Ымусьтон

Ми палан Ымусьтонлы одно ик мунчое пыро вылэм. 6-тӥ толшоре ӝытазе ик ӝӧк вылэ пуктылыса кельто, быдэс ар ванё-буро улоно мед луоз шуыса. Гуртысь калык черке мынэ бере, та нуналэ уг ужало. Вазь ӵукна ик султыса, табань пыжо, нош нырысь табанез кукеен каро вылэм. Коркась воргорон со табанез вӧсяськон тусьтые понэ, собере, юрт котырысь вӧсяськон куалае пырыса, вӧсяське. Вӧсям табанез со нырысь ик ачиз веръя, собере семьяез.

Табанез уг вандо вылэм, тӥялтыса гинэ веръяло. Корка пырем муртлы со вӧсям табанез уг сёто – ас семьяедлы гинэ сиёно. Вӧсяськон нунал шуыса, ог куинь колды ке но нянь пыжо вылэм.

Милям гуртамы черк вылымтэ. Но та нуналэ Юрмалай черко гуртысь но мукет гуртъёсысь ӵукна ик кырӟасьёс вуо вылэм. Верамзыя, со куанер улӥсьёс. Инмарез данъяса, коркась корка ветлылӥзы. Та адямиосты одно ик куно карылӥллям. Кырӟамзы понна кин пызь, уксё, нянь, пӧраськем сётылэм.

Нош со дыре семьяос пельнянь куто – кин маин быгатэ: сӥлен, кубистаен, картошкаен, варокен. Пельнянь пушкы газет юдэс но поно вылэм. Соя тодыны, пе, луоз, кыӵе улон возьма тонэ таяз арын. Пельнянь пушкысь озьы ик шедьтылӥзы чечы пуньы выллем вӧлдэм пу, озьыен, чечыен улод. Нянь яке пызь ке сюре, быдэс арез нянё улод, уксё шедьтӥд – уксёё луод, ыжгон – пудоед удалтоз. Нош эгыр – аламалы, тонэ таяз арын возьма бадӟым адӟон. Озьы огшоры тодметъёсъя но тодылыны тыршизы вуись арлэсь аспӧртэмлыксэ.

Пельнянь сиемзы бере быдэс семьяен уксё лыдӟыны кутско вал. Анай-атайёс выль вӧлдэм тӧдьы ӝӧккышет вылэ уксёзэс пазьгылӥзы. Семьяысь котькудӥз адями лыдӟе со кисьтэм уксёез. Собере ог-огзылэсь юало: «Кӧня уксё лыдӟид?» Кинлэн котькинлэсь трос луэ, солы одно ик кузьым сёто вылэм, пиналъёслы – ческыт пӧрам яке кампет.

Ӝытпал шулдыръяськон азьланьтӥське. Гуртамы улӥсьёс понна кутске тужгес но аспӧртэмлыко вакыт – пӧртмаськонъёс. Шубаез берыктыса, бамзэс шумен (суэн) зыраса, кие одно ик боды кутыса, адямиос чокмор дӥсясько но коркась корка ветло. Чокморез котькуд коркан ик возьмаллязы, соосты куно карид ке, ыжпи трос вордӥськоз, шуо, пудо таза но азинлыко луоз.

Чокморъёслы шуыса, анай-атайёс лавкаысь (магазинысь) трос кампет басьто вал. Пичи пиналъёс ке пыро, одно ик кампет яке преник, печення пуйыазы поно. Мӧйы адямиос сьӧразы юон басьто, вина бичало. Корка пырыса, чокморъёс уг верасько, киосынызы гинэ возьматъяло. Корка кузёос пырем чокморез одно ик тодманы тыршизы. Соосыз тодмамзы бере но уг верасько, экто, бодыенызы дыбырто. Кошкыкузы тау каремзэс киынызы но мугорынызы вераса пото.

Котькуд ар гуртын кин ке но выль корка пуктэ. Коркатуе вань калыкез уг ӧтё бере, мылкыд карисьёс чокмор дӥсяськыса пыраны тыршылӥзы.

Пӧртмаськонъёсын ӵош кутско тунатӥськонъёс. Тунатӥськылӥзы уйшор бере. Оген кышкыт шуыса, ньыль-вить кузя люкаськылӥзы.

Азьло аръёсы сямен ик, али но сюрес воже вал букоос пӧлысь одӥгез тунатӥськисьёсты одӥген-одӥген бергатэ, синзэс кышетэн керттыса, соосыз буко пыр потто, кин буко пыр потэ, со таяз арын бызёз яке кышнояськоз, шуо.

Кудпала бызёд яке кытысь кышно басьтод, тодозы вал, гын сапегез гидкуазьысь капка йылтӥ сэрпалтыса. Сапеглэн нырыз кудпала возьматэ, со палась ик луоз кузпалыд.

Картлэсь яке вуоно кышнолэсь кыӵе луонзэ но тодыны луэ вылэм. Уйшор бере вань тунатӥськисьёс пыро лапас улэ, кынем синмын артана пис быръё. Корка пырыса учко ини, кинлэн кыӵеез шедем. Пислэн улъёсыз ӧвӧл ке, туж умой но чебер муртлы бызёд яке вуоно картэд чебер, веськрес луоз.

Кузпал луонлэсь арлыдзэ тодон понна, гидэ пырыса, ыжез кырмыны кулэ. Пинал яке мӧйы ыж сюроз, соя ик тодод ни.

Вуоно кузпаллэсь йырсизэ но тодыны тыршылӥзы. Уйшор бере ыж гидэ потоно, кынем синмын ыжлэсь гонзэ ишкалтоно. Яке, ымын кушаса, нянь пушкесэз колӟо кароно, собере ӧс вылэ пононо. Ӵукна учко ини: кыӵе буёло йырси кутске бордаз.

Та вакытъёсы ик кылзӥськылӥзы, кинлэн ке но корка дораз лушкемен пуксьыса. Мар тонэ возьма таяз арын – со верамъёсъя эскеро вал ини. .