Марлы бичай

Марлы бичай, марлы бичай

Тӧдьы льӧмпу сяськаез?

Али ке но ӧй бичасал,

Сьӧд льӧмзэ ке тодысал.

Али ке но ӧй бичасал,

Сьӧд льӧмзэ ке тодысал.

Марлы турнай, марлы турнай

Возь вылысь вож турынэз?

Али ке но ӧй турнасал,

Италмассэ ке тодсал.

Марлы сии, марлы сии

Убоысь вож сугонэз?

Али ке но ӧй сиысал,

Курытсэ ке тодысал.

Марлы юи, марлы юи

Та курыт но винаез?

Али ке но ӧй юысал,

Кудӟемме ке тодысал.

Марлы кутӥ, марлы кутӥ

Та яратон туганэз?

Али ке но ӧй кутысал,

Куштэмзэ ке тодысал.

Марлы кошки, марлы кошки

Та вордскем но гуртысьтым?

Али ке но ӧй кошкысал,

Мӧзмемме ке тодысал.