Чиркова Елена Михайловна

Туала вакытэ ляб луыны уг яра!

Эгра ёросысь «Зуринский» эштосэн кивалтыны кутскыкуз, Елена Чирковалы 31 арес сяна ӧй вал на. Ньыльпыдъяськем хозяйствоез ӝутон борды со ӝабыр-ӝабыр басьтӥськиз. Юрттӥзы юн сямыз но калыклэн осконэз.

«Зуринский» эштос туннэ республикаямы одӥгез адӟем карымонэз луэ. Но Елена Михайловна таин уг буйгатскы. Ортчись аре сое бырйизы Кун Кенеше депутатэ. Табере быдэс республикаысьтымы гуртоослэн сюлмаськонъёсынызы улэ.

- Елена Михайловна, тӥ, дыр, пичиысен ик тодӥськоды ни вал, асьтэды гурт удысэн герӟалоды шуыса.

— Вордски но будӥ мон Эгра ёросысь Зура черкогуртын, интеллигентъёслэн семьяязы. Буби нюлэсчи вал. Но улонысь со вазь кошкиз, мон соку-соку гинэ школае мыныса вуттӥ, 7 аресъем маке кыли. Бӧрсям будӥз на выны. Озьы анаймы огназ милемыз пыд выламы султытӥз ни. Со эмъясь вал, быдэс улонзэ ужаз черкогуртысьтымы нылпи санаторийын. Пуктэмын вылэм ай со война вакытъёсы, сирота нылпиослы шуыса. Мон пичи дыръя отын шутэтскизы, тазалыксэс юнматылӥзы быдэс шаерысьтымы нылпиос.

Но соку ведь сыӵе улон вал: адями котькыӵе удысын мед ужалоз, колхозэ-совхозэ юрттӥськыны вутскылӥз. Озьы санаторийысь коллектив быдэс гужемзэ пудо сиён дасялляз. Котькудӥзлы нимысьтыз удыс сётэмын вал. Мон, 7-тӥ классын дышетскыкум, анаелы юрттӥськыны ветлылӥ ни. Будэмъям потаны кутски зернотоке. Собере школаос бордын но кылдытъямын вал нылпиослы ужъя но шутэтсконъя лагерьёс. Нимысьтыз музъем висъяллязы. Отын картошка, кушман, кубиста будэтылӥм. Мон мыло-кыдо мынӥсько вал бусые.

Азьло пиналъёс, ужлы дышыса, будылӥзы. Али 14 арессэс тырмымтэосты, пе, ужатыны уг яра. Таин воксё соглаш кариськеме уг поты! Егитъёсмы визьмоесь, Интернетысь ваньзэ кыло-адӟо, но киын ужаны соос дышемын ӧвӧл. Нокыӵе куронъёс соос азе ум пуктӥське, иське, номыр понна кыл кутыны быгатӥсьтэмесь будо. Дорын но ведь жаляськом ай соосты. Зурая ик верало. Азьло гуртоос ас хозяйствоосазы ог 300 йыр скал вордо вал, али 50 но кылемын ӧвӧл ни, дыр. Иське, нылпиос пудо-живот котырын уг выро. Нош калык пудо уг ворды ни ке, ӧжытгес мерттӥське но. Азьло семьяосын трос нылпи будэто вал, бадӟымъёсыз возьмаллязы пичиоссэ — та но али ӧвӧл ни.

Егит вакытысен — мыло-кыдо

Нош куке но вал пионеръёс, комсомолецъёс… Монэ комсорге но бырйылӥзы. Атыкай музъеммес гажан мылкыд нылпиослы туж зол пыӵатӥське вал. Мон школаын дышетскон вакытэ пуромиз Афган ожмаськон. Отысь берытскем пиос дорамы пумиськонъёсы ветлылӥзы. НВП урокъёс нуиськизы. Малпасько, соос туж пайдаё вал — жаль, быдтӥзы. Нылпиос но мӧйыос котьку артэ вамышъязы. «Зуринский» совхоз школамылэн шефез лыдъяськылӥз. Озьы ми классэнымы кунян сюдӥсьёс, скал кыскисьёс доры концертъёсын поталлям, ужазы ма но со юрттӥськылӥм. Адӟиськом вал, кыӵе интыын ужало гуртоос. Соку ик йырам бергатъяй ни: тазэ тазьыгес лэсьтысал, созэ мукетгес кароно.

8-тӥ-9-тӥ классъёсын дышетскыкум, тодӥсько ни вал: луо экономист. Но огпол дорамы ужзы сярысь мадьыны вуылӥзы совхозысьтымы экономист но прораб. Малпанъёсме йырин-чукин берыктыса кельтӥзы. Экономист вераз: лумбыт пуконо кабинетын, бумагаос пӧлын бугыръяськоно. Нош егит прораблэн, нылмурт вал, синъёсыз чилязы — сокем тунсыко, пе, удысэ.

- Со вакытэ гуртъёсын трос лэсьтӥсько вал.

— О-о, гуртъёсын лэсьтӥськон мынӥз озьы ик, кызьы городын. Зура, кылсярысь, со вакытэ тодмантэм воштӥськиз: волязы сюресъёс, пуктэмын выль ферма, клуб.

Ижысь техникая кун университетын, соку со институт вал на, гурт удысын лэсьтӥськисьлы дышетски. Собере монэ ыстӥзы асьме ёросысь ик «Нива» эштосэ — Бадӟым Пурга гуртэ. 4 ар пала ужай отын. Та вискын мар но ӧм лэсьтэ! Выльдӥм школаез, библиотекаез, медпунктэз, 2 гид жутӥм, сюресъёсты волятӥм, гуртэ ву кыским, отчыозь колодчаос гинэ вал. Эшшо ведь сик но корано вал на, нош участокъёс бадӟымесь — 50 гектарозь. Вылам дэрем-юбка дӥсянэз ӧй тодылы, лапак штаниен ветлӥ, машинае но угось ГАЗ-66 вал.

Уже мынӥз, маке уз пӧрмы шуыса кышканэ ӧй вал. Бен, вал сыӵеез но. Корано сик, арня ортчыса, ужъёсмес йылпумъяно, нош милям со кутскемын ик ӧвӧл, шуыны луоз. Воргоронъёс юон вылэ чӧлскемын. Пинал йырыным малпаськи: мар кароно? Пукси, ваньзэ радызъя чаклай-гожъяй, кызьы калыклэсь ужаны мылкыдзэ ӝутоно. Собере ваньзэс люкай но шуисько: тани, кылсярысь, 10 сюрс манет. Сое тӥ толэсь ӵоже басьтыны быгатӥськоды, катьты луиз ке — арня ӵоже. Но со понна кыз улын кӧлоно, карта куяса пуконо ӧвӧл. Кин азьтэмъяськиз, солэн уждунэз пичиятэмын луоз. Сюлмо ужасьёс пӧлысь бырйи бригадиръёсты — соослы оски. Сикез кӧня ке нунал ӵоже корамы! Али но сыӵе амалэз ӟечен лыдъясько: кин ужа, со басьтэ.

- Елена Михайловна, «Зуринский» совхозэн кивалтыны кутскыкуды, со банкротэн ялэмын вал, шуо.

— 1998-тӥ арын февраль толэзе киям выль биньгозы кутӥ, отчыозь Зураын ик прораб вал. Зэм но, кылем даурысь 90-тӥ аръёслэн кустсконазы лябӟыны ӧдъям хозяйство пыд йылаз ӧз султы ни. Кредит тыронъёсыз тымиськизы, пудоез сюдыны номырин, техника вужмемын, кизьыны кидыс ӧвӧл… Совхозын ужасьёслы араз кык пол уждун сётъязы. Тросэз специалистъёс, валамон, мукет интыосы кошкизы. Таӵе гуысь потыны быгатӥм 2005-тӥ арлы гинэ.

- Кызьы малпаськоды, мар юрттӥз совхозлы выльысь улӟыны?

— Калык! Монэ предэ бырйыкузы, мукет кандидатураос но вал, ваньзы — воргоронъёс. Ёросысь кивалтӥсьёслэн уг поты вал хозяйствоез нылкышно кие сётэмзы. Но гуртоос мыным оскизы бере, мон эшшо юнмай. Тыл пыртӥ но, ву пыртӥ но потӥ. Гурт хозяйство удысын 25-тӥез нылкышно кивалтӥсь луиськем. Ёросамы таӵеос ӧй вал на.

Мар бордысен кутским? Нырысь ик кӧттырмон сюдоно вал пудомес. Али но малпасько: бусыосты тыро-пыдо кизён-мерттон борды нырысь ик гижысь-пиньысь басьтӥськыса, туж шонер лэсьтӥм. Трос вуылӥ мукет хозяйствоосы, палэнэ но потай, кылсярысь, Белоруссие. Ижысь гурт хозяйствоя академиысь тодосчиослы, специалистъёслы, визь-нод курыса, вазиськылӥм. Туннэ пудо сиёнмы кык арлы азьлапал дасямын. Ар ӵоже котькуд скаллэсь 6 сюрс но ӝыны килограмм йӧл кыскиськом. Туэ котькуд 100 скаллы 84 кунян басьтӥм, кылем арын 70 вал. Но ушъяськыны вазь, малпасько. Азьланьын будэтыны кулэ йӧл, сӥль поттонмес.

- Туэ эшшо одӥг ныпъетты кылдӥз — тӥледыз бырйизы Кун Кенеше депутатэ…

Кун Кенешлэн депутатэз

— Мон понна со шуак луиз. Кандидатураме ӵектэмзы бере но малпасько вал: мандатме мукетызлы сётоно луо. Уг ваты, шумпотӥсько, мыным оскизы шуыса. Кузьым со мон понна! Зэм, со дыре ик валасько, со ныпъет капчи ӧвӧл, табере эшшо тросгес тыршоно луо. Аслам районэ гинэ уз, быдэс республика ужме дунъялоз.

Но гурезез оген берыктыны луысал ке! Алигес Шаркан ёросысь одӥгезлэн хозяйстволэн тӧроез жингыртэ: Елена Михайловна, юрттэ, шуэ. Вотка городын усьтӥллям нянь пыжон комбинат. Тросэз гуртоос отчы уже интыяськизы, фермаысь скал кыскисьёс но кошкизы ни, пе. Соосты автобусэн нуо-ваё, уждун фермаын мында ик тыро. Но шунытын, чылкытын ужан умойгес ук. Предлэн ужасьёсты гочатэмез уг луы — уждун будэтыны луонлыкъёсыз ӧвӧл. Тӥни озьы. Но маин мон солы юрттыны быгатом? Визь-кенешен гинэ ке шат. Жаляса верано, гурт удыслы тырмыт саклык уг висъяськы. Йӧллы дотация серемес — 1 манет. Пермьысь одӥгаз эштосэ вуылӥ. Куинь йӧн-йӧн фермаос радэн сыло. Берло дыре гинэ, пе, скалъёссэс 600 йырлы будэтӥллям. Дояркаос ведраосты, скал кыскон аппаратъёсты уг ӝуткало — ваньмыз автомат. Одӥг мурт 100 йырез утялтэ-кыске. Отысь пред шуэ: улосысьтызы юрттэт ӧй луысал ке, таӵе улон-вылонзы ӧй луысал. Йӧллы дотация отын 3 манет тупатэмын. Али ми Кун Кенеше вазиськон дасяськом, йӧллы дотациез Удмуртиын но кӧня ке коть йылтоно шуыса. Со улэ гожтӥськизы ни эграос, уваос, алнашъёс. Валасько, республикамылэн бюджетэз пыдэстэм ӧвӧл. Но та вакытэ, куке ВТО-е пырим, гурт хозяйствоосты куштыны уг яра. Мукет сюрес ӧвӧл ке, иське, мукет удысъёслы ӧжытгес коньдон висъяно. Малпасько, сотэк 2013-тӥ арын троссэ гурт хозяйствоосты ыштыны быгатом. Малы меда асьмелэн озьы луэ: нырысь ӟечсэ быдтӥськом-таркаськом, собере, сое выльысь улӟытыны вырыса, катьтэммиськом. Шуом, куке-соку быдтӥм черкъёсты. Огвакытэ куштӥським вал медвытрезвительёслэсь — табере соосты выльысь усьтыны малпаськом.

Эштосъёслэн сюлмаськонъёссы туж трос. Ачим поселенилэн депутатэз вал, тодӥсько, Зура гурт администрацилы толалтэзэ сюресъёсты сузяны 45 сюрс манет висъяське. Малы со коньдон тырме? Шор ульчаосты гинэ утялтыны. Нош Зура сяна, артэ гуртъёс эшшо кӧня на. Отысь сюресъёсты утялтоно луэ совхоз. Совхоз вылэ ик усе нылпиосты школае нуон-ваён но трос мукетыз. Лыдъялэ, кӧня коньдон кошке талы. Но та ужез хозяйство ас вылаз ӧз басьты ке, быдэс гурт куашкалоз-быроз. Кыдёке ветлонэз ӧвӧл. «Нива» эштос, мон отын ужаку ай, туж адӟем карымон вал. Но отысь предлэн малы ке ёросысь кивалтӥсьёсын кылыз ӧз тупа, со интые пуктӥзы мукетсэ. Таиз ваньзэ эрказ лэзиз. Бадӟым Пургалась калык табере палэнэ кошкыны кутскиз. Уг валаськы, асьмелэн сяммы меда сыӵе — котькуд ар кутскыку, шуиськом: азьланьын каньылгес уз луы. Туэ но озьыгес пӧрме.

- Иське, Выль арез ӝутӥськем мылкыдын уд пумитаське?

— Мынам ӟечезлы осконэ туж бадӟым! Асме оптимист шуысал, оло нош боевик но. Шуг-секытъёс азьын киосме уг юскиськы. Жаляса верано, шаерысьтымы колхозникъёс правоосcэс утьыны уг быгато, сюлмаськонъёссэс пушказы пыдло вато. Но ӵектонъёс потыны кулэ улӥысен но. Кышкано ӧвӧл кивалтӥсьёсын вераськыны, одӥг кыл шедьтыны. Малпасько, куке но соку гурт калыкез одно кылозы.

- Но гурт удысын али но маке со ӟечез вань, вылды?

— Кызьы сотэк? Республикаямы туж ушъямон хозяйствоос вань, кылсярысь, Вавож палъёсын. Эгра ёросамы «Чутырский» эштос вормонъёсыныз шумпоттэ. Колхозникъёс ужаны быгато, шуг-секытъёслэсь уг кышкало — таӵеос вылын туннэ возиське быдэс гурт удыс. Пусйымон, гуртэ егит специалистъёсты кыскон понна али ӧжыт уг лэсьтӥськы. Милям хозяйствоямы но соос вань. Кусып возиськом 36 номеро училищеен, отын дышетскисьёсты дорамы практиказэс ортчыны кутӥськом. Дорамы вуыло Ижысь гурт хозяйствоя академиысь студентъёс но. Мон соослы шумпотӥсько. Ӵемысь юри пуктӥсько сыӵе удысэ, кытын соос троссэ уг тодо на — мед ваньмызлы дышетскозы. Уг яратӥськы горд дипломенызы данъяськисьёсты, улон инты, ужаны ӟеч условиос куремзылэсь азьло соос ужаны быгатэмзэс мед возьматозы.

Вань сыӵеос но: дӥням лыкто но куро, практикаме ортчи шуыса гожтэ вал, пе. Асьсэос одӥг нунал но уже потамтэ. Таӵеосты ӧс куспысьтым но медам адӟы — туж вожомисько. Но вань ужаны мыло-кыдо егитъёс но. Одӥгез пияш августэ практиказэ ортчыны кулэ вал ай, совхозэ июнь толэзьысен ик куриськиз ни, ужаме, пе, туж потэ. Кияз лопата кутонлэсь но ӧз кышка, электрикмы бордын но ветлӥз. Оскисько, солэсь туж ӟеч специалист пӧрмоз: йырыз но ужа, киыз но мынэ. Куд-ог дышетӥсьёслы туж воже потэ. Нылпиосты визьманы выро: ляб дышетскиды ке, колхозэ сяна уже уз кутэ. Шат озьы вераны яра?! Адӟе вал, кыӵе туала техника лыктэ гурт удысэ — компьютеръёсын соос узырмытэмын ни. Макня йырын сое интыысьтыз но вырӟытыны уд быгаты…

- Елена Михайловна, ӟеч кивалтӥсь сяна, тӥ трос нылпиё анай луиськоды…

Семьяез

— Нылпиосы понна керпотэме ӧвӧл. Мужике мынам трос нылпиё семьяысь, со пичиез, куатетӥ, пинал. Тыр коркаен улэмез потӥз. Милям кык нылмы но одӥг пимы. Табере соос пыд вылазы султэмын. Кык бадӟымъёсыз семьяоссэс но кылдытӥзы ни, кык нунокмы будэ.

Бадӟымез нылмы, Катямы, Гурт хозяйствоя министерствоын экономист луыса ужа. Кириллмы Зура школаын ужъя дышетӥсь но психолог. Пичиез нылмы, Юлямы, ИжГТУ-ын 2-тӥ курсын дышетске. Кыӵе удысэз быръёзы — мон но, кузпалы но бордазы ӧм нориське, асьсэлы асьсэос кузё. Кузпалы Котегуртысь. Али со Дэбес ёросэ пыре ни, азьло Зура ёросысь гурт лыдъяськылӥз. Зура черкогуртамы ик вань МЧС-лэн ёзэз. Отын со пожарной машинаын водитель. Кивалтӥсько-а семьяын? Ачим валатэк, дырын-дырын сямме поттылӥсько ик. Кылсярысь, семьяе мерттэ картошка. Мон ужысь беромыса вуисько но кутскисько: тазэ тазьы кароно вал, созэ — озьы. О-о, кивалтӥсь вуиз ни, шуо. Но мужике но мынам юн сямо, асэныз кивалтыны уз сёты! Солэн малпанэз мон понна котьку но нырысетӥ интыын. Маке соя кариськеме уг поты ке, йырзэ каньылэн гинэ берыктыны турттӥсько.

Али ӵошен гинэ улӥськом. Но пиналъёсмы котькуд суббота-арняе бертыло. Возьмало пыжиськемме. Нош мон ӵукна 5 часын султӥсько, гур эстӥсько, черкогуртамы газ пыртымтэ на, быжме урдӥсько но — уже! Шуисько: пӧраське, корка котырын утялтӥське. Арня вискын ӵемысь потано луэ Иже. Мае уг вуттӥськы, сое шутэтскон нуналъёсы быдэстӥсько ни. Ӵемысь потасько фермаосы, одӥгаз гидэ ӵукна кыскон дыръя мынӥсько ке, мукетаз ӝытазе вуисько. Шутэтскисько ужын. Алигес кык арнялы санаторие ветлӥ — сюлмы путэ ни вал: мар меда каро гуртын? Ваньзэ ас синмыным адӟыны кулэ, сотэк умме усьыны уг быгаты.

- Шат гань-гань кариськылэмды, асьтэды ляб кышномуртэн шӧдэмды чик уг потылы?

— Туала вакытэ ляб луыны уг яра! Ужея но ӵемысь воргоронъёс пӧлынгес луисько, соос одӥг-ог куалекто: ой, Елена Михайловна, пӧламы нылкышно вань шуыса вунэтӥськом но. Мыным озьы ик кулэ кадь потэ.

Азьло, котькудӥз нылкышно сямен ик, керттӥськыны туж яратӥсько вал — нылпиосы керттэм костюмъёсын ветлӥзы. Али дыры уг тырмы. Ужысь вуисько, сиён пӧрасько — кӧлыны выдон дыр вуэ ни.

Куасэн бызьылыны туж яратылӥ, али но одӥг-ог султылӥсько. Гурт адмистрацимылэн йырыз спортэз калык пӧлы пыӵатон сярысь туж сюлмаське. Али тани огазеяськонъёс куспын волейболэн шудонъя ӵошатсконъёс ортчо. Совхозмылэн командаез но отчы пыриське, мон — пӧлазы.

- Кылэме вань, тӥ сяськаосты туж яратӥськоды шуыса.

— Мынам соос дорам ог 60 пумо. Кытысь ке выль, адӟылымтэ будосэз адӟисько ке, синъёсы чиляны кутско ни. Белоруссие вуылыкум, пайми вал: отын котькытын-котькытын сяськаос.

Ужасьёсылы котьку шуисько: тамак пумъёстэс октэ, выжъёсты умой-умой ӵужоно — дорады пырем кадь мед потоз. Сяськаос но мерттоно. Табере милям соос будо фермаосын но, гаражъёсын но. Гужемзэ азбаръёсмес но шулдыртӥськом. Чебер ук!

- Нош Выль ар азьын вож кыз пуктӥськоды-а?

— Та вакытэ ми арлы йылпумъянъёс лэсьтӥськом. Котькуд коллективез люкалляськом, пӧраськемъёс, тортъёс басьтӥськом, ог-огмес ӟечкыласьком. Уждун, премия сётэм сяна, пичияк кузьым но дасяськом. Коньдонлы ёрмон вакытъёсы шампуньёс гинэ но басьтылӥм вал, солы но шумпотылӥзы. Али бадӟымгес кузьымъёс люкылӥськом ни. Ужась калыкез дунъяны кулэ!

Источник:

Чиркова, Е. М. Туала вакытэ ляб луыны уг яра! / Е. М. Чиркова ; записала Э. Кумачева // Удмурт дунне. - 2012. - 28 дек. - С. 6, 11 : фот. - (Удмурт кизилиос)

За предоставление материала выражаем огромную благодарность редакции газеты "Удмурт дунне"