Глухова Галина Анатольевна

Лулыз тупаз фольклорен

Глухова Г.А.

Галина Глухова — фольклорез но литератураез эскерись, филология наукаосъя кандидат, УдГУ-ысь Удмурт кылосбуръя, финно-угроведениея но журналистикая институтлэн директорезлэн воштӥсез, Удмурт Элькунысь тодон-валан сётон удысысь дано ужась, пусъемын Удмурт Элькунысь Правительстволэн но Дышетонъя но наукая министерстволэн Данъян грамотаосынызы. Солэн лэчыт кылыз но жингрес серекъямез котьку мылкыдэз ӝуто.

— Галина Анатольевна, калыкедлэсь культуразэ яратон вордӥськем гурттэд бордысен потэ, дыр. Кытын тӥляд пичи дырды ортчиз?

— Мон вордӥськи Кез ёросысь Куасер гуртын. Гуртме син азям пуктыкум, котьку Кузебай Гердлэн «Гондыръёс» поэмаез тодам лыктэ: «Кыдёкын оло матын, туж пичи удмурт гуртын улӥллям кык пересьёс, улӥллям куанер соос…». Зэм, совето вакытэ куанер яке узыр сярысь валан ӧй вал, адямиос огкадьгес улӥзы, гуртмы зэм но котьку туж пичи вал. Бакча бере-а, ульчае-а потӥськод, кытчы гинэ уд учкиськы — соку ик синъёсыд нюлэс шоры мырӟисько. Али гуртмы бырон калэ вуэмын ини, 6 корка сяна улӥсез ӧвӧл. Гуртмы пичи бере, калык отын огазьын тупаса улӥз, ваньмыз сямен ужъёс но ӵош быдэсъяськылӥзы, юон дыръёсты но котьку дэмен ортчытъязы.

Мон бабушен будэмын — милям гуртамы садик но, школа но, магазин но, почта но ӧй вал. Азьло сюресъёс ӧй вал, ми сӥзьыл но тулыс, 2 километрез дэри коласа, школае ветлӥськом вал. Няньлы но арняяз одӥг пол сьӧр гуртэ ветлылӥм — со нянез Кезысь ваё, машина ӵемысь нӧдэ, ми сое кема возьмаськом. Собере 12-15 сукыриен уйин бертӥськом вал ини. Сьӧд нянь борды 1 яке 2 сукыри тӧдьы нянь сёто вал. Гуртэ бертӥськом но со тӧдьы няньлэсь нырзэ, вуэ месыса но песоке веттаса, вынъёсыным ӵошатскыса сииськом вал. Собере бабушмы песоклы чуланэ потэ но, сакыр кот яке кынмемын луэ ке, ну тышкаське вал ук: «Ой, та пиналъёс нош татчы кизэс вуттӥллям ведь!».

Мынам ноку но йырам ӧз шуккылы, гуртам кыӵе ке сям-йылолъёс, вашкала мадёнъёс вань шуыса. Куке мон студент дыръям нырысьсэ фольклорной экспедицие потӥ, малпай: мукет гуртъёсын адямиос сомында тодо, нош аслам гуртам мынӥ ке, мар отысь шедьтыны луоз? Аспирантурае пыри но, ӵапак гуртам мыныны малпамы. Калык пӧлын сомында тодон-валан улэ вылэм, мон сомында материал бичай! Аслэсьтым гурт калыкме эшшо но золгес яратӥ. Пичи дыръя валано ӧвӧл сое, малы ке шуоно тон будӥськод со культураен, традициосын артэ, со вань но вань кадь, со сярысь уд малпаськиськы. Юнме шорысь ӧвӧл ук, дыр, шуэмын: адями аслэсьтыз улон интызэ но, выжыоссэ но валаны кутске арлыдо луэмез бере. Соку адямиез гуртэз ялан бордаз кыске.

— Тӥ али университетын ужаськоды. Студентъёсты дышетон капчиен-а тӥледлы сётӥське?

Мон студентъёс пӧлын егит дырысеным ини. Нырысь университетын ассистентын ужай. Вань занятиосы мукет факультетъёсын вал, удмурт калыклэн традиционной культураеныз тодматылӥ. Тодӥсько на: исторической факультетэ заочникъёслэн группаязы занятие мынӥ, отын тросэз быдэ вуэм таза пиосмуртъёс вылӥллям, пӧлазы кӧня ке гинэ нылъёс. Студентъёсы юазы: тӥ, шат, милям дышетӥсьмы? Собере шуизы: «Ничего себе чувиха!» Нош мон со кылэз нырысьсэ кылӥ, гуртэ бертӥ но картэлэсь юасько: мар со сыӵе «чувиха»? Со валэктӥз ини. Огез студент юанъёсын тэбиниз, кин, пе, нырысетӥ удмурт выжыкылэз гожтӥз? Калык выжыкыллэн авторез луоз шат? Егит дышетӥсез озьы вуёмытыны малпаз, лэся. Мон солы шуи: «Мон тӥледыз уг кылӥськы». Но веранме азьланьтӥ.

Малпасько, студентъёс доры лыктӥськод ке, ноку но астэ соослэсь вылӥе пуктоно ӧвӧл. Одӥг кылын соосын вераськыны кулэ, соослэн эшсы кадь. Но со дыре ик студент но дышетӥсь вискысь гожез ыштыны кулэ ӧвӧл, туж матэ соосты лэзёно ӧвӧл. Со гож сӧриське ке, дышетӥсьлэн данэз быре. Тынад студентъёсты марлы ке умоезлы дышетэмед потэ ке, сое аслад улонысьтыд примеръёс вылын, яке кыӵе ке тупась учыр кылдыку, валэктоно. Нош юри вераны кутскиськод ке, одӥг адямилэн но кылзӥськемез уг поты, егит адямиез со тужгес но палэнтэ, мыным потэ. Мынам пие быдэ вуыны кутскиз но, мон туж шумпотӥ, егитъёсын ужасько шуыса, угось котьку аслам пиеным огъя кыл шедьтӥсько. Котырам ялан студентъёс. Мынам но мылкыды егит. Соин асме шудо шуыны быгатӥсько. Картэ кардиологлы дышетскемын, вань улонзэ «скорой помощьын» ужамын, берло дыре поликлиникае выжиз. Нуналысь нуналэ со доры висисьёс, пересьёс лыкто, котькудӥз тазалыкез вылэ ӝожтӥське, со висён сярысь гинэ кылэ. Туж паймисько чидамезлы, ужзэ яратэмезлы. Со шудо адями, малы ке шуоно адямиосты эмъяны талант солы Инмарен сётэмын.

— Егитъёсын гинэ ӧвӧл, арлыдоосын но кусып возьыны быгатоно, угось тӥ фольклорной экспедициосы ӵем потаськоды.

— Пересьёсын ужаку, психолог луыны кулэ, вань чыры-пырыосты котыр ласянь чаклано. Котькыӵе адями пумиське, куд-огеныз капчи вераськыны, мукетыныз — секытгес. Мон студентъёслы но, экспедицие потыкумы, шуисько: пересь доры пыриды ке, «вералэ ай мыным выжыкыл» шуыса кутсконо ӧвӧл. Соослэн соку ик мылкыдзы куашка, вераськемысь дугдо, борддор сьӧры ватско кадь. Пересьёс туж ярато саклык висъямез. Пересьёсын соослэн улон-вылонзы, шугъяськонъёссы сярысь вераськыны кутскиськод ке, соос шунало, усьтӥсько тыныд. Мукет ласянь, конечно, сямъёсты чаклано. Ӟучъёслэн но, удмуртъёслэн но, бигеръёслэн но асьсэлэн аспӧртэмлыкъёссы. Тодӥсько на, кызьы аспирантураын дыръям нырысьсэ потӥмы Балезино ёросэ староверъёс доры. Пумиськимы пересь кышномуртэн, туж умой вераськимы, со милемыз корказ ӧтиз. Пырим гинэ но — шорамы гын сапег лобыса вуиз. Номырзэ ум валаське. Ойдо потом, шуэ пересь. Солэн кузпалыз — старовер — гур вылын кылле вылэм, нош староверъёс туж ик уг ярато, палэнысь адямиос корказы пыро ке. Соин туж чакласьконо.

Одно ик пумисько мыло-кыдо пересьёс, соос сям-йылолъёсты кутсконысеныз пумозяз тодо но егитъёслы ваньзэ вераны-кельтыны тыршо. Сыӵе адямиос доры эшшо но эшшо мынэм потэ. Сыӵе мадьыны, кырӟаны-вераны быгатӥсь муртъёс трос ӧвӧл ке но, пумиськыло ик. Жаляса верано, соосын вераськыны дыр котьку уг тырмы. Тани Кияса ёросысь Карамас-Пельгаысь Ӝакы апаез но верано ке — сыӵе адями улонысь кошке ке, малпаськод: нош ик быриз удмуртъёслэн одӥгез энциклопедизы, сьӧраз нуиз вашкала дырысен кылем тодон-валанзэ, кырӟанъёссэ. 2 ар талэсь азьло, куке берпуметӥзэ Ӝакы апаен пумиським, со ӝожтӥськиз: мынам сомында веранэ на, мынам сыӵе вераськеме потэ. Верамды потыны кутскиз ке, гожъялэ, шуи. Николай Анисимов тодосчи сое ватыны ветлӥз но шуиз: туж трос, пе, гожтыса кельтэм материалэз. Сыӵе адямиос сярысь вераны, гожъяны кулэ, материалъёссэс люкаса поттоно. Ӟуч фольклористикаез учконо ке, отын нимысьтыз исполнительёс сярысь сомында книгаос поттэмын. Асьмелэн малы ке но соос палэнэгес кылё.

Ӵош ужась эшъёсыныз

Асьмеос шудоесь со ласянь — туннэ но люканы-гожтыны быгатӥськом на традиционной культураез. Нош кызьы со али воштӥське, мар али вылез лыктэ удмуртъёс пӧлы — со сярысь ум дыртӥське вераськыны. Куд-ог дыръя малпаськомы: ма, культурамы ӟучомемын ини, со милемлы тунсыко ӧвӧл… Куддыр асьсэос пересьёс но озьы шуо. Нош ӵапак али адӟиське, кызьы азьланьтӥське культура, маиз воштӥське, маиз кыле — со бордын тунсыко ужаны.

— Нош ку тӥ фольклорен тунсыкъяськыны кутскиды?

— Ми тодмо фольклористэн, кылбурчиен Даниил Александрович Яшинэн Якшур-Бӧдья ёросысь Ӵошкыт гуртэ экспедицие потамы. Со нырысетӥ курс бере вал, озьыен, одӥг ар ӵоже дышетсконлы со кыӵе ке йылпумъян луиз. Куке экспедицие быдэс группаен потӥськод, ог-огдэ умойгес валаны кутскиськод, кыӵе луэмдэ шӧдӥськод. Мыным потэ, ӵапак Даниил Александрович милемыз огазеяны быгатӥз, дышетӥз, кызьы пересьёсын вераськоно, кызьы астэ возёно, материал люкано. Мыным ваньмыз со туж яраз. Ми 2 арня ӵоже, ӝытъёсы гуртысь гуртэ ветлыса, олокӧня концерт возьматӥмы. Туж умой тодӥсько на одӥг пересез, солы 80 арес пала вал, дыр. Солэн синмыз уг адӟы, но пельыз ӟеч кылэ. Огназ улэ вал. Со туж трос кырӟанъёс милемлы кырӟаз, сюлэмме бугыртӥз.

Дышетскыкум фольклоръя дипломме гожъяй Д. Яшинлы ик, но соку ӧй малпа, научной ужен выро шуыса. 5-тӥ курсын дышетскыкум, Даниил Александрович дорам лыктӥз но вераз, монэ кафедрае кельтыны малпало шуыса. Мон вази, асме наукаын ужасен уг адӟиськы шуыса, гурт дышетӥсен гинэ.

Университетэз йылпумъяме бере аслам ёросысьтым ик Пужмезь гуртысь школае мынӥ — соку выпускникъёслы ужан инты азьлапал юнмато вал. Мыным школаын но туж кельшиз, нылпиосы мынам туж аспӧртэмлыкоесь вал. Мон 5 часозь школаын ужасько вал, собере клубе мынӥсько, егитъёсын спектакльёс пук-тылӥм. Нагрузкае бадӟым вал, но семьяед ӧвӧл ке, тон быдэсак ужад выемын, со туж трос уг поты вал. Но улонын чакламъя гинэ ваньмыз уг луы вылэм: ар школаын ужаме бере нош ик университетэ вуи. Кузпалэ Ижын мединститутын дышетске на вал бере, мыным но берен городэ лыктоно луиз.

— Фольклорез эскеронды мар бордысен кутскиз?

— Тодӥсько на, традиционной культурая занятиос нуыкум, пушкам пумитъяськон вал, мадиськонъёсты, лэчытверанъёсты, визькылъёсты «фольклорлэн пичи жанръёсыз» нимало шуыса. Одӥг визькылын гинэ сомында пуштросэз, визьмо верамез! Кыӵе со пичи жанр? Кызьы ке огпол филология наукаосъя доктор, фольклорез эскерись Татьяна Григорьевна Владыкина кафедраямы пыриз, мон шуисько: Татьяна Григорьевна, мынам юанэ вань, малы ке но нокызьы сюлмы уг буйга «пичи жанр» шуэмлэсь. Со дэмлаз: ма, со самой ӧжытэз быдэс лекция луыны кулэ, пыр, пе, аспирантурае дорам.

Мон али но туж тау солы шуисько, ми солэн нырысетӥ аспирантъёсыз вал. Уг тодӥськы, улонэ кыӵе луысал. Мынам диссертацие удмурт культураын пӧртмаськонлэн символикаезлы сӥземын вал, та тема сэрттэмын-пертчемын чик ӧй вал на. Мар со, кудласянь сое учконо, мар кароно соин? Нокытын материал ӧй вал. Но темаеным мыным удалтӥз. Выриськод ке сям-йылолъёсын, обрядъёсын, со троссэ валаны юрттэ — кыл радлыкез но, жанръёсты но, улонлэсь кудласянь бергамзэ но. Гуртъёсы потаны кутским но, мон удмурт калыкез, солэсь культуразэ, сям-йылолъёссэ эшшо юнгес яратыны кутски. Адямилэн пушказ, йырсазяз сомында тодон-валан улэ вылэм, сое гожъяса вуттыны гинэ кулэ. Ӵапак мынам ужан вакытам со ваньмыз кыре потыны кутскиз, 1990-тӥ аръёсы удмурт национальной движение выльысен улӟыны кутскиз. Совето вакытэ атеистической воспитание вал ук, калык аслэсьтыз сям-йылолъёссэ лушкем ортчытъяны, утьыны тыршиз. Нош 1990-тӥ аръёсы адями со сярысь ваньмызлы кылымон вераськыны кутскиз. Со традиционной культуралэн выльысен вордӥськонэз вал, дыр.

— Ӵошатоно ке со вакытэз но туалазэ, зол-а воштӥськиз калыклэн культуразэ тодэмез?

— Али зэмос (аутентичный) фольклор сярысь туж трос верасько, сое вӧлмытыны кулэ, шуо. Сое вӧлмытоно ке, туж ӟеч тодыны кулэ пӧртэм чыры-пырыосты. Табере вашкала культура ӵем дыръя калык дорозь вуэ сцена вылысен. Пересь муртъёс сям-йылолъёсты возьматыны сцена вылэ пото ке, соос шоры шумпотыса учконо, малы ке шуоно соос тодо, кызьы асьсэзыз возьыны. Пересь муртлы номыр валэктоно ӧвӧл, со тодэ, кытын мар кароно но малы со озьы. Оло, малызэ уг но тоды, но арлыдоос будэмын со традициын. Нош куке «лякем визьёс» пото — егит адямиос, мынам ёзъёсы — со юромо малпам кадь адӟиське. Тани Брангурт песянайёсты басьтоно ке — малы соосты калык яратӥз? Соос кырӟало озьы, кызьы соос быгато, соос юри дышетэмын ӧвӧл. «Евровидение» дыръя ик, шуом, куке соосты султытӥзы гур борды тыбырынызы, соос ӟудӥзы, угось калык культуралы со уг тупа, но куке перепечъёссэс киязы кутӥзы, эркынак луизы. Али асьмеос чакланы кулэ, кызьы калык культура азинске, мар кошке, мар кыле но кызьы со ваньмыз ортче. Но специалистъёслэн тырмымтэзы шӧдӥське.

Али асьмеос ӵемысь, сям-йылолъёслэсь пуштроссэс тодытэк, мар но со выриськом. Тани Вожодыре но пӧртмаськыса ветлӥськом — со ини шулдыръяськонлы пӧрмемын. Нош кыӵе солэн вашкала пуштросэз?

Пӧртмаськон — со адямилэн улоназ нимысьтыз вакыт. Удмуртъёслэн вожояськонзы, сӥзьылысен кутскыса, тулысозь кыстӥське вал. Тол вожояськон — туж аспӧртэмлыко сям-йылол, вашкала дыръя солэн туж мур пуштросэз вал. Ымусьтонысен Йӧвылэсултонозь вожоос — лек кужымъёс — ву улысь пото, асьме доры лыкто. Шур — со сопал дуннеысь тапал дуннее сюрес. Та вакытэ ваньмыз сураське-пожаське, дуннеос вискысь гож усьтӥське. Соин ик адямиос та нуналъёсы тунаськизы, сопал дуннеысь тодон-валанэз басьтыны луэ вал шуыса, оскизы. Вожоос — кулэм муртъёслэн лулъёссы, соин ик соос тусбуйтэмесь, ымныръёссы ватэмын. Соин азьло дыръя юри туй бамъёс — маскаос — лэсьто вылэм, со кулонлэн тодметэз вал. Яке ымнырзэс суэн яке мелэн зырало вал, валлэсь яке скаллэсь юри маскаоссэс лэсьто вал. Та радэ ик бӧрысь пӧртмаськонэ пырыны кутско солдатлэн яке выль кенлэн дӥсьёссы. Со ваньмыз возьматэ мукет луэмез. Берло, куке улон-вылонысь традиционной костюм воксё ышыны кутске, сое но дӥсялляны ӧдъязы. Вань со маскаос но персонажъёс одӥг радын сыло, сопал дуннелэн тодметъёсыз луо. Конечно, берло вакытэ, адямиос дӥсясько ке но, сыӵе пуштросэз соос йыразы уг ни возё. Но мукет ласянь, асьмеос котькуд нунал дӥсьмес воштӥськомы, соин валче мукет луиськомы: ужын одӥг дӥсен, дорын — мукетыныз, озьыен, статусмес воштӥськом, пӧртэм рольёсты шудӥськом. Юнме шуэмын ӧвӧл: быдэс дунне — со театр, асьмеос — шудӥсьёс. Алигес аслам но выль роле кылдӥз, шуыны луоз, — табере мон песянай, кылем арын шуркынмонэ нуноке вордскиз.

— Фольклорез бичакуды, олокыӵе но паймымон мадёсъёсты кылзӥськемды вань, дыр. Нош асьтэлэн улонады паймымонэз вал-а?

— Пиме ваеме бере быдэс ар висьыса улӥ. Врачъёс доры мынӥсько но, соос номыр уродзэ уг шедьто, улоназ чик но висьымтэ муртлэн кадь тазалыкты, шуо. Больницаысь бертӥсько гинэ — мыным урод луэ, кужмы чик ӧвӧл. Огпол анае шуиз тятяелы: мын ай нылмес сьӧр гуртэ нуллы, отын тодӥсь бабуш вань, оло, толкез луоз. Уг тодӥськы, оло, чигиськон калэ вуэменым ини мон ачим солы сокем оски, но со пересь доры ветлэме бере висёнэ ортчиз, собере врачъёс доры но ветлэмысь дугдӥ. Мар со вал? Калыкын шуо: тунасьлэн но висисьлэн лулзы тупа ке, висён ортче, пе. Мукет учыръёсын но та шонер, дыр: матысь адямиосыныд, уженыд лулыд тупаз ке, ваньмыз быдэсмоз.

Источник:

Глухова Г. А. Лулыз тупаз фольклорен / Галина Глухова ; вераськиз Анастасия Шумилова // Удмурт дунне. - 2019. - 17 янв. - С. 10, 15. - (Тӧр шорын).

За предоставление материала выражаем огромную благодарность редакции газеты "Удмурт дунне"