Малых Лия

Лия Яковлевна Малых - удмурт гожъяськись, Удмурт Элькунысь сӥё-дано журналист.

Улон сюресэз

Лия Малых вордскиз 1960-тӥ арын 14 южтолэзе Шаркан ёросысь Камышево (Малый Казес) гуртын. Атаез начальной классъёсын дышетӥсь вал, нош анаез вань улонзэ колхозын ужаз. Семъяязы тямыс нылпи будэтӥзы, Лия вал сизьыметӥез. «Ёрмысагес ке но улӥм, коркан котьку кузёяськиз ог-огдэ гажан», – тодаз вае Лия Малых.

1975-тӥ арын йылпумъяз 8 классъем школаез, 1977-тӥ арын – Быгиысь шор ёзо школаез.

Пичи дыръяз ик туж яратӥз лыдӟиськыны. «Библиотекаысь вань книгаосты лыдӟи, дыр. Тужгес яратылӥ выжыкылъёсты. Яратылӥ гожъяны сочинениос. Ӟуч кылъя но литературая дышетӥсьмы Агния Михайловна Петрова зол куронъёс пуктылӥз, тунсыко темаос, урокез нуон амалъёс шедьтылӥз, пӧртэм сямен малпаськыны дышетылӥз…», – тодаз вае Лия Яковлевна. Нош Быгиын дышетскыкуз удмурт кылъя дышетӥсез Екатерина Александровна Зорина Удмурт университетэ дышетскыны мыныны бурдъяз.

Школаез йылпумъяса, со арын ик Лия пыриз дышетскыны Удмурт Кун университетысь филологияя факультетлэн удмурт отделенияз. Татын дышетскыкуз «Советской Удмуртия» газетысь литературной объединение ветлӥз, синмаськиз журналистлэн ужезлы. Татын уго со вакытэ ужа ни вал апаез – Людмила Хрулёва.

1982-тӥ арын, университетэз йылпумъяса, «Советской Удмуртия» газетын корректорлэсь ужзэ быдэсъя. 1990-тӥ аре выже лулчеберет ёзэтэ корреспондент луыса. Кема аръёс ӵоже Лия Яковлевна дасяз но лэсьтӥз арнялы быдэ потӥсь «Удмурт арня ӝытазе», «Берекет», бӧрысьгес «Наталь» но пинал лыдӟисьёслы сӥзем «Шунды», «Пичи куараос» бамъёсты.

1997-тӥ арысен оскизы улон-вылон ужпумъёсъя отделэн кивалтыны. Журналист мыло-кыдо гожъяз социальной ужпумъёслы сӥзем статьяос, шуге-леке шедемъёс сярысь материалъёс, трос чиданэз чидам адямиос сярысь очеркъёс. Газетын материал потэм бере редакцие жингыръязы, геройёс сярысь юаськыса, тау карыса.

Лия Яковлевна туж тупа но та быръем удысэзлы. Утчаськись, учырез пӧртэм сямен возьматыны быгатӥсь, котькытчы вуись.

Журналистлэсь ӟеч тыршемзэ редакциын синйылтытэк ӧз улэ – 1998-тӥ арын солы сётӥзы Удмуртиысь дано журналист ним.

Арлыдоослэн, ветеранъёслэн, нылкышноослэн сюлмаськонъёссы сярысь гожъям сяна, Лия Малых мыло-кыдо пыриське егитъёсын ужан политикае. Газетын вылысьтыз вылаз радъясько тунсыко конкурсъёс, усьтӥське нимысьтыз «Шунды» бам, трос уж нуиське пиналъёс пӧлын Атыкай музъемез гажан мылкыд пыӵатонъя. Со понна 2007-тӥ арын Россиысь Правительство бордын ужась военной историко-культурной центр удмурт журналистэз пусъе «Патриот России» медален.

Алнашысь нылпи юртын "Ӟеч уж" ужрад

Газетысь нылкышноослы сӥзем сэрегез оскемзы бере со пӧртэм амалъёс утчаны кутскиз: кызьы материалъёсты тунсыко гинэ ӧвӧл, пайдаё кароно? Бадӟым уж лэсьтӥз Лия Яковлевна татын но. Та проект туннэ но гуртоос понна тужгес кулэен лыдъяське. «Удмурт дуннеын» выльысь улӟе «Пинал куараос» бам. Эшшо кӧгя ке улыса, кылдэ выль малпан: лыдӟисьёсты, гожъяськисьёсты будэтоно покчи дырысенызы. Озьы кылдӥз «Ерпечкаос» сэрег. Ваньмаз вуттӥське Лия Яковлевна.

Л. Малых трос кужымзэ сётэ общественной ужлы но. Сое бырйыло пиналъёслэн «Шунды» огазеяьконзылэн правленияз но, Удмурт Элькунысь сӧсыр луэмъёслэн президиумзылэн ёзчие но, Удмурт нылкышно кенешлэн правленияз но. Отын со мыло-кыдо пыриське мукет малпанъёсты но улонэ пыӵатонэ.

Удмурт калыклэсь культуразэ утён но азинтон удысын бадӟым уж нуэмез но чеберлыко но мур пуштросо литературной произведениос кылдытэмез понна 2006-тӥ арын Лия Яковлевна пусъемын Ашальчи Оки нимо премиен.

Озьы кылдӥз, нылаш ӧлексы вордскиз – инкузь жалям солы паллян ки кузьманы. Трос гинэ шуг-секытъёсты вормоно луиз нылкышнолы: пинал дыръя эшъёсызлэсь серем каремзэс но, пиналысен огназ кыльса нылзэ будэтэмез но… Но «адями аслэсьтыз улонзэ ачиз куэ», – шуо калыкын. Пичи дырысеныз Лияез дышетӥзы юн луыны, аслад кужымедлы но быгатэмедлы оскыны. Туннэ нуналозь но со тау каре атаезлы улонэз чеберен адӟыны дышетэмезлы. Улытозяз Лия Яковлевна кӧня пол меда малпаз: тыныд уг оско, нош тон, ваньмызлы пумит нюръяськыса, шуг-секытъёсты вормыса, калыкез но, астэ но шумпоттӥськод – кыӵе умой!

Гожъямъёсыз сярысь

Лия Малых арлыдоосыз писательёс пӧлы уг ке но пыры, со сярысь егит, алигес гожъяськыны кутскись автор но уд шуы. Корректорын ужакуз, Лия сак эскерылӥз пӧртэм материалъёсты. Отысь янгышъёссэ гинэ ӧз адӟы, озьы ик синмаськыса лыдӟылӥз мӧйы но пинал авторъёслэсь чеберлыко произведениоссэс, ачиз но гожъяны кутскиз газетной материалъёс, веросъёс, юморескаос, выжыкылъёс. Нырысетӥ литературной произведениосыз печатласькизы «Инвожо», «Кенеш», «Кизили» журналъёсын, «Дась лу!», «Советской Удмуртия» газетъёсын но «Инӟарекъян» (1991) дэмен сборникын. «Чебересь но син азе пуктымонэсь Л. Малыхлэн веросъёсыз-выжыкылъёсыз. Вылтуссыя но пуштроссыя соос мультфильмъёслы матынэсь, удмурт мультфильмъёслы («Иви но Нюлэсмурт», «Эктӥсь Кизили но пичи ныл»), соосъя синмаськымон суредъёс но кылдытыны луоно. Но авторлэн тужгес но бадӟым кужымез – пичи геройёслэн лул-сюлэмазы пырыны быгатон», – тазьы гожтӥз филология наукаосъя кандидат В. Шибанов «Инӟарекъян» бичетлы азькыл гожтыкуз. 1997-тӥ арын «Удмуртия» книгапоттониын «Эктӥсь кизили» пиналъёслы выжыкылъёсын бичетэз потӥз.

«Лия Малых ас удыссэ шедьтӥз – нылпиослы веросъёс, выжыкылъёс гожъя. Мыным яра солэн, отчы-татчы тэтчатэк, ас куаразэ утчамез, кужымзэ кыдатыны тыршемез. Та писатель огшоры, но со дыре ик яркыт образ сётыны быгатэ, солэн гожъямъёсыз пыр мон удмурт кыллэсь луонлыкъёссэ адӟисько. Нош та вормонъёсыз Лиялэн, мон сямен, чылкыт сюлэмо, пӧяськисьтэм луэмысьтыз, дан сярысь сюлмаськытэк литература понна мыло-кыдо тыршемысьтыз пото».

Лия Малыхлэн выжыкылъёсаз туж валаса пыртылэмын мифъёсысь веранъёслэн, югдуръёслэн кыӵе ке люкетъёссы, дунне шоры учкон сям-йылолъёслэн чалепъёссы но отысь персонажъёс. Гожъямъёсаз адями но Инкуазь, тапал дунне но сопал дунне, зэмос дунне но малпам дунне, таиз дунне но пичи геройлэн кыӵе ке но шекъёсыныз йырин кылдэм дунне ваче пумит вуо. Геройёсыз – пичи нылъёс но пиос. Котькудзылэн нимзы вань. Озьы ик син шоры йӧтэ: автор котькугес ик пичи лыдӟисеныз кенеше, соосты малпаськытэ, геройёсызлэсь ортчоно сюрессэс син шоразы пуктыны косэ. Лия Малых выжыкылъёссэ капчи, пиналъёслы валамон кылын гожъя, лыдӟисьёслы кельшымон кылсуредъёс но геройёс шедьтыны тырше. Пӧртэм чеберманъёс мадёнлы медам люкетэ, пичи муртлы соос пыртӥ пӧртмам дуннее вуыны шуг медам лу.

Кулэ на-а туала пиналлы выжыкыл? Одно ик. Солэсь чеберез маке вань шат? Выжыкылъёс уродлы уг дышето, пиналэз уг кӧшкемато, соос учыръёс пыр покчиосты улонэз, ӟечез валаны дышето.

Тросэз сюжетъёсы басьтэмын улонысь учыръёсысь. Выжыкыкыл гожъяны, нылпи дуннеез возьматыны юрттӥз Юля нылы. «Боко но Моко» выжыкылысь геройёс ас сярысьтым потӥзы. Боко – визьнодо, пӧртэм учыръёсысь потыны быгатэ. Моко – ерпечка, олокыӵе но юмокъёсы шеде. Мон таӵе но, сыӵе но луисько. Но Боко вормегес кадь…

Нылпи дуннее эшшо выёнлэн мугез луиз шудо учыр – Лия Яковлевна луиз песянай. Со пичи нылашлы ӝытбыт выжыкылъёс лыдӟылӥз, ӵемысь ачиз соосты малпалляз – шаян героез табере син азяз. Нылпи мар гинэ уг вераськы – кылзы гинэ сое, нуналлы быдэ книга гожтымон. Лия Малыхлэсь вань гожъямъёссэ лыдӟыса валаськод: удмурт нылпи литературае туж кибашлы мадёсчи, тунсыко геройёс, яркыт суредъёс но усто малпаса сюжет гердъёс, пужыос пыр будӥсь нылпиослы ӟеч сямъёс пыӵатон сярысь сюлмаськись писатель лыктӥз.

Премиосыз

Удмурт Элькунысь егитъёсын ужан комитетлэн данъян грамотаез, 1998

Быдэс Россиысь сӧсыр луэмъёслэн огазеяськонзылэн данъян грамотаез, 1998

Ашальчи Оки нимо премилэн лауреатэз, 2006

«Патриот России» синпель медаль, 2008

Библиография

Книгаосыз

Эктӥсь кизили : нылпиослы выжыкылъёс / суредаз В. Михайлов. - Ижевск : Удмуртия, 1997. - 42 с. : ил.

Шудберган : веросъёс, юморескаос, бöтьыртонъёс, мöйыослы выжыкылъёс, сценкаос. - Ижкар : Инвожо, 2010. - 94 с. : ил.

Статьяосыз

Амало Петыр : сценка-бӧтьыртон // Удмурт дунне. – 2006. – 11 апр. – С. 8.

Басик, Яша но Маркиза : рассказы о кошках // Удмурт дунне. – 2006. – 24 окт. – С. 7.

Боко но Моко : выжыкыл-повестьысь люкетъёс // Удмурт дунне. – 2009. – 24 июля. – С. 12 ; 16 окт. – С. 12–13.

Боко но Моко : пичи коркакузёос сярысь мадёсъёс // Удмурт дунне. – 2009. – 11 дек. – С. 12 ; 2010. – 16 июля. – С. 13.

Боко но Моко пи потто : одӥг суредэн пьеса // Кенеш. - 2013. - № 9. - С. 92-95.

Ваменэс мунё // Азвесь кышетэн толэзь : веросъёс : семьяын лыдӟон книга / люказ но радъяз В. Н. Ившин. – Ижевск, 2007. – С. 78.

Васька коӵыш но Чульым шыр : арлыдоослы выжыкыл // Удмурт дунне. – 2010. – 9 июня. – С. 6. – (Шудэлэ тӥ, серектэ).

Вералоз – кортӵогалоз // Удмурт дунне. – 2011. – 28 янв. – С. 15. – (Мынясь куно).

Вогань / иллюстрациез Вася Мустаевлэн // Кизили. – 2010. – № 3. – С. 8–9.

Возьмаса кать быриз ни ; Дуно карт : бӧтьыртонъёс // Кенеш. – 2006. – № 3. – С. 103–105.

Дурыстэм шумпотон ; Кытысь нуныосты ваё ; Кап-кап-кап!.. ; Синпӧртмась бодые луысал ке... // Ӟардон : прил. к газ. "Пригород. вести". – 2008. – 4 апр.

Ӟечбур, выжыкыл! : анай-атаен лыдӟон книга / суредъёсыз В. Жигаловалэн // Вордскем кыл. – 2008. – № 9. – Вкл. л. : ил. – ("Вордскем кыллэн" книжкаез).

Йыртӥян ; Дуно карт : бӧтьыртонъёс // Удмурт дунне. – 2010. – 17 марта. – С. 7. – (Шудэлэ тӥ, серектэ).

Йырчукин дунне : мӧйыослы выжыкыл // Кенеш. – 2005. – N 10. – С. 105-108.

Кин валтоз вуись арез // Удмурт дунне. – 2010. – 30 дек. – С. 15. – ("Выль ар пырыос" конкурсэ).

Киосам – кужым // Удмурт дунне. – 2010. – 3 дек. – С. 12. – (Ерпечкаос).

Кылзӥськись папу : верос // Кизили. – 2013. – № 7. – С. 6.

Кырыж учкод – мыжык сиёд : юмореска // Удмурт дунне. – 2007. – 24 авг. – С. 15. – (Шӧкыч).

Мӧйыослы выжыкылъёс // Кенеш. – 2010. – № 3. – С. 11–14.

Пӧртмаськись кыз : одӥг действиен сценка // Удмурт дунне. – 2010. – 22 дек. – С. 6. – (Шудэлэ тӥ, серектэ)

Ӧрекчи Йӧӟузыри / иллюстрациез Н. Быковлэн // Кизили. – 2007. – № 7. – С. 10–11 : рис.

Скал кенеш : уйбыртон / суредаз В. Беломорских // Удмурт дунне. – 2008. – 30 дек. – С. 15 : ил. – (Шӧкыч).

Уксёен басьтэм висён ; Поромытӥсь пыран ; Пиньтэм шумпотон : мыдланес арифметика // Удмурт дунне. – 2010. – 24 дек. – С. 15. – (Шӧкыч).

"Шӧкыч" но гордэктэ ; Пегась огкыл : Рашит сярысь веранъёс // Удмурт дунне. – 2007. – 7 сент. – С. 15. – (Шӧкыч).

Шудэн шудон ; Синтэм яратон : нылкышноос сярысь веранъёс // Удмурт дунне. – 2011. – 25 мая. – С. 7.

Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.