Виль

Арлэсь котькыӵе вакытсэ басьтыса, асьмеос ум суралэ одӥг сэбедэз мукетыныз: малы ке шуоно ваньмыз соос юн герӟаськемын калыкмылэн вашкала культураеныз, солэн йылолъёсыныз. Тани Гужем Юон шуим ке, соку ик син шоры йӧтэ вӧсьнерге ветлон, пудо вандон, вылӥсь Инмарлы вӧсяськонъёс, турнаны потон, веньык (веник) бичан. Собере вуэ Виль. Ми палан Вилез герӟало кизем ю няньлэн вуэменыз. Вашкала дыре куазь али кадь уг йӧспӧртэмъяськы вылэм. Гужем пӧсь луэмен, ю тысь но, бакча сиён но вазь вуылӥзы.

Табань сиён

Виль нуналэ ӵукна ик табань пыжо, но со огшоры нянь ӧвӧл – туала арлэн пызеныз пӧрам нянь. Вашкала дыръя, Вильлы шуыса, одно ик арало вылэм нимаз дасям участоксэс. Сое сюрлоен арало, собере кутсало, тӧло, гур вылэ вӧлдыса яке шунды шорын куасьто. Собере, вукое мыныса, выль пызь изо. Со выль пызен ик нянь кото.

Удмуртлы номыр но инмысь уг усьы. Ваньзэ сое ас киыныд, йырыныд, мылкыдыныд бергатоно. Сюлэм пыр поттэм маке гинэ ческыт но аспӧртэмлыко луэ. Мон алигес гинэ сое валай. Дорамы телевидениысь ужасьёс вуизы. Ӝӧк вылэ пуктэм няньмылы городын улӥсьёс туж паймиллям. Ма, кызьы пыжем нянь та, туж ческыт ук, шуо. Кышное валэктӥз, ма, мон сое ас киыным ныркисько ук, аслэсьтым вань мылкыдме, сюлэмме поныса ныркисько, соин ик со ческыт луэ. Озьытэк малы пӧралод?

Нянь али но котькуд сэбедын Кузё, нош Вильлы нырысь пыжо табань. Кыӵе ческыт зын вӧлме быдэс гуртэ! Мынам аслам но вань нырме кыскаса сылэме. О, кин ке но табань пыже.

Ми палан табанез зыретэн пӧрало. Собере кема сием уг поты ни: быдэс нунал мылкыд каньыл луэ, вань малпам ужъёс но капчиен лэсьтӥсько.

Вильлы шуыса, одно ик дасяло така, сӥльын шыд пӧзьто. Тӥни озьы: ӵукна ик зыретэн табань сиыса, воргорон валзэ кытке но, нылпиоссэ уробое пуктыса, вамыштэ вылэм кизем – гырем бусыяз.

Мукылчинлы – кукей, милемлы – бакча сиён

Воргорон сьӧраз басьтэ на куинь кукей. Со кукейёсты гуало ю нянь мерттэм музъеме: Мукылчинлы салам сёто. Собере нылпиосыныз ӵош бичало туала арлэсь емышъёссэ. Ма гинэ ӧз будэтэ туала арын аслаз музъем вылаз котькудӥз семья, сое нюжаен-нюжаен окто но киязы люкало. Кылсярысь, басьтозы куинь ӟег йыр, куинь чабей йыр, сезьы, йыды, вазь но мукет, нош кӧжы бичаны косо вылэм пичи пиналъёсты. Соос трос гинэ вуэм кӧжыез доразы ваё вылэм. Со кӧжылэсь кӧжыен тоторо пӧрало.

Доразы бертыса, бусыысь ваемъёсты куала пушкы борддоре ошыло.

Вильлы шуыса ми палан бадӟым вӧсяськон уг ортчыто. Котькудӥз воргорон потоз вылэм юрт котырысь куалае но Вильлы пӧрам табанез вӧсяса пыртэ. Со табанез семьяын гинэ сиёно, мукет муртлы уг сёто. Ӝытазе кутске Ваче юон.

Ваче юон

Ваче юон – со ог-огдэ куно карон. Вить-куать корка огазе кариськыса, ас доразы куно ӧтё вылэм. Али гинэ йылпумъяськиз турын дасян уж. Гуртын улӥсь понна со тужгес но секыт вакыт: толзэ пудоез поттон понна тырмыт сиён дасяны кулэ. Виль дырозь сое дасяны тыршо.

Вашкала дырысен Сальялан турнан ужъёсын гуртысь староста кивалтэ вылэм. Солэн гинэ луэ кенер пусъёсын бодыез, со ик турнан участокъёсты пуктылэм. Кин кытын турналоз. Кинэн артэ тупа возьзы, со адямиосын ик ваче юон ортчыто.

Ваче юонлы одно ик дасяськыны кулэ. Со понна чебер пукто вылэм ӝӧк вылэз. Отын одно ик луыны кулэ Вильлы пӧраськемъёс: нянь, табань, выль картошкаен перепеч, выль сӥлен шыд лым, борынянь, виртырем, губинянь но трос мукет. Котькуд коркан та нуналлы луыны быгатэ аслаз аспӧртэмлыкез. Кин выре мушен, соос одно ик чечы тубо (кыско), озьыен, соослэн ӝӧк вылазы пуктозы чечы, чай секталозы. Нош кыӵе юондыр ортче кырӟантэк?

Ӝӧк сьӧрын пукисьёс Вильлы дасям пӧрамъёсты веръямзы бере кырӟаны кутско ини.

Ӟеч муртъёслэн но, ой, ӝӧк сьӧръёсаз

Пуксьылэм но, ой, бере.

Ӟеч кылъёсмес вералляса

Пукылыны кулэ, дыр.

Асьтэс ке но кызьы ик ук,

Ми но озьы, туганэ.

Кызьы гинэ секталляны

Али ке но эсэпез.

Ой, однако, вылылэм ук

Секталляны эсэпез.

Кутылэм но чаркаоссэ

Быдтылыса со юиз.

Тани милям, тани милям

Куно сектан винамы.

Тани милям, тани милям

Чын яратон туганъёсмы.

Гуль ке шуисько, гуль ӧвӧл но,

Мак ке шуисько, мак ӧвӧл.

Ӵуж бубыли луылыса

Пуксьысал сюлэмады.

Ум мӧзмиське мак сяськалэсь,

Ум мӧзмиське гуль сяськалэсь.

Ми мӧзмиськом, ми мӧзмиськом,

Тӥ яратон туганлэсь.

Зарни качы азвесь вандэ,

Азвесь качы гуль вандэ.

Тӥ, туганъёс, лыктон дыръя

Тямыстон гуле усьтӥськиз.

Инмын гудыри гудыртыку,

Вал йырам сермет жыльтыртӥз.

Тӥ, туганъёс, лыктон дыръя

Сизьым черыке жингыртӥз.

Милям вина тырос али,

Сизьым валэн уямон.

Сизьым валэн уямон но,

Ӟольгыри пыд ышымон.

Кытын кырӟан – отын эктон.

Вашкала дырысен ми палан экто одӥген, кыкен, ваче, куинен, куатен, тямысэн, ваче потаса, палагеен, сяська бичаса но мукет. Зэмзэ но, ас вакытаз кулэ таӵе аспӧртэмлыко сэбед. Одӥгез уж йылпумъяськиз, нош гуртын улӥсез возьма ини мукетыз – араны потон. Ваче юон ортчытэм бере котькуд коркан дасясько вылэм араны потонэ. Вашкала дыръя быдэс бусыез сюрлоен араллязы. Туала арын бусыез шулдырто комбайнъёс. Куазь умой луиз ке, вакчи дыр куспын бушалозы соос. Таяз учыре нырез бичатэ мукет зын, озьы выль вуэм нянь кузёяськыны кутске. Асьмеды быдэс ар куно кароз тыро шыкысысьтыз. Озьы мед луоз .