Волкова Татьяна Геннадьевна

Султыса чабизы наукая 12 докторъёс

Татьяна Волкова – кылосбур наукаосъя кандидат, Дышетӥсьёслэсь тодон-валанзэс будэтонъя институтысь удмурт филологияя но йӧскалык кылъёсъя кафедраысь доцент. Со тодэ: ваньмыз потэ дышетӥсь бордысь. Кытын удмурт кылъя дышетӥсьёс ас удыссэс, нылпиосты лулысь-сюлмысь ярато, отын анай кылэз дышетонъя нокыӵе шугъяськонъёс уг кылдо. Тае Татьяна Геннадьевна ас вылаз шӧдэ, со кема аръёс ӵоже ужамын студентъёсын, али урокъёс нуэ школаын, визь-кенешен юрттэ дышетӥсьёслы. Солэсь урокъёссэ келлямзы уг поты Кун Кенешысь депутатъёслэн но.

- Татьяна Геннадьевна, тӥледлы туж бадӟым уж оскемын – Кун Кенешысь депутатъёсты удмурт кыллы дышетӥськоды. Сыӵе дано-нимо муртъёслы урок нуыны дӥсьтон кулэ, малпасько.

- Та курсъёсты нуыны ӵектӥз йӧскалык политикая министрлэсь ужзэ быдэсъясь Лариса Буранова. «Уг» шуыны ӧй быгаты. Нош нырысетӥ занятие мон, зэмзэ но, ту-уж кепыраса мынӥ. Соку уг тодӥськы на вал дышетскисьёсме но. Телевизор пыр адӟылӥсько, но соос ужын одӥг, занятиосын мукет луыны быгатозы ук!

Юрттӥз опытэ! Урокме кутски гинэ – вань куалекъянэ ортчиз. Дышетӥсьлы шӧдоно: кыло-а, валало-а тонэ. Адӟыны кулэ, мар соослы тунсыко. Тон котыр ласянь адӟем карымон луыны кулэ. Пӧртэмлыкез ӧвӧл: сылӥськод-а депутатъёс, дышетӥсьёс яке нылпиос азьын. Котькуд вамыштэ чаклано, тыбырын сылоно ӧвӧл – берытсконо луэ ик ке, вераськоно озьы, котькуд кылдэ мед умой-умой кылозы шуыса. Пӧрмытсконо но валаса! Калыкын юнме уг верало, вылды: пумитало дӥсья...

Кун Кенешын нырысетӥ занятие 24 мурт лыктӥз вал. Но бадӟым коллективен секыт ужаны шуыса, удмурт кылэз тодӥсьёслы мон ӵектӥ ветлытэк. Ӧй алы – туж потэ ке, ветлэ ик, шуи. Но, малпасько, занятиосысь соос трос-а меда басьтысалзы, угось программае чакламын удмурт кылэз воксё тодӥсьтэмъёслы. Нош али гинэ кылэз дышетыны кутскисьёс асьсэды лябен шӧдыны быгатысалзы. Улонын азинлыко адямиослэн котькытын азинлыко луэмзы потэ. Депутатъёс пӧлын трос сыӵеос, кудъёсызлы, зэмзэ но, удмурт кыл туж тунсыко. Кылсярысь, Светлана Петровна Кривилёвалэн одӥг занятиез но кельтэмез уг поты. Лыктыны уг быгаты ке, одно жингыртэ, оло, дышетсконмес мукет дырлы выжтом, шуэ. Наталья Алексеевна Судариковалэн филолог луэмез туж шӧдӥське. Юанъёсыз но солэн муресь, пӧртэм кылъёслэсь грамматиказэс ӵошатэмез потэ. Вань трос мукетъёсыз но, кудъёсыз удмурт кыллэсь гурзэ шӧдыны кутскизы ни.

Дышетсконмес гужемлы вис карылӥм, но октябрьысен нош ик азинтом.

- Тодӥсько, мукет группаосын но удмурт кылэз нуиськоды на, кинъёсгес лыкто отчы?

- Дышетӥсьёслэсь тодон-валанзэс будэтонъя институтын ужасько бере, отын кылем арын кык группае вал. Одӥгаз ветлӥзы Ижысь мылкыд карисьёс. Берлояз группаям самой егитэз вал 11-тӥ классын дышетскись нылаш, школаязы, пе, удмурт кылъя урокъёс уг нуисько. Анаез удмурт, соин ик кылэз дышетэме потэ, шуиз. Тужгес мӧйыез вал 75 аресъем Александр. Таиз чылкак ӟуч. Но бускельёсыз, пе, удмуртъёс. Эшшо удмурт гуртын тодмоосыз вань на. Соослы сюрприз лэсьтэме потэ, шуиз. Нырысь дышетскыны туж секытэн кутскиз. Кытӥ-отӥ уг вала ни ке, немец кылын вазиське вал – Германиын службазэ нуэм. Немец кылэз дышетӥ бере, мон но солы пумитаз вазисько. Озьы каллен-каллен выжим удмуртэ. Сюрприз пӧрмиз!

Удмурт кылэз дышетонъя группаосын ужаны мон кутски ай, Глазовысь пединститутын дышетыкум. Нырысь соосты радъяз вал Борис Каракулов тодосчи, институтын ужасьёс отчы ветлӥзы. Собере кӧня ке дыр ӵоже та курсъёсты радъянын вис вал. Та уж борды выльысь басьтӥським – мон но Ольга Никифорова, ӵош ужась эше. Нырысетӥ группаямы ик удмуртэз дышетӥзы Глазов ёрос администрациын ужасьёс. Ёрослэн йырыз Владимир Терский таӵе ӵектонэн вазиськиз, курсъёсы быдэс командазэ вайиз. Администрациын югдур чылкак воштӥськиз, шуизы. Вазен, пе, удмурт специалистъёссы анай кылзэс поттылыны кепырало вал – соос дӥсьтӥсесь луиллям, йыръёссэс ӝутӥллям.

- Дась программаосъя ужаськоды-а?

- Ми сое Ольга Никифороваен ик дасямы. Али но со отын ик та ужез азинтэ. Тросэз дышетӥсьёс, удмурт кылын вераськыны дышетскыкузы, укыр трос саклык висъяло грамматикалы. Но опыт люкаськемъя валаськод ук: уноезлы дышетскон секытэн сётӥське. Ми занятиосын тросгес вераськиськом, доразы лыдӟиськыны курисько. Котькуд урокез аспӧртэм карыны турттӥсько, час куспын кӧня ке темаосы но потыса вуиськом.

- Тӥ йылпумъямын Удмурт кун университетэз. Ватонэз ӧвӧл: отын методикалы ӧжытгес саклык висъяло...

- Зэмзэ но, Удмурт кун университетын теориез зол сёто, практикаез ӧжытгес. Соин ик ужаны кутскыкум аслым синтэм коӵыпши кадь потӥсько вал. Яке сапёр кадь-а. Одӥг вамыш лэсьтӥськод – а-ха: шонер! Котьку ик шонер ӧз пӧрмылы. Туж яратыны кулэ сое, мае лэсьтӥськод. Соку одно ик ваньмыз пӧрме! Нокыӵе мугтэк занятиосме кельтӥсьёс ӧвӧл – мон понна со туж дуно. Доразы ужзэс лэсьтыса уг вуо ке, ватскыса уг пуко, вождэс эн поттэ, Татьяна Геннадьевна, шуо, ӧм вуттэ, пе. Мон валасько ук соосты – дорын сотэк но ужъёс трос. Но тазьы гажаса вазиськемзы но сюлэмме шумпоттэ. Туж яратӥсько усьтэм сюлэмо адямиосты, котькыӵе уж борды мыло-кыдо басьтӥськисьёсты.

- Асьтэос но пӧртэм ӧвӧл. Та сямъёсты улонады уг люкето-а?

- Куддыр люкето но... Map ке борды гижысь-пиньысь басьтӥськисько ке, тае шӧдыса, эшшо но эшшо трос ужъёсты ӵекто. Адямиос вылам ворттылыны кутско кадь потэ – песьтэре вормонтэм но луылэ. Потэ-а, уг-а, но куддыр огдыре вить кечез но кутоно луисько. Жаляса верано, берло дыре жадьыны кутски – азьло тае уг шӧдӥськы вал. Секыт ныпъетэ семьяе вылын но шӧдӥське, нылпиосылы дыры уг тырмы. Озьы но луэ: муртъёслы юрттӥськеменым, куддыр аслам ужъёсылы дыры ичи кыле.

Но берло дыре мон «уг» шуыны дышетскисько - туж секытэн та сётӥське. Но мукет сямен уг луы ни.

- Татьяна Геннадьевна, кызьы тӥ Глазов палъёсы сокемалы кошкылӥды?

- Отчы мон распределениея сюри. Ачим Глазов ёросысь Пӧжы гуртын вордски бере, со палъёс мон понна туж дуноесь. Соин ик отчы шумпотыса мынӥ.

Глазов пединститут аслам кӧкые. Отын мон нырысетӥ вамышъёсме лэсьтӥ - канжаськылӥ но, ӝутскылӥ но. Отын мон дышетски адямиосын ужаны, вераськыны, асме возьыны. Лыдӟисько вал удмурт литературая, нылпи литературая, методикая лекциос.

Тӥни озьы, Глазов пединститут тодэ ваёнъёсам туж шунытэн кылемын. Жалясько, малы меда студент аръёсам нокыӵе ужрадъёсы ӧй пыриськылы шуыса. Бен, 1990-тӥ аръёсы соос, оло, туж шер ортчылӥзы но. Но Глазовысь студентъёсты, уката но удмуртъёссэ, котькытчы кысканы вырылӥ. Map пединститутысь басьтыны луэ - ваньзэ мед кырмозы кадь потылӥз. Интыысьтызы вырӟытыны турттыса, куддыр укыр акылес но луылӥ, дыр, кин ке синазькыль но карылӥз, оло. Но азьвыл студентъёсы али но жингыръяло, социальной сетьёс пыр ог-огмылы гожъяськом. Тросэз тау шуо куддыр кужмысь карылэмъёсы понна.

Пединститутын 16 ар ужай. Кошкыны туж секыт вал. Угось Глазовын вал ни квартирамы. Туж удалтӥз - соку 30 аресозь семьяослы 7 процентъем кредит сётъяны кутскизы. Ми апреле выль улон интыямы выжим ке, августэ мыным 30 арес тырмиз ни. Сое ми кызьы асьмелы кельше, озьы шулдыртӥм. Но кузпалэлы Иже уж ӵектӥзы - со соглаш кариськиз. Володяе - Пичи Пурга ёросысь Кечол каргуртысь. Анай-атайёсызлы матэгес кариськемез потӥз. Ижын улон интымы ӧй вал на бере, нырысетӥ ӝыны арзэ куинь городлы улоно луим: нылмы Москвае дышетскыны пыремын ни вал, Володя ӝытъёсы бертылӥз Кечолэ, нош ми пичи пиеным кылим Глазове.

Собере Ижысь Соцгородэ квартира басьтӥм - отын 2 этажо пичи юртъёс чурен сыло, Глазовез тодэ вайыто. Но берытскысал на-а мон Глазове? Ӧй, дыр. Вамыштыны кулэ азьлань.

- Иже вуыса, тӥ туж ӝог шедьтӥды ас ӧрдэс...

- Дышетски Удмурт кун университетын - шоркар мон понна мурт город ӧй вал. Дышетӥсьёслэсь тодон-валанзэс будэтонъя институтэ лыктӥ, кафедраенымы кивалтэ Андрей Клементьев, соин ми Историяя, кылъя но литературая Удмурт институтын аспирантураын ӵош дышетским. Кафедраын ӵош ужась эшъёсме куд-огзэ, матысь уг ке но, тодӥсько вал.

Ужасько но мон дышетӥсь луыса ик. Бен, табере студентъёсын уг ни, дышетӥсьёсын. Но пӧртэмлыкез трос ик ӧвӧл. Студентъёсты валтыны кулэ на улонтӥ. Дышетӥсьёс пӧлын но таӵеос ӧжыт ӧвӧл. Али кыл кутӥсько удмурт кылэз воксё тодӥсьтэмъёсты анай кылмылы дышетон понна. Ужам юртто Глазовын ортчытэм аръёсы. Пединститутын сяна, мон 16 номеро школаын ӟуч пиналъёсты удмуртлы дышетӥ вал. Малпай: школаын ужатэк, мынам правое ӧвӧл методикалы дышетыны. Школалэсь али но люкиськемын ӧвӧл - кылем арысен Ижысь Кузебай Герд нимо гимназиын 1-тӥ классэ лыктэмъёсты удмурт кыллы дышетыны кутски, туэ соос кыкетӥ классэ лыктозы ни - ой, муспотонэсь ук!

- Уд жаляське-а, улондэс удмурт кылэн герӟады шуыса? Мукет удысъёсын но тӥлесьтыд туж ӟеч специалист пӧрмысал, дыр.

- Улонын номыр юнме уг луы. Малпасько вал кунгожсьӧр кылъёсъя дышетӥсь луыны. Школа бере документъёсме сётъяй УдГУ-ысь кунгожсьӧр кылъёсъя факультетэ. 1 баллэ ӧз тырмы.

Доре бертӥ гинэ но, монэ школае ужаны ӧтизы. Ой, кин но мон отын ӧй вал: пионервожатой, нылпиосты крезьгурлы, суредаськыны дышетӥ... Кыӵе предметъя дышетӥсь ӧвӧл - отчы ик монэ донгылӥзы. Вазь ӵукна кошкыса, бер ӝытозь школае ышылӥ. Со ар куспын яратоно дышетӥсе Людмила Николаевна Лукина мыным малпан пыӵатӥз: мыным одно луоно удмурт кылъя но литературая дышетӥсь. Мон пыри удмурт филологияя факультетэ. Малы ке тодӥськымтэ но, та факультетын ик удмурт но немец кылъёсъя нимысьтыз группа вань шуыса.

- Кузпалдэс дышетскыкуды ик шедьтӥды-а?

- Володя - историк. УдГУ-ысь одӥг корпусын дышетским, одӥг общежитиын улӥм. Малы отысен ог-огмес пумитаськымтэмы? Но шуисько ук: номыр юнме уг луы. Ӵош дышетсконо эше бызиз. Сюаназ ветлыны ӧй быгаты - больницае шедьылӥ. Отысь потэме бере Надя монэ дораз куное ӧте, мон пумитъяськисько - дорын пукыны туж яратӥсько вал. Но со шуэ: мон билет басьтӥ ни. Озьы картэныз, солэн ӵыжы-выжыосыныз тодматскыны мынӥ. Соку ик Володяен ог-огмес синйылтӥм.

Кузпалэн туж удалтӥз - ӵош улэммылы та нуналъёсы 21 ар тырмиз. Татчыозь ужаз вал Ижысь 45 номеро лицейын директорлэн воштӥсез луыса. Но отын дышетскисез туж трос, кык сменаен ужано луылӥз - ог-огмес бер ӝыт гинэ адӟылӥм, пимылы дыр ӧз кыльы ни. Озьы со туэысен интыяськиз Кузебай Герд нимо гимназие.

Мон трос ветлӥсько командировкаостӥ - йырам но уг лыкты, пие аналтэмын, сюдытэк-дӥсятэк кельтэмын луыны быгатоз шуыса. Аспирантураын дышетски. Нырысетӥ араз заочно кутски вал, но кандидат диссертациез озьы гожтыны туж секыт. Соин ик 2 арзэ очно дышетски ни. Картэ Глазове 4 аресъем Юляенымы кылиз. Ваньзэ дышиз - нылмылэсь йырсизэ гинэ пуныны ӧз быгаты. Кус улланёзь йырсизэ вандоно луиз. Макем бӧрдӥз со - али но син азям.

Картэ сиён пӧраны нырысь чик ӧз быгаты. Дорын вал пӧраськонъя книгае. Суббота-арнялы вуисько - адӟисько: кӧня ке бамъёсыз нош ик вӧй шапыкъёсын наштамын. Озьы со книгая дышетскиз пӧраськыны. Табере нянь но котэ, пӧраське но. Юлямы Москваысь вуэ гинэ, соку ик куре: папа, тынэсьтыд пирожкидэ сиеме потэ.

Диссертациме защитить кари Чебоксарыын. Уже сӥземын вал удмурт нылпи литературалэн кылдэмезлы но юнмамезлы. 12 докторъёс вал, одӥгез сяна, ваньмыз воргоронъёс. Защитае ортчем бере ни шуи: ӝыны уже - картэлэн, со ке ӧй луысал, диссертацие ӧй вордӥськысал. 12 кузя докторъёс султыса чабизы...

- Пиналъёсты ас выжыяды ик мынэмын, дыр.

- Юлямы дышетске Москваысь химия технологиосъя М. В. Ломоносов нимо кун университетын. Шуэ вал: ноку дышетӥсь уг луы. Адӟе вал: ужысь бер бертӥськом, нош ик тетрадьёс сьӧры пуксиськом. Бадӟым классъёсын тунсыкъяськыны кутскиз химиен, биологиен - та предметъёсъя дышетӥсьсы зол вал, малпасько. Озьы нылмы химик-инженер-технолог луыны малпаз. Но али, 4-тӥ курсэ вуэмез бере, вераны кутскиз: мынам но, пе, дышетӥсь луэме потэ! Арсениймылы туэ октябре 5 арес тырмоз ай.

- Тодӥсько, тӥ семья праздникъёстэс туж тунсыко ортчытъяськоды шуыса.

- Уката но яратӥськом нылпиосмылэсь вордскем нуналзэс пусйыны. Одӥгез но ог-огзылы медаз тупалэ кадь потэ. Юлямы, кылсярысь, али но тодэ вайылэ пичи дыръёссэ. Нырысь общежитиын улӥськом вал ай. Таӵе шудон малпаммы вань: шедьтоно торт! Общежитие бадӟым бере, пичи куноосмы пӧртэм интыостӥ ортчо, юромо дасям заданиосмес быдэсъяса. Но бӧрысь вуо комнатае ик - ческыт ватос жӧк вылын сылэ ни! Яке шуиськом: туннэ асьмеос пукиськом кафеын. Map сиемды потэ - басьтэ. Нош сиёнъёслэн дунзы - кырӟан, эктон, кылбур...

- Асьтэлы дырды кыльылэ на-а?

- Шер, но нуналлы быдэ киям одно книга кутылыны, 5-6 бамзэ ке но лыдӟыны тыршисько. Вуриськыны туж яратӥсько. Нылмы пичи дыръя солы пальто но вуреме вань - коньдонлы ёрмоно вал, но чебер дӥсям потэ. Быгатӥсько керттӥськыны, чильпаськыны. Улон интымы чебер мед луоз шуыса, юртъер котырысь чыры-пырыосты чакласа потӥсько. Кемалась ӧвӧл дорамы обой лякылӥм, солы мед тупалозы шуыса, диванмылы шобрет но миндэръёсызлы выль пуйыос вурылӥ. Декупаж лэсьтыны туж кельше... Дышетӥсь ӧй луысал ке, дизайнере дышетскысал, малпасько.

- Вань-а тужгес шудо нуналды?

- Котькуд нунал! Улон чаляк ортче, соин ик котькуд нуналлэсь чеберзэ адӟыны турттӥсько. Тани туннэ Юлямес Москвае келям, Агрызын, поездэз возьмаса, 2 час пала ортчытӥм. Вокзалын калык трос, пукон интыос ӧвӧл. Мон интыяськи укно азе. Тыбырме шунды сыӵе шунтӥз, сюлэмам ик пыӵаз! Шунытэз быдэс толлы табере тырмоз, малпасько. Кыӵе ке ӟеч кино учкиськод, мар ке выльзэ тодӥськод - со шуд ӧвӧл шат? Улонын котькыӵе учыръёс луо, кылдыло шуг-секытъёс но. Кызьы тон соос пыр потод? Яке чигиськод, яке тон понна со урок луоз - ваньмыз потэ адями бордысь.

Вордскем Пӧжые туж чебер интые пуксемын. Оло, соин но мон дыши чеберез адӟыны. Семьяямы ми 4 пинал, мон кыкетӥез. Будэтӥз милемын песянаймы. Одӥг пол но тышкаськемез но, чабкемез но ӧвӧл - ваньзэ лад-лад валэктоз вал. Анай-атаен куштэм нылпи мон ӧвӧл. Инмарлы тау шуисько, кыксы но соос бордамы на. Но ми пичи дыръя соос вазь ӵукнаысен бер ӝытозь ужын вал: мамае вуз карон удысын, папае водитель луыса тыршемын. Соос мынам туж-туж визьмоесь. Тау шуисько, одӥг пол но семья кусыпамы пыремзы ӧвӧл. Ноку но верамзы-косъяськемзы ӧвӧл: озьы кар, тазьы лэсьты. Аслым бырйыны луонлык сёто вал. Нош янгышай ке - мынам со янгыше.

Кыкетӥ мумы-бубые мынам - Володялэн анай-атаез. Таосыз но туж-туж визьмоесь, яратоно кадесь. Быземе бере ик монэ нылзэс кадь каризы, одӥг пол но урод кыл верамзы ӧвӧл. Котырад таӵе адямиос вань ке - та шуд ӧвӧл шат?

Источник:

Волкова, Т. Г. Султыса чабизы наукая 12 докторъёс : беседа с кандидатом филологических наук, доцентом Удмуртского института повышения квалификации и переподготовки работников образования о жизни, о работе, о семье / Т. Г. Волкова ; записала Э. Кумачева // Удмурт дунне. - 2014. - 29 авг. - С. 10, 15 : фот. - (Тӧр шорын)

За предоставление материала выражаем огромную благодарность редакции газеты "Удмурт дунне"