Сидоров Валерий Михайлович

Пӧсь тылын гомась Така

Сидоров В. М.

Корт ӧс вылэ бадӟым букваосын гожтэмын: «Меӵак эфир! Пыраны уг яра!»

- Нырысетӥ камера дась-а? Кыкетӥез? Так, Валера, дас секунд ортчыса потӥськом.

Сидоров эшшо огпол микрофонзэ, пиджаксэ тупатэ, рос-прос небыт диваназ интыяське.

…Вить, ньыль, куинь, кык, одӥг. Чагыр экранъёсамы – «Лулысь-сюлмысь».

Паймисько Валерий Михайловичлэн ужаны быгатэмезлы. Кӧня кужымез кыске меӵак эфирын ужан! Нош кутсконэз вал тазьы:

- Школаме йылпумъяса, Удмурт университетысь филология факультетэ пыри. 4-тӥ курсын ӵапак «журналистика» специализацимы ужаны кутскиз. Мон отчы мылысь-кыдысь пыриськи. Визьмо но гажано дышетӥсьмы – Олег Корнилович Шибанов (со вакытэ со «Удмуртия» кун телерадиокомпаниен кивалтӥз но университетын дышетӥз) - быгатонлыкъёсме шӧдыса, лэся, телевидение ӧтиз. Учкод, пе, эскерод астэ. Со вакытэ мон газетын но, радиоын но ужалляй вал ини. Нош телевидение ласянь маке малпаны ик кышкалляй: отын туж визьмо, дӥсьтӥсь, чебер, самой-самойёсыз гинэ ужало, кожалляй. Озьы ке но, 5-тӥ курсын практикаме телевидениын ик ортчи. «Нунал бӧрсьы нунал» передачалы, телефон дурын пукыса, иворъёс бичалляй. Марысь мар, валамтэос кылдыку, Мария Евсеевалы, Евгений Михайловлы вазиськисько вал. Котьмае, котьку юа – соос ваньзэ валэктозы. Тӥни озьы иворъя отделын куинь ар ужай.

- Телевиденилы кема-а дышыны выриды? Татын тӥляд чылкак кузьыли карын кадь ук.

- Зэм, зэм – ваньмыз татын огыр-бугыр. Но мон татчы вуыкум, югдур чылкак мукет вал: туж ӟеч но капчи мылкыдо коллектив, журналистъёс ог-огзылы котьку юрттылӥзы. Жаляса верано луэ, туннэ югдур мукетгес.

Телевиденилы дышыны-валаны куинь ар пала выри. Азьло туж курадӟимы техникаен йырин. Иворъёсмы кык-куинь нуналлы беромыса потылӥзы. Нырысь сюжетэз плёнка вылэ гожтӥськом, бӧрысь кулэзэ-кулэтэмзэ куяськом-лякылӥськом, собере гинэ ай куаразэ гожтӥськом. Кыл ласянь но, туннэосыныз ӵошатыса, иворъёсмы жуг-жагесь вал. Ӧз тырмылэ видеосуредъёс, соин огшоры кӧсыт иворъёс гинэ мынылӥзы.

Гожъяськон перозэ егит Сидоров «Дась лу!», «Советской Удмуртия» газетъёсын волятӥз, одӥг ар Шаркан ёросысь редакциын но ужаз.

- Валерий Михайлович, мон тодэмъя, тӥледыз РТР каналэ но ужаны ӧтё вылэм…

- Иворъёсъя отделын ужаса акыльтӥ. Олег Корниловичен кенешыса, 95-96 аръёсы дас толэзьлы Москваысь журналистъёслэсь квалификацизэс будэтонъя институтэ вуылӥ. Ваньмон дыры трос вал бере, тодон-валан басьтэм сяна, съёмкаосы но поталляй. Тодматски Владислав Листьевен, Сергей Супоневен. РТР-ысь кивалтӥсьёсмы сюжетъёсы кельшылӥзы. Озьы доразы кыльыны но ӵектӥзы вал. Москвае кошкон азям «Удмуртия» гостелерадиокомпаниен кенешим: отчы кыли ке, удмурт телевиденилы 15 сюрс манет тыроно луо. Мон понна соку та лыдпус мултэс трос йӧтӥз. Шумпотӥсько: туннэ нуналозь одӥг секундлы но татчы кылеме пумысен жаляме ӧвӧл.

Дышетскемысь бертӥ выль кужымен. Мария Евсееваен (со ӵапак нылпи редакциын ужа вал) интыенымы воштӥським: мон егитъёс борды басьтӥськи, нош Мария Фоминична иворъёсъя отделэ потӥз.

- Тӥледыз «Там-там новости», «Телеутро» передачаосысь кылылӥм, адӟылэм вань.

- Нырысетӥяз тямыс ужъёсы потӥзы. Куинь пол Москваысь татчы командировкае вуылӥ, калык куспо «Мир» телекомпаниен герӟаськи. Отын вить сюжетэ пӧрмиз. Али кадь ик тодӥсько на Азербайджанлэн культурая министрзылэсь Полад Бюль-Бюль Оглылэсь интервью басьтэмме. Нош кыӵе устоесь вал Москваысь дышетӥсьёсы: И. Кириллов, С. Моргунова, В. Леонтьева, В. Шебеко… Мылкыды выль кужымен, выль малпанъёсын пачылмиз. Вордӥськиз «Ко-ко-ри-ко» крезьгуро передачае. Ой, нош кыӵе секыт вал соку нылпиосын но егитъёсын ужаны! Возьдаськисесь, кепырасесь. Данъяськисько: ми нырысь ик Марина Галичанинаез синйылтӥм. Быгатонлыкъёсыныз паймытӥз, конкурсамы со ик вормисе потӥз.

- Трос гинэ ужъёстэс чагыр экранысь адӟиськом. Кытысь передачаостылы сомында геройёс шедьтӥськоды?

- Ваньзэс асьмеос утчаськом. Кылӥськомы йӧспӧртэм адямиос сярысь вераськонъёсты - дыртӥськом доразы. Куддыр асьсэос жингыръяло.

- Узыр вылэм шаермы сыӵе адямиосын: «Лулысь-сюлмысь» передачаяды тэрымтэенызы, выль ужъёсты потӥзы: «Йӧспӧртэм», «Выжыос».

- Соос дырозь «Эзь» передачае вал ай. «Эзь» кылэз Г. Верещагинлэн «Вотяки сосновского края» книгаысьтыз шедьтӥмы. Ӟуч сямен со «гармония» шуэмез возьматэ. Москваын дышетскыкум, йырам малпан чилектӥз: возьматоно пичи гуртъёслэсь «шокамзэс», соослэсь улэм-вылэмзэс. Озьы «Эзь»-мы вордӥськиз. Телекамераосын гуртъёстӥ ветлыса, пересьёс милемды кин но ӧз кожалэ, ява: райкомъёс но, артистъёс но… Котькыӵе секыт улонмы мед луоз, пичи гуртъёс кыштыр азинско. Мынам туж потэ вал соослэсь улонзэс пальпотӥсь ымныр тусъёс пыр, капчи мылкыдын возьматэме. Кык-куинь нунал командировкаосы потаса, тямыс-дас 35 минутъем кассетаосы тунсыко вераськемъёс, суредъёс гожъяллямы. Нош экранэ дас вить минутэз гинэ шедьылӥз. Уноез бичам чебер суредъёсмы потытэк кыльылӥзы. Соин но выль передачаос кылдытӥм.

- Тӥ пиналэныз-пересеныз но, пичиеныз-бадӟыменыз но капчиен кусып тупатыны быгатӥськоды.

- Мон ноку аслам геройёсылэсь вылэ уг султӥськы. Шуом, пересьёсын кенешисько – соос сяменгес вераськыны, вырыны тыршисько. (Съёмкаос бере дорам бертыса, куддыр асме ачим «кырмисько»: эк, чылкак Марья апай сямен та кылэз верай ведь, пыдъёсме нош Олёнка апайлэн кадь пуктӥськем ук!) тунсыко ивор басьтод – кельшид ке адямилы. Тужгес секыт пересьёсын. Пичи нуныос выллемесь, ява: шӧдӥзы тынсыкъяськытэк, я мылкыдтэк юалляськемдэ – дыг! карисько, чылкак вераськемысь дугдо. Кивалтӥсен кенешыку, соослэсь улӥе медад лэзиськы, нош гуртын улӥсь калыкен - озьы ик огшоры выроно.

- Озьыен, котькуд геройды тӥляд сюлэмады пытьы кельтэ: выросъёссы гинэ но.

- Зэм. Котькуд пумиськон сюлэме кыле, тужгес но йӧно, йӧспӧртэм, небыт сюлэмо адямиен вераськиськод ке. Но улонмы огыр-бугыр быземен, соосты ваньзэс тодэ вайыса, йырын «бергатыса» пукыны луонлык ӧвӧл. Таяз арняе вуылӥмы, шуом, одӥг «зарни пыры» доры, соязэ – мукетыз доры. Передачалэн-а, сюжетлэн-а куноеныз матысьгес тодматскыса, паймыны кутскиськод быгатонлыкезлы, сямызлы. Озьы нырысь «висиськод» одӥг героен, дыр ортче – мукетыныз.

Синмаськи Дэбес ёросысь Юферевъёслэн семьязылы. Соос Вятка выжы валъёс будэто. Туж гажаса тодам ваисько Пантелей Николаевич Кузнецовез. Ма, туж уно гинэ сыӵе адямиос.

- Тӥляд улон катты.

- Выльзэ утчан. Одӥг омырен шокаса ӵакмисько. Йырам яркыт малпан лыктэ ке, бызьыса сое улонэ пыӵатоно ини. Угось кышкыт, шӧдтэк шорысь мылкыды бырыны быгатоз. Ваньмыз пӧрме - нош выльзэ учаны кутскисько. Тани «Лулысь-сюлмысь» передачаямы но ялан паймымонзэ, выльзэ шедьтыны тыршиськом: меӵак эфир тупатӥм, лотереяен шудон ортчытӥськом. Калыкмес ӧжыт ке но вырӟытоно, мед со дышоз ас малпанзэ вераны, та выллем ужъёсы пыриськылыны.

- Кызьы мылкыддэс ӝутӥськоды?

- Ӵыжы-выжыосы, эшъёсы юртто: ӟеч кылъёсын либато, шулдыртыны выро.

Куддыр дорам гитара улсын кырӟанъя ӝытъёс ортчытъясько. Вуыло гажано тодмоосы – Надежда Уткина, Светлана Белых… Но дас адямилэсь трос калык ноку уг люкаськы: акыльтыны кутскисько. Ӵошен пукиськом, чай ӟузылӥськом, улонмы, культурамы, калыкмы сярысь вераськиськом. Шуг-секытъёс кылдыку, сюлэмыдлы кельшись гуръёс туж юртто вылэм.

- Шаерамы тӥледыз ваньмыз сямен тодо ни. Трамвай-автобусэн ветлыны маза ик уг сёто, дыр.

- Нырысь чылкак абдрасько вал: огшоры ульчаетӥ вамышъясько. Огез ӟечбуръяське, мукетыз. Пумитазы ачим но вазисько ини. Собере, ну йырме тӥясько ук: ма, кытысь со монэ тодэ? Ку меда пумиськылӥм вал?

Туж уг кельшы, бордам йӧтскылыса вераськыны кутско ке. Пӧртэм пумо калык шулдыръяськонъёсы ӵем уг ветлӥськы. Уж дорам уно адямиосын пумиськылӥсько бере, огнам но кылеме потэ. Коллективмы, ӝытъёс, пикникъёс ортчытъяку – соосаз пыриськисько. Шумпотӥсько: вӧзам визьмоесь, монэ валась адямиос ужало. Тани Татьяна Степановалэн но Николай Эсканденровлэн сямъёссы огкадесь. Нош ми Анна Федотоваен – чылкак пӧртэмесь.

90-тӥ аръёсы егитъёслы передача дасям сяна, Валерий Михайлович басьтӥськиз «Шунды» огазеяськонлэн ужез борды но. Дыр ортчемъя шӧдӥз: огвакытэ отчы-татчы вуттӥськыны секытгес йӧтэ. Озьы быдэсак телевидение «зымиз».

- Милям татын ужасьёс телевидениез сыръясь интыен ӵошато. Туж шонер: та ужез яратыса, солы дышыса, секыт ини люкиськыны. Шӧдонтэм сиосын юнгес но юнгес бордаз кыске.

- Тодӥсько, тӥляд асьтэлэн дышетскисьёсты – вуоно кивоштӥсьёсты но вань ини шуыса.

- Мон 2-тӥ арзэ Удмурт кун университетысь журналистикая факультетысь студентъёсты телеужлы дышетӥсько. Со сяна, «Шундыкар»-ысь нылпиосын ужасько. Пӧлазы туж быгатӥсьёсыз вань: Ижысь, шуом, Алёна Петрова, Пичи Пургалась Таня Бектышева, Ува палъёсысь Лена Сидорова…

- Валерий Михайлович, тодмоос пыр луэ-а телевидение сюрыны?

- Ма, луэ, дыр. Но мон ачим кивалтӥсь ӧвӧл бере, та пумысен номыр карыны уг быгаты. Кыӵе ке кенеш, визь-нод сётыны – пожалуйста.

- Нош кизилиосъя тӥ кин?

- Пӧсь тылын гомась Овен.

- Яратоно праздникты?

- Вордӥськем нуналы. Соку асме музъем вылысь быдӟым кузёен шӧдӥсько. Мыным гинэ кузьымъёс сёто, ӟеч кылъёс верало. Эх, лӧптӥсько.

- Вормонъёсты?

- Калык куспо фестивальын кык пол нырысетӥ интыосы поталлязы «Юан-веран, тодон-валан», «Рос-спрос» передачаосмы; «Вся Россия» фестивальын пусъемын «Эзь» передачае; финн-угор журналъёс пӧлын ялэм ӵошатсконын 1-тӥ инты басьтӥ. Конкурс ас калыкедлэсь улон-вылонзэ возьматонлы сӥземын вал (Валерий Михайлович - Элькунысьтымы культура удысысь дано ужась)

- Азьланяз быдэстоно ужды?

- Кин тодэ, оло, вуоз сыӵе дыр – мемуаръёс гожъяны кутско.

- Шорады учкыса, Валерий Михайлович, малпан кылдэ: тӥ шудо адями. Кыӵе-о меда шудлэн шӧмыз?

- Мхм… пуксьытӥд ук, Оли. Секыт юан… Шуд - со астэ кинлы ке кулэен шӧдон, дыр. Ми анаеным шуиськом: мон улӥсько тон понна, тон – мон понна. Нош кыӵе меда шудлэн шӧмыз? Со туж ческыт.

Источник:

Сидоров В. М. Пӧсь тылын гомась Така / В. М. Сидоров ; записала Ольга Никитина // Удмурт дунне. - 2002. - 6 дек. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"