Беляева Нина Григорьевна

Гуртлэн режиссёрез

Беляева Н.Г.

Нина Беляева — Шаркан ёросысь Быги муниципал кылдытэтлэн йырыз. Та гуртысь удмурт культурая «Зангари» центр ёросын гинэ ӧвӧл, шаерамы но одӥгез адӟем карымонэз луэ. Муниципал кылдытэт но элькунамы азьветлӥсьёс пӧлын. Тросэз вормонъёс Нина Григорьевналэн тыршемез бордысь пото.

Нина Беляева — Удмурт Республикаысь культура удысысь дано ужась, калык понна тыршемез озьы ик дунъямын Удмурт Республикалэн Данъян грамотаеныз.

— Нина Григорьевна, муниципал кылдытэтэн кивалтон капчиен сётӥське-а?

— Та удысэз мыным оскизы 2005-тӥ арын, туэ январь толэзе тямыс ар луиз ни кивалтон борды кыкетӥзэ басьтӥськеме дырысен. Бырйизы бере, озьыен, калык оске. Вордӥськемын ке но Шаркан ёросысь Балтач гуртын, куамын арзэ Быгиын улыса, та палъёс мынам аслам луизы, татын ик вордӥськизы кык пиосы. Соин ик вань кужымме но быгатонлыкме сётоно кариськи быгиослэсь улонзэс умоятон понна.

Мынэсьтым азьло главаын 15 арзэ ужаз Николай Протопопов. Со поттылӥз, малпаськы, пе, уждэ воштон сярысь. Мон нырысь нокыӵе ӧй кариськы вал таӵе ӵектонлы, отӥяз малпаськыны кутски. Собере кыӵе ке сыӵе опытэ но вал ини райсоветын кык созываз депутатэ бырйылэмзы бере.

Озьы ке но кутскыкум синтэм коӵышпи выллем потӥсько вал аслым. Номыре уд валаськы, собере мургес но мургес пырыны кутскиськод. Ас поселениед, калыкед понна сюлмаськон тонэ быдэсак ньылэ кадь. Витьтон арес луыса, вылӥ образование басьтӥ — дышетски Кун службая Урал академилэн филиалаз.

Зэмзэ вераса, та удыс капчи ӧвӧл. Кыӵе ке секыт ужез лэсьтэм бере шутэтскиськод но, капчия. Нош татын жадемед нокытчы уг кошкы. Кӧлыны выдыса но, пӧртэм малпанъёс йырад бергало. Ӵукна нош ик сюлмаськонъёсын сайкаськод. Кызьы анай котькуд нунал нылпиосыз сярысь малпаське, озьы ик татын но тэк улыны маза ӧвӧл. Ваньмыз понна кыл кутӥськод уго. Коньдон номырлы уг тырмы, сюресъёс шугъяськыто. Бызьылытэк-бергатэк номыр ас кожаз уз вуы.

— Кызьы радъяське калыкен ужды?

— Вазь ӵукна ик султыса, уже дыртӥсько. Нош доре бер гинэ вуисько. Куддыр мукет главаослы жингыртоно луиськод ке, ньыль часъёс бере интыязы уг луо ни. Мыным возьыт потэ куать часлэсь вазь ужысь кошкыны. «Восход» колхозмы милям зол, нош зол хозяйствоын вить поллы золгес ужаны кулэ.

Кивалтон удысын тыршытозям, котькуд улӥсез аслэсьтым семьяме кадь тодӥсько ни. Гурт кузя ортчиськод но син азе пуктӥськод: таизлэн половикъёсыз таӵеесь, таиз таӵе мылкыдын улэ. Интыям луисько ке, котькыӵе ужпумъёсъя адямиосын дась вераськыны. Пересьёс доры гуртазы потасько. Быги муниципал кылдытэтэ пыро на Быгипочинка но Шегъян. Отысь но песянайёс монэ возьмало. Кинлы ке эмъяськон ласянь юрттэт кулэ, кинлы ке юрт котырзэ тупатъяно.

Куронъёссы пумысен ёросысь Пенсиосъя фондэ я калыкез улон-вылонын утёнъя ёзэ вазиськисько. Социальной выплатаос, льготаос али ми киын ӧвӧл, со юрттэтэз коньдон компенсациен воштӥзы. Ёрмисьёслы 2-3 сюрс манет ке но шедьтыны быгатӥськод ке, со бадӟым шумпотон ни.

Ярам, газ пыртэмен валче эстӥськонэн капчигес луиз. 73 процентэз гуртоос доразы чагыр эстӥськон кыскизы. Туж пӧсь вакытэ кемдӥмы ми та ужен. Удмуртиез азинтон программая 2008-тӥ арын Быгие школа пуктӥзы. Проектъя юрт эстӥськыны кулэ газэн. 1-тӥ сентябрьлы школаез одно вуттоно, соин валче гуртэ но газ лэзёно.

«Удмуртгаз» милесьтым газ пыртыны мылкыд карисьёсты куре. Секретарьын соку ужа вал Лидия Кузьмина. Котькуд коркаез сямен ортчимы соин. Монэ арнялы быдэ кенеше ӧтчаллязы. Пионер сямен отчёт лэсьтӥськӧ кӧня адямиен ужамын, кин газ пыртоз, кыӵе ужъёсты быдэстоно.

Газ гумыос пыртыны котькуд хозяйстволы 50 сюрс манет пала коньдон кулэ, тросэзлэн со ӧвӧл. Кредит висъян пумысен «Россельхозбанкысь» специалистъёсты гуртэ вайылӥмы, кенешъёс ортчытъямы. Документъёсын ачим бызьылӥ, адямиос дась бумагаосы гинэ гожтӥськылӥзы. Озьы азямы пуктэм планэз быдэстӥм. Калык валаса но ӧз вутты, кызьы чагыр эстӥськон коркаосазы пыриз. Ӵыжы-выжыоссы юало ке, мар кароно со понна, кытчы вазиськоно, валэктон сётыны ик уг тодо.

— Котькыӵе ужын кулэ юрттӥсьёс. Тӥ кин вылэ пыкъяськиськоды?

— Пӧртэм юанъёсты эскериськом кивалтӥсь вӧзы кылдытэм координационной кенешын, татчы пыро специалистъёс но, старостаослэн кенешсы но. Быгиын ньыль старостаос, быдэн одӥг починкаын но Шегъянын. Соос ужало калыкен. Пудолы прививкаос пуктоно, гуртлэсь нуналзэ ортчытоно яке мукет кыӵе ке ужрадъёс чакламын — старостаос бызьыло.

Секыт ужпум кылдэмын вал жуг-жагез поттонэн. Вераськимы Шаркан свалкае нуллыны. Старостаос список лэсьто, юрт кузёослэсь 200-300 манетэн коньдон люкало. Озьы котькуд толэзе жуг-жагез свалкае нуиськом, машина пумысен вазиськиськом частниклы.

Гуртъёсты, юрт котырез чылкыт возён ужпумъёсты правопорядокъя комиссиын эскериськом. Лэчыт юанъёс кылдо ке, калыкез сходъёсы люкаськом. Татын ик кинлэсь но солэсь кылзэс юаськом корка котырысьтызы жуг-жагез, жаг турынъёсты, пушнерез октон-утялтон пумысен, куашкан калэ вуэм кенеръёсты но тупатъяны косӥськом. Гожтэт сётыса, куинь нунал дыр висъяськом янгышсэс тупатыны.

Гуртэз чылкыт, чебер возён — со будӥсь пиналъёслы ӟеч сямъёс, патриотизм мылкыд пыӵатон. Куд-ог гуртъёсы вуиськод но воксё паймиськод кырсьсылы: пыд улын ик бутылкаос, жуг-жаг кыстаське. Ас дорысьтым жагдӥськисьёсты адӟи ке, машинаысь но пото визь тырыны, палэнтӥ ортчыны уг быгаты. Жаль, штраф тырытыны ум быгатӥське, законъя поселениослэн сыӵе луонлыксы ӧвӧл, нош ёрос администрациос быгато та ужен вырыны.

Куашкан калэ вуэм, шугъяськытӥсь семьяосын но правопорядокъя комиссия пыр ужаськом. Бордамы кыскиськомы школаез. Пинал кемагес уг ке ветлы дышетскыны, милемлы иворто ни. Соку ик анайёссэс дорамы ӧтиськом. Уг ке лыкто, дӥнязы мынытэк уг луы. Йыркуръясько, ми, пе, тӥледыз ӧм ӧте, асьмеос тодӥськом, мар карыны, кызьы улыны. Котькызьы вераськоно луэ калыкен. Вань шонер сюрес вылэ султэм семьяос но, таосыз понна шумпотоно.

Анай капиталэн валче берло дыре Воткаысь семьяос дорамы улыны лыкто. Юон пӧлы выйыса, тросэз пиналъёссэс но уг адӟо ни. Соослэн ик нылпиоссы трос. Одӥгъёсызлэсь кык аресъем кыкто пиналъёссэс талано луиз, доразы участковоен ветлыса. Сютэм нылпиос ӵошен 10 килограмм но уг кыско вал. Врачъёсты ӧтим, соосты больницае нуизы. Эмъямзы бере та нылпиосты мукет семья ас дораз басьтӥз.

— Нош коньдон ужпумъёсын кызьы пыр потӥськоды?

— Арлы бюджетмы 4 миллион манет. Отысь ик 26 адями уждун басьтэ. Муниципал кылдытэт бордын культура юрт юнматэмын на. Спонсоръёсын ужаськом. Муниципал кылдытэтамы нефтяникъёслэн музъемъёссы вань бере, соосын огкыл шедьтытэк уг луы. Калык туж йыркуръяське сюресъёсты быдтэмзы пумысен, милям асфальт ӧвӧл уго. Зор-кот дыръя, уката ик тулыс, ферма дортӥ пыдын но потыны уг луы. Нош сюресъёсмес мед лэсьтозы шуыса, косыны ум быгатӥське. Сюрес фондэ бадӟым налог тыриськом, шуо мувӧй поттӥсьёс. Мынон-ветлонзэс но ворсаммы уг луы: нефть шапыкъёс кулэсмизы ке, Москва йырмес уз маялля.

Воткаысь НГДУ-е мыныса, куронъёсмес бумага вылэ гожтӥсько ни. Ярам, гужем транспорт висъяло сюресэз волятыны. Мукет ласянь но юрттэт куриськом. Озьы ик тыршиськом грантъёс, проектъёс пыр коньдон поттыны. Бӧрсьысь кык арзэ ини элькун ӵошатсконын гуртъёсъя устоез муниципал кылдытэт ним басьтӥмы. Вормеммес 80 сюрс манет премиен пусйизы. 2008-тӥ арын озьы ик тужгес устоез муниципал кылдытэт луимы вал. Благоустройствоя но кылем арын ужаммес дунъязы — таизъя кыкетӥ инты басьтӥмы.

Культура юртын ужасьёс но ӟеч тыршо. Кылем арын 105 сюрс манет поттӥзы, нош туэ нырысетӥ квартал ӵоже 47 сюрс манет пала люкаськиз. Ваньмыз со мынэ юртэз выльдыны-тупатъяны, аппаратура басьтыны, дӥськут вурыны. Пусйымон, удмурт культурая «Зангари» центрамы ёрос ужрадъёс гинэ уг ортчо, республикаысь но ӵемысь вуо дорамы. Нош кыӵе но ужрадъёс уг ортчо гуртоос понна! Нокыӵе но праздникъёс палэнэ уг кылё. Выльёссэ но малпаськомы.

— Нина Григорьевна, уд жаляське-а, культура удыслэсь палэнскиды шуыса?

— Кивоштӥсьёс будэтӥ шуыса, кивалтонэ капчи мылкыдын кошки. Егитъёс мед ӝутозы ни культураез. Быгие культура юрт пуктӥзы 1993-тӥ арын. Мон нырысь чеберлыкъя кивалтӥсь вал, берло кивалтӥсьын ужай. Дас ньыль ар луиз отын тыршеме. Туж вожъяськылӥ городъёслы, пиналъёссэс пӧртэм кружокъёсы нуллыны быгато, искусствоосъя школазы вань шуыса. Малпасько, малы ми доры но сое уд пыӵаты.

Ижысь культурая училищее ветлыса, ёросысьтымы ик нылъёсты практикае ӧти. Гуртэ ум кыле, шуо вал. Кылем гинэ ӧвӧл, семья кылдытыса, быдэн куинь нылпи вордӥзы ни. Жанна Ермолаева али культурая центрен кивалтэ, нош Алёна Савельева — чеберлыкъя кивалтӥсь.

Егит специалистъёсын ӵош соку ик уж борды басьтӥськимы. Школаын 160 нылпи дышетске ке, 110-эз сюрес лёгизы культура юртамы. Дорамы Шарканысь искусствоосъя школалэсь филиалзэ усьтӥмы, ужаны кутскизы драмая, фольклоръя, вокалъя кружокъёс. Бордамы итӥськиз на Оксана Буранова, азинскиз калык творчество. Милемыз «святая четвёрка» гинэ шуо вал.

Быгиысь культура удыс арысь аре паськыта но азинске. «Даур герӟет» вокально-инструментальной ансабльмы но вань, арлыдоос «Апайёс» фольклор ансамбле люкаськыло. Туристъёс экскурсиен вуыло, калык сям-йылолъёсын, киужъёсын тодматско, асьсэос но киужлы дышетско. Ульчаын гурмы вань, куноосты пӧсь табанен, перепечен утялтӥськом.

Шумпотӥсько выль методистмылы Ангелина Бехтеревалы. Туж кибашлы, вань костюмъёсты ачиз малпа-вуре. Огъя верано ке, культура юртысь коллектив котыр ласянь адӟем карымон, мон соосын данъяськисько.

— Нош асьтэос кызьы вуиды та гуртэ, тубатъёстӥ кызьы ӝутскиды?

— Мон йылпумъяй Дэбес педучилищеысь покчи классъёслы дышетӥсьёсты дасясь ёзэз. Ужаны ыстӥзы Быгие, нош дышетӥсьёс школаын тырмыт вал. Одӥг арзэ пионервожатойын ужай, берло продлёнкаез нуи, висьыкузы дышетӥсьёсты вошъялляй. Нош сюлмы весь кыскиз клубе. Но отчы вуытозь, сельсоветын секретарь но вал, нылпи садэн но кивалтӥ.

Пинал дыръям туж потэ вал артист луэме. Атае Александр Константинович Корепанов пумит луиз театральной училищее мынонэлы. Уж-а, мар-а, пе, со — артист луон. Дышетӥсе мыныны косӥз. Кылзӥськи. Семьяямы ми куать кузя пиналъёс, мон самой бадӟымез.

Ӧйтӧд, кытысь мынам сцена борды кыстӥськон мылкыды. Керпотонэ воксё ӧй вал. Братъёсы азьын но, классын но, училищеын но концерт возьматылӥ.

Сямыя мон атае кадьгес. Со туж йӧно вал. Быдӟым оже ветлэмын, ожмаськемын Курской дугаын, кык Слава орденэн пусъемын. Улонысь со вазьгес кошкиз ни. Нош анае Александра Константиновна туж востэм, калыкен вераськыны но возьдаськоз. Быгие но вуылэмез вань. Соин пумиськыса, адямиос паймӧ ма, кызьы, пе, сокем востэм анайлэн сыӵе чупрес нылыз вордӥськем?

Училище бере режиссёре дышетскеме потэ вал. Но куинь арзэ ужаны кулэ, шуизы. Со куспын бызи, дышетскон сярысь малпан ӧй вал ни. Но режиссёр луон мылкыды юнме ӧз быры. Культура юртэн кивалтэмен ӵош ӝыны ставкаен режиссёрын ужай. «Беренес» калык театрмылы туэ 25 ар тырмиз. Одӥг арзэ соин кивалтэ ини Павел Митрофанов. Режиссёре дышетскемын ӧвӧл ке но, быгатӥсь пияш. Нош мон солы юрттӥсько.

— Театр — со тӥляд вордэм нуныды, шуыны луоз?

— Быгие лыктыкум, спектакльёс пуктон мылкыдъёс вал ни. Сельсоветын секретарьын кема аръёс ӵоже ужам Лидия Кузьмина шуэ: выриськом мар ке со лэсьтыны, но со сценаозь уг вуы. Тынад, пе, кылыкен ужаны пӧрме. Озьы басьтӥськи репетициосты радъян борды, калыкез люкай. Нырысь организатор интыын вал, режиссёр берлогес луи.

1988-тӥ арын возьматӥмы ни Василий Садовниковлэн пьесаезъя «Выж вылын» спектакльмес. Калык сое туж умоен пумитаз. Театр ми понна висён выллем луиз. Мукет араз кык бадӟым спектакль дасямы. Озьы котькуд аре выль уж борды басьтӥськылӥмы. 1991-тӥ арын вуж клубмес сэрттӥзы, вылез лэсьтымтэ на. Репетициосмес олокытын но ортчытъяно луимы. Нош 1992-тӥ арын калык театр ним сётӥзы ни милемлы.

«Выж вылын» ужмес 13 пол возьматӥм, нош Владимир Котковлэсь «Маскара Парасказэ» — 26 пол. Нырысь ачим но спектакльёсын шудылӥ. 26 пол пу ящиклэсь коросэ выдоно луиз. Спектакльёсынымы ёросысь вань клубъёстӥ ортчимы, Дэбесэ но, Воткае но потамы. Транспорт висъялляз колхоз, спектакль понна дун ӧм курылэ. Али со улон воштӥськиз.

Быдэс сценаез, вань шудӥсьёсты адӟыны кулэ шуыса, берло спектакльёсын ӧй шуды ни. Удмурт репертуар сюбеггес луэмен, басьтӥськи ӟуч пьесаосты берыкъян борды. Котьку ӟеч кусыпъёсы вал Удмурт театрен. Отысь литература люкетэн Анна Евсеева кивалтэ вал ай. Бадӟым мешокен ик сётӥз ӟуч авторъёслэсь пьесаоссэс, театр, пе, соосты палэнтӥз. Отын бугыръяськыса, мон асьмелы кельшымонъёссэ шедьтӥ. Театрмылы 25 ар тырмонлы но калык ниммес возён понна (эскеро котькуд куинь ар ортчыса) апрель толэзе премьерамы вал. Игорь Виноградовлэсь «Богатые женихи» пьесазэ берыктыса, «Лякыт сямо но небыт сюлэмо эмеспи» спектакль возьматӥм.

— Асьтэос пьесаос уд гожъяське-а?

— Пӧрмоз-а, уз-а, но сыӵе мылкыды вань. Дасьсэ берыктыны капчи, аслэсьтым кужымме эскереме потэ. Малпасько, пенсие потӥ ке, та уж борды басьтӥсько. Нылпиослы пьеса гожтысал, малпанъёс но йырын вань ни.

— Кыӵе сюлмаськонъёсын улэ та дыре муниципал кылдытэтлэн йырыз?

— Сюлмаськонъёс но быдэстоно ужъёс трос. Тупатъяно-выльдоно Шегъянысь но Быгипочинкаысь клубъёсты. Кыкезлы ик быдэн 100 сюрс манет пала кулэ луоз. Спортзал но административной юрт вискы ожын бырем солдатъёслы выль обелиск пуктоно.

Азьвыл интыез кызьпуос пӧлы ышемын ни, отын туж трос куакаос. Соосын йырин отын Вормон Нуналлы митинг но ортчытыны ум быгатӥське. Ыбылыны уг яра, паймим ни, мар карыны. Нош кызьпуосты кораны жаль. Азьланяз татчы парк усьтыны чакласьком.

Мукетыз шугъяськытӥсь ужпум: корка пуктыны мылкыд карисьёслы одӥгаз но гуртын кулэ категориен музъемъёсмы ӧвӧл. Осконмы кылемын 1993-тӥ арын колхозникъёслы висъям пайёслы. Кудӥзлэн кузёез ӧвӧл ни, наследникъёссы но соослы уг кулэясько яке сыӵеос ӧвӧл. Сходъёс ортчытыса, 6,5 гектар музъеммы кылдӥз ни. Но пуктӥськон дырозь ужез туж трос ай.

— Сомында уж пӧлы выйыса, семьядылы дырды кыле-а?

— Инмарлы тау, пиосы будэмын ни. Бадӟымез улэ Шарканын, нефтяникъёс дорын оператор луыса ужа. Пичиез бордамы ик улэ, ужаны ветлэ Шарканысь керттӥськон фабрикае, со — программист. Культура юртын тыршыкум, кузпалы Александр Васильевич куаретылэ ик вал, бер бертылэмысьтым: тон куке но гуртэ вуылод-а, пе. Со колхозын инженерын ужаз, та дыре ужтэк пуке. Семьяосы дышемын ни уж пӧлы выемелы. Медаз куаретэ шуыса, вазь султыса ик, сиён дасясько.

Нош уж бере яратӥсько тусьты-пуньы миськыны. Пие кызьы ке шуиз вал: оло, пе, посуда миськон машина басьтоно? Кулэ ӧй кары. Вуэн вырыса, вань жадем ортче, мылкыд но капчи луэ. Шутэтскон нуналъёсы яратӥсько утялтӥськыны, крезьгур лэзьыса ик. Укно вылам бакча сиён, сяська удъёс трос-трос будо. Туэ ӝыны бакчаям сяська мерттоно кариськи. Скал берло дыре ум ни вордӥське, туж мӧзмисько ке но солэсь. Вань пудомы — курегъёс, пуны но коӵыш.

Азьвыл аръёсы сюлэм весь уж доры кыске вал, нош пенсие потон арлыд матэктэмъя, лэся, матысь адямиосыд вӧзын трослы шунытгес. Коркась ӧсэз усьтӥсько гинэ, соку ик ганяк луисько. Дорын уж сярысь ум поттылӥське. Коӵышме вешасько, бадӟым пиелэн нылъёсыныз телефон пыр вераськисько. Мынам соос кык кузя, бадӟымез туэ школае мыноз ни. Табере туж ӟеч валасько, анай но песянай луон — со пӧртэм мылкыд вылэм. Ваньмон дыръёсме пичиосынымы ортчытыны турттӥсько, шудӥськом, лыдӟиськиськом, экскурсиосын Иже вуылӥськом. Со-а шумпотон ӧвӧл?

Источник:

Беляева, Нина Григорьевна. Гуртлэн режиссёрез : беседа с главой миниципального образования "Быгинское" Шарканского района о работе с населением, о проблемах и заботах сельчан, о жизненном пути, о семье / Н. Г. Беляева ; записала Л. Малых // Удмурт дунне. - 2013. - 3 мая.- С. 10, 15 : фот. - (Тӧр шорын)..

За предоставление материала выражаем огромную благодарность редакции газеты "Удмурт дунне"