Солдат келян

Сцена вылын шудон-шулдыръяськон композиция

Егит нылъёс но пиос кунултӥськыса пото но кырӟало:

Тӧдьы носки, сьӧд колоша

Кинлэн пыдаз уз кельшы.

Милям таӵе мылкыдъёсмы

Кинлэн сюлмаз уз кельшы.

Кырӟаса лэзём али но,

Вераса лэзём али.

Ортчем пинал дауре ӧвӧл

Шудом, серектом али.

Тӧдьы лӧмпу сяськаосыз

Весь бур киям возьысал.

Тӥ яратон, ой, эшъёсме

Весь син азям возьысал.

Нылъёс но пиос полукруг кылдыто. Одӥгез шораз потэ но шуэ: «Эшъёс, ойдолэ сяська бичаса шудом!» «Ойдолэ!» Егитъёс параен султо. Арганчи эктон гур шудэ. Одӥгез шораз потэ но эктыны кутске. Кинлэсь ке но парзэ эктыны ӧте. Соос бергало. Огназ кылем мурт нош ик аслыз эш утча. Эктӥсьёс пӧлы бызьыса пичи пияш потэ но кесиське: – Агай, агай, тыныд повестка вань, анай бертыны косӥз! Ваньмыз кушектӥськыса: «Мар? Повестка?»

Пиос сцена вылэ кылё. Соос котырто эшсэс. Ваньзы ӵош ӟыгырско. Нылъёс сцена вылысь кошко но мукет палтӥ кырӟаса пото:

Сьӧд валъёслэсь но, ой, букозэс

Кытын меда буяло?

Та вордэм но, ой, пиосмес

Кытчы меда келяло?

Куинь сэрго но, ньыль сэрго ук

Та Салья но бусыед.

Куд пал сэргаз кыльылоз ук

Та лёгылэм пытьыед.

Та кырӟанэз кырӟаку, кык нылъёс лекрутлэн картузаз чук поно.

Эн вунэты вож турынэз,

Эн вунэты сяськазэ.

Эн вунэты тон милемыз,

Ум вунэтэ ми тонэ.

Солдатлэн анаез кырӟаса пиезлэн чыртыяз ӵушкон понэ. Арганчи эктон гур шудэ. Экто лекрут, солэн анаез но атаез куинь кузя ваче потаса. Ваньмыз кырӟало:

Мӧзмом ини, мӧзмом ини,

Мӧзмим ке, бӧрдом ини.

Нюлэс матын уӵы чирдэ,

Чигоз ини сюлэмы.

Шунды ӝужа бергаса но,

Улмопуэ пиштыса.

Ӟеч ке ветлӥд, бертод али,

Шунды сяин бергаса.

Эктӥсьёс арганчилы тау каро но эктыны вань пиос пото. Ваньмыз кырӟало:

Эктэ, пиос, эктэ, пиос,

Эн жалялэ пыдъёстэс.

Пыдъёстэс ке жалялляды

Эктытэк но кылёды.

Шорады ке учкылӥсько,

Чебердылы паймисько.

Люкиськонме малпасько ке,

Чиге пинал сюлэмы.

Гуль сяська кадь адӟисько но,

Мак сяська кадь адӟисько.

Оломардэс яратӥсько,

Лулы кадь ик адӟисько.

Эктӥсьёс арганчилы тау каро. Лекрутлы атаез сётэ молот, уксё но чук. Ки вылазы пуктыса, лекрут чук шукке, со дыръя ваньмыз тазьы кырӟало:

Та шуккылэм но, ой, чукъёсме

Бертытозям возелэ.

Тузон ке но, ой, пуксьылӥз,

Чылкыт тылыен шуккелэ.

Нылъёс но пиос парен эктыны потто. Вань калык кырӟа:

Али гинэ вал ук али

Бусы дурын лыз сяська.

Али гинэ вал ук али

Дас кык арес дыръёсы.

Шоръяса-поръяса, шоръяса-поръяса

Шедьтэм яратонэ ӧй-а вал?

Сьӧд чабейлэн, ой, сяськаез

Сьӧд уг лу, тӧдьы луэ.

Арлэн куспыз дас кык толэзь,

Туж мӧзмон дыр но луэ.

Шоръяса-поръяса, шоръяса-поръяса

Шедьтэм яратонэ ӧй-а вал?

Сьӧд кышетэлэн пужыез

Вань кышетам лусал ке.

Тынад та чебер тусъёсыд

Весь син азям лусал ке.

Шоръяса-поръяса, шоръяса-поръяса

Шедьтэм яратонэ ӧй-а вал?

Эктӥсьёс тау каро арганчилы. Кин ке но кесиське: – Эшъёс, асьмелы вырӟоно ни.

Ваньмыз кырӟало:

Тутут гинэ карылоз ук

Пассажирной поездэд.

Тулыс (сӥзьыл) басьтэм солдатъёсыз

Али ке но возьмаса.

Кык пиос лекрутэз ки вылазы пукто. Лекрут, калык пала берытскыса, ӵушконэныз сэзъя:

Гурезь тубон но, ой, луытозь,

Гурезь васькон луысал ке.

Ӟеч лу шуон, ой, луытозь,

Ӟеч-а шуон лусал ке.

Ваньмыз кырӟаса сцена вылысь кошко но мукет палтӥз потыса кырӟало:

Шунды но ӝужа но,

Шунды но пуксе но,

Нош ик со интые

Толэзь но ӝужа.

Пиос но будо но,

Пиос но кошко но,

Нош ик со интые

Пиос будыло.

Нылъёс но будо но,

Нылъёс но кошко но,

Нош ик со интые

Нылъёс будыло.

Толэд но вуэ но,

Толэд но ортче но,

Нош ик со интые

Гужем чеберске.

Сяська но ӝужа но,

Сяська но тӧлӟе но,

Нош ик со интые

Емыш быгыльске.

Ваньмыз тау каро но сцена вылысь кошко .