Удмуртъёслэн Кылдысинэз инмысь васькытэмзы

Вань калыкъёс доры вуылӥзы ни инмаръёссы. Нош удмуртъёс, инмаръ-ёссылы вӧсяськыса-вӧсяськыса но, Кылдысинзэс доразы васькытъяны быгатӥллямтэ. Кылдысин кемалась-кемалась дыръёсы музьем вылын улэм, пе. Уд¬муртъёс нош пересьёслэсь кылӥллям вылэм: Кылдысин музъем вылын улыку, пе, ю-нянь но удалтэгес, пӧйшураны но дэлетогес. Адямиос но али сярысь умойгес улӥллям.

Одӥг пол шур дурысь ӝужыт кызьпу улэ люкаськыса вӧсяськыны малпаллям. Кылдысинэз музъем вылэ васькытытэк ум, пе, кошке. Трос пудоез вӧсяно луиллям, уно уй но нунал куриськиллям. Кылдысинлэсь сюлэмзэ небӟытыны быгатӥллям ик. Малы вӧсяськемзэс юам Кылдысин. Куриллям сое удмуртъёс, музъем вылэ васькыса, вашкала дыръёсы кадь, пӧлазы улыны. "Дорады васькеме уг луы, — шуэм соослы Кылдысин, — музъем вылын улонтэм кылме одӥг пол верай ни. Со кылме воштэме уг лу ". Туж сюлвориллям удмуртъёс огдырлы ке но доразы васькыны. Малпаллям соос: Кылдысин васькиз ке, кызьы ке гинэ сое кутыны быгатозы но кемагес доразы улыны косозы. Талы но пумит кылзэ ве¬рам Кылдысин. Вакчи дырлы но, пе, уг быгатӥськы адямиослы возьматӥськыны: солэсь воштӥськем тусбуйзэ адямиос адӟизы ке, кӧшкемаса кулылозы.

Тае кылыса, удмуртъёс Кылдысинэз кыӵе ке но пӧйшур луыса васькыны куриллям. Коньы-а, сяла-а луиз ке, одно ик сое кутыны быгатом шуыса малпаллям. Тодэм-а Кылдысин адямиослэсь малпанзэс, ӧвӧл-а, оло, тодэм ик. Но одӥгзэ со тодэ вылэм: кутыны сое нокызьы но уз луы. Соин ик соглаш луэм. Вӧсяськыны люкаськем адямиос азе, кызьпу йылэ, коньы кылдэм.

Писпу улын сылӥсь пӧйшурасьёс кема малпаса улӥллямтэ: мертаськыса пукыӵъёсынызы ыбиллям но, вием коньы кызьпу выжые усьыны кутскем. Но музъем вылэ коньылэн куэз гинэ усем, луд вылтӥ нош сяла лобӟыса кошкем.

Нош ик пукыӵъёссэс мерталлям пӧйшурасьёс, нош ик сутӥллям соослэн ньӧлъёссы тылобурдоез: сяла музъем вылэ усем. Музъем борды гинэ йӧтскыса вуэм, соку ик тур луыса лобӟем. Тур шур сопала потыны кутскем. Но пӧйшурасьёслэсь озьы гинэ уд мӧзмы. Нош ик золскиллям пукыӵъёс, шултыса лобӟиллям ньӧлъёс - ыбем тур вуэ усем. Вуз усем но - чабак чорыглы пӧрмем. Чиптэм-чаптэм ышем.

Одӥгъёсыз шуо, инме, пе, ватскем, мукетъёсыз — музъем пыдсы.