Шараев Пётр Низамиевич

Сизьым полэс вормонэ

Шараев П.Н.

Эмъян удысын ужасьёс пӧлысь тросэз тодо профессорез Пётр Низамиевич Шараевез. Бадӟым азинсконъёсыз понна солы оскизы Ижысь мединститутысь биохимияя кафедраен кивалтыны. Россия Федерациысь вылӥ школаысь, Удмурт Республикаысь наука удысысь дано ужась пӧртэм данъян грамотаосын пусъемын, социалистической ӵошатсконын трос пол вормисе потылэмын. Та нуналъёсы со 70 арес тырмонзэ пусйиз. Арлыдыз шоры учкытэк, кивалтэ медакадемилэн Ижысь 3 номеро медсанчасте интыяськем биохимияя но диагностикая кафедраеныз.

Семьяе.

- Пётр Низамиевич, шорады учкыса, уд но малпа, тӥ удмурт шуыса.

- Вордскемын но быдэ вуэмын Башкириысь Янаул ёросысь Коньга (Конигово) гуртысь бадӟым семьяын. Сизьыметӥез пинал - шумес пыдэс ке но, жалясез, нуныясез трос ӧй вал. Ваньзэ аслым лэсьтоно луылӥз. Атае, Граждан ожысь бертыса, выль кылдэм колхозэн кивалтӥз. Кема ик кузёяськыса ӧз вутты - Быдӟым ож кутскиз. Мукет воргоронъёсын ӵош со но фронтэ кошкиз. Но кема ожмаськыны уг кылды. Донбасс паласен сӧсырмыны шеде, нош Воронежысь госпитальын кылльыкуз, сӧсырмем солдатъёсын ӵош пленэ сюре. Тушмонъёс асьме солдатъёсыз улэпкын сутӥллям, шуо. Озьы кык аресысен атайтэк кыли, тусбуйзэ но син азям пуктыны шугъяськисько.

- Анайдылы шуг вал, дыр, сизьым пиналэз пыд вылаз ӝутыны?

- Анаймы Магиза Хазиахматовна котьмае чидано луиз. Вань улонзэ колхозын ужаз, бакча емыш будэтон котырын бергаз. Семьямылы шуг-секытысь потыны юрттӥз на анаймылэн эмъяны быгатэмез. Азьвыл аръёсы тросаз гуртъёсын медпунктъёс ӧй вал, нош ёрос центре мыныны кыдёкын. Соин ик висисьёс туно-пелёослы вазиськылӥзы. Мынам анае кӧт висёнзэс йӧнатылӥз, вольтчем лыоссэс тупатыны йӧндыриз. Ми пичиысен ик пӧртэм ужлы дышыса будӥмы, ог-огмылы дышетскыны но юрттӥмы.

- Аттестатады одӥг гинэ «куинь» отметкады вылэм.

- Директормы бигер вал, астрономиез нуиз. Солэн предметэныз гинэ «куинь» потэм, нош мукетъёсыныз -«ньыльёс» но «витьёс». Школаез йылпумъякум, туж потэ вал дышетӥсь яке агроном луэме. Малпанме быдэстон вылысь Уфаысь сельхозинститутэ вамыштӥ - конкурс пыр ортчыны ӧз удалты. Бӧрысьгес тодӥ, аттестатын «куинь» отметкаос вань ке, вылӥ дышетскон заведениосы уг куто шуыса.

- Вордскем палъёсады берытскиды-а?

- Гуртын улон туж секыт вал. Семьяямы трос нылпи вал ке но, анаймылэн котькудмес дышетэмез потӥз. Котьку шуоз вал: гуртэ кыльыса, адями чот уд луэ, городэ кошке. Озьы мон Сарапул городын улӥсь ӵыжы-выжыосмы доры вуи. Коньдон поттон вылысь рельсосварочной заводэ ужаны интыяськи. Одӥг ар слесарьын тыршеме бере армие басьтӥзы.

- Сурон сапег нуллон иназ мынэм, лэся.

- Юнме уг верало, дыр, армия егитъёсыз улыны дышетэ шуыса. Куинь ар сурон сапеген ветлытозям, трос тодон-валан басьтӥ. Одӥг арзэ Забайкальеын вал, нош берло кык арзэ Белоруссиын ортчытӥ, пушкаосыз зарядить карылӥмы. 1960-тӥ аръёсы солдатъёсыз котьмалы дасязы. СУ-7 самолётэз но соку нырысьсэ адӟи. Инметӥ лобась арбериос, пе, Америкаозь вуыны быгато. Егит пиос понна ваньмыз паймымон. Куд-огез самолётъёсын лобазы, ми дарыез пичи пробиркаосын мертаса дасямы. Уд но оске, куд-ог дыръя ваньмыз войнаын выллем вал. Шудтэм учыре шедьыса сӧсырмем солдатъёслы трос пол юрттылӥ. Ӵапак соку ик эмъясь луон сярысь малпаськыны кутски.

Эшшо одӥгзэ пусйысал на: со вакытэ котькуд солдатлэсь ӝот-ӝот юаллязы азьланяз кытын дышетскыны мылкыд каремзэ. Вордскем палъёсамы бертыса, пе, вузэ пырыны мед быгатомы. Сочинениез гинэ кӧня пол гожъямы меда, мукет предметъёсъя но трос тодон-валан сётӥзы. Туала вакытэ ке озьы дышетысалзы армиын. Дышетӥсь яке агроном луон сярысь малпанъёсме воштыны ӵектӥз удмурт офицер. Соин мыным малпамтэ шорысь пумиськыны кылдӥз. Ачиз со Пичи Пурга ёросысь вылэм, азьланяз удмурт сямен но куспамы вераськылӥмы. Ваньзэ тодыны тыршемме, пӧртэм приборъёсын тунсыкъяськемме шӧдыса, Ижысь мединститутэ пырыны ӵектӥз. Удалтӥз, студент луыны нырысетӥ араз ик быгатӥ.

- Палэнысь вуэм адямилы секыт ӧй вал-а дышетскыны?

- Кызьы сотэк, юрттӥсьёс ӧй вал, вордскем палъёсы бертылон дуно потӥз. Нырысь аръёсаз дӥськутлы но ёрмылӥ. Куд-ог мукет студентъёсын ӵош мон но арлэсь кема солдат дӥсен дышетски. Тодон-валан люкам сяна, кӧттырон сярысь сюлмаськылӥ. Эшъёсын ӵош вокзалэ ветлӥм вагонъёсты ӝоктыны. Кӧня ке толэзьлы Ижысь военкоматлэн кочегаркаяз уже интыяськылӥ. Коньдон ласянь шуг-секытъёсты ворми гинэ - дышетсконын шугъяськонъёс кылдӥзы. Анатомиез, гистологиез - мугорысь тканьёсты эскерись наукаез - но кунгожсьӧр кылъёсты дышетонъя урокъёсын «уяй». Котьмалэсь секыт сётскиз латынь кыл. Ярано коть, группаямы пиосмы туж сабыресь вал, котьку ог-огмылы юрттӥмы. Соин но, дыр, ӵош дышетскем эшъёсмы пӧлысь куатез профессор луиз.

- Нырысетӥзэ эскерондэс малы сӥзиды?

- Комакъёсыз эскери. Кык лулосэз нимаз банкаосы пытсай, одӥгезлы В6 витамин пуктӥ. Малпай вал, со ик улэп кылёз шуыса, нош ӵуказеяз со чатрам. Малызэ валэктон шедьтыны юрттӥз институтысь профессор. Витамин пуктэм комаклы, мугораз воштӥськонъёс ортчемен, шоканы омыр но тросгес кулэ луэм. Уже пӧрмымтэысь, ӧй юскиськы, мукетыз борды ӝабырски. Угось кыкетӥ курсысен ик институтысь лаборант луыса ужай.

- Сюлмо луэмысьтыды ик аспирантурае дышетскыны ыстӥзы, дыр.

- Мон дӥсьтӥсьтэмгес адями, соин ик косэмзэс возьмалляй. Дышетсконме йылпумъяме бере Якшур-Бӧдья ёрос больницае ужаны интыяськи ни вал, но тӧдьы халатэн ветлыны кема ӧз кылды. Мединститутысь удмурт воргорон, медицина наукаосъя кандидат, доцент Константин Петрович Петров Куйбышевысь мединститутлэн аспирантураяз дышетскыны ӵектӥз. Оско бере, азьлане вамыштӥ.

- Кыӵе уж борды басьтӥськиды аспирантураын?

- Татысен мон кык научной уж гожтӥ. Атеросклероз висёнлэн кылдэмез, сое эмъян амалъёс сярысь диссертация дасяй, 1972-тӥ арын медицина наукаосъя кандидат луи. Отысь И. Сидоренко профессор герӟась дыж (соединительной ткань) сярысь бадӟым уж гожтыны куриз. Арня мында библиотекаын бугыръяськеме бере дораз мынӥ кулэ реактивъёс курыны, нош со шорам долкаса учкиз: укыр мудронэсь, пе. Озьы ке но улляса ӧз лэзьы, Москваысь Мавзолеез возёнъя институтэ ыстӥз: отысь кулэ реактив шедьтӥд ке, пе, та темамес азьланьтом. Москваысь та институт сярысь тыро-пыдо ӧм тодылэ, сое лушкемен возизы. Отчы пырыны лэзизы ке но, ужан амалъёссэс ӧз возьматэ. Со понна кулэ реактивъёс сётӥзы. Выльысь Куйбышев городэ вуэме бере И. Сидоренко профессорлэн синъёсыз кымесаз тэтчизы: ӧй малпа, пе, вал, дуно реактивъёсыз кыӵе ке аспирантлы сётозы шуыса.

Отӥяз ваньмыз радъяськиз. Озьы мон Россиысь нырысьёсыз пӧлын герӟась ткань сярысь эскеронъёс ортчытъяй. Туннэ нуналозь 500-лэсь ятыр уж гожтӥ. Ас вакытаз соосты сюлэсь трос газет-журналъёсын печатлазы, ньыльзэ - кунгож сьӧрын. Наукаез азинтэме понна 1993-тӥ арын сётӥзы Сорос нимо калыккуспо наукая фондлэсь грантсэ.

- Дышетскондэс йылпумъяса, выльысь Ижысь мединститутэ вуиды. Москвае яке Куйбышеве кылемды ӧз поты-а?

- Уж ӵектӥсьёс вал, но вордскем палъёс дуногес потӥзы. Ужаны кутски Ижысь мединститутлэн биохимияя кафедраяз. 1977-тӥ-1994-тӥ аръёсы соин кивалтӥ. 1983-тӥ арын доктор диссертациме ути. Ӟеч тыршемме адӟизы. Милям кафедрамы Совето Союзысь вылӥ дышетскон заведениос пӧлын радъям ӵошатсконын сизьым пол вормись луылӥз.

- Наукаен вырем сяна, студентъёсыз дышетон бордын но ялан тыршиськоды.

- Та вакытэ милям кафедраямы тодон-валанзэс будэто шаерысьтымы но Свердловск, Киров, Пермь улосъёсысь, Башкириысь но Татариысь врачъёс-лаборантъёс. Пӧлазы трос гинэ гуртъёсысь лыктэмъёс но. Одӥг учыр тодам лыктэ. Вазь ӵукна кабинетам пырисько но, ӧсъёс ӵогамтэ. Ӝӧк дорысь нылашез синйылтӥ. Кытчы мыныны паймеменыз, кабинетам ик уйлы кӧлыны кылем. Соин ик улонын мынам одӥг ӧтёнэ: калыклы юрттоно! Пумитъяськыны быгатымтэысьтым, вылды, трос аръёс ӵоже общественной ужез но мон вылэ погыльтылӥзы. Дас ар институтысьтымы парткомлэн секретарез вал.

Котькуд адями шумпотэ, будэтэм емышсэ бичакуз. Мон но данъяськыны быгатӥсько, улонме юнме ӧй ортчыты шуыса. Туннэ нуналозь наукая 3 доктор но 24 кандидат будэтӥ, шуыны луоз. Табере соос мынэсьтым дышетон амалъёсме академиысь унояз кафедраосын ужазы куто. Медикъёс диссертацизэс утьыны ветло Башкириысь медициная кун академие. Отысь учёнойёслэн кенешазы пыртэмын мон но. Соин араз куинь-куать пол Башкирие ветлоно луэ.

Та вакытэ мынам кивалтэме улсын 6 диссертация гожтӥське. Жаляса верано, туала егитъёс наука борды уггес кыстӥсько. Тросгес коньдон поттыны тыршо.

- Трос кыл тодӥськоды, нош кудӥз матынгес потэ?

- Удмурт но ӟуч кылъёсын вераськисько, бигерзэ но башкирзэ тодӥсько. Удмурт бере, анай кылын ик вераськыны но малпаськыны капчигес. Одӥг пол, институтысь студентъёс азьын лекция нуыкум, юмоке шеди: удмурт сямен дышетыны кутскиськем. Студентъёс паймыса шорам учкемысь гинэ, мазэ-созэ валай. Со дырысен удмурт сямен семьяын гинэ вераськисько.

- Семьяды сярысь кылпум поттылӥды бере, оло, матысьгес тодматоды.

- Одӥг пол гинэ кышнояськемын (серекъя). Кузпалы Нина Ивановна вордскемын Якшур-Бӧдья ёросысь удмурт гуртын. Али пенсиын. Семьязы милям кадь ик бадӟым - укмыс нылпи. Тупаны но кулэ, со но сизьыметӥез. Ньылетӥ курсын дышетскыкум, пумиськимы. Нырысьсэ адӟеме бере ик сьӧд кысъем нылашлы синмаськи но аслым кыл сётӥ - кышноясько. Январь толэзь вал соку, нош ноябре кузпалъяськимы.

- Нылпиосты кинлэн пытьыезъя вамыштӥзы?

- Кык ныл будэтӥмы, табере нунокъёсмы вань. Бадӟымез Елена нылмы Ижысь медакадемие дышетскыны пыремез бере ик уже интыяськиз Ижысь 3 номеро нылпи ваён юртэ. Санитаркаысен кивалтӥсьлэн воштӥсез дорозь будӥз ни. Лариса нылмы Удмурт кун университетысь экономикая факультетэз йылпумъяз. Та вакытэ банкын ужа.

- Тӧдьы халатэн ужасьёслы тау карисьёс уг бырыло, дыр?

- Тау каремзэс возьманы дышемын ӧвӧл. Мар быгатӥ, ваньзэ лэсьтӥ.

Источник:

Шараев П. Н. Сизьым полэс вормонэ / П. Н. Шараев ; записала Е. Емельянова // Удмурт дунне. - 2010. - 29 янв. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"