Лаврентьев Александр Иванович

Серекъян буйгатэ но, бӧрдытэ но

Лаврентьев А.И.

Удмурт кун университетлэн огез данъяськымон адямиез — со Кизнер ёросысь Короленко (Вуж Мултан) гуртын будэм удмурт тодосчи, английской филологияя но зарубежной литературая кафедраысь доцент, филология наукаосъя кандидат Александр Иванович Лаврентьев.

Дуннеысь ваньзэ сямен литератураез лыдӟем муртлэн котыр ласянь визьмо, оломае но тодӥсь луэмезлы, англи кылын шатыр поттыса вераськемезлы паймисьёс лачак. Студентъёс солэн лекциосаз вожмаськыса вуо. Со тодон-валанзэ возьматъя калыккуспо конференциосын но. Алигес докладэн вераськиз Эстониын юморез эскеронлы сӥзем калыккуспо конференциын.

— Александр Иванович, тӥ пичи дырысеныды ик визьмо луэменыды паймытъяськоды вал, дыр?

— Семьяысьтымы 3 пиналъёс пӧлысь огмы понна но анай-атаймылэн ноку возьдаськемзы ӧвӧл — ваньмы школаез медален йылпумъямы, ваньмы асьме удысъёсамы кыӵе ке вормонъёс басьтӥмы. Агае, Ижысь гурт удысъя институтэз йылпумъяса, военной кариськиз, контрактъя службае кошкиз. Али запасын. Апае, Ижысь мединститутэз йылпумъяса, Кизнер ёрос больницае врач луыса берытскиз.

Кин ке, оло, шуоз: дышетӥсьёслэн семьяязы будыса, мукет сямен луыны уг быгаты. Анае Лидия Ивановна Вуж Мултан школаын англи кыллы но биологилы дышетӥз. Иван Петрович атайме, распределениен Тюмене келяно муртэ, вожмаськыса ик совхозэ кутӥзы ке но, со но дырзэ школалы шедьтылӥз, урокъёс нуылӥз. Анаелэн предметъёсызъя «вить» отметка басьтыны туж секыт вал — тодон-валанэз 3 полэс но эскерылӥз.

Ляб дышетскыны асьмелы но возьыт вал: анай-атайлы дышетӥсьёс но дышетскисьёс азьын возьыт медаз йӧтылы кадь потылӥз. Дорын маке быдӟа библиотекамы вал — ми отысь ӧм ик поталлялэ. Визьмо луон культ выллем вал.

Соин ик мон понна зэмос шутэтскон — со Короленко нимо музеямы лыктэм куноос, дышетскисьёс понна экскурсиос радъян вал. Ми будон вакытэ угось отличникъёсты общественной уже кыскылӥзы. Огез сыӵе уж ӵапак экскурсиос ортчытъянэн герӟаськылӥз. 1896-тӥ арын Мултан ужъя янгыше уськытон тема монэ бордаз пичиысен кыскылӥз. Родняос ӵемысь шуылӥзы: янгыше уськытыса, удмуртъёслэсь ӟеч музъемъёссэс таланы туртто вал озьы, ӧз пӧрмытэ. Туннэ со историез сокем вӧсь луыса уг мадьыло ни — вакыт бурмытэ.

Туристъёсты кыскон вылысь ошмесмы но данэ потӥз: котыраз вераськиськод ке, со уката зол бугыръяськыны кутске, тонэн вераське, шуо. Ми будон вакытэ со ошмес сярысь номыр ӧз поттылэ. Али но гурт калык сое абдрамон учыръёс но вӧсяськон интыос пӧлы уг пырты. Зэм, интыосыз чебересь ик. Соин ик ас вакытаз, экскурсиос радъякум, тросгес саклык висъялляй Мултан ужлы, ӵыжы-выжыосылэн улон сюрессы сярысь вераськылӥ. Аслым ачим кыӵе ке ролез шудӥсь кадь потылӥ.

— Актёр луон малпанды кенжиз, луоз?

— Со мылкыд пумен пуксиз. Асме котькуд удысын эскереме потылӥз. Гуртын со вакытэ арбуз, дыня кадьёсты уг ик мерттыло на вал. Теплицаямы анай-атайме сэрег висъяны кури. Вазь ӵукнаысен бер ӝытозь со теплицаын, арбуз но дыня будэтыны турттыса, бергалляй. Нырысь-валысь нокин ӧз оскылы, маке пишмоз шуыса. Но теплицаысь уллясь но ӧй вал: йӧнтэмъяськытозь мед йӧндыроз шуизы, вылды. Емышез быгыльскиз, эшшо ке ческыт пӧрмиз. Сое гуртоос но учкылыны вуылӥзы.

Вуоно араз экспериментме азинтӥ — таяз радэ аслам бакчаям гинэ ӧй кузёяськы ни — адямиос но доразы ӧтчаллязы. Ческыт емыш ваньзэсты гочатӥз. Соин но, школаез йылпумъян вакытэ вуыкум, бадӟым мылкыды вал биологе мыныны. Та удысъя книгаос но трос лыдӟылӥ. Но будэмъям семьяямы ӵемгес вераськыны кутскизы тодосчиос сярысь.

Мынам ӵужмуртэ, Николай Плотников, Москваысь техникая Н. Бауман нимо кун университетын дышетскыса, выриз ракетаослы двигательёс лэсьтон бордын, огдыре кӧня ке институтъёсын ужалляз. Семьямы понна со туж данъяськымон вал. Нылпиослы солэсь туспуктэмзэ ялан возьматъяллязы. Зэм, 1970-тӥ арын Москваын авариын быриз.

Анай-атае ялан шуозы вал: тыныд Плотников ӵужмуртэд кадь луоно. Ачим но тодосчиослы, выльзэ усьтӥсьёслы, асьсэ малпанъёсынызы дуннеез воштӥсьёслы золгес но золгес синмаськыны кутски. Соин но, лэся, наукаен но фантастикаен герӟаськем произведениосты яратылӥ.

Совето вакытэ эмъян, маке поттон-кылдытон удысын выльзэ малпан но улонэ пыӵатон калыклэн син шораз вал. Но мыным валэктӥсь сюриз: тон коть скульптор, коть физик, коть химик лу, но валтӥсез — малпан, сое калык дорозь вуттыны быгатон. Угось котькыӵе удысын тыршы, но визьдэ бергатытэк, наукае уд сюры. Тодосчи луэмед потэ ке, бырйы со удысэз, кудӥз тыныд матын. Будэтӥзы: наукае тужгес вакчи сюрес, пе, литература пыр. 1990-тӥ аръёсы со озьы ик вал. Соку ганяк шокчи.

Мон угось 5-тӥ классысен англи кылын шатыр поттыса бадӟымесь произведениосты лыдӟисько ни вал. Анае та предметэн дышетӥсь вал бере, валантэм кылъёсын печатлам книгаос котыре пичиысен кыстӥськыны кутски. Кие кутӥськод но номырзэ уд валаськы. Бератаз ни агай-апае киям кыллюкам сётӥзы. Эшъёсы, нырысь-валысь оскытэк, монэ серем но карылӥзы. Нош асьсэос ӟучсэ но кылэз куддыр умой ӧз тодылэ. Нош милям семьяямы удмурт сямен вераськылӥзы, нылпи садын но школаын ӟуч кылын гинэ лабыртылӥзы. Кыкеныз но огкадь вольыт мед вераськозы, шуылӥзы.

Озьы Удмурт кун университетысь романо-германской филологияя факультетэ капчиен пыри. Кыкетӥ курсысен ик наука котыре кыстӥськон сярысь рос-прос малпаськыны ӧдъяй. Озьы ачим ватсаса тодон-валан отысь но татысь бичалляй, пӧртэм конференциосы пыриськылӥ. Со сюрес вылысь ӧй кожы ни. Филология наукаосъя доктор Ирина Морозова адӟыны быгатӥз литератураез гажан мылкыдме. Дипломе но гожтэмын ӧй вал на, со аспирантурае кыльыны ӵектӥз. Шумпотонэлэн пумыз ӧй вал. Соин ик дипломе киям вуэме бере ӝегатскытэк басьтӥськи литература ӧрын маке выльзэ усьтон борды. Зэм, нырысь-валысь со американской литератураен герӟаськем ужъёс, публикациос, произведениосты котыр ласянь эскеронъёс вал. Англи кылэз тодэме со ӧре кыскиз.

Тодэме потӥз: литератураысь серекъян-маскаръяськон кызьы герӟаське зэмос улонэн, кыӵе выжыысь калыклы со сям матынгес? Огшоры улонысь юморез литератураысь шоккетонэн ӵошатыны кутскизы угось 1970-тӥ аръёсы гинэ. Ачим но серекъяны яратӥсько бере, серекъянлэсь пуштроссэ усьтоно кариськи.

Тодэ лыктӥз тодосчиослэн веранзы но: удмуртъёс, пе, серекъяны тросгес ярато, бӧрдыны сярысь. Но зэмос улонын ваньзы серекъянэз-маскаръяськонэз уг валало бере, куд-огзэ со вӧсь но каре бере, оло, шоккетӥсь адямилэн малпаськон манерез мукетгес? Оло, серекъянъёссы пыр адямиослэсь психологизэс но валаны, выжы калыкъёс сярысь мургес тодон-валан басьтыны луэ?

— Куд-ог адямиос юморез чик уг валало ук…

— Серекъяны быгатон понна логикаед зол луыны кулэ. Угось серекъяны-маскаръяськыны, кыӵе ке шуг-секыт шоры серемпыр учкыны визьмо но улонэз юн шӧдӥсь, сюлэмзы пыр поттӥсь адямиос гинэ быгато. Со мылкыдлэн но визьлэн огазеяськонзы луэ. Произведениосын но, улонын но адямиос серекъяло сое гинэ, мар соосты тужгес зол сюлмаськытэ, вӧсь каре я паймытэ.

Валан кылдэ: серекъян пыр дунне шоры учкон потэмын шуг-секытъёсын трос пумиськем калыкъёс пӧлын гинэ. Юмор кылдэ отын, кытын кулэ кыӵе ке секыт юанъёсысь потыны. Зол серекъяны быгато со улосъёсын, кытын трос выжы калыкъёс уло но кытын соос золгес сураськемын, кытын ог-огенызы ваче вуонъёс но, дэмен вормонъёс но кылдыло. Кылсярысь, удмуртъёс, ӟучъёс, поръёс, бигеръёс куспын ялан улыса, шуг-секытъёсты серектон вылэ выжтыны ӧй быгатысалзы ке, мар луысалыз? Серекъяны быгатэмзы кусыпъёсты юнматӥз. Озьыен, серекъян — керетонысь потыны огез амал.

Зэм, удмуртъёслэн серекъянзы ӧч карон выллем. Кельт выжыысь калыкъёслэн серекъямзы сыӵе ик. Ляб палъёссэ, урод улонзэ сереме уськытыны котькудӥз уз быгаты. Белорус тани ассэ ялан улӥ карыса кадь серекъя. Но адями серекъятэк улыны уг быгаты — со вире пыӵа. Но со серекъямез ик солы отӥяз улыны люкетэ. Серекъян пыр угось ялан ассэ пиртэшен шӧдыны кутске, депрессие усе. Соин ик, огласянь, адями серем пыр ассэ шуг-секытъёслэсь, муртъёсын керетонлэсь уте кадь, мукет ласянь, аслаз вӧсяз выйыны кутске.

Адямилэсь лул-пуш дуннезэ серекъян пыр усьтӥсьёс рос-прос ӧй вал на. Со сярысь кылем арня вискын юморлы сӥзем калыккуспо конференциын верай. Ортчиз со Эстониын. Озьыен, али психологиын выль амалъёс кылдозы. Шаерамы соосты радъясьёс пӧлын мон но луо. Методика дась ни. Со вылын ик доктор ужме но азинтыны малпасько. Огез жаль: дыр уггес тырмылы.

Тросгес саклык кошке студентъёслы. Но соостэк но уг луы. Тодосчи уг дышеты ке, малпанъёссэ студентъёс дорозь уг вутты, уг вераськы ке, со зэмос тодосчи ӧвӧл. Калыклы малпанъёстэ валамон вераны ӧд быгаты ке, студентъёслэсь синъёссэс ӝуатыны ӧд пӧрмыты ке, наукая ужъёсыд но нокинэ уз паймытэ. Мон шудо, сьӧрам адямиос кыстӥсько шуыса.

— Психологие пумен выжыны уд-а малпаське?

— Удмурт кун университетын уже туж кельше. Сое воштыны уг малпаськы. Психолог луон — со бадӟым кыл кутон. Психолог валэктэ, кызьы улыны кулэ. Нош кытысь со тодэ, кызьы шонер улоно, нош кызьы янгыш? Пӧртэм югдурын пӧртэм валэктон но сюрес кылдэ ук. Соин ик психологъёслэн ужзы мыным быдэсак кельше шуыны нокызьы но уг луы. Зэм, улонын мон куддыр, ачим но валатэк, адямиослы визь-кенешен юрттӥсь луисько. Ӵемысь — командировкаосын дыръям.

Пӧртэм адямиосын тодматскыса, студентъёс пӧлын улыса, шӧдӥ: мыным сюлэмзэс усьтыны ярато. Адямилы угось туж ӵем кулэ сое кылӥсь но кылзӥсь. Мон ачим, лекциосын трос вераськыса, вылды, кылзӥськыны, котыр ласянь чакласькыныгес яратӥсько. Соин но, дыр, адямиос мыным лул-пушсэс усьтыны кутско. Керетӥсьёсты но мон ик ӵемысь люкисько.

— Студентъёс ӵемысь паймо: лекциосын ӵошатыса, турмаршрутъёсын но походъёсын мынямды ик воштӥське.

— Озьы ик луыны кулэ. Дышетон — со актёрлэн ужезлы матын. Котькуд занятилэн аслаз радлыкез, сценариез. Отын котькудӥзлэн аслаз ролез. Сценарий ик тонэн, дышетӥсен, но студентъёсын валтэ. Котькуд дышетӥсь озьы ужа. Нош походын тон эрике вуиськод кадь. Оло, инкуазь но гань-гань кариськыны косэ, асэныд ачид ваче син кылиськод кадь. Соин но, дыр, мон ӵемысь пуксисько велосипед вылэ но одӥг-кык нуналлы матысь эшъёсыным я воксё огнам потӥсько сюрес вылэ. Мугорме но кыдатӥсько, выль интыосын но тодматскисько. Зэм, велосипед куддыр тӥяськылэ. Мукет техникаез уг яратӥськы — ӝокасько, улонлэсь чебер палзэ адӟемысь дугдӥсько кадь.

— Дуннеез котыръякуды, адямиос, улон шоры учконъёсты но, велосипед сямен ик, тӥяськыло-а?

— Ӟучъёслэн умой веранзы вань: чтобы не разочаровываться, не надо очаровываться. Мынам сямы уродгес, лэся: пушкам пуке критик но скептик. Адямиосты нырысь адӟемам ик котыр ласянь дунъяны вырисько: кыӵе со, мае солэсь возьмано, адӟыны вырисько ляб но юн палъёссэ. Уж но сыӵе угось: дышетӥсьёслэн виразы пыӵамын, студентэз одно ик дышетоно, сое улонлы дасяно, со ачиз номыре уг тоды на шуыса. Таин сэрен но адямиослэсь но возьмаськод, лэся: соос сокем визьмоесь, дӥсьтӥсесь уз луэ. Зэм, берло дыре ӵемысь паймыто воксё мукет луэменызы.

Но студентъёс монэ лек кожало. Зэм, темаез тодэмзэс чурыт курисько. Улонын радлыкез луыны кулэ шуыса лыдъясько. Мон понна валтӥсез: адямиослэсь ӟечсэ возьмаськод ке, тон но соос понна ӟеч лу. Зэм, ӵемысь мыным адямиос тросгес ӟечсэ лэсьто, мон соослы сярысь. Но тыршисько та ласянь ас бордам ужаны. Пичи дырысеным сямы сыӵе: ялан умойгес луыны тыршисько.

— Весь умой луыса, жадёно ӧвӧл-а? Урод сямъёсты воксё но ӧвӧл шат?

— Урод сямы луысал ке, сое кемалась ас пушкысьтым поттысал ни. Нош жадемез кино, театр веськато.

— Яратонлы улонады инты вань-а? Яке зол сутскиды но табере сюлэмдэс усьтыны уд дӥсьтӥське ни?

— Синмаськылэмъёсы вань. Жаляса верано, улон возьматӥз: синмаськон шоры сазь синмын учкыны кулэ. Мон яратонлы уггес оскиськы. Тужгес но уг оскиськы нырысьсэ адӟиськем бере ик яратон кенжемлы. Зэм, тодмоосы пӧлын вань семьяен шудо улӥсьёс. Но яратон — со туж секыт уж: ог-огедлы юрттон, ог-огедлэсь мылкыдзэ ӝутыны тыршон, ог-огедлы кулэ луон. Ваньзы со возэз вормыны уг быгато. Собере, яратон нокызьы но книгаосын кадь чебер уг луы.

Мынам книгаын кадь ӧз пӧрмы, яке сьӧраз кыскись, ваньзэ вунэтытӥсь яратон дуннее ӧй усьылы на. Ачим но сюлэмме усьтыны уг быгатӥськы. Дышемын вань сюлмаськонъёсме пушкам возьыны. Мынэсьтым вожме поттыны гинэ но туж секыт ук. Оломалы сыӵе гань-гань вордскиськем. Зэм, азьтэмъёсты, алдаськисьёсты, кылзы вылын сылыны быгатӥсьтэмъёсты туж уг яратӥськы. Вожпотонэ бугыръяськыны кутскыса, сыӵеослы куддыр кылме но верасько. Но со туж шер луылэ. Оло, сюлэмме усьтыны быгатымтэеным но али мон огнам. Родняосы та понна ялан куарето…

— Магазин сюдэ, машина дӥсез миське. Воргоронъёслы нылкышно утялтэм, сюлмаськем, шунытлык арысь аре ичигес кулэ, дыр?

— Нылкышноослы туала вакытэ пиосъёс ӧжытгес кулэ. Гуртын гинэ ке шат — отын пиосмурттэк юртъер уд куты. Нош городын нылкышноос машина но нулло, квартира но басьто, выж вылазы паркет но асьсэос быръё. Пиосмуртэн кенешемысь дугдо, сое сиён пӧзьтӥсь радэ пукто.

Кышномуртлы воргорон кулэ, уксёлы ёрмыкуз, яке кыӵе ке секыт югдурын гинэ. Соку солы пельпум кулэ. Но та гинэ пиосмуртлы уг тырмы. Солы ялан шӧдоно яратэмзэс. Озьы нылкышноос воргоронъёсты асьсэос дорысьтызы палэнто, кышкато. Яратон шоры мон, 40 арескам вуыса, озьы учкисько.

Кин тодэ, оло, йырез поромытӥсь сюроз ай. Нош туннэ мон туж яратӥсько аслэсьтым ужме. Соин ик асме оген шуыса уг шӧдӥськы. Ваньмон дыръям туж яратӥсько пыриськыны визь сынанъя ӝытъёсы. Нырысь-валысь ветлыны кутски ӟуч ӝытъёсы. Пумен выжи ни удмуртаз но — «Шудкоме». Удмурт кун университетын ачим но сыӵе визь сынанъёс ортчытъясько.

— «ВКонтакте» сайтысь бамады юнматэмын Антон Чехов писательлэн веранэз: «Эрик но уксё кулэ вылэм. Пукысал палуба вылын. Юысал вина но вераськысал литература сярысь». Визьмо адямиосын вераськон тырмымтэен но, со визь сынан ӝытъёсы ветлылӥськоды-а?

— Озьы шуыны луоз. Творческой адямиослэн асьсэ ӧрын уясь, соосын огкадь малпаськись адямиосын кенешемзы потылэ ик. Соос мӧзмо сыӵе вераськонъёслэсь. Соин ик А. Чеховлэн та чуръёсыз мон понна адӟем карымонэсь луо. Со культураысь идеал.

Зэм, макем тросгес книга лыдӟиськод, сокем золгес валаськод: вань сюжетъёс огвыллемесь. Шумпотӥсько, вӧзам вань монэ валась но визьмо эшъёсы. Монэ ӵемысь ӧтчало библиотекаосы, писательёсын пумиськон ӝытъёсы, соизлы я таизлы произведенилы анализ лэсьтыны курыса. Со туж бурдъя.

Но улон возьматэ: котькыӵе тон визьмо мед луод, вузэз йылпумъямтэ адямиосын но вераськыны тунсыко, соос но куддыр сокем визьмо малпан сётозы. Соин но мон туж яратӥсько гуртам бертаны. Атае кулэмын ни. Но анае котьку бордаз кыске. Огшоры калык пӧлын но сюлэм шутэтске. Нош макем шумпотыса басьтӥськисько мон нюлэс дасян но пу коран борды! Тӥр кутӥськод ке, сюлэм буйга кадь. Ужедлэн емышез но соку ик адӟиське, кыл шерем кадь ӧвӧл.

Источник:

Лаврентьев А. И. Серекъян буйгатэ но, бӧрдытэ но / Александр Лаврентьев ; вераськиз Елена Сараматова // Удмурт дунне. - 2018. - 5 июля. - С. 10, 15 : фот. - (Тӧр шорын)

За предоставление материала выражаем огромную благодарность редакции газеты "Удмурт дунне"