Рахимова Сазида Минляскаровна

«Пиналъёс шорам удмурт кылын вазё…»

С. М. Рахимова

Сазида Минляскаровна (Александра Михайловна) Рахимова Ижысь Первомай ёросысь 59-тӥ школаын удмурт кыллы но литературлы дышетэ. Со – Россия Федерациысь дышетон удысысь дано ужась, Удмурт Республикаысь дано дышетӥсь, вылӥ категориен тодон-валан сётӥсь. Нылпиосты ӟеч дышетэм сяна, Александра Михайловна пӧртэм ӵошатсконъёсы пыриськылэ. 2008-тӥ арын «Россия Федерациысь устоез дышетӥсь» конкурсын вормисе потыса, 100 сюрс манет утӥз.

- Нимтулдыя шӧдӥське: Башкир музъем вылысь, дыр, выжыды?

- Вордӥськи Башкортостанысь Татышлы ёросысь Вылысь Балтач гуртын, ӵыдонтэм чебер, шулдыр интыын. Маке мында нылпиос будӥмы. Пичиысен ужез шӧмъяса, быдэ вуимы.

- Выжыяды дышетӥсьёс вал-а? Кин тӥледыз со удысэ кыскиз?

- Пичи дыръям артист луэме потэ вал. Кырӟаны, эктыны яратылӥ. Асме артист кожаса, олокызьы но пӧрмытскыса, дорын концерт пуктылӥ. Катанчи сьӧрысь зэмос артист сямен потылӥ. Кыкез но агайёсы арганчиос вал. Соос шудэмъя мон эшшо лӧптӥсько, дугдыны валатэк, кырӟасько но эктӥсько. Бадӟым классъёсын визьмаськи, артист луон сярысь малпанэ воштӥськиз. Синмаськыса бырисько вал ӟуч кылын но литератураен дышетӥселы Софья Хуснуяровалы. Удмурт вал со. Софья Ульяновна – лек ож пыр потэм нылкышно, кышкасьтэм но дӥсьтӥсь. Кыӵе со урокъёссэ быгатыса сётылӥз! Котькуд темазэ пыр-поч валэктылӥз, войнаын ожмаськемез сярысь сюлмысьтыз мадьылӥз. Будэмъям мынам со кадь луэме потыны кутскиз.

Атае но, ание (анай) но – крестьян нылпиос. Бадӟымез Файзи агае 1936-тӥ арын вордскемын. Собере Фасих вордске. Огсыр улон сяменызы кузпалъёслы люкиськоно луэ: атаймес армие басьто. Со вискын лек ож кутске. Атай Ленинград блокадае шедьылэмын. Отын со куинь ар сютэм улэмын. Война бере но секыт на вал улон. Отӥяз ми Салих выныным вордскиськеммы. Гуртмы тып-тып удмурт ке но вал, анай-атайёс нылпиоссылы бигер нимъёсты тырылӥллям. Куинь агай-вынъёс пӧлын огнам ныл будӥ. Монэ ваньзы яратӥзы. Ож бере атаймы кема аръёс «Социализм» колхозын председатель луыса ужаз. Война бере куашкам хозяйствоез ӝутыны капчи ик ӧй вал, дыр. Атай ӟеч валаз колхоз ужез, калыкен одӥг кыл шедьтылӥз. Ас вакытаз со грамотной адямиен лыдъяськылӥз. Бирск городын бухгалтерлы дышетскемын вал. Пиналъёссэ но мыр-мыр дышетӥз. Асьме гуртамы покчи классъёсты пырпотыса, ньыльнамы ик тодон-валанмес будэтӥмы Бигиней шор ёзо школаын. Удмурт, бигер, башкир но ӟуч нылпиосын ӵош дышетскимы.

- Иське со кылъёсты тӥ ӟеч тодӥськоды?

- Ньыленыз ик вераськисько. Бигерен башкир кылъёс одӥг кадесьгес, шуг ӧвӧл соослы дышыны. Но мон туж гажасько удмурт кылме. Со мынам пыдлось, вашкала выжыелэн вераськон кылыз, пичиысен сюлмам-вирам пыӵамын, нырысь ик – кырӟанъёс пыр. Кырӟаны-вераны яратэмысьтым но общественной уже мыло-кыдо пыриськеменым, школаез йылпумъяме бере мыным гуртысь клубен кивалтыны ӵектӥзы. Ӧтё бере, соглаш луи. Кинлы ке но гуртысь культураез ӝутоно ук. Ой, кӧня концертъёс пуктылӥмы. Колхоз бусыосы, фермаосы ужась калыкез шулдыртыны поталлямы. Егитъёсын капчи вал огкыл шедьтыны. Культура удысын одӥг арзэ ужаса, монэ асьме школае ик пионервожатое басьтӥзы. Татын эшшо но уже сюлэмыя, мылкыды ӝутӥськиз, всё, малпасько, дышетӥсь луо, весяклы школае кылё. Собере дышетскыны пыри Удмурт кун университетэ. Пумен ужасько, пумен дышетскисько. Школаямы быгатӥсь нылпиос туж трос вал: суредало, кырӟало, экто, спектакльёсын шудо. Котьма ласянь соосын капчи вал. Пиналъёсын концертэн гуртысь гуртэ ветлӥмы. Гуртоос милемыз зэмос артистъёсты сямен шумпотыса пумиталлязы. Удмурт дэремен дӥсяськем нылпиосты адӟыса но вашкала удмурт кырӟанъёсты кылыса, мылкыдзы бурдъяськылӥз, лыктэ на, лыктэ ми доры, шуылӥзы. Пересьёс синвуаськыса кыльылӥзы.

- Башкир музъем вылын улӥсьёс удмуртлыкез дауръёсын утьыса возё.

- Зэм ик но, Башкир музъем вылын улэм пересьёслэн удмурт выжызы юн, муре пыӵаса кылемын. Мон паймисько соослэн визьзылы, асьсэды йӧно возьыны быгатэмзылы. Туж тунсыкоесь соос. Дӥськутсы ӝикыт, асьсэос чылкытэсь. Пересьёс ог-огенызы тупаса, эшъяськыса улӥзы. Ӝыт ке вуэ, пото ини капка азе. Кыӵе гинэ учыръёсты уг верало! Мон ялан соосын пукысал, вераськемзэс уй-нунал кылзӥськысал. Гужемзэ егитъёсынызгес, аниелэн ёзъёсыныз, эмезяны ветлылӥм. Соосын но мыным туж тунсыко вал. Ульчаямы пересь Бикеби (Бике песянай) улэ вал. Тазалыкез тыпы кадь юн. Мунчое одӥг субботае соос дорын пыриськом, мукетаз Бикебилэн семьяез ми доры лыктэ. Вазен тросэз мунчое озьы пырылӥзы. Со, пересь маке, кисьтэм (литой) колошаез гольык пыд кутча но, лымыез пурӟытыса ик, ульча кузя лыктэ вал. Паймыса шораз учкылӥмы. Кынмонэз-мае ӧз тодылы. Сыӵе пересьёслэн больницаез адӟылэмзы ик ӧй вал, дыр. Нош али… Пичи гинэ тӧл шукке ке, кизьнӥськом, эмъюм борды кутскиськом… Вазен пионеръёс, пересьёслы юрттыса, тимуровской командаен коркась корка ветлылӥмы. Пичиысен адямиослы юрттыса будэмен, со сям улытозьлы пыӵаса кылиз. Гуртамы курег фермамы вал, отчы субботалы быдэ классэнымы юрттыны ветлылӥмы. Дружиналэн председателез вал бере, мон нокинлэсь бере кыльыны кулэ ӧй вал. Классмы котьку азьмынӥсьёс радын ветлӥз. Туж умоесь эшъёсы вал. Тужгес но матысез – Ямига Шарифуллина. Со но дышетӥсь луиз. Али Уфаын улэ. Эшеным адӟиськыны уг кылдылы, тодмоосмы пыр гинэ ог-огмылы салам вералляськомы.

- Ку семья кылдытон пумысен малпаськыны кутскиды?

- Ёросын ортчылӥсь ужрадъёсы ӵемысь пыриськылӥ. Пӧртэм конференциосы, совещаниосы, семинаръёсы ӧтчаллязы. Шудэ артэ ветлэ вылэм. Одӥг нуналэ Вязовка школаысь егит пиен тодматским. Василий котыр ласянь визьмо. Дышетӥсьёс тырмымтэен, со трос предметъёсын визь-нод сётӥз: биологиен, химиен, историен. Бӧрысь Василий Рахимович кема аръёс ӵоже кивалтӥз школаен. Жаляса верано, кылем арын Вася улонысь кошкиз.

- Улыны Ижкаре выжиды. Секыт ӧй вал-а вордскем палъёстылэсь люкиськыны?

- Та улонын нылпиос понна котьмар карод вылэм. Бадӟымез нылмы Удмурт кун университетэ пыриз но, огазьын мед уломы шуыса, 1987-тӥ арын Иже выжимы, корка басьтӥмы. Кузпалы мушъёссэ городэ сьӧраз вайиз. Капчи ӧй вал, конешно, дорысь потыны.

- Удмурт шаере гуртады кадь вуиды-а?

- Егит дыръям Ижын удмуртъёс гинэ уло, малпалляй. Университетэ документъёсме сётыны мынӥ но, поездысь васькыса, аслам пельёсылы уг оскиськы: трамвайын но, ульчаын но ӟуч кылын верасько. Мар та таӵе, сюлэмы ик оломар луиз, удмурт кыл нош кытын? Университетэ пыри, паймемлэсь паймисько, отын но удмурт кыл уг кылӥськы. Нырысь ик Маша Евсееваен пумиським (бӧрысь ми соин матысь эшъёс луимы). Маша Удмурт телевидениын ужа ни вал. Уг валаськы, малы эше калык пӧлын удмурт кылзэ уг потта. Нош мон ке транспортын но, ульчаын но, удмурт калык пӧлы шеди шуыса, куаныса шалтыр анай кылыным лабыртӥсько. Вазь шумпотӥськем, Ижын удмурт кылэз шер кылод вылэм. Вот малы Маша анай кылыныз уг вераськы вылэм. Но мон ас кылылэсь ноку ӧй возьдаськылы.

- Вязовкаысь дышетэм нылпиостэс кельтыны жаль ӧз поты-а?

- Соку сюлмысьтым маиз ке ишкалскыса кылиз кадь. Анай-атайёс гинэ но бӧрдыса келязы. Ураме потӥськод ке, ульчаос ик шулдыр луэ, шуо вал гуртысь мӧйы нылкышноос. Дышетӥсь – котыр ласянь адӟем карымон адями, уката ик гуртын. Котьку со чебергес дӥсяськыны тырше, мукетъёс сярысь вылӥынгес возиське, котьма ласянь висъяське. Иже лыктэммы бере гуртысьтымы нылпиос, экскурсие вуыса, классэн-классэн ми дорын кӧласа, кошкылӥзы.

- Озьы ке но Ижын ӟуч школае мыныны дӥсьтӥллямды.

- Нырысь-валысь куректӥ: кызьы меда город нылпиосын ужалом? Кылзӥськозы-а соос мынэсьтым? 65-тӥ школае инты шедьтӥ. Покчи классъёсты сётӥзы. Куинь ар отын ужай, визьмо дышетӥсьёс вӧзын бадӟым опыт басьтӥ. Пичиез нылы 59-тӥ школаын дышетскиз. Бӧрысь ачим но отчы йыгаськи. Ӵапак удмурт кылын дышетӥсь кулэ, класс усьтыны медӥськом, шуизы. Мон, со кылъёсты кылыса, шумпотэменым юзыр-кезьыр луи, доре бурдъяськыса бертӥ. Ӵуказеяз мынӥ но, соку ик нимаз кабинет сётӥзы. Сое чеберъяны Удмурт кун университетысь суредасез ӧтчамы, учебникъёс но шкафъёс басьямы. Ну, малпасько, вань кужымме сётыса, ужало ини. Но малпамъя гинэ уг луы вылэм ай. Уно шуг-секытъёсын пумиськи. Кызьы гуртысь удмурт нылпиосын ужай, сыӵеесь ик татын но куронъёс пуктӥсько. Пиналъёс удмурт семьяосысь ке, анай кылынызы умой верасько, дыр, шуыса, малпасько. Соослэн анай-атайёссы гинэ но кылэз уг тодо вылэм. 1-тӥ классэз басьтӥ, отчы 15 пиналэз кутӥ: ӟучез но, бигерез но, удмуртэз но вал. Со нылпиос табере быдэ вуизы ини. Пумиськиськом ке, удмурт кылын шорам вазё. Тау шуэме потэ школалэн азьвыл кивалтӥсезлы Вера Юминовалы. Со котыр ласянь юрттэт сётӥз. Малпасько, ужед ӟеч мед пӧрмоз шуыса, нырысь ик аслэсьтыд быгатонлыктэ возьматыны кулэ. Нюняй луид ке, астэ лёгаса кельтозы. Школае лыктэме бере Вера Борисовна алӥз: татын удмуртъёсты кыкетӥ сорт каро. Мынам воже потӥз: кызьы, малы? Пумитаз шуисько: мон сыӵеос пӧлысь ӧвӧл, адӟоды ай, мон вылӥ сорт луо. Удмурт кылэз дышетонлы пумитъяськисьёс шедьылӥзы, синмам со сярысь ӧз вераллялэ, но кылӥсько вал. Мон соослы ӧй сётскы. Урокъёс бере, удмуртлыклы сӥзьыса, нылпиосын олокыӵе но ужрадъёс, ӝытъёс ортчытъямы. Котькытчы вутскыны тыршылӥмы. Одӥгаз урокам Первомай ёрос роноысь кивалтӥсьёс пукизы. Паймимы, пе, быгатонлыктылы. Соос шуизы: тӥледлы вылӥ катерия басьтоно. Со аръёсы городысь удмурт дышетӥсьёслэн семинаръёссы, конференциоссы милям школаямы ортчылӥзы. Мыным ялан соос азьын вераськоно луылӥз. Кыкетӥ араз мукет классъёсын удмурт кылэз нуыны факультатив сётӥзы. Одӥг пол ӟуч анай дорам лыктӥз но юа: тӥ мынэсьтым пиме удмурт карыны турттӥськоды? Мон солы валэктон сётӥ, пидылы удмуртэз гажан мылкыд пыӵатӥсько шуыса. Кык-куинь ар ортчыса, та анай нош ик дорам лыктэ, нылме, пе, 1-тӥ классэ тӥ доры сётыны малпасько. Мон паймыса шуисько: тӥ пидэс дышетыны пумит вал ук. Вождэс эн вае, мон, пе, янгышме валай. Алёна, школаез быдтытозяз, мыло-кыдо дышетскиз, со мынам бур киы, юрттӥсе вал.

Нылпиослы юри удмурт дэремъёс вуртылӥмы. Городысь но ёросысьтымы пӧртэм ӵошатсконъёсы, смотръёсы пыриськылӥмы. Директормы милемын ассэ одӥг кадь возьылӥз. Ӟуч нылкышно, удмурт дэрем дӥсяса, ӵош эктэ, кырӟа. Озьы ик нылпиослэн анайёссы ужрадъёсамы мылысь-кыдысь пыриськылӥзы, соос мыным трос юрттылӥзы. Вера Борисовналы «Удмурт кенеш» огазеяськон Ашальчи Окилэсь премизэ юнме ӧз сёты, та нылкышнотэк ми сокем вылэ ӧй ӝутӥськысалмы. Школаямы удмурт кылэз котьку кык-куинь кузя нуылӥмы, дышетӥсьёсын, тупаса ужамы. Али дыре Людмила Барановаен дышетӥськомы.

- Дышетэм нылпиосты тӥлесьтыд удыстэс бырйизы-а?

- Тросэз соос дышетӥсь луизы ни. Вязовкаын ужакум, одӥг тол каникулэ 6-тӥ классын дышетскись нылпиосты экскурсие Иже вайи. Поръян сяменымы одӥгез нылмы ышем. Кызьы собыдӟа городысь йыромем мае ке шедьтом на шуыса, кӧня бӧрдӥ. Кыӵе синмын доре бертом, мар шуоз монэ нылашлэн анай-атаез но гурт калык? Ярам, шудэ вылэм, Люда ачиз ик ми доры вуиз. Али со Татарстанысь Сарсак-Омга школаын дышетэ. Мон тӥледыз гажаса, педучилищее пыри, шуэ. Кылем арын дышетӥсьёслэн бадӟым научно-практической конференцизы вал. Люда отчы лыктэм. Отын ми соин пумиським. Монэ адӟыса, «ой, Сазида Минляскаровна» гинэ шуэ на.

Шумпотоно, 59-тӥ школаез йылпумъяса, Удмурт кун университетысь удмурт филология факультетэз йылпумъяз Наташа Дёмина. Со усто дышетӥсь луиз.

- Ӟучомем удмуртъёс шоры учкыса, ӧд сӧриське, нылпиоостылэн нылпиосынызы шалтыр гинэ анай кылыныды вераськиськоды. Пиналъёсты кудзы ке дышетӥсь луизы-а?

- Ми ваньмы удмурт кылын вераськиськом. Бадӟымез Лира нылмы Удмурт кун университетэз йылпумъяса, 59-тӥ школаын географиен дышетӥз, кема завуч луыса ужаз. Али со семьяеныз улэ Москва улосысь Щёлково городын. Бадӟымез Сергей пиез Ижын ужа. Туж визьмо пияш. Пичи дырысеныз котьмаин тунсыкъяське. Умой шудэ пианиноен. Кыкетӥез Паша пиез 6-тӥ классэ гинэ потӥз ай. Каникулъёс сёто ке, соку ик Иже бертэ. Пашалэн сюлэмыз Удмурт шаере кыстӥське.

Индира нылмы 18 арлэсь кема ини Италиысь Форли городын улэ. Отчы со бызиз. Школа бере Ижысь медучилищеез йылпумъяса, финансовой колледжез пыр потӥз. Но улон сое чылкак музон шаере вуттӥз.

- Тӥледлы итальян кылэз но дышетоно луиз, дыр?

- Вальтер эмеспие ӟуч кылэз уг вала. Нош Лира итальян но англи кылын туж умой вераське. Эмеспиед шоры учкыса уд пукы ук, кытӥ-отӥ кылзэс йӧттэм карисько ини. Одӥг кыл верасько но – со вала.

- Нылъёстылэн нимъёссы аспӧртэмесь. Кин соосты тыриз?

- Татышлыын Лира нимо нылаш туж чебер кырӟа вал, сое кылыса, нылме озьы нимай. Нош Индира ваньмызлы тодмо: Индиын тодмо нылкышно кивалтӥсьсы Индира Ганди вал. Солы синмаськыса, нимыз чебер потыса, нылмылы инди ним сётӥмы. Со вакытэ индийской киноосты возьматъязы. Туж мыным кельшо вал соослэн кырӟанъёссы но эктонъёссы.

Пиналъёсмылэсь мӧзмиськом, адӟиськеммы потэ. Италие ньыль пол вуылӥ ини. Ярам, али улон трослы азинскиз. Мобильной телефон но Интернет кылдӥзы. Табере нуналлы быдэ нылпиосын герӟаськиськомы ини.

Источник:

Рахимова С. М. «Пиналъёс шорам удмурт кылын вазё…» / С. М. Рахимова ; записала Л. Тихонова // Удмурт дунне. - 2012. - 17 августа. - С. 10, 15. - (Удмурт кизилиос).

За предоставление материала выражаем огромную благодарность редакции газеты "Удмурт дунне"