Филимонова Ирина Олеговна

Коркаямы шунды пыриз

Быдэс шаерамы сое тодо Ури-бери Орина нимын. Капчи мылкыдыныз та артистка пӧртэм концертъёсы вуттӥське, шутэтскон нуалъёсы сое дорысьтыз шер шедьтод. Нош Пичи Пурга черкогуртын сое тодо Ирина Олеговна Филимонова шуыса. Со 13 ар пала ини дышетӥсь луыса тырше, Пичи Пургалась гимназиын покчи классъёсын дышетэм сяна, удмурт кылъя но литературая урокъёс нуэ.

— Кин со Ури-бери Орина?

— Вордӥськи мон Пичи Пурга ёросысь Миндэр гуртын. Соин мугоры но таӵе — миндэр кадь. Пичи дыръям малпасько вал артист луыны. Синучкон азьын, эсьма, кырӟаса но утчалляй, диктор чотын но вераськылӥ. Школаын дышетскыкум, одӥг ужрад но монтэк ӧз ортчылы шуи ке, уг янгыша, дыр. Соку ик аслым артист кадь потылӥ. Льӧль малпанме дядие уретӥз: «Трали-вали тэтчаса уд ветлы. Артист луон — со йӧназ уж ӧвӧл».

Дядяйлэн верам кылыз — закон. 9-тӥ классме йылпумъяса, кошки Можгалась педучилищее. Ох! отын дышетскон аръёсы шулдырлэсь но шулдыр вал. Нуналлэсь ортчемзэ ик ӧм валаллялэ. Пӧртэм кружокъёсы ветлыны удалтӥз. Педучилищеез йылпумъяса, Удмурт кун университетысь филологияя факультетэ заочно амалэн дышетскыны пыри. Мон одӥг ужез гинэ ужаны уг быгатӥськы, огкутскемен кӧня ке удысэ кырмиськисько. Но сыӵе дыръя урод сямы вань — дыртӥсько. Озьы университетын лекциос вискын машина нуллыны праволы дышетски. Одӥг пол инструктореным кенешим университет вӧзын пумиськыны. Дышетскон бере бызисько ни машина доры, ӧссэ усьтӥ, пукси, «поехали» шуисько.

Нош пумитам вазё:

— Куда вы сели? Выйдите, пожалуйста.

— Не выйду, я деньги заплатила, — мытылӥсько пумитаз.

Паллян пала учки но — руль сьӧрын мукет воргорон пуке. Соку гинэ валай мурт машинае пуксемме. Нош инструкторелэн машинаез берамы ик сылэ вылэм.

— Тӥ дышетӥсь. Нош сцена вылын шудэм бере школаын мӧзмыт уг поты-а?

— Дышетӥсь — со сыӵе ик артист. Урокын пӧртэм амалъёсыз кутон, астэ артист кадь возьыны быгатон котьку юрттэ. Тани нылпи дорысь ужзэ быдэстэмын ӧвӧл ке, соку ик адӟиське. Я синъёсыз кытчы ке палэнэ учко, я мугорзэ шымыртыса пуке. Ӟеч дышетскисьёслэн тыбырзы ик шонертӥське. Огпол дышетскон ар кутскемын ни вал, нош шуркынмон толэзе мукет классысь пияш мынамаз выжиз. Оценкаосыз аламаесь. 2 толэзь ортчиз оло ӧз, умоесь отметкаос басьяны кутскиз. Завучен кенешыса, валай: сояз классын пияш азьтэм пиосын эшъяське вылэм. Мынам классам вуыса, возьыт потэм, лэся, бере кылисьёс радын ветлыны, ӝабыр-ӝабыр басьтӥськиз дышетскон борды. Ну, соку ушъяй ук со пияшме. Йырзэ маялтыса ик, тыбыраз вешай. Тӥни сыӵе нылпиос шоры учкыса, ужаны мылкыд ӝутске.

— Дышетӥсьлэн ужез сьӧраз бертэ, шуо. Уката покчи классъёсын тетрадь эскероно. Ку вуттӥськоды ваньзэ?

Мыным тросэз паймемзэс верало, кызьы, школаын ужаса, мукет уже вутскиськод шуыса. Нош мыным юрттэ пыдын ветлон. Семьяямы машинамы одӥг. Соин куддыръя мон «питранъёстэк» кылисько, Пургаласен Миндэрозь пыдын бертоно луисько. Тӥни со иськемъёсыз вамышъятозям, йырам сценарий гожтӥсько яке вуоно уроклы дасяськисько.

Тани Сюмсиысь кышномурт телефон номерме шедьтэм. 2 арня йӧназ изьыны уг быгатӥськы ни, шуэ. Кызьы, пе, школаын ужаса, концертъёсын ветлыны луэ на? Концерт бере юан сётыны возьдаськем, жингыртыса юа ни. Лыктэ, шуисько, Пурга гимназие. Мон трос вераськыны уг яратӥськы, ужын капчигес ваньзэ возьматыны. Лыктыны ик ӧдъя, лэся.

— Артистэ дышетскемды ӧвӧл. Нош кытысь сыӵе быгатонлык?

— Ачим но паймисько. Анае Раиса Валентиновна — востэм кышномурт. Вордӥськемын Сьӧлта ёросысь Аяшур гуртын. Ужамын нылпи садын визьнодасьлэн юрттӥсез луыса. Бӧрысь тыршиз на Пугачёво посёлокысь чорыг дасян цехын. Дядие — Олег Васильевич — Миндэр гуртысьтымы ик. Со кема аръёс ӵоже ужамын Пичи Пургалась газовикъёс дорын. Жаляса верано, дядие, лек пыктосэн висьыса, пӧламы кемалась ӧвӧл ни.

Мон дядиелэн анаез — Анисья Фёдоровна — вӧзын будэмын, шуыны луоз. Пересь мемеймылы али 92 арес ни. Дядяен анай ужаны кошко вал, ми кыкнамы кыльылӥмы. Пересь анае монэ весь сюдыны выре вал — огпӧртэм нӧкы вӧйын картошка. Дорамы пукыны шуыса, бускель кенакъёс ӵем гинэ вуылӥзы. Пересьёслэн оломар сярысь но вераськыса улэмзы мынам али но тодам на. Тӥни со ик юрттэ, дыр, сцена вылын но.

— Иське, сцена вылысь пересь — со Миндэр гуртысь кышноослэн огазеям образзы? Кема утчады-а сое?

— Чик кема ӧй утча. Мынам со манере быдэс пересь мемеймылэсь басьтэмын. Со али но шоккетыса вераське на. Мугорын бон мон зӧкта ик ӧвӧл. Эктыны но, вераны но туж быгатӥсь вал. Котькыӵе ужрадэ пыриськылӥз. Миндэрын пересьёслэн асьсэлэн ансамбльзы вал, мемеймы отчы но ветлэмын. Юон дыръёсын но шулдыртылӥз. Киуж ужаны быгатэмез гинэ мыным ӧз паласькы. Шонерзэ ке верано, кулэ луиз ке, кертто но, вуро но. Пока анае ваньзэ керттыса сётэ.

— Удмурт филармониысь сцена вылэ участковой кариськыса но поталляды вал.

— Со Анатолий Ушаковлы сӥзем фестиваль вал. Оло нырысетӥез, оло кыкетӥез — тодам уг лыкты ни. Быдэс зал тыр учкисьёс мынэсьтым маскаръяськемме зол кичабонъёсын дунъязы. Шумпотыса пушкы тыриз.

— Бадӟым сценалэсь кышканды вал-а, кызьы сое вормиды?

— Кышканы ӧй вала кадь. Малпасько, дышетӥсьын ужам адями номырлэсь но уз куалекты. Эшшо ке бурдъясь мурт сюре ке. Тани Удмурт театрысь валтӥсь режиссёр Алексей Ложкин кытӥ-отӥ юрттӥськылэ сценарий гожтыны. Ӵапак со вераз: тынад, пе, Инмарен сётэм быгатонлыкед вань, кудӥз-огез артистъёс, институтын дышетскыса но, сётэм ролез шудыны туж курадӟо. Мон сцена вылын кытын ке янгышасько ке но, учкись сое уг вала, малпа, дыр, со озьы ик кулэ вал шуыса. Кылэз волятыны уката юрттэ шара лыдӟиськон. Туэ тани вань удмурт изданиослы гожтӥськи. Эсьма 92 аресъем песяеным вожмаськыса лыдӟиськиськом.

— Кызьы эшъяськизы дышетӥсь Ирина Филимонова но удмурт эстрадаысь кизилиос: Алёна Тимерханова, Иван Котельников, Николай Анисимов, Андрей Корнилов?

— Артистъёсын Коля Анисимов тодматӥз. Алёна Тимерхановаен но Иван Котельниковен эшъяським Пургала ужаны вуэмзы бере. Концертэн ветлон куспамы мон Иванлы ним ляки, Пурты Ванька шуи.

— Концертъёсы арганэн но потаськоды… Шуо, ӵапак Иван Котельников арганэн шудыны дышетэм…

— Э, алдаллям ук! Арган мыным пичи дыръям басьтӥзы. Семьяын мон одӥг нылпи вал бере, номырлы но вожъяськыса ӧй вутты. Арган кури но — ме, пе. Арганме нырысь огшоры кыскасько вал. Дядяй куаретыны кутске ке, мунчое потыса, шудылӥ. Пӧрмыны ӧдъяз. Пумен гур но шулдыргес пуктыны кутски. Табере арганэ — мынам матысь эше. Ӝож мылкыдъёсме мон арганлы гинэ верасько, огнам коркан арганэн шудыса, буйгасько.

— Огнады быгатӥсь-коды-а калыкез шулдыртыны?

— Муг сюрем дыръя мактаськоно ай. Тодмоосы куремъя я сюан, я юбилейёс ортчытъясько. Огез тодмое сюанын шулдыртыны куриз. Ваньмыз-а куноосыд удмуртэсь луозы, юай. Куинез, пе, ӟуч, кылемез чисто удмурт. Малпай, пумит уз луэ, удмурт сямен ужрадэз нуи ке. Ӝыт ортчемъя огез ӟуч кунолэн йырыз кур луэм, лэся. Мынэсьтым юа: мар, пе, со «сю грамм» шуэм? Учебникысь лыдӟи, шуисько, «сто грамм». Визьмо, пе, тон, нош кызьы удмурт сямен луоз «кривошипно-шатунный механизм». Озьы куддыръя асме но паймытъясьёс шедё.

— Дорады, пе, гид тыр пудоен улӥськоды. Ку утялтыса вуттӥськоды?

— Анайлы тау, ваньзэ гурт ужез со бергатэ. Дӥсез «кен» миське. Мон мисьтаськон машинаме озьы шуисько.

Пудо трос вордӥськом. Соос котырын анайлы бергано луэ. Мон асме ветеринарен лыдъясько, пудо басьтоно ке, эмъяно ке — таиз мыным оскемын.

Концертъёсын ветлыкумы, учкисьёс мыным олокыӵе но кузьымъёс сёто. Можга ёросысь фермер Галина Белозёрова кузьмаз вьетнам выжыысь айы но мумы парсьпиоссэ. Ну, сюдӥм ни ми соосыз. Дыр ортчемъя мумы парсьмылэн кӧтыз ошиськыны кутскиз — иське, пияно та. Табере возьмаськом ни солэсь пи поттэмзэ. Со дыр куспын айы парсьмес вандӥм. Одӥг ӵукна анай пудоосты сюдыса пыриз но куалектыса шуэ:

— Ирина, парсьмы маке выдыса гинэ улэ, пи поттыны курадӟе кадь. Мын эскеры.

Потӥ, нуназеозь, ява, парсе вӧзын коргидын пуки. Нурскетӥсе уг выры, коть парсед вӧзы ачид изь. Пуконъям ачим шумпотӥсько: пиосыз вордскизы, будӥзы ке, Огырчи базарын вузалом, кисыям коньдон пыроз. Возьмаськыса жади, нош парсе изе но изе. Йырам шуккиз: жингыртоно пудо першалъёслы, татын мынам тодон-валанэ уг тырмы ни. Я, ветеринар лыктӥз, учкиз но пыд йылысьтым погыртэ ни вал: парсед, пе, пияно ӧвӧл, укыр трос сюдӥллямды но, куаеменыз весь изе но изе. Йыры кур луиз: парсьпи ӧз потты, нош сиён кошке. Вандом тае, шуисько. Нош пересь мемеймы, солы 92 арес, чабкиське гинэ: «Парсьпиоссэ вузаллям, табере парсьсэс но вандо ини».

Мон маскара учыръёстэк одӥг нунал но улыны уг быгатӥськы. Тани Выль ар азьын айы ӵӧжмы кулӥз. Огырчи базаре ӵӧж утчаны мынӥ. Одӥг воргорон ӵӧж вуза. Малпаса-малпаса тодам ӧз лыкты, кызьы айы ӵӧжез ӟуч сямен шуоно. Ну, возьдаськон мынам толло нуналэ кылемын ни, вуз карись доры лыктӥ но шуисько: «Для утки мужа надо». Валаз ведь. Но татчыозь айы ӵӧж ӧй шедьты на. Мумыез ӵӧжмы табере, карт утчаса, азбар трос кесяське.

— Нош асьтэос кытысь карт шедьтӥды?

— Вуж Мӧнья гуртэ эше доры куное мынӥ вал. Клубысен дорам йӧно пияш лыктӥз но тодматскыны выре. Нимме уг вера, шуисько. Со нош аслэсьтыз каре: «Оло, мон тонэ кышно басьто?» Уд, дыр, шуисько, мон укыр узыр, «кунянэ» но вань (со дырлы нырысетӥ картэным люкиськыса, Миндэрам Дарина нылыным бертӥ ни вал). Женяен тодматскеммы бере кӧня ке дыр ортчиз. Можга педучилищеын вожатой луыса ужакум, нош пумиським. Женяез вунэтӥськем ни вылэм. Маке тусыз туж тодмо кадь потӥз. Дорам лыктӥз но чупа-чупс сётӥз. Со ик луиз, лэся, эшъяськеммы. Собере Женя зэмос пиосмурт луэмзэ возьматӥз: секыт учырын юрттӥз. Милям юрт котырмы ӝуаз вал. Кытысь ке тодэм тылпу сярысь. Тур-пар вуизы эшъёсыныз. Нунал куспын вань ӝуам коръёсыз калтӥзы. Озьы Вуж Мӧнья кен луи.

— Вуж Мӧньяла ӵем вуылӥськоды-а?

— Отчы ми куно чотын вуиськомы. Женялэн мамаез «коркам шундымы пыриз, ачид ик сюрес шедьтӥд яке веразы-а?» шуыса серекъя. Женяелэн сузэръёсыз но монэ туж ярато. Куспамы тупаса улӥськом. Ог-огмы доры куное вуиськомы ке, милям сыӵе шулдыр луэ — серекъямысь ум дугдылӥське кадь.

— Нылъёстылэн маскаръяськон сямзы потылэ-а? Шорады учкыса, сцена вылэ уг курисько-а?

— Бадӟымез, Дарина 6-тӥ классэ ветлэ. Пичи дыръяз сцена вылэ кырӟаны поталляз, возьдаськонэз ӧз валалля. Та вакытэ кепыранэз сайказ ни, оло, бадӟымъяськыны выре. Пичиез, Каринамы, кепырась, востэм. Мон кадь чик но ӧвӧл. Кыкназы но концертэ ветлыны ярато, шумпото мынам «шоккетэмъёсылы».

Учыр тупаку, тау кареме потэ анаелы, мыным сомында юрттӥське со. Ӵош ужась эшъёсылы — валамзы понна. Сцена вылысь эшъёсылы — выль мылкыд сётэмзы понна. Кизэс жалятэк чабись учкисьёсылы — дунъямзы но яратэмзы понна.

Источник:

Филимонова И. О. Коркаямы шунды пыриз / Ирина Филимонова ; вераськиз Нина Шутова // Удмурт дунне. - 2019. - 28 марта. - С. 10, 15. - (Тӧр шорын).

За предоставление материала выражаем огромную благодарность редакции газеты "Удмурт дунне"