Корепанов Анатолий Максимович

Кескич ляльчи но дано эмчи

Корепанов А. М.

Анатолий Максимович Корепанов – медицина наукаосъя доктор, профессор, 5 изобретенилэн, 200-лэсь трос ужлэн авторез.

Анатолий Корепанов вордӥськиз 1929-тӥ арын Игра ёросысь Сьӧдкыр гуртын крестьян семьяын. 1947-тӥ арын Ижысь фельдшер-акушеръёсты дасясь школае дышетскыны пыре. Сое «витьёсын» йылпумъяса, Ижысь медициная институтын дышетске. Куинетӥ курсысен Анатолий Корепанов Сталин нимо стипендиат луэ, институтэз «витьёсын» гинэ йылпумъя.

Анатолий Корепановлэсь нимзэ наукая журналъёсысь, конференциослэн но съездъёслэн программаосысьтызы адӟыны луэ, нош ассэ шедьтод Ижысь элькунысьтымы 1 номеро больницаысь. Та больницаын со жадёнэз валатэк ужа ини 40 арлэсь кема, 1971-тӥ арысен Ижысь медициная кун академиысь терапияя факультетлэн кафедраеныз кивалтэ. Профессор вань тодонзэ, быгатонлыксэ жалятэк сётэ ӵош ужась эшъёсызлы, студентъёслы но висисьёслы.

Анатолий Корепанов – Россия Федерациысь но Удмурт Республикаысь дано врач, Россия Федерациысь тазалыкез утёнъя отличник, Удмурт Республикалэн Кун премиезлэн лауреатэз, Нью-Йоркысь Наукая академиослэн огазеяськонзылэн ёзмуртэз.

- Анатолий Максимович, тӥледлы туж секыт вакытэ будоно-кыдано луиз.

- Мар веранэз ни... Гуртысьтымы ньыль классъем школаез 1941-тӥ арын «витьёсын» гинэ быдтӥ. Азьланяз туж дышетскеме потӥз, но война кутскиз. Озьы ке но мон витетӥ классэ Выль Ӟатчала, гуртмылэсь 12 иськеме мынӥ. Отын школа ӟуч. Мон ӟуч кылэз валасько, нош вераськыны уггес пӧрмытӥськы вал. Класс азе потӥсько ке, театрын кадь луэ - ваньмыз серекъяло. Мар карод, дышетсконме куштоно луи. Гуртамы одӥг ӟуч семья улӥз. Соос доры мынӥ но шуисько: монэ ӟуч кылын вераськыны дышетэ вал. Озьы ӟуч семьяен кусып вози, вераськыны дышетски, собере мукет араз ни витетӥ классэ выльысь дышетскыны мынӥ. Нырысь секытгес ик йӧтӥз ай, нош сизьым классэз Данъян грамотаен быдтӥ.

Эшшо дышетскеме потӥз на. Школалэн директорез Поволжьеысь немец Франц Францович Янцен вал – туж умой адями но дышетӥсь. Ижысь педучилищее мынэме потэ вал, шуисько солы. Гожты, пе, соку заявление, мон сое ачим нуо. Ӝыны толэзь ортчиз но - мыным артиллеристъёсты дасясь военной училищее дышетскыны ӧтьыса повестка вуэ. Ма, мар та таӵе, шуисько: отчы курон ӧй гожты ук.

Мар карод, мыноно луиз. Собере директормылэсь юано кариськи. Со шуэ: атаед ӧвӧл, семьяяды гожтэтэз уг тодо, дӥсед ӧвӧл, сиён-юон – карточкаен, юрттыны тыныд нокинлы луоз. Нош училищеын, пе, казармаын улод, сюдозы-дӥсялозы. Кылзӥськи, арзэ дышетски. 1946-тӥ арын озьы мон тямыс классэз быдтӥ. Война бере военной училищеос туж трос вал. Донецке, милесьтым училищемес сяна, быдэс эшелонэн Ташкентысь но, Ленинградысь но вуттӥзы. Собере соосты ӧжытгес карон сярысь постановление вуиз: куинь училищеысь, пе, одӥг гинэ кельтоно. Ваньмес комиссия пыр поттӥзы. Умой дышетскемея мон тупай, нош синмы ляб, шуизы, училищеысь поттӥзы.

Озьы дасэтӥ сентябре гуртэ бертоно луи. Дышетскем потэ, нош вань дышетскон интыосын ужаны кутскемын ни. Мар кароно? Син шорам йӧтӥз «Дась лу!» газетысь ялон: Удмурт театрын, пе, Ленинградын артистэ дышетскон вылысь калыкез эскерон мынэ на. Шумпотыса гуртысь кошки. Одӥгзэ экзаменэз сётӥсько, кыкетӥзэ… Ваньмыз умой: куарае но тупаз, шудэме но яраз. Кутӥзы. Мынам, шуисько, паспортэ ӧвӧл ук, кызьы-о Ленинградэ мыном? Мар со понна сюлмаськонэз, пе: дышетскыны пырид шуыса справка гожтом но, тыныд паспорт сётозы. Шумпотыса гуртмылэн сельсоветаз 12 иськеме бызисько: паспорт басьтыны вордӥськем инты сярысь справка кулэ, шуисько. Отын шуо: ми ум валаське сыӵе справка сётыны, нокин но татчыозь солы ӧз кулэяськы на. Нош ик гуртам 12 иськемез бызьыса бертӥсько но ӵуказеяз 22 иськеме, Вуж Ӟатчала, мынӥсько. Милицаос доры пырисько. Озьы но озьы, шуисько, паспорт басьтыны вордӥськем инты сярысь справка кулэ. Ой, шуо, ми сыӵе справкаос ум лэсьтӥське, прокурор дӥне мын. Прокурор шуэ: мар тон, пияш, милемыз пӧяськод, театрысь дышетскыны кутӥсь Корепанов тынад дядяед вылэм ук, тон солы вӧй нуид но, тыныд справка гожтэм.

- Зэмзэ ик-а мар-а со тӥляд ӵыжы-выжыды вал?

- Ма, луоз ини. Удмуртъёс, оло, котькуд витетӥез Корепанов но… Мар табере карод? Мын, шуэ прокурор, тэль кораны, Казахстанысь шахтаослы трос рудостой кулэ… Гуртэ бертӥ. Котьма ке но дышетскем потэ. Со вакытэ котькуд ар ФЗО-е но ФЗУ-е дышетскисьёсты люканы косэмын вал. Милям гуртысь одӥг пиез, пе, отчы келяно. Мукетъёсыныз ӵош Ижын монэ но комиссиысь врачъёс учко ни. Мынам со ФЗО шуоназы чик но мынэме уг поты. Мар кароно? Соку одӥг врачлы лушкемен шуисько: мынам урод висёнэ вань – триппер. Ой, шуэ, соку мон тыныд направление гожто, эмъяськыны мын. Гуртэ бертӥ. Дас нунал ортчиз-а, мар-а - нош ик ФЗО-е мыныны наряд вуиз. Табере - Люкшудьяе, плотникын ужаны. Нош ик мон борды мырӟиськизы. Мар-о карод на, мынӥ. Комиссиын юало: ветлӥд-а эмъяськыны? Ветлӥ, шуисько. Учкизы, эскеризы но, умой, шуо. Озьы милемды, 25 пиосты, Лукшудьяе келязы. Дас вить иськемез, машина дорозь, пыдын мыноно. Нюлэс дорозь вуимы но, мон пегӟи. Гуртын юало: марлы ӧд мыны? Ӧз басьтэ, шуисько.

Лымы усиз но, мар карод на, тэль кораны мыноно луиз. Ой, курадӟиськиз! Тулыс бригадире пуктӥзы. Колхозмылэн нимыз «Раскрепощение» вал. Калык отын крепостной кадь ужаз, нош нимыз тӥни - чылкак мыдлань.

Одӥг пол пересь дядяе шуэ: мар олокытчы но дышетскыны курадӟыса улӥськод, фельдшере мын. Сое гажало, ужез чылкыт, югыт интыын. Ижын фельдшере-акушере дышетскон сярысь ялонэз адӟи но пырак отчы дышетскыны мынӥ. Тямыс классэз похвальной грамотаен быдтэмын вал бере, нокыӵе экзаментэк соку ик кутӥзы.

1946-тӥ ар. Сиён карточкаен гинэ сётъяло. Дӥсь ӧвӧл. Стипендия 120 манет, нош базарын пичи гинэ юдэс нянь 10 манет сылӥз. Общежитие интыязы. Но отын улыны ӧй быгаты: мыным кытын ке сиён пӧзьтоно ук. Соку асьме палась городэ улыны лыктэм Тарасовъёсын тодматски. Лэзе вал, шуисько, дорады улыны, тӥляд скалды, пудо-животъёсты вань, мон ву вайыны, турнаны, пу пильылыны юрттысал. Лэзизы.

Сиёнлы туж шуг вал. Городысь вань ульчаосы картофка мерттылӥзы. Дышетскем берам мон картофка октэм бервылъёсыз гудыса ветлӥ, кылем-мылемъёссэ котомкаен-котомкаен улон патерам пудо-животлы нуллӥ, нош соос монэ асьсэ ӟеч картофкаенызы сюдӥзы ни.

- Гуртысьтыды вӧйын-сӥлен ке но юрттыны ӧз быгатэ шат?

- Ма, гуртмы Ижлэсь 120 иськемын ук. Арлы кык пол сяна бертылыны ӧй быгаты. Поездъёсы билетъёс ӧз вузалэ, нош вагонъёс вылын трос-а ваёд?

Кыкетӥ араз сторожъёсын тодматски но, соос мыным картофка мерттон инты сётӥзы. Озьы картофкаё луи. Фельдшерской школаез «витьёсын» гинэ йылпумъяй. Отысь преподавательёс юазы: фельшерын-а, пе, ужалод, яке враче-а дышетскондэ азьланьтод? Тынад, шуо, мединститутэ экзаменъёстэк пыремед луоз. Мединститутын дышетскыкум но, кык арзэ Тарасовъёс дорын ик улӥ на. Соослы юрттэм сяна, городэтӥ уж утчаса ветлӥм: кинлы ке пу дасяськом, кинлы ке укнооссэс толалтэлы туйылӥськом, закодъёс но лэсьтыса ветлӥм.

- Медициная институтын дышетскыны секыт ведь, ку-о лыдӟиськыны, лекциослы дасяськыны вуттылӥды?

- Уйин. Физика, химия, математика секытэнгес сётскизы. «Терпение и труд всё перетрут», шуо ӟучъёс. Кык ар куспын мынам вань предметъёсъя «витьёс» гинэ потӥзы. Сталинской стипендия сётӥзы. Ой, кыӵе узыр луи: 680 манет! Нош врач со вакытэ толэзяз 600 манет гинэ басьтылӥз. Соку ик общежитие потӥ. Научной ужен вырыны дыр сюриз.

- Ӵош ужась эшъёсты тӥледыз капчи мылкыдды, лякыт сямды понна но гажало. Анай-атайёстылэсь-а сыӵе сямды?

- Озьы. Соос туж лякытэсь, востэмесь вал.

- Семьяды бадӟым-а вал?

- Ми, пиналъёс, кык кузя вал – мон но сузэре. Вӧзамы – нэнэмы, песянаймы, песятаймы, нош бубымы мыным куать арес дыръя шудтэм учыре сюрыса быриз. Соос одӥгзы но гожтэт ӧз тодэ. Нэнэмы дышетсконлэсь ӧз алы, нош песянаймы шуылӥз: малы, пе, дышетскод, милемлы юрттыны кулэ.

- Тӥляд песянай-песятайды эксэй вакытэ улэм адямиос вал. Кызьы учкизы соос Совето власть шоры?

- Соос азьвыл улонэз ӟечен гинэ вераллязы. Кык-куинь валмы, куинь-ньыль скалмы, пе, вылэм. Ужаса гинэ ӟеч улод, ваньмыз луоз, шуылӥзы.

- Колхозъёс кылдыку, кулаке поттӥллямтэ-а?

- Ӧжыт гинэ кулак кариллямтэ. Середняке гожтӥллям.

- Нош одӥг адямиез данъян вакытэ тӥледыз но маин ке янгыш карыны ӧз тырше-а?

- Ӧз. Мон тодӥсько вал, студентъёс пӧлын, комнатаын ӵош улэмъёс пӧлын но КГБ-ын ужасьёс вань шуыса. Соосты али но ӟеч тодӥсько, но нимын-тулын вераме уг поты. Тани, шуом, студентъёс люкасько, улон-вылонэз курлало, Сталин вылэ ӝожтӥсько. Кӧня ке улыса учкиськом но, пӧламы одӥгез студент ӧвӧл ни, мукетыз, куинетӥез... Адямиез 58-тӥ статьяен янгыш каро, со чиптэм-чаптэм ыше-быре…

- Пичи дыръяды тӥ Ижевск – Якшур-Бодья чугун сюрес лэсьтонын но ужаллямды.

- Озьы. Война вакытэ, Украина немец кие сюрем бере, отысь музъем эгыр ворттыны ӧз луы ни. Соку Ижысь мартенъёс пуэн эстӥськизы, соин милемлы одӥг гужемзэ сюбег чугун сюрес лэсьтоно луиз. Соку мыным дас куинь арес пала гинэ вал ай. Валъёс войнае келямын вал бере, ваньзэ киын лэсьтоно луиз. Секыт йӧтӥз.

- Асьмелэн медициная тодосчиосмы трос. Удмуртъёслы адями лулэз, мугор люкетъёсты шӧдон инкуазь золгес сётэм кадь уг поты-а тӥледлы?

- Удмуртъёслэн тодон-валанзы ӧжытгес. Гуртысь потэмын ук. Но соос ваньзэ вормо чидаменызы, тыршеменызы. 1930-тӥ аръёс луысалзы ке, монэ, националист шуыса, пытсэт сьӧры пуктысалзы ни. Мынам вань кафедраосын – удмуртъёс. Тазьы малпасько: ачим удмурт калыкысь потэмын бере, удмуртъёслы юрттоно, мон ке ӧй – кин-о?

- Юрттэмдыя тодосчи луэмъёс трос гинэ, дыр, ини?

- Кызь муртлы медицина наукаосъя кандидат, куинезлы доктор луыны юрттӥ. Пӧлысьтызы ӝыныез – удмуртъёс.

- Людмила Яковлевна кузпалэныды тӥ ӵош дышетскиллямды.

- Озьы. Ми соин 46 ар улӥм. Тямыс ар талэзь азьвыл улонысь кошкиз.

- Нылпиосты но медицинаез бырйизы-а?

- Пичиез пие врач-терапевт, Ижысь огаз больницаын ужа. Бадӟымез пие композитор. Со али Сириын, Дамаскысь консерваториын дышетэ.

- Быдэс дуннелы тодмо Ася Корепанова тӥляд выжыысьтыды ӧвӧл-а?

- Ма, со бадӟым пиелэн нылыз.

- Озьы-а? Кызьы меда сыӵе визьмо нылпиосты будэтоно?

- Со милям школаын чик ӧз дышетскы. Отысь предметъёсъя уж басьтылӥз но экзаменъёс сётылӥз. Бернард Шоу шуиз ук: «Осто Инмаре, мамында мон тодысал, школаын сомында аръёсме юнме ӧй быдтысал ке». Асьмелэн школа ведь шоро-куспо дышетскисьлы чакламын. Нылпилэсь малы ке быгатонлыксэ нимысьтыз азинтыны кулэ.

Кенэ но музыкант. Асялы али кызь кык арес ни. Со - композитор, крезьгуръёс гожъя. Пичиысен кутскыса, котькуд нунал пианиноен куать-тямыс час шудэ. Жаде ке, суредаське, кылбур гожъя. Ася крезьгуръя ӵошатсконъёсы, фестивальёсы туж трос пыриськылӥз ни: Франциын но, Великобританиын но, Австриын но, Грециын но… Ой, ваньзэ вераса быдтод шат? Котькытын сое вылӥ дунъяло. Али Москваын улэ, крезьгуръя консерваторилэсь кыкетӥ курссэ быдтэ. Экзаменъёс бере, пе, ӝамдэлы татчы вуыло, нош мумиз-айиз доры Дамаске концертэн январе ветлӥз.

- Удмурт кырӟанъёсын уг тунсыкъяськы-а?

- Туж потэ тодэмез, монэ одӥг гужемлы ке но гуртэ нуэ вал, шуэ. Уг пӧрмы, дырыз уг тырмы, котькуд нуналэз часэн, минутэн лыдъямын.

- Тӥляд асьтэлэн выжыяды но крезьгурез валасьёсты ӧй вал-а?

- Мынам арганэн шудэме туж потылӥз. Пичи дыръям курисько вал: басьтэ мыным арган. Пересь дядяе шуиз: «Уг, уг басьты, бубид арганэн шудэменыз кулӥз». Азьвыл ведь арганэн шудӥсьёсты олокыӵе но юондыръёсы ӧтчаллязы, секталлязы. Удмурт театре артистэ дышетскыны пырыкум, шуизы вал: тынад - «абсолютный слух». Со шӧдонэ эмчи ужам туж юрттэ. Соин, дыр, ӵош ужась эшъёсы шуо: кылзыса гинэ но, пе, пуш висёнъёсты ӟеч шӧдӥськод-валаськод.

- Туно-пелёослы, гороскопъёслы, хиромантилы оскиськоды-а?

- Одӥг но уг.

- Выльысь улыны кылдысал ке, кыӵе вакытэз бырйысалды?

- Аслэсьтымзэ ик. Мон – туж но туж аслам интыям. Зэмос профессионал луон понна, быдэс улонме дышетски, тыршыса ужай. Мон адямиослы кулэ, мынэсьтым дышетско. Улыны али капчи потэ. Тыршись муртлы нокыӵе пыд пуктэтъёс ӧвӧл ни. Но асьмеос эриклы дышемын ӧвӧл на, соин ик йыромыны но шедиськом. Ма со эрик? Ӝытазе выдӥськод но аслэсьтыд ачид юаськод: мар мон ӵуказе лэсьто? Ужысь вуиськод но юаськод: мар-о мон туннэ кари? Тон понна нокин уз малпаськы, уз но сюлмаськы. Азьвыл ваньзэ сое государство малпаз-лэсьтылӥз ук.

Жаляса верано луэ: улон нош ик огшоры калыклы пумит берытске. Тани милям куд-ог профессоръёсмы, секыт висисьлы консультация ортчытыны куро ке, нырысь ик юало, висись коньдон тырыны быгатоз-а? Адямиез эмъякум, мон ноку но коньдон сярысь ӧй малпаськылы. Соин ик сыӵе учыръёс мыным туж уг ярало. Созэ но верам потэ: даурысь дауре мӧйыосты егитъёс воштылӥзы. Нош мон али уг адӟиськы мӧйыосты но егитъёсты герӟась гердэз, со чигиськыса кошке кадь ини. Егитъёс эрикез туж шӧдо, нош номыр понна кыл кутыны уг валало, уг но туртто кадь.

- Егитъёслы но али секыт йӧтэ. Коньдонэн дышетсконо, уж утчаса курадӟоно.

- Ой, ой! Ма, со шуг-секыт шат, азьвыл улонэн ӵошатоно ке?! Сютэм уг уло, дӥсьлы ёрмыса уг ветло.

- Берло вакытэ эмъюмъёслы туж ик уг оско ни. Пӧртэм амалъёсын выро, сютэм улыса но эмъясько.

- Ваньмыз со – реклама. Нош сютэм улон мугорлы бадӟым изъян вае. Туж шер дыръя гинэ сютэм улыса эмъяськыны яра, но одно ик врач чаклам улсын. Нош начармемед потэ ке, ӝӧк сьӧрысь вазьгес султоно. Тани, шуисько эшъёсылы, учке ай мон шоры: егит дыръям кадь ик веськрес.

Туала эмъюмъёс сярысь ке, соос али туж ӟечесь. Но соосты уже тодыса кутоно. Ӟеч врач урод врачлэсь соин пӧртэм: со кыӵе висёнлы кыӵе эмъюм кулэез гинэ уг тоды, кулэтэмзэ но тодэ. Собере висисьлы туж кулэзэ гинэ, ӧжыт эмъюм яра, кудӥзтэк со йӧнаны нокызьы но уз быгаты.

- Висисьёсты эмъякуды, янгышъёсты вал-а?

- Кызьы, пе, уз луы ни? Но сое дыраз тупатыны тыршиськод. Врачъёслы пырак шуисько: мон табере бадӟым опытэн врач-профессор ини, тани таӵе учырын янгышаны шедьтӥ вал. Со эмъян удысын туж кулэ: янгышъёс вылын но дышетскон мынэ ук.

- Гомеопатилы оскиськоды-а?

- Изъянэз но, пайдаез но ӧвӧл. Психотерапия ук со.

- Вераськемды, выросъёсты шоры учкиськод но, тӥледлы нокызьы но 76 арес сётыны уг луы. Синмаськымон воргорон на тӥ.

- Студентъёслы шуисько: тодӥськоды-а – мынам ведь трагедия. Соос кушетско: «Мар сыӵе луиз?» Тани мыным, шуисько, сизьымдонлэсь ортчиз ни, нош мылкыды сыӵе егит на: тӥни кытын – конфликт… «Ха-ха-ха!» - серекто…

Егитъёсын ужасько ук! Шӧдӥсько: соослы мон кулэ. Собере, аслам удысэя дас пумо отделениосы вань. Отын 360 висисьёсы. Ижысь элькунысьтымы 1 номеро больницаын но монэ сюрс кык сю висись вите. Отын секыт висисьёсъя котькуд нунал сямен консилиумъёс ортчытъясько. Студентъёслы лекциос лыдӟисько на. Арняяз вить нунал сизьым часысен бер ӝытозь ужасько.

Егитъёс сое, оло, уз но валалэ, но мон быдӟа аресъем мурт коньдон понна гинэ уг ужа. Со адямиослы пайда сётэмзэ валаса тырше ке, солэсь но бадӟымез шуд ӧвӧл ни. Соин ик мон таӵе задор мылкыдо.

Бен, жаль: огнам кыли. Но мон уг сётскиськы. Ноку но тамак ӧй кыскы, мултэс вина ӧй юы. Котькуд нунал пыдын 7 – 8 иськем ветлыны тыршисько.

Источник:

Корепанов А. М. Кескич ляльчи но дано эмчи / А. М. Корепанов ; записала Галина Романова // Удмурт дунне. - 2005. - 8 июля. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"