Художественная литература. Издания 2021-2022 года

Ермолина, А. В. Суредай мон тонэ уйвӧтам : кылбуръёс / Антонида Ермолина ; [вступительная статья Т. Черновой]. – Ижевск : Удмуртия, 2022. – 94 с. – Текст на удмуртском языке. – Текст : непосредственный.

Антонида Ермолиналэн «Удмуртия» издательствоын потэм «Суредай мон тонэ уйвӧтам» (12+) кылбур книгаез авторлэн нырысетӥез луэ. Со (тодмо журналист, та дыре «Ӟечбур!» газетлэн кивалтӥсез), кылбуръёсыз газет-журналъёсын потылӥзы ке но, ӝыны дауръем арлыдзэ ортчыса гинэ, нырысетӥ книгазэ лыдӟисьёс доры вуттӥз. Кызьы вера тодмо кылбурчи Татьяна Чернова книгалэн шуныт гожтэм азькылаз, «кин ке аслэсьтыз гожтэмзэ ӝоггес калык син азе поттыны дыртэ, мукетыз чаклаське, мае ке возьма кадь, ассэ дан поттымон кылбурчиен уг лыдъя, дыр». Та веранысь кыкетӥосыз пӧлы пыре Антонида Ермолина. Солэн кылбуръёсыз, нырысь ик учкыса, пичиесь гинэ вылтусо кадь. Но соос пушкын – кӧня ке кылверанъёсын, буёл пырыосын гинэ – туж мур пуштросо малпанъёс ватскемын. Автор, кылсярысь, инкуазьлэн пӧртэм вакытъёсысьтыз сям-тодметъёс пыр адямилэсь малпанъёссэ, мылкыдъёссэ, шӧдонъёссэ суреда но, туж тунсыко кылсуредъёс пӧрмо: чилектэм кадь ортчись пичи дыр но гудыри кадь тодэ ваён; лулсэръёсын шудӥсь крезьгур но ву тулкымъёс вылтӥ тэтчась мылкыд; сизьым кускерттонзэ пертчылӥсь тӧл но малпан бугорез сэрттӥсь тылсиос... Трос вераны луысал Антонида Ермолиналэн быгатыса лэсьтэм кыл чильпетъёсыз пумысен. Но, сю пол кылзытозь, одиг пол кутод кияд тунсыко книгаез но сюлмыд лычсузьыса уялод кылсуредъёслэн чебер но паймымон дуннеязы.

Ганькова, Л. Л. Мар сярысь бӧтьыртэ Палды шур : веросъёс, тодэ ваёнъёс, кылбуръёс, визькылъёс / Любовь Ганькова. – Ижевск : Удмуртия, 2022. – 287 с. : ил. – Текст на удмуртском языке. – Текст : непосредственный.

Нош ик выль книгаеныз шумпоттӥз Алнашысь гожъяськись Любовь Ганькова. Таяз учыре яратоно лыдӟисьёсызлы со дэмла «Мар сярысь бӧтьыртэ Палды шур» (12+) ужзэ. Отчы пыризы веросъёс, тодэваёнъёс, кылбуръёс, визькылъёс. Гурт калыкезлэсь улэм-вылэмзэ умой тодыса-шӧдыса гожтэм тодэваёнъёсыз сярысь автор тазьы гожтэ: «Со огъёз эшъёсылэн улон сюресъёссы, пичи но быдэ вуон дырзы. Ог-огмылэсь ми трослы ӧм висъяськылэ, вакыт сыӵе вал…» Тодэмды потэ-а, зэмзэ но, ма сярысь бӧтьыртэ Палды шур? Кытӥ бызе Палды? Малы шурез озьы нималлям? Со понна одно ик басьтоно но лыдӟоно Любовь Леонидовналэсь али гинэ потэм книгазэ.

Михайлов, В. П. Вошъяське улон суред : нылпиослы кылбуръёс, поэмаос / Владимир Михайлов. – Ижевск : Удмуртия, 2022. – 94 с. : ил. – Текст на удмуртском языке. – Текст : непосредственный.

«Вошъяське улон суред», – шуэ «Удмуртия» издательствоын поттэм книгаяз тодмо гожъяськись но радиожурналист Владимир Михайлов. Нылпиослы сӥзем кылбуръёсаз но поэмаосаз адӟиське: вошъяськеменыз ик аспӧртэм но яркыт буёло асьмелэн улонмы. Тани одӥгез пинал вера, кыӵе чебер солэн вордскем гуртэз, собере ассэ шуак уретэ но шуэ: ма, кызьы сое кылъёсын вералод, лыктэ гуртамы но – ваньзэ ас синмыныды адњоды. Нош Кима нимо пияш Ярысь Ижкаре мынӥсь поездын пуке но укное учке; укно сьӧрын, киноплёнкаысь кадръёс выллем, суредъёс вошъясько но вошъясько: возь вылын скалъёс сисько, кыз улын ыжъёс кыллё, нош калык турын дася... Тани одӥгез героймы, Ижкаре вуыса, дас куатетӥ этаже – ӵыжы-выжыосыз доры куное – тубем ини; татысен адӟиське, кызьы бӧчыослы укшась автомобильёс ог-огзы бӧрсьы ширто, соослэн азязы кускерттон выллем кылле асфальт сюрес, нош кузьылиослы тупась адямиос мукет интытӥ, тротуаръёс вылтӥ, нюж гинэ мыно – ой, кыӵе уно соос! Владимир Михайловлэн книгаяз суредъёс, зэмзэ но, пӧртэм-пӧртэм буёло, геройёс пӧртэм-пӧртэм сямо но пӧртэм-пӧртэм югдуръёсы шедьыло соос. Ӵапак улон суредмылэн тунсыко вошъяськыса питырамез выллем. Питыраса – азьланьскемез. Нош азьланьскон – со тодон-валан люкан, визьбурез юнматон но быдэ вуон.

Кузнецова, А. А. Тон мыным улонлэсь но дуно : быръем кылбуръёс / Алла Кузнецова ; [редактор-составитель С. В. Матвеев]. – Ижевск : Удмуртия, 2022. – 127 с. : ил., портр. – Текст на удмуртском языке. – Текст : непосредственный.

Алигес «Удмуртия» издательствоын куинь удмурт писательёслэн выль книгаоссы потӥзы. Одӥгезлэн нимыз «Тон мыным улонлэсь но дуно» (12+). Таӵе кылъёсын аслаз кылбуръёсаз сюлэмзэ усьтэ тодмо нылкышно кылбурчи Алла Кузнецова. Одӥг ласянь учкыса, вылӥ верам кылъёс яратоно муртлы вазиськонлы тупало кадь. Литератураез гажась, тодӥсь-валась адямиос тодо, кыӵе шара но дӥсьтӥсь вал Алла Алексеевна: гожъяськон удысаз но, улонын вамышъяназ но. Со усьтылӥз, мар сюлэмаз тымиськемын, мар йыраз берга – мылкыдъёсыз но малпанъёсыз шарак кисьтӥськылӥзы бумага вылэ но собере калык пӧлы вӧлскылӥзы, сюлэмъёсы пыӵаллязы. Кышномурт но воргорон кусыпъёс пумысен шара кенешемез, яратоно пиосмуртлы усьтӥськемез сяна, Алла Кузнецова «тон мыным улонлэсь но дуно» шуыса вазиськылӥз яратоно шаерезлы. Вуоно кылбурчи удмурт поэзие секыт война аръёс сярысь гожъямъёсыныз вамыштӥз. «Май тӧллэн кадь ненег анай киослэсь» мӧзмон, «кампет шӧмез тодылытэк», «сисьмем картофкалэсь табань», «беризь куарлэсь пӧраськем» сиыса будон, «сьӧд эгырен гожъяськыны дышетскон» но мукет та выллем веран-мадёнъёс лыдӟисьёслэсь сюлэмъёссэс позыртылӥзы. Тазьы вераз вал куке Алла Кузнецовалэн эшез но вылӥ быгатонлыко кылбурчи Людмила Кутянова: «Кылбурчиосты трос книга поттэмзы данэ уг вутты, вунонтэм луо соослэн сюлэм ӟырдытъёссэс, вырӟетъёссэс, лул пиштылонъёссэс аспӧртэмлыко кылрадлыке пыртыса вераны быгатэмзы. Алла Кузнецовалы сыӵе быгатонлык Инмарен сётэмын». Туж шонер но интыяз верамын.