Голубев Владимир

Владимир Васильевич Голубев (1923-тӥ арын 24 июле, Пичи Пурга – 2018-тӥ арын 16-тӥ шуркыннмонэ, Москва) – удмурт писатель, журналист.

Улон сюресэз

Голубев Владимир Васильевич вордӥськиз Пичи Пурга черкогуртын 1923-тӥ арын 24 июле огшоры крестьян семьяын. Пичи Володялы кык арес но ӧй вал на, Азинлэн дивизияз ожмаськем атаез Василий Спиридонович 1924-тӥ арын кулӥз. Сирота будӥз Володя. Пичи Пургаысь шор ёзо школаын дышетскыкуз ини, дышетӥсьёссэ но эшъёссэ паймытъяз усто дышетскеменыз, трос лыдӟыны вуэменыз. Володя яратэ вылэм А. Гайдарлэсь книгаоссэ, Н. Островскийлэсь «Кызьы андан кыдаз» романзэ лыдӟемез сярысь мадьыны. Школаысь пионеръёс но комсомолецъёс пӧлын ялан азьветлӥсь луэ. Соин, вылды, со «Артек» пионерской лагере но шедьылӥз. Школаез со ушъяно аттестатэн быдтӥз.

Котькуд егит муртлэн вань аслаз малпанэз – кин луыны сюлмаськемез. Володялэн ортчыт потэ вылэм лётчик луэмез, Валерий Чкалов кадь ӧрӟи сямен лобамез. Соин, шор ёзо школаез быдтон азяз, дасяськыны кутске Казаньысь авиационной институтэ пырыны. Люкетэ Быдӟым Отечественной война.

Дас классэз «витьёслы» гинэ йылпумъяса, Володя Голубев «Ударник» ёрос газетлэн редакцияз ужаны интыяське. Но 1941-тӥ арын война пуроме. Дас тямыс аресъем егит пи, ас мылкыд каремезъя, фронтэ кошке.

Егит пияшлы военно-инженерной училищее мыныны дэмлало. Куать толэзьскын со вал ни младшой лейтенант. Лэзизы Северной Кавказэ, фронт соку ортчиз Ростов город дортӥ. Нырысь со вал нимысьтыз учебной сапёрной батальонын взводлэн командирез, собере луиз стрелковой полкын сапёрной взводлэн командирез.

Сапёр. Минаосты утчась. Ньыль ар ӵоже Владимир Голубев туж уно тушмон минаосты октылӥз. Херсон городэз мозмытыку гинэ боецъёсыныз 600 мина утялтӥзы. Кӧня асьме солдатъёсты но офицеръёсты быронлэсь утизы! Та ожын ассэ кышкасьтэм возьматэмез понна, Голубев старшой лейтенантлы сётӥзы Александр Невский нимо орден. Нош азьпалан уно ожмаськонъёс вал на.

Ожмаське Кавказ гурезьёс дорын, Кубанез тушмон киулысь мозмытон ожъёсын, Таманской полуостровысь тушмонлэсь «Чагыр гож» обороназэ тӥянын, Донбассын, Днепрез выже. Вормонэн ӵош ӝутске ачиз, пыре партие, луэ сапёрной роталэн командирез. Прут шур дурысен В. В. Голубевез ысто Москвае Высшой офицерской инженерно-минной школае. Фронтэ вуэ войналэн берпум толэзяз. Ӝоген луэ сапёрной батальонын штаблэн начальникез, собере – капитан чинын комбат.

С. Будённый маршал В. Голубевлы орден сётэ

Сапёр огпол гинэ янгыша, шуо. Нош удмурт офицер Голубев ож лудын одӥг янгыш но ӧз лэсьты, ачиз но улэп кылиз, уно ожгарчиосты но быронлэсь утиз. Лек ожъёсын куинь пол сӧсырме. Правительство вылӥ дунъяз солэсь батыр луэмзэ, В.В. Голубев дунъямын Отечественной войналэн 1-тӥ но 2-тӥ степенё но Горд Кизили орденъёсын, «За отвагу», «За боевые заслуги» но мукет дас медальёсын. Вераны кулэ, Удмуртиысь одӥг гинэ военной журналист пусъемын Александр Невский нимо орденэн. Со адями – Владимир Голубев.

1946-тӥ арын Владимир Васильевич дышетскыны пыре Москваысь Куйбышев нимо военно-инженерной академие, отын куать ар дышетске. Кема аръёс ӵоже отын ачиз но дышетӥз. Академия бере ужа Московской военной округысь инженерной управлениын, кивалтэ кышкыт но секыт ужен – война ортчем интыосыз разминировать каронэн. Офицерлэн службаез ортче Австриын но, Югославиын но, Румыниын но. Ваньмон дыръёсаз ужа пӧртэм архивъёсын, утча Удмуртиысь батыръёс сярысь материалъёс. Полковник луыса, 1974-тӥ арын отставкае потӥз. Берло аръёссэ Москваын улӥз. Улонысь кошкиз 2018-тӥ арын 16-тӥ шуркынмонэ .

Гожъямъёсыз сярысь

1936-тӥ арын Володя вань сюлэмзэ сётыса гожъяны кутске «Дась лу!», «Егит большевик» газетъёсы. Отын солэн трос гинэ ужъёсыз потылӥзы. Отӥяз со газетэн ӧз люкиськылы ни. В. В. Голубев газетъёсты гожъян сямзэ ӧз ышты. Ожмаськон вакытэ но со газетьёсын эшъяськиз. Ӵош служить карись эшъёсыз сярысь очеркъёс кылдытъяз. Собере веросъёс, повестьёс но гожтӥз. Уно удмурт геройёсты шараяз. Гожъямъёссэ нимаз книгаосын поттылӥз. Соос пӧлысь тужгес но тодмоосыз: "Батыръёс" (1963, 1985), "Солдатлэн данэз" (1964), "Виктор Пислегин" (1966), "Ӧрӟи" (1969), "Ми — разведчикъёс" (1974), "Лудӟиысь батыр" (1974), "Солдат иськемъёс"…(1995) но берпуметӥез книгаез «Берпуметӥез ӟардон» (2011) .

Ӵош ожмаськем эшъёсыныз

Озьы ик ӟуч кылын печатламын «Шаги в бессмертие» (1972) книгаез. Татчы пыро куинь повестьёс: Советской Союзлэн Геройёсыз Виктор Пислегин но Василий Зайцев, куинь Слава орденъёслэн кавалерзы Александр Фёдорович Виноградов сярысь. Ваньзэ ӧвӧлзэ Владимир Васильевич Голубевлэн дас одӥг книгаез потэмын.

Журналист Владимир Васильевич Голубев, «Дась лу!» газет выльысь потыны кутскем дырысен, ялан гожъя землякъёсмылэн Быдӟым Отечественной война дыръя батыр ожмаськемзы сярысь. Солэн удмурт солдатъёс сярысь гожтэм нимъёсын списокез быдэс батальонлэсь но уно ни, шуо. Кызьы тӥ военной дӥськутэн адями, басьтӥськиды гожъяськон уж борды, шуыса, юанлы, Владимир Васильевич вера: «Москваын улыкум но удмурт газет-журналлы гожтӥськылӥ. Трос лыдӟиськисько вал. Одӥгзэ материалэз война сярысь лыдӟисько, мукетсэ. Маиз ке но сюлэмам уг лякиськы кадь. Соку Кавказ гурезьёсын ожмаськеме сярысь рукописьме келяй Удмуртиысь Писательёслэн огазеяськоназы, но со М. П. Петров кие сюрем. Михаил Петрович пыр-поч учкем но мыным гожтэт ыстэм…».

Повестез яке очеркез гожтон понна куддыръя кӧня материалъёсты ки пыртӥ поттыны кулэ. Автор со гожтонэз сярысь рос-прос умой тодэ ке, сюлмыныз гожтэ ке книгаез лыдӟисьёс доры пыраклы сюрес шедьтэ. Документальной книга гожтон котьку но кутске материал люкан бордысь. Солдатлэн ожмаськемез сярысь документъёсты зарни пырыосты сямен архивысь утчано луэ. Та бордын лад-лад ужамез сярысь В. В. Голубев «Ож тылӝулэн ӵыныз курыт» бадӟым статья поттӥз «Удмурт дунне» газетын. «Одӥгез но повесте огшоры малпаса гожтэмын ӧвӧл, геройёсы улӥзы, ужазы, улонын вунонтэм инты кельтӥзы. Война сярысь гожъяны кулэ ож пыр, тыл но ӵын пыр потэм адями», – шуэ ачиз журналист. Владимир Васильевич ужзэ али но азинтэ.

Премиосыз

Удмурт Элькунысь писательёслэн огазеяськонзылэн ёзчиез.

Удмурт Элькунысь журналистъёслэн огазеяськонзылэн ёзчиез.

Библиография

Книгаосыз

Батыръёс : сборник. – Ижевск : Удмуртское книжное издательство, 1963. – 72 с.

Батыръёс : Советской Союзлэн Геройёсыз сярысь очеркъёс. – Устинов : Удмуртия, 1985. – 216 с.

Берпуметӥез ӟардон : документальной повестьёс, очерк. – Ижевск : Удмуртия, 2011. – 182 с.

Лудӟиысь батыр : геройлэн улонысьтыз суредъёс. – Ижевск : Удмуртия, 1974. – 112 с.

Ми – разведчикъёс : документальной повесть. – Ижевск : Удмуртия, 1974. – 80 с.

Пыраклы егитэсь : очеркъёс, документальной повестьёс. – Ижевск : Удмуртия, 2001. – 231 с.

Ӧрӟи : Петр Бабкин сярысь повесть / В. Голубев, Г. Ходырев. – Ижевск : Удмуртия, 1969. – 75 с.

Виктор Пислегин : документальной повесть. – Ижевск : Удмуртия, 1966. – 111 с.

Солдат иськемъёс : очеркъёс, повестьёс. – Ижевск : Удмуртия, 1995. – 248 с.

Солдатлэн данэз. – Ижевск : Удмуртия, 1964. – 62 с.

Тылӝу пыр : ёзъёсылэн адӟонзы – мынам адӟонэ : солдатлэн тодэ ваёнъёсыз. – Малая Пурга : Издательский дом "Маяк", 2003. – 191 с.

Шаги в бессмертие : очерки. – Ижевск : Удмуртия, 1978. – 124 с.

Статьяосыз

Берпуметӥез ӟардон : документальной повесть // Кенеш. – 2005. – № 5/6. – С. 3–38.

Бугрыш пи : очерк // Инвожо. – 2011. – № 7/8. – С. 76–79.

Буре ваён бусы : кузьмадёс // Кенеш. – 2013. – № 3. – С. 3-31. – (Проза). ; Кенеш. – 2013. – № 4. – С. 8-22. – (Проза). ; Кенеш. – 2013. – № 5-6. – С. 6-20. – (Проза).

Виктор Пислегин, погибший под Лугой // Удмуртская правда. – 2008. – 11 апр. – С. 8.

Вормон сюреслэн кутсконэз // Кенеш. – 2011. – № 11/12. – С. 57–59.

Вунонтэм подвиг : верос / В. Голубев, Г. Ходырев // Покчи эше : 1–2-тӥ классъёсын ватсаса лыдӟон книга. – Ижевск, 2006. – С. 135–136.

Выльысь вераськыны дышиз : верос // Азвесь кышетэн толэзь : веросъёс : семьяын лыдӟон книга. – Ижевск, 2007. – С. 30–31.

Днепрез тодам возисько... // Удмурт дунне. – 2005. – 20 дек. – С. 6–7.

Дорен люкиськон // Кенеш. – 2008. – № 4. – С. 34–39.

К 70-летию подвига танкиста В. Пислегина // Увинская газета. – Ува, 2011. – 12 июля. – С. 3.

Кайгу кыӵес : повесть // Кенеш. – 2009. – № 4. – С. 3–35.

Кунгожез выжонын нырысьёсыз пӧлын // Иднакар. – Глазов, 2005. – 18 марта. – (К 60-летию Победы).

"Мон – солдат..." : очерк // Кенеш. – 2005. – № 2. – С. 75–85.

На войне – снайпер, а в дни мира – учитель // Маяк. – Малая Пурга, 2012. – 22 июня. – С. 2, 7.

Нимтэм вырйыл понна // Удмурт дунне. – 2005. – 26 апр. – С. 8.

Ожын – снайпер, гуртаз – дышетӥсь : очерк // Ӟечбур! – 2008. – 24 июля. – С. 14–15.

Ортчемез уг вуны : тодэ ваёнъёс // Кенеш. – 2013. – № 5-6. – С. 22-30 : фот.

Останутся в памяти навечно // Земляки : удмурт. землячество в Москве. – Ижевск, 2008. – С. 46–48.

Тылож суредъёс // Кенеш. – 2010. – № 4. – С. 52–61. – (Быдӟым Вормонлы – 65). – Пуштросэз: Днепр шур дурын ; Будапештэз мозмытон ; Вормон тулыс.

Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.