тазалыксэс одно ик кыдатоно. Дэриын азьвыл аръёсы но вал школалэн спортзалэз, стадион но мукетыз. Ёросысь командаос республикаын пӧртэм ӵошатсконъёсын вылӥ интыосты утыло. Волейболэн шудонъя ёросысь огазеям команда берло 12 ар ӵоже республикаын нырысетӥ интыын ветлэ.

Ӟеч сям луиз ни, Атыкай музъемез утисьёслэн нуналзылы но Нылкышно праздниклы сӥзьыса, гурт администрацилэн кузьымез понна спортъя ӵошатсконъёс ортчытъяны. Отчы пыриське 400-лэсь ятыр адями. Туж бадӟымесь азинсконъёс басьтӥськом капчи атлетикаын. Кызь вить ар ӵоже ини республикаын нырысетӥ интыын луиськом. Кемалась ик ӧвӧл хоккеен шудон площадка лэсьтӥм. Мукет ӵошатсконъёсын но кужыммес мертаськом. Кылсярысь, черкогуртамы куинь пол радъяськиз ни машинаен ворттылонъя элькун ӵошатскон.

Ужъёсын пачылмем адями аръёслэсь ортчемзэ уг шӧды. Георгий Геннадьевич корка пуктӥз, ныл но пи будэтӥз, писпуос пумтэм трос мерттӥз. Воргорон азьын пуктэм ужпумъёсты быдэстӥз. Но кивалтӥсь уг буйга:

- Ортчем аръёсме уг жаляськы, улытозям адямиослы юрттыны тырши. Но аслэсьтым малпанъёсме троссэ ӧй быдэсты на. Шутэтскон дыръёсам дорам пӧртэм ужъёсты эскерыны яратӥсько. Кылсярысь, гужем чебер газон будэтон бордын выри. Сюлэмыя суредаськон. Журналист ӧй луы ке но, гожъяськон пушкам гыбдаса улэ. Матэктэ ини юбилее. Пенсие потӥ ке, оло кылбуръёсын бичетме потто, оло суредаськыны кутско.

Источник:

Тронин Г. Г. Верамез вешам кадь / Г. Г. Тронин ; записала Юлия Кузьмина // Удмурт дунне. - 2010. - 19 нояб. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"