Вашкала книга сярысь пересьеслэн мадемзы

Вашкала дыръя удмуртъёс огазьын улӥллям. Инмарлы но куриськыны, кенеш но возьыны пиналэз пересезлэсь дышетскем, соин ик вань адямиос нодлыко вылӥллям. Map гинэ эн, пе, юа, ваньзэ, пе, сэрттозы-пертчозы, ваньзэ валэктозы вылэм. Нош калык трос луэмъя вӧлдӥськиллям удмуртъёс котыр шаеръёстӥ. Вӧсяськыны-куриськыны но кенеш возьыны гинэ огазе люкаськозы вылэм. Дыр ортчемъя, выжыос огзылэсь огзы эшшо но кыдеке палэнскиллям. Пересьёссы огазе вуыкузы, пе, вань кулэзэ лад-лад валэктыны но быгатӥллямтэ ни.

Одӥг пол, кенеше люкаськыса, тазьы тупатӥллям: вӧсяськон но кенеш ортчытон радзэс, вунэтонтэм вылысь, книгае гожтыны. Туй кесяллям, вандылӥллям, солэн бамаз вань тодазы возён радлыксэс пусъёсын гожтӥллям. Понӥллям со книгазэс бадӟым тӧдьы из вылэ. Бадӟым иззы вӧсяськон интыязы вылэм, котырысь гуртъёслэн шор вадесазы ик. Кыӵе ке пересь вӧсяськон радлыксэ вунэтэ ке, пе, татчы лыктэ но, книгаез лыдӟыса, ваньзэ тодаз вае.

Но та книгаез гожтэмзы бере, адямиос вӧсьёсы шергес но шергес люкаськыны ӧдъяллям. Инмарлы сӥзьыса, пудозэс но шергес вандылыны кутскиллям. Азьло пересьёс, вӧсяськон радлыкез вунэтонтэм вылысь, удмуртъёсты вӧсе ӵемгес люкалозы вылэм. Нош табере, пе, солэсь но кышкась ӧвӧл ни. Инмарлэн соку вожез потэм но удмуртъёслэн книгазы доры бадӟым скалэз ыстэм. Книгаез возьмаса пукись пересь изьыку, со тӧдьы скал книгазэс из вылысь нюлыштэм. Нош Инмар, удмуртъёс выльысь сыӵе книга медаз гожтэ шуыса, пусъёсты тодон йырвизьзэс сурам.

Со дырысен котькуд удмурт одӥг пуслэсь мар возьматэмзэ гинэ тодэ на, пе. Соин ик аслэсьтыз арбериоссэ со пусэн гожтыса тодмостэ.