Карпова Людмила Леонидовна

Огпол шедьтэм шуд дуно

Л. Л. Карпова

Малы ке чылкак вужерын уло удмурт кыл удысысь куд-ог егит тодосчиос. Нош соослэн быдэстэм ужъёссы – ини тросэзлы адӟем карымон. Ува ёросысь Жужгес гуртын вордӥськем но будэм удмурт кылчи Людмила Карпова аслаз удысэзлы нырысь ик дышетскиз Удмурт кун университетысь кылтодонъя факультетлэн удмурт люкетаз. Сое ӟеч йылпумъяса, удмурт кыллы но литературалы ар ӵоже дышетӥз Сьӧлта ёросысь Гопгурт школаын. Отӥяз ӧтемзыя выльысь лыктӥз Иже – Кылъя, литературая но историяя Удмурт институтэ. Удмурт кылэз эскерон борды лулысь-сюлмысь басьтӥськыса ятвылтӥз: тодон-валанзэ йылэтоно на. Эстониысь Тарту университетлэсь аспирантуразэ но магистратуразэ усто йылпумъяса, дышетсконзэ азьланьтӥз на. Куамын вить аресказ луиз философияя доктор.

Отӥяз, Эстониысь ӵыжы-выжыосынымы ӟеч мылкыдын люкиськыса, пыд йылаз йыг-йыг сылӥсь тодосчи выльысь берытскиз дораз. Выльысь – Кылъя, литературая но историяя Удмурт институтэ.

Али но Людмила Леонидовна Карпова татын ик ужа. Солэн эскероно удысэз – уйпал удмуртъёслэн вераськон йылолъёссы но амалъёссы.

- Людмила Леонидовна, Удмурт кун университетысь кылтодонъя факультетлэсь нырысетӥ арзэ пырпотыкум, тӥ дышетскондэс йылпумъяськоды ни вал. Ваньды ик, Удмурт шаерлэн пӧртэм палъёсысьтыз вуэм нылъёс но пиос, туж лэчыт визьмо, паймымон етӥз сямо адямиос вал. Тӥ, ог-огдэс азьвыл чылкак тодылӥсьтэм муртъёс, туж вакчи дыр куспын кызьы меда огазеяськыны быгатӥды, собыдӟа кужымлы пӧрмиды?..

- Тодосчиос верамъя, вакытэн-вакытэн озьы луэ. Куддыр – вить ар ортчыса, куддыр – дас ар куспатыса. Ми, Удмурт кун университетысь кылтодонъя факультетлэн удмурт люкетаз кызь вить ар талэсь азьло вуэм нылъёс-пиос, зэм но, сэзь адямиос вал. Маин герӟаськемын та учыр – валэктыны уг быгатӥськы. Ваньмы ик, одӥг кадь етӥз егитъёс, одӥг дыре тупамы, дыр.

Ува ёросысь Бадӟым Жужгес школаысь ми кык кузя вал – ачим но ӵош дышетскем эше Светлана Арекеева. Удмурт кыл сяна, мыным туж ярало на вал история, физика, математика. Мукетъёсызъя но тодон-валанъёсы ӟечесь вал. Тае соку ик ятвылтыса, университетэ дышетыны кутӥсь муртъёс, документъёсме учкыкузы, малы ке чабкиськизы:

- Тӥляд ваньмыз «витьёс» гинэ – малы бен сокем-сокем малпаськиськоды кылчи луон сярысь?.. Йыгаськелэ историяя факультетэ…

Зэм, мон соосъя ӧй кариськы – бырйи кылтодонъя факультетэз ик, солэсь удмурт люкетсэ. Школаын ӟеч дышетскемелы вылӥ дунъет сётыса, монэ эшъёсылы йыр каризы.

- Университет бере, тросэз эшъёсты сямен ик, школае вамыштӥды, дыр…

- Дышетсконме йылпумъякум, монэ кельтыны туртто вал кылтодонъя факультетысь ик ӟуч кылъя но литературая кафедрае. Но та малпанэ ӧз быдэсмы. Соку мон ас мылкыдыя бырйи Сьӧлта ёросысь Гопгурт школаез.

О, кыӵе аръёс вал!.. Пиналъёсын но, дышетӥсьёсын но одӥг кыл шедьтыса ужай. Нылпиосты дышетэм сяна, школаын драмкружоклэсь ужзэ радъяй. Гуртысь егитъёсты но сцена вылэ тубтӥ. Но вакчи дыр куспын уно-а лэсьтод? Одӥг пол гинэ лӧптылӥмы ми, гуртысь пиналъёс но егитъёс - Степан Широбоковлэсь «Ой, чебер нылъёс» комедизэ пуктыкумы, серекъятэк кин ке кылиз меда?..

Тапалась калык монэ куддыр паймытъяз. Тужгес но – эмъясьёс. Вадестӥзы куддыр ортчылыкум, соос ёртылӥзы:

- Людмила Леонидовна, дорамы пыре ай, пыре – кӧня ке пуком, вераськом…

Малы ӧтьылэмзэс ачим ӧй ятвылтылы. Берло асьсэос ик «усьтӥськизы»:

- Тон туж чебер мадиськиськод удмурт кылын: вераськемед сюлэммес вӧё тылыен маялтылэ. Гопгуртын ар гинэ ужай. Мугез таӵе. Дышетыны кутскон вакытам ик, куарусён толэзе, мыным Ижысь гожтэт вуиз. Ыстэм сое Кылъя, литературая но историяя Удмурт институтын ужась Бибинур Шараповна Загуляева. Гожтэтаз ивортэм:

- Институтысьтымы кылъя люкетын буш инты кылдэ. Азьланез сярысь малпаськиськод ке, лыкты – кенешом. Мон, ужаны али гинэ кутскись адями, гуртысь ӧй пегӟы. Ма, пиналъёс, дышетӥсьёс азьын но кыл кутӥськод ук. Озьы ке но Иже ветлоно кариськи. Институтэ вуыса, кенеши татын ужасьёсын, институтлэн директореныз Кузьма Иванович Куликовен. Ог-огмес валамы кадь…

Ар ортчыса ини, лыктӥ Иже. Бен, гопгуртъёсын кайгырыса люкиськи. Дышетӥсь Виктор Андреевич Полянских (али со - школалэн директорез) ӝожомыса музэн куриз вал:

- Людмила Леонидовна, эн кошкелэ. Мон Тӥледыз ӧй лэзьысал…

Нош мон, котьма ке но, мукет шудме оскалтоно кариськи.

Кылъя, литературая но историяя Удмурт институтэ лыктӥ но, мыным нырысь туж мӧзмыт вал. Институтын ужась мурт ялан лыдӟиськыны, ӝӧк сьӧрын гожъяськыса пукыны кулэ ук. Нош мон мукет адями: яратӥсько калыкен вераськыны, кыӵе ке ужрадъёс ортчытъяны…

Но… чигнаны кулэ ӧй вал ни. Таӵе учыре тодам вайи Удмурт кун университетын дышетӥселэсь Иван Васильевич Таракановлэсь индылэмзэ:

- Людмила, одӥгез кылужед (статьяед) печатласькоз, мукетыз – отӥяз дугдэмед уз луы ни, ялан гожъялод но гожъялод…

Озьы ке но… Озьы ке но аслам сюлэмы ялан куриськылӥз на школае, пиналъёс пӧлы…

- Нош отӥяз Удмурт кун университетын гинэ люкам тодон-валанды ӧз тырмы ни – азьланяз эшшо дышетскон сярысь малпаськылӥды…

- Институтын ужаны кутскеме бере ик солэн директорез К. И. Куликов монэ ыстэ вал Тарту университетлэн аспирантураяз. Отын дышетскон вылысь университетэ документъёсме келяй, реферат гожтӥ, вуоно дышетӥсеным – Пауль Авре профессорен, – Тартуэ ветлыса ик, тодматски… Но… аспирантурае мон ӧй мыны. Аслам кужымелы малы ке ӧй оскы. Трос пол малпаськылӥ: наукаын ужаны пӧрмыто меда?…

Бен, тазьы мыдлань-азьлань кыстаськеме пумысен берло туж ӧпкели…

- Озьы ке но наукалэсь ӧд люкиськелэ…

- Туж-туж ӧпкели ке но, ӧй. Ай ваньзэ тодам ваёно ке, наукаен тодматскон сюресэ туж тунсыко мытӥськиз.

Институтэ нырысьсэ лыктон нуналам ик тодӥ: кылъя люкетын ужасьёс дасяло удмурт вераськетъёсты мукет вераськетъёсын ӵошатон кылбугор. Нимысьтыз юан-веран радъяса, монэ но Бибинур Шараповна Загуляеваез ыстӥзы Красногорск ёросысь Дёбы гуртэ. Татын улӥсь удмуртъёслэсь юалляськимы но, Бибинур Шараповна индылӥз:

- Та бичамъёсмес ӟеч-ӟеч эскеры но маке но гожты ай…

Бибинур Шараповна тазьы нодъям бере ачим но зол-зол сэзъялтӥськи. Отӥяз дунне вылэ вордӥськиз таӵе уже: «Удмурт кыллэн Дёбы вераськетысьтыз аспӧртэм куараос».

Нырысетӥ дӥсьтэме мыным кыӵе ке кужым сётӥз. Удмурт кун университетын дышетӥсе - тодосчи Валентин Кельмакович Кельмаков - собере дэмлаз:

- Быръем сюрестэ азьланьты. Эшшо кӧня ке ёросэн тодматскы но уйпал удмуртъёслэн вераськемзыя бадӟымос уж кылдытон сярысь малпаськы.

Берло эскери на уйпалась вить ёросысь удмуртъёслэсь вераськемзэс. Нырысь ик вуылӥ Юкаменск, Красногорск, Глазов районъёсысь гуртъёсы, собере потай на Балезино но Яр ёросъёсы.

Валамон ни: сомында ветлыса, туж уно бичамъёсы люкаськизы. Оглом эскери сю витьтонлэсь ятыр гуртысь удмуртъёслэсь вераськон манерзэс. Таиз сярысь шумпотыса вераны кулэ: уйпал удмуртъёслэн вераськон йылолъёссы со вакытэ чик эскеремын ӧй вал на. Нош аслам та уж борды басьтӥськеме мукет вераськетъёсты эскерыны луонлык сётӥз. Ачим мон вордӥськи но будӥ Удмурт шаерлэн шор ёросаз. Соин ик, уйпал удмуртъёслэсь вераськемзэс валаны турттыкум, мыным нырысь-валысь туж секыт вал. Собере аслым нимысьтыз программа лэсьтӥ. Котькуд ёрослэсь вераськон амалъёссэ нимысьтыз тетраде гожъялляй.

- Уйпала сомында пол поталлямды. Нош отысь удмурт калык тӥледыз кызьы пумита вал?..

- Асьме пӧлысь кин но со уйпал удмуртъёсты вераськисьтэм адямиос шуо. Соосын одӥг кыл шедьтыны уг луы, пе. Тазьы «пӧллисьёсын» одӥг лулысь ӧй кариськысал. Уйпал удмуртъёс мадиськыны туж быгато. Соослэн сюлэмазы сюрес гинэ шедьтыны кулэ. Отӥяз котьма сярысь кылалозы-буралозы.

Огаре мон огнам вуылӥ Глаз ёросысь Пусошур гуртэ. Миым тапала Удмурт кун университетын дышетскись егитъёсын ӵош потай. Тупаны но кулэ ук: ӵапак пумиськи кӧня ке ар талэсь азьло кенешем адямиеным. Лулысь-сюлмысь вераськимы, оломае но тодамы вайимы, синвуаськимы но…

- Быръем удыстыя тодон-валан люкады ке но, азьланяз дышетскон сярысь малпандылэсь ӧд куштӥськелэ…

- Кылъя, литературая но историяя Удмурт институтын ужай 1985-тӥ арысен 1991-тӥ арозь. 1991-тӥ арын монэ нош ик ыстӥзы Эстоние. Тарту университетлэн аспирантураяз январьысен августозь дышетски. 1991-тӥ арын сӥзьыл асьме кунъёс вискытӥ шукрес «тӧлпери» погыльтӥськиз: Эстония СССР-лэсь люкиськиз. Мон выльысь йыр бордам кутӥськи: табере бен мар кароно? Оло, Йошкар-Олае вамыштоно – отын выль аспирантура усьтэмын…

Маке луод – лу! Эстоние выльысь берытскыны дӥсьтӥ. Юнме сокем куалекъяськем: финн-угор выжыысь бӧлякъёсмы ваньзэ асьсэ сямен лэсьтӥзы. Дышетонзэс радъязы Европаын выллем. Выль сӧзнэтъя аспирантура интые кылдӥз магистратура. Аспирантураын ӧй ни, магистратураын эшшо вить толэзь дышетски на.

Та дыр ӵоже мон сярысь ялан сюлмаськылӥз профессор Пауль Авре. Ужме ӟеч быдэстӥ но, монэ докторантурае выжтӥзы.

- Мон понна соиз паймымон: тӥ, кылэз яратӥсь адями, эстон музъем вылын малы ке бырйиды философиез. Философия но филология ог-огенызы кызьы герӟасько?

- Тарту университетын ӧвӧл филологияя факультет, вань философияя факультет. Таиз огинэ валчея кылэз тодонъя, историяя люкетъёсты, мукетъёссэ. Та факультетлэн докторантураяз дышетскемъёс басьто философияя доктор ним. Ачим мон, дышетсконме йылпумъяса, луи урал семьяысь кылъёсты эскерон удысын философияя доктор. Бен, валамон ни, мон нокыӵе философ ӧвӧл. Азьвыл сямен ик – кылэз эскерись. Доктор диссертациме инъякум, мыным ӵапак кулэ луизы уйпал удмуртъёс сярысь кӧня ке ар ӵоже люкам ивортонъёсы. Вань гожъямъёсме огинэ люкай но кылдытӥ таӵе монография: «Шор Чупчи вадесын улӥсь удмуртъёслэн вераськон аспӧртэмлыксы».

Монографиме ачим ик печатлай, поттӥ. Солы коньдон висъян сярысь сюлмаськиз Тарту университет. Та монографие – кылэз эскерон удысысь нырысетӥ бадӟым уже.

Быръем сюресме азьланьтӥсько, кыкетӥ ужме дасясько.

Та сузьетысь куинетӥез ивортонэ тазьы нимаськоз: «Чупчи котырысь удмурт вераськетъёсъя кылбугор».

- Монографиды бордын туж лулысь-сюлмысь ужады, луоз. Соин ик сое вакчи дыр куспын вуттӥды. Соин ик философияя доктор но туж вазь – 35 арескады – луиды…

- Озьы тупаз: Эстоние мыныса, мукет радъя дышетскыны кылдӥз. Нырысь ик магистр луи, собере – доктор. Зэм, доктор нимлэн пуштросэз отын кӧня ке мукетгес. Соин ик асме сокем уг ӝутӥськы. Азьланяз, кылдӥз ке, оло, Россиын но доктор ужме утё ай. Россиын – Россиысь адямиос сямен. Азьвылгес луи ке философияя доктор, табере мед луо ини филологияя доктор.

Эшшо верасал на таӵе учыр сярысь. Пор но мордва эшъёсыным – Ольга Еринаен но Инна Тимиряеваен – ӵош ми луиськеммы доктор диссертацимес Эстониын нырысьсэ утись кунсьӧр тодосчиос. Тае лыдэ басьтыса, Эстон Кивалтэт котькудмылы кузьмаз быдэн 1000 крона.

- Али тӥ, Кылъя, литературая но историяя Удмурт институтын ужам сяна, дышетӥськоды на Удмурт кун университетын…

- Тартуысь бертэме бере ик монэ ӧтизы университетысь удмурт кылтодонъя факультетысь огъя но финн-угор кылтодонъя кафедрае. Шуисько ук: школалэсь, пиналъёслэсь, дышетӥсьёслэсь, ӵош ужам эшъёсылэсь ялан мӧзмылӥ. Шонерзэ вераса, мыным дышетӥсь луыны кылдэмын вал, дыр, нош ачим бырйи тодосчилэсь ужзэ.

Али ужасько туала удмурт кылъя кафедраын. Со сяна, удмурт кыллы дышетӥсько музон факультетъёсын дышетскись мукет выжыосысь егитъёсыз. Соосты быгатэмея тодматыны тыршисько удмурт калыклэн аспӧртэм сямъёсыныз-йылолъёсыныз. Валэктӥсько пиналъёслы, маин удмурт калык пӧртэмгес луэ ӟуч калыклэсь. Зэм, мукет интыосын ужан туж трос дырез «сие». Институтысь бертыса, мон выльысь ӝӧк сьӧрам пуксисько на – студентъёсын ӵуказе пумиськонлы дасяськисько. Умме усисько ини уйшор бере.

- Озьы ке но наука тӥледлы котьмалэсь дуногес. Отчы сюрес лёгыны юрттӥсьёс пӧлысь кинлы тужгес бадӟым тау кариськоды?

- Иван Васильевич Таракановлы, Валентин Кельмакович Кельмаковлы.

Удмурт кун университетын кыкетӥ арзэ дышетскыкум, Иван Васильевич Тараканов монэ ыстӥз Ленинградэ – А. А. Жданов нимо кун университетэ, студентъёслэн наукая кенешазы. Отчы ачим но буш ӧй мыны – Иван Васильевич сюлмаськемъя азьвыл ик дасяй таӵе ивортон: «Кыӵе пытьы кельтӥз Д. В. Бубрих пермь кылтодонын?..»

Со вакытэ чик уг тодӥськы вал ай, кин со Д. В. Бубрих. Та адямилэн аслаз ужъёсыныз, со сярысь гожъямъёсын тодматски но, мон азе пуктэм ужпум быдэстонтэм ӧй вал ни. Соин ик Ленинградэ ӝутскем мылкыдын кошки. Та ивортонэ наукалэн дуннеяз, пичи гинэ ке но ай, укно ӵогиз.

Куинетӥ араз Иван Васильевич монэ ыстӥз Саранске – Н. П. Огарёв нимо кун университетэ. Татын но студентъёслэн наукая кенешазы пыриськи.

Университетэз йылпумъякум, диплом ужелэн нимыз таӵе вал: «Удмурт кылын шонер вераськыны чаклам куронъёс». Таиз пичияк юрттӥз кадь туала удмурт кылын шонер вераськыны-гожъяськыны ӧтись бадӟымос бичет дасяны. Со бордын ужазы В. М. Вахрушев но В. Н. Денисов. Макем шумпотӥ, та книгаысь аслэсьтым ужме адӟыса. Соку малпай: мынэсьтым туж пичи тыршемме но сыӵе бадӟым адямиос кӧня ке но дунъяны быгато вылэм.

Удмурт вераськетъёсты эскерыкум, туж бадӟым юрттӥсе вал Валентин Кельмакович Кельмаков. Вуоно монографиме но со ик эскериз, тупатъяз.

Али но Валентин Кельмакович - мынам туж бадӟым дышетӥсе но юрттӥсе. Котьку вазиськы – котьку юрттоз, визь-кенеш сётоз.

- Котьма ке но наука адямиез куасьтэ, дыр. Нош гуртын вордӥськем адями, сьӧрлон кӧня ке улыса но, выльысь музъем вылаз ик берыктӥське…

- Мон туж яратӥсько вордӥськем гуртме. Тужгес но – гужем. Котькуд кӧснуналэ, котькуд арнянуналэ дорам вуттӥськыны турттӥсько. Оло, зэмзэ но, мон янгышай, городэ кошкыса? Пичи дыръям котьку малпасько вал: бадӟым будӥ ке, мед луозы мынам нимаз коркае, нимаз юртъере, со вӧзын пӧртэм емышо писпуосы, турлы-турлы сяськаосы. Соос аслэсьтым улонме но, юртъер котырме но шулдыртысалзы… Ӝожомыса верано луэ: та малпанэ уз быдэсмы ни, дыр...

- Людмила Леонидовна, тӥляд туспуктэмъёсты туж трос. Котькудӥз кие кутымон. Одӥгаз тӥ вылын туж чебер удмурт дӥсь. Кыӵе-мар учыр та?

- 1995-тӥ арын Эстонилэн Президентэз Арнольд Рюйтель пумиськылӥз финн-угор выжыосын. Бадӟым шуд усиз: пумиськонъёсы ми ветлӥмы калык гуръёсты эскерись тодосчиенымы Ирина Муртазовна Нуриеваен ӵош. Пумиськон ортчиз концертъёс возьматъян «Эстония» юртын». Ми калык доры потон азьын «Финно-угрия» юртлэн тӧроез Яак Прозес кылзӥсьёслы эстон сямен ялӥз:

- Али тӥ азьын кырӟалозы пичи удмурт нылъёс...

Ирина Муртазовнаен оглулысь шокчимы но, юрт пушкын ӝикытак ӧръяськиз «Марлы тӥяй?» удмурт калык кырӟан. Кырӟаммы тросэзлы ярам, адямиослэсь сюлэмзэс бугыртэм. Дорамы лыктыса, куд-огез синмаськемзэс ӧз ватэ:

- Тӥ зэмос кырӟасьёс, дыр?..

- Ойдолэ огдырлы выльысь берытскыломе наука дуннеяды. Кылъя, литературая но историяя Удмурт институтын али ужаса но, бичаськон удыстэс уд вунэтӥське. Бен, гуртъёстӥ ветлон уж капчи ӧвӧл. Нош тӥ уд чигиськиське, «асьтэлэсь сюрестэс уд ыштӥське» – котькыӵе шугадӟонэз пырпотыса, кырӟась-верась калык доры вуиськоды…

- Егит дыр котькыӵе кайгуэз ворме.

Собере та пумысен но кӧт куректэ: пересьёсмы та улонысь кошко, сьӧразы туж чебер кырӟанъёссэс, мадёнъёссэс нуо. Ваньзэ сое люкаса вуттыны, кельтыны кулэ…

1990-тӥ аръёс мытӥськыку, одӥг гужеме Тартуысь бертӥ но нош ик шонтӥ тодмо интыосам – уйпала. Нырысь ик лыктӥ Глазкаре. Отын сиён-юон басьяса кошки Глаз ёросэ. Собере вуылӥ на Юкаменск, Балезино, Яр ёросъёсы…

Со гужеме мон гуртъёстӥ куинь арня ветлӥ. Кырын ялан зориз. Чиданэлы туж паймыса, адямиос амалтэк чабкиськылӥзы:

- Таӵе куазь дыръя но «нӧдэз нелькиськоды», сюрес вылэ огнады потӥськоды?..

Зэм но, соку мон нокинлэсь, номырлэсь чик ӧй кӧбералля: гуртысь гуртэ огнам ветлӥ. Али паймисько: кызьы меда дӥсьтӥсько вылэм?..

Дунне вылын котькыӵе адямиос вань. Куд-огез одӥг пол мытэм сюрессы вылысь чутрак кожо но шудзэс палэнын шедьто. Егит но шӧртчи удмурт кылчи Людмила Леонидовна Карпова одӥг пол быръем сюресэз вылын йыг-йыг сылэ. Огпол шедьтэм шудэз котьмалэсь дуно. Уз сайя сое нокыӵе вужер!

Источник:

Карпова Л. Л. Огпол шедьтэм шуд дуно / Л. Л. Карпова ; записала Е. Виноградова // Удмурт дунне. - 2004. - 25 июня. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"