Крючкова Нина Якимовна

Мын отчы, кытын секыт

Нина Крючкова Кизнер черкогуртысь 9 классъем школаын дышетэ удмурт но ӟуч кылъёслы, быдэсъя завучлэсь ужзэ. Та удысын Нина Якимовна 27 ар тырше ини. Ӟеч тодон-валан сётэмез но нылпиосын одӥг кыл шедьтыса ужамез уно тау каронъёсын но синпельёсын пусъемын. Со Россия Федерациысь дышетон удысысь отличник. Туэ шаерысьтымы удмурт кылъя дышетӥсьёслэн вожвылъяськоназы вормисьёс пӧлы потӥз. Нина Якимовна мылысь-кыдысь пыриське «Удмурт кенеш» огазеяськонлэн Кизнер ёросысь ёзэзлэн ужаз.

Мон - мукет ыльняньлэсь

- Котыр музъем сыръяса улэмен, лэся, вашкалаос Татарстанысь Балтач ёросысь гуртмес Сэръя шуиллям. Музъемез пичи гинэ гудӟиськод но, соку ик ошмес син усьтӥське. Нырысетӥ классэ мынӥ асьме гуртэ ик. Куинь классъёсты огазеяса, дышетӥз Анастасия Прокопьевна Прокопьева - туж визьмо но синмаськымон кышномурт. Мон со шоры вожъяськыса учкылӥ. Со кадь луэме потылӥз.

Асьме гуртысь покчи классъем школаез пырпотыса, шор ёзо школаысь тямыс классэз йылпумъяй ини Чабъяын. Покчи классъёсын милемды вань предметъёсты, математикаез гинэ но, удмурт кылын дышетӥзы. Ӟуч кылэз чик ӧм тодэ. Соин ик, Чабъяе вуыса, ӟуч кылын верамзэс ваньзэ валасько кадь, нош аслам вераме уг луы. Туж яратӥсько вал математикаез. Дышетӥсе Василий Фёдорович Трофимов кадь визьмо адямиос ӧвӧл ни, потылӥз. Сыӵе со ӟеч но валаса дышетӥз, математикаез яратон мылкыд пыӵатӥз.

Тямыс класс бере Наташа эшеным Можга педучилищее пырыны малпамы. Монэ атае келяса мынӥз. Дышетскыны ӟуч группае сюремысьтым, ӧпкелисько ини. Атае шуэ: мар йырдэ ошид? Мон дӥсьтытэк гинэ ныр улам нукыртӥсько: мыным отын секыт луоз дышетскыны. Атае пештырскиз ук. Капчизэ ӝӧк вылысь шедьтод, шуиз. Озьы мон ӟучъёс пӧлы шеди.

Чабъяын классамы, удмуртъёс сяна, бигеръёс но поръёс дышетскизы. Одӥг ӟучмы но ӧй вал. Милемыз выжыя нокин ӧз люкы. Со сярысь йырамы малпан ик ӧз лыктылы. Озьы ке но ваньместы ӟуч кыл огазеялляз. Классэн кивалтӥсьмы Раиса Ивановна Алексеева пор вал. Со котьку шуылӥз: адямилэсь выжызэ висъяно ӧвӧл. Ми, бигер шаерысь нылпиос, пичиысен таӵе валанэн будӥмы. Можгаысь удмурт дышетӥсьёсты дасясь училищее шедьыса, валай: мон мукет ыльняньлэсь лэсьтэмын.

Вӧтасько дышетӥсьме

- Училище бере ужаны Кизнер ёросысь Кибъя черкогуртысь шор ёзо школае шеди: пионервожатой луод, шуизы. Мар пинал мурт пумитъяськыса улоз, мае косӥзы, сое ик лэсьтӥ. Ой, кыӵе шулдыр ортчылӥзы нуналъёсмы! Лумбыт нылпиосын ӵош, соос сюлэмъям, туж умоесь, кылмы тупа, уже кельше. Со аръёс мынам улонам тужгес но яркытэсь вал, дыр. Мон соку ӧй ужа - шудӥ кадь потӥсько. Кыӵе но ужрадъёс, спортэн герӟаськем шудонъёс ӧм ортчытъялэ: волейболэн, футболэн, баскетболэн. Гужемзэ лагерьын, толалтэзэ, тол каникулъёс дыръя, ульчаысь ёлка дорын. Ачим егит бере, пиналъёс но яратӥзы, монэ эш каризы.

Но соку Валера кузпалы Кизнер черкогуртын ужаз ни. Со монэ дораз кыскиз. Ми лыктэмлэсь азьвыл Кизнер черкогуртэ Татарстанысь егит дышетӥсьёс Валеевъёс вуиллям. Тодматским-марам но, одӥг пол Галина Николаевна шуэ: «Нина Якимовна, ужаны потыны уд малпаське на-а? Мылкыдды вань ке, лыктэ школаямы, ӵапак вожатойлэн интыез бушамын». Нылме кутӥ но ӵуказеяз ик школае вамыштӥ. Со черкогурт пумысь гурезь йылэ интыяськемын. Киноын кадь чебер. Нылпиос ӟабыль потто. Сыӵе со мыным кельшиз. Пиналъёслэн куараоссылэсь ик мӧзмиськем ни вылэм. Пайми, нуные шоры учкытэк, со нуналэ ик монэ ужаны кутӥзы. Кык арзэ вожатойын тыршыса, мыным каллен-каллен оскизы покчи классъёсысь нылпиосты дышетыны. Туж ӟеч коллективе шеди. Директормы Валентина Сергеевна Распопина адямиез дунъяны быгатылӥз. Монэ кутыкуз, шуиз: «Шӧдӥсько, таиз пужалтӥськыса ужалоз».

Юнме кышкаськем

- Удмурт кылэз но литератураез яратон мылкыд пыӵатӥз Кизнер школаысьтымы Мария Михайловна Николаева. Со дырозь мон удмурт кыл шоры палдуресгес учкисько вылэм. Мария Михайловна мыным сюрес ӧй ке возьматысал, кин мон та улонын луысал? Ӧйтӧд. Дышетӥсьёслэн огаз кенешазы со шуиз: «Школамы ӟуч, соин ик факультатив амалэн нылпиосты удмурт кыллы дышетомы. Дышетӥсьлы ёрмонэз ӧвӧл, тани Нина Якимовнамы вань». Нырысь-валысь шугъяськи. Ма, мон тупал удмурт ук, кызьы мынэсьтым вераськемме нылпиос валалозы, шуисько. Мӧйы дышетӥсь меӵак ӵогиз: «Валалозы, тон бигер сямен соосын уд вераськы ук, урокъёстэ удмурт кылын нуод».

Нырысь-валысь туж секыт вал ӟучомем нылпиосты удмурт кылэз дышетон пумысен ӝутканы. Тросэз анай-атайёс пумит луизы, малы, пе, со милемлы кулэ. Шапыкен-шапыкен, шуэм сямен, ужмы интыысьтыз вырӟиз. Удмуртлыкез ӝутон но анай кылэз гажан пумысен нимысьтыз кенешонъёс ортчытъямы. Татариын удмурт газет поттэмзы но удмурт кылэз дышетэмзы сярысь вералляй. Каллен-каллен Алевтина Журавлёвалэн «Анай кыл» учебникезъя дышетскыны кутскимы. Адямиослэн удмурт кыл шоры учконзы воштӥськыны кутскиз. Нош ачим сыӵе выйи со уже! Урокъёс нуэм сяна, нылпиосын концертъёс дасяны кутски. Удмурт кырӟанъёсты, эктонъёсты дышетӥськом. Эсьмаса, чылкак ӟуч пиналъёс но милемлы вожъяськыны кутскизы. Нылпиосы воксё бурдъяськизы. Кыӵе ке думетысь мозмем муртъёс кадь асьсэды эрико шӧдӥзы, каллен-каллен удмурт кылын вераськыны кутскизы.

Анае дорысь удмурт дӥсь вайи, чыртыкышъёсмы жингыр потто, туго кышетъёсмы синэз мальдыто, нылпиос, соосты дӥсяса, эшшо но шумпото. Асьмеды возьматъяны кутскимы ёросын ортчись ужрадъёсын. Озьы ми ёрос понна удмуртлыкез утисьёс но ӝутӥсьёс луимы. Собере адямиослэн синъёссы усьтӥськизы, вашкала, кылылымтэ кырӟанъёсмес кылыса, синвуоссы быльыраллязы. Соку ини анай-атайёс но ми шоры мукет синмын учкыны кутскизы. Куд-огез асьсэос юрттӥськыны басьтӥськылӥзы. Школаен кивалтӥсьмы, тае адӟыса, эшшо милемды лӧпкытъя, мылкыдмес ӝутэ. Нылпиосын ӟеч ужаме понна мыным таукаронъёс сётъя, калык азьын ушъя. Уже сюлэмыя бере, мон, пичи мурт сямен, эшшо шумпотыса ужаны кутскисько. Милемыз Кизнер роноысь кивалтӥсьёс но синйылтыны шӧтазы.

Отӥяз монэ Мария Михайловна Николаева ик Удмурт кун университетысь удмурт факультетэ пырыны ӝутказ.

Сюлэм висён

- Озьы мон, 15 ар талэсь азьвыл школаез йылпумъям адями, выльысь парта сьӧры пукси, заочно дышетскыны кутски. Группаямы монэ соку ик старостае бырйизы. Татын мон бурдъяськи, сыӵе мыным удмуртъёс матын вылӥллям. Асме воксё мукет шӧдыны кутски. Дышетӥсьёс но, студентъёс но куспазы удмурт сямен куаж-куаж верасько. Мон соослы синмаськыса быри. Ну, малпасько, тани кинъёс мынам улонам уг тырмо вылэм. Нош мон ке воксё синтэм коӵышпи кадь, номыре удмуртъёс сярысь уг тодӥськы. Пушкам пинал, капчи мылкыд каръяськиз. Кӧня эшъёс отысь шедьтӥ! Али ке но соосын ӟеч кусып возиськомы, люкиськонтэм луимы.

Кизнерам зэмос удмурт луыса берытски. Мария Михайловнае шуэ, тырмоз, пе, тыныд покчи классъёсты дышетыны, каллен-каллен анай кыллы бадӟым классъёсты дышетыны кутскомы. Соку монэ ёросысьтымы «Удмурт кенеш» но синйылтӥз: пӧртэм ужрадъёсы ӧтчаны кутскизы. Кӧня ке ар талэсь азьвыл Кизнерысь «Удмурт кенешен» кивалтӥсьёс шуизы: Нина Якимовна, тырмоз тыныд ас пушкад гинэ пӧзьыса улыны, милям кивалтӥсьмылэн юрттӥсез луод. Косо бере, ужано кожай. Нырысь-валысь туж мыло-кыдо ужамы, олокыӵе но ужрадъёс ортчытъямы. Калык но ужаммылы синмаськылӥз. Кытысь сомында кужымды, шуылӥзы. Нылпиосын тыршемелэн емышез адӟиське кадь потэ. Али гинэ ужаны кутскись дышетӥсьёс урокъёсам пукыло. Исследовательской ужен вырыны бадӟым юрттэт сётӥз кылбурчи но тодосчи Василий Ванюшев. Мон солы котьку но бадӟым тау шуисько. Василий Михайлович угось, Удмурт кун университетын дышетскыкум но, научной кивалтӥсе вал. Кӧня ке ар талэсь азьвыл ми пиналъёсын черкогуртысьтымы пӧртэм удысын ужась дано адямиос сярысь статьяос гожъяны кутскимы. Нылпи угось озьы аслэсьтыз быгатонлыкъёссэ шарае поттыны быгатэ. Пиналъёсмы со ужъёсынызы элькун ӵошатсконъёсын нырысетӥ интыос басьтылӥзы. Дышетӥсьлы туж зол психолог но луыны кулэ. Куддыръя нылпи сыӵе юанэн вазиське, уд тодӥськы, мар солы вераны, кызьы валэктыны. Яке пинал ас пушказ ватӥське, сое усьтоно, эркын шокчытоно.

Источник:

Крючкова Н. Я. Мын отчы, кытын секыт / Н. Я. Крючкова ; записала Любовь Тихонова // Удмурт дунне. - 2010. - 10 дек. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"