Яшина Роза

Роза Ивановна Яшина - кылбурчи, очеркист, литературной критик, лингвист, филология тодосъя кандидат, Удмурт госуниверситетысь доцент, профессор.

Улон сюресэз

Яшина (Лекомцева) Роза Ивановна вордӥськиз Кез ёросысь Ӟуч Зязьгор гуртын 1933-тӥ аре 1-тӥ толшоре (январе) дышетӥсьлэн семьяяз.

Кык арескысен Роза улӥз но быдэ вуиз Дэбес ёросысь Аргуртын. Дышетӥсьёсты дасян институтэз йылпумъям бераз солэсь атайзэ татысь школае директоре ыстӥзы вал. Быдӟым ож кутскемен, вань калык сямен ик, трос курадӟонэз адӟоно луиз Розалэн семьяез но. Та секыт аръёсы улэмзы-вылэмзы сярысь Роза Ивановна «Помним, пока живём» статьяяз пыр-поч гожтэ.

Сизьым класс бере Роза Лекомцева Дэбес педучилищеез горд дипломен йылпумъяса, 1951-тӥ арын дышетсконзэ Удмурт пединститутлэн филологи ёзэтаз азьланьтӥз. Институтын литературно-творческой кружоке мылысь-кыдысь ветлӥз, хорын кырӟаз. Татысен ик Даниил Яшинэн тодматскиз. Соку Даниил Яшин Евгений Самсоновен ӵош литературно-творческой кружокен кивалтэ вал. 1955-тӥ арын диплом басьтэм бераз Роза Лекомцева Д. А. Яшинлы бызиз но со сьӧры Глазове улыны кошкиз.

Р. И. Яшинаез Глазкарысь 4-тӥ номеро школае ӟуч кылъя но литературая дышетӥсе ыстӥзы, ньыль ар отын тыршиз. 1959-тӥ арын картэныз, тодмо удмурт кылбурчиен, фольклористэн но литературоведэн Д. А. Яшинэн ужаны выжизы Удмурт пединститутэ.

Егит кышномурт татын но чырмыт уж борды басьтӥськиз. Ӝоген Роза Ивановна А. А. Поздеева доцент доры аспирантурае пыриз. 1962-тӥ арысен со студентъёсыз дышетыны кутскиз. 1965-тӥ арын «Сравнительные конструкции в удмуртском языке» темая кандидат диссертацизэ утиз. Автор отын туж быгатыса но шонер усьтӥз служебной шуон кылъёслэсь лексикая но грамматикая пуштроссэс (значенизэс), синтаксисъя (предложениын кыӵе член луэмзэс) функциоссэс, озьы ик вылӥ верам кылъёслэсь вераськонын кутӥськонзылэсь аспӧртэмлыкъёссэс. Удмурт кылэз эскерон ужын Роза Ивановна юн пытьы кельтӥз.

Нош 1970-тӥ арын солы аслыз доцент ним сёто ини. Р.И. Яшина мыло-кыдо пыриськиз удмурт кыллэн синтаксисэзъя но морфологиезъя учебникъёсты кылдытонэ. A.B. Конюховаен ӵош дасязы «Удмурт кыл. Синтаксис. 6—8 классъёслы» книга. «Куать улонэз» адӟиз со, куать изданиосын потаз. Кыкетӥез но — «Удмурт кыл. Морфология. 5—6 классъёслы» учебник (Г.Н. Никольскаяен, A.A. Поздееваен но И.В. Таракановен ӵош дасямын) озьы ик куать пол потылӥз. Элькунысьтымы дышетӥсьёс туж бадӟым тау карон кылъёссэс верало «Удмурт кылъя внеклассной ужъёс» пособиез понна (1972). Отын лексикая но грамматикая туж узыр материал люкамын: удмурт языкознанилэн пӧртэм люкетъёсызъя 11 занятиосты ортчытъяны ӵектонъёс (графикая но орфографияя, лексикая но фразеологияя, ономастикая, кыл кылдытонъя но этимологияя), удмурт школаосысь 5—6-тӥ но 7—8-тӥ классъёсын олимпиадаос ортчытъяны материал, бадӟым классъёсын дышетскисьёслы этнонимикалэн но удмурт кылъёслэн кылдэмзылы сӥзем ужпумъёсъя докладъёс лыдӟыны но беседаос ортчытъяны ӵектонъёс. Сборникез эшшо кие кутымон каро пӧртэм шудонъёсты, йыртӥянъёсты, ребусъёсты, шарадаосты, кроссвордъёсты ортчытъяны узыр материалъёс. Р.И. Яшиналэн мукетыз бадӟым ужез — «Удмурт стилистикая очеркъёс» («Очерки по стилистике удмуртского языка»). Тодосчилэн уно статьяосыз потылӥзы удмурт синтаксислэн теориезъя но.

Р.И. Яшина озьы ик бадӟым эскерон уж нуиз литературоведениея, литератураез дышетон амалъёсъя. Уноез соос сӥземын тодмо удмурт писательёслэн (Кузебай Гердлэн, Ашальчи Окилэн, Анатолий Бутолинлэн, Михаил Ляминлэн, Афанасий Лужанинлэн, Флор Васильевлэн, Семён но Евгений Самсоновъёслэн, Даниил Яшинлэн, Степан Широбоковлэн но мукетъёслэн) чеберлыко произведениоссылы.

Р.И. Яшина ваньзэ-ӧвӧлзэ кылтодосъя, методикая 100 пала статьяослэн, 10 нимаз книгаослэн, пособиослэн авторзы. Роза Ивановна кема аръёс оскымон но яратӥсь кузпал вал тодмо удмурт кылбурчилы, учёнойлы Даниил Александрович Яшинлы. Со трос юрттӥськиз картэзлы ужаз но улон сюрес вылаз но. Озьы ик утялтыса возе кузпалызлэсь архивзэ но печатьын поттылэ печатлатэк кылем ужъёссэ. Солэн кичӧлтэмезъя поттэмын Д. А. Яшин сярысь «Поэт. Учёный. Педагог» (1993) книга.

Р. И. Яшина — студентъёсыз дышетон удысын ветеран луэ, со туж ӟеч методист но воспитатель, ас азяз бадӟымесь куронъёс пуктӥсь мурт, мукетьёссэ но озьы ик ужатэ. Удмурт кылъя урокъёсыз котьку вылӥ ӟечлыкоесь луо, соос сюлэм ӟырдытлыкеныз шунтэмын, дышетскисьёслы вордскем шаерзэс яратон пыӵато, шонерлыкез утчаны дышето, адямиез гажан мылкыдъёс улӟыто.

Роза Ивановна жадёнэз валатэк тырше удмуртлыкмес ӝутон понна но. Со та ласянь зэмос анаймы кадь: кылыныз алоз (йӧттоз но!), нош сюлмыныз яратоз. Map ке малпа, сое ик вера, уг учкы вылӥ кивалтӥсь-а тон, яке огшоры ужась-а. Со чакламъя котькудмы асьмеос нырысь ик Адями луыны кулэ, ас шаермес, ас калыкмес яратыны. Таӵе ӟырдытлыксэ тодыса ик Р.И. Яшина бырйылэмын вал «Удмурт кенешлы» тӧрое но (1993–1994-тӥ аръёсы). Ма со али но тэк уг пукы: быгатэмезъя юрттэ визь-кенешен но, ужен но, лыдӟе студентъёслы тунсыко лекциос.

«Удмурт кенешын» ужамез-тыршемез сярысь пыр-поч Роза Ивановна гожтэ «Бадӟым вис бере кутскон» статьяяз.

Ӟырдыт мылкыдзэ, удмуртлык сярысь сюлмаськонъёссэ пыӵатыны быгатӥз нылпиосызлы но. Пиосыз туж чебер верасько анай кылынызы. Роза Ивановна удмурт выжыез гажан мылкыд пыӵатӥз нунокъёсызлы но. Та ласянь соос Даша внучкаеныз – бадӟым эшъёс. Соиз но шалтыр вераське удмурт кылын, Москваысь университетэз йылпумъяса, К. Герд нимо гимназиын ужа.

Гожъямъёсыз сярысь

Роза Ивановна ас кужымзэ литература удысын но эскере. Нырысь кылбуръёсыз газетъёсын потыны кутско студент аръёсаз. Тужгес но ӟеч кылбуръёсыз печатламын вал «Ныл сюлэм» (1965) огъя бичетын. Нырысь гожтэм кылбуръёсыз но поэмаез М. Петров улэп дыръя газет-журналъёсын потылыны кутскизы. Дано писатель сюлмысь гожтэм чуръёсты вылӥ дунъяз. "Тодӥськод на-а тон?" поэмазэ но критикъёс адӟытэк ӧз кельтэ. Кылсярысь, Ф. К. Ермаков поэмаын возьматэм нылмуртлэн лул чеберез пумысь ӟеч кылъёссэ вераз. Поэмаысь лирической героиняез лул-гажанэз оскытӥз вал, ноку уз вунэты, ялан яратоз шуыса. Нош дышетсконзэ быдтэ но вордӥськем гуртаз чебер кышноен берытске. Ӝоген кышноез пизэ картэзлы кельтыса кошке. Героиня сюлмыз вӧсь луыса тодаз вае яратон нуналъёссэс. Яратонэз ӵуштаськиз ке но, нылмурт йыркурзэ уг возьы. Угось нырысь яратон вуныны уг быгаты:

Куректон вормемын.

Яратон нош кылиз:

Со — нырысь яратон,

со уз кысы ноку...

Роза Ивановналэн ӟырдытэсь, бадӟым ужъёсы ӧтись кылбуръёсыз но ӟеч пӧрмо.

1997-тӥ арын Р. И. Яшиналэн "Улон азинске" нимын книгаез потӥз. Сборниксэ автор сӥзиз улонысь вазь кошкем яратоно кузпалэзлы – Д. А. Яшинлы. Татчы со берло гожтэм кылбуръёссэ, веросъёссэ, пӧртэм ужпумъёслы сӥзем статьяоссэ пыртэм. Война аръёслы сӥземъёсаз шӧдӥське, автор ас улонысьтыз югдуръёсты но учыръёсты гожтэм шуыса, но соос война пыр потэм котькуд адямилы матын луо. Угось таӵе курадӟон-куректонъёсты ваньмызлы сямен ик удмурт семьяослы адӟоно луиз. "Куинь сукыри" веросаз огшоры кышномуртлэн бадӟым сюлэмыз сярысь мадемын. Сютэм война аръёс но ӟеч адямилэн сюлмысьтыз мукетъёсты гажан, куректонъёссэс-бӧрдонъёссэс валан мылкыдъёсты уг куасьто-быдто. Ог-огедлы юрттытэк со секыт аръёсты калык, оло, вормыны но ӧй быгатысал. Тужгес но ӟеч возьматэмын анайлэн образэз: ас нылпиоссэ пумтэм яратэ ке но, сюлэм шунытсэ мукет адямиослы но тырмытэ.

Сюрид ке тон кезьыт азе

Яке лек адями кие,

Йыркур зӥбиз ке ӝытазе –

эн сӥят сюлэмдэ,

пие.

Роза Ивановналэн веросъёсаз аслаз пичи дырыз чильпыраса улэ. Соин ик валамон луэ, кытысь та йӧно кышномуртлэн юн сямыз, кытысь солэн сюлэмаз ас шаердэ яратон, калыктэ, солэсь лулчеберетэз гажан мылкыд пыӵамын.

Берло дыре Р. И. Яшина ӟуч кылысь удмурт кылэ берыктон ужен тунсыкъяськыны кутскиз. Кылсярысь, со С. Есенинлэсь кык сю пала кылбуръёссэ удмурт лыдӟисьёс доры вуттӥз. Берыктэм ужез ӟеч быдэстэмын: ӟуч кылбурчилэн кылсуред пуктон сямыз но ыштэмын ӧвӧл, удмурт кыллэн аспӧртэмлыкез но пуксемын. Роза Ивановна С. Есенинлэсь поэзизэ туала нуналъёслы матэ карыны быгатэм. Солэн уй-нуналэз тодытэк тыршеменыз, асьме лыдӟисьёс доры вуизы А. Пушкинлэн, М. Лермонтовлэн, Н. Некрасовлэн произведениоссы. Нош 2009-тӥ арын, Роза Ивановналэн тыршеменыз, быдӟым ӟуч классиклэн А. С. Пушкинлэн «Евгений Онегин» кылбуранэн романэз потӥз удмурт кылын нимысьтыз книгаен.

Премиосыз

Яшина Роза Ивановналэн ӟеч тыршемез пусъемын уно наградаосын, Почёт грамотаосын, Удмурт АССР-ысь Верховной Советлэн Президиумезлэн, Удмурт АССР-ысь Министръёслэн Советсылэн Данъян грамотаосынызы, «Ветеран труда» медален. Солы сётэмын:

Удмурт Элькунысь наука удысысь сӥё-дано ужась, 1983

Россиысь калыкез дышетонысь но вылӥ школаысь отличник, 1983

Кузебай Герд нимо премиялэн лауреатэз, 1999

Библиография

Книгаосыз

Улон азинске = Жизнь продолжается : кылбуръёс, веросъёс, статьяос. – Ижкар : Тодон, 1997. – 114 с.

Статьяосыз

Эн жадьы паймыны : кылбур // Выль даур : прил. к газ. "Можгин. вести". – 2005. – 13 авг.

Стихи-посвящения / перевод автора // Италмас. – 2008. – № 2. – С. 70. – Содерж.: Поэту и прозаику Михаилу Петрову ; Русскому поэту Сергею Есенину ; Даниилу Яшину – поэту и супругу ; Поэту Флору Васильеву ; Поэтессе Людмиле Кутяновой.

Берыктэмъёсыз

Короленко В. Сон Макара = Макарлэн вӧтэз : святоч. рассказ / ӟуч кылысь берыктӥз Р. Яшина. – Ижевск : Удмуртия, 2003. – 127 с.

Пушкин А. Евгений Онегин : кулбуранэн роман / ӟуч кылысь берыктӥз Р. Яшина. – Ижевск : Удмурт. ун-т, 2009. – 253 с.

Ворончихин А. Югыт дунне – мынам юртэ = Мой дом – мироздание : кылбуръёс пер. на удмурт. яз. и вступ. ст. Яшиной Р. И. – Ижевск : Тодон, 1996. – 79 с.

Лермонтов М. Сӥзьыл ; Д...влы ;Эшъёсылы ; Ожгар ; Грузин кырӟан ; Баллада ; К***; "Огнам юнме ӵаш поттонын..." ; Шугъяськон ; Стансъёс ; Огнын луон ; Кизили ; Шузигес чеберайлы ; Кавказлы ; Кураськись ; "Нокин, нокин, нокин ческыт ӧз кар..." ; "Эн вера: мон шузи, кышкась!.." ; Новгород ; Дыдыксин ; Капчи визьем чеберайлы ; Тӧлпо ; "Ӧвол мон Байрон, мон мукет..." ; Кылбурчилэн быремез ; Бородино ; Пытсэтын пукись ; "Куке тулкымъясько ӝужась юос..." ; "Медаз тоды "свет" шуонзы..." ; Кинжал ; "Кырӟа но со – куараосыз сылмо..." ; "Кылӥсько ке тынэсьтыд..." ; "Эн серекъя азьпалаез тодон мӧзмонъёсме..." ; Малпаськон ; Казак нуны веттан ; "Мусо нунылэсь вордӥськемзэ..." ; Вӧсяськон ; "Вань веранъёс – пуштроссы..." ; Гётея Малы ; Тау карон ; А. О. Смирновалы ; Пилемъёс ; Вордскем шаер ; "Кыч северын чылкак огназ..." ; [С. Н. Карамзиналэн альбомысьтыз] ; "Ӟеч лу, мисьтӥськымтэ Россия..." ; Утёс ; "Уг, тонэ ӟырдыт уг яратӥськы мон..." ; "Сюрес вылэ огнам мон потӥсько..." ; Азьланьзэ верась / берыктӥз Р. Яшина // Избранные произведения : стихотворения / М. Лермонтов. – Ижевск, 2008. – С. 21, 23, 28–31, 34–35, 39–40, 43, 46, 48, 58–59, 61–62, 64–67, 70–72, 74, 77–78, 81, 95, 98, 110–112, 119–122, 128–129, 133, 135, 142, 145, 147, 149, 151–153, 155–159, 161, 168, 171, 173, 174, 179, 184, 186, 189, 191, 193, 195, 202, 206, 213–214.

Некрасов Н. Вордскем юртэ ; Зор азьын ; Тройка ; "Толон, куать часэ мыныку..." ; "Тынад серемесэд уг кельшы ук мыным..." ; Арамтэ удыс ; "Улонлэсь праздниксэ – егит аръёсме..." ; Городын бугырес улонлэсь..." ; "Ожлэсь шимессэ валаку..." ; Дышетскись ; "Шоркаръёсын весь ӵаш потто..." ; Дунне понна кисьтэм синвуосыз..." ; Волга вылын (Валежниковлэн пинал дырыз) ; Нылпиослэн бӧрдэмзы ; "Ар ортче ке – синэ кужыме..." ; Эрик ; Крестьян нылпиос ; Малпаськон ; Вож ӵашетон ; Орина, солдатлэн анаез ; Чугун сюрес ; Добролюбовез буре вайыса ; "Шудтэк, эриктэк туж ӝокыт..." ; Музалы ; Кизисьёслы ; "Макем мылкыд! котькыӵе ӧсъёс дурын..." ; "Матэктэ ини дорам корос!.."/ берыктӥз Р. Яшина // Избранные произведения : стихотворения, отрывки из поэм / Н. Некрасов. – Ижевск, 2005. – С. 33–35, 38–39, 43–44, 59, 67, 77–78, 80–82, 103, 109–110, 113–114, 139–148, 155–156, 159–160, 162, 173–182, 186–187, 190–192, 198–202, 218–223, 233–234, 246, 265, 268–269, 276–278.

Пушкин А. Евгений Онегин / берыктӥз Р. Яшина // Кенеш. – 2008. – № 1. – С. 78–83.

Пушкин А. Чаадаевлы ; Гурт ; Пытсэтын пукись ;Тылобурдо ; О роза-ныл, мон кортнамын..." ; "Уйин зефир..." ; "Уть монэ, мынам талисманэ..." ; [А. П. Кернлы] ; "Улон тонэ пӧяз ке..." ; "Берпуметӥ сяськаос мусогес..." ; "Мыл потон тыл вирам ӝуа..." ; П. А. Осиповалы ; Тол ӝыт ; Сильтӧл ; Няняелы ; И. И. Пущинлы ; Тол сюрес ; "Сибирьысь рудаос пӧлын..." ; "Кырныж доры кырныж лобе..." ; 1828 арын 19 коньывуонэ ; "Уй ӝомал кылле ни Грузилэн вырйылъёсаз..." ; Калмычкалы ; Тол ӵукна ; "Мон яратӥ тонэ: оло нош, яратон..." ; "Урамъёстӥ-а калгисько мон..." ; "Туж мур вуосыд..." ; "Кышкыт но мӧзмыт..." ; "Мар бен тыныд мынам нимы..." ; Элегия ; "Йӧно испан ныл азьын..." ; "Кык мылкыдъёс матын милем..." ; Чузъяськон ; Уӵы ; Вал ;Ода LVII ; Пилем ; "...Выльысь вуи мон..." ; "Тодосъя академиын..." ; "Кастрат доры лыктэм скрыпач..." ; "О, мон ӧй акыльты на улыны..." ; "Киын лэсьтымтэ аслым синпель пуктӥ..." / берыктӥз Р. Яшина // Избранные произведения : стихотворения, отрывки из поэм / А. Пушкин. – Ижевск, 2007. – С. 40, 46–47, 62, 64, 83, 86, 95–96, 100, 102–103, 115–117, 121–124, 130–133, 138–139, 141, 149–150, 162, 164, 166–167, 169, 173–174, 180, 183–184, 186–187, 191, 198–199, 203, 207, 230, 232, 233, 235, 240–245, 248.

Яшин Д. Нылмурт нимъёс / подстрочный перевод Р. Яшиной // Италмас. – 2008. – № 2. – С. 91–92.

Кырӟанъёсыз

Широбокова В. Анай гур : «Сюрид ке тон кезьыт азе…» ; Яратӥсько : «Тынад мусо тусбуед» / кылъёссэ гожтӥз Р. Яшина // Кенеш. – 2006. – № 1. – С. 110–111.

Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.