Белых Владимир Васильевич

Арганлэн эшез

Азьвыл аръёсы концертъёсты чеберъялляз арган куара. Туала удмурт эстрада кельшыны кутске ини шундыпуксён палъёсысь вуэм сямъёслы: пелез онгыратӥсь фонограммаос, мугорез огшоры куасаллян. Куд-ог кырӟанъёслэн пуштроссы начар, сюлэме гинэ ӧвӧл, йыре но уг кылё. Но визьмо учкись вань ай. Соос пӧлысь троссэ лӧпкытэ Удмуртиысь культура удысысь дано ужась, арганчи, Ижысь «Тюрагай» калык ансамбльысь валтӥсь кырӟась Владимир Белых. Та коллективе со куамын ар пала ини ветлэ.

Нянь шорем

Эгра ёросысь Годегшур гуртын вордскем пияш атайтэк будэ. Таиз финнъёсын ожмаськон вакытэ быре.

Али Владимир тодаз вае:

- Туж кырӟась вылӥськем. Огпал гурт пумын чирдэмед мукет палаз кылӥське, шуылӥз гурт калык. Кырӟатэк нокытчы но уг ветлӥськы вал. Одӥг пол, школае мыныкум, туж ӝож гур мытӥськем: «Из но, му но пилиське но, адямилы чидано…» Апае кылэм но укнозэ усьтыса ик юам: «Володь, малы сокем ӝож нёжъяськод?» - «Кӧты сюма, кутэн ветлӥсько». Апае укноетӥ мычиз нянь шорем. Ну бен шумпотӥ, шулдыр кырӟаса, школае бызи ни.

Тулыс бусы усьтӥськем бере, музъемез гырыкузы мычиськем вуж картошкаез бичаса, пияш кисаль лэсьтылэ, урокъёсты келляса, бакчаяз бугыръяське. Пу дасян но ву нуллон нырысетӥ классын ик Володя вылэ усе, малы ке шуоно сизьым классэз йылпумъяса, Иван агаез Воткаысь техучилищее кошке.

Арган

Уж адямиез дышетэ но будэтэ. Пичи дырысен ик бадӟымъёслэсь ужзэс быдэсъясь Вова тэк пукыны уг чида. Сизьыметӥ-тямысэтӥ классъёсын ини гуртысь клубазы библиотека мактал кылдытэ. Отчы ёрос библиотекаысь книгаос нуллыса, лыдӟисьёс вылэ карточкаос лэсьтэ. Культура улӥын, гуртъёсын клубъёс ньӧмыз понна сыло. Володя ас мылкыдызъя егитъёс понна гуртысьтызы клубез ачиз утялтэ. Дырын-дырын ӧтьылэ сьӧрлось киномеханикез кино возьматъяны. Ӝытъёсы арган кутэ но эшъёссэ шулдыртэ.

Гулбеч

Владимир Васильевич веранзэ азьланьтэ:

- Туж дышетскеме потэ вал крезьгуръя училищеын. Начальной классъёсын дышетскисьёслы ёлка радъялляй, мукет ужрадъёсын арганэн шудылӥ, собере ини егитъёсын ӵошен кырӟаллям. Ӵужодӥге но, атае но арганчиос вал. Соос выжые мынӥськем. Вань сюлмы крезьгур бордын. Отӥяз анае, мон но агае кузпалэныз городэ выжим. Улӥмы кыӵе ке юртлэн гулбечаз, пичи гинэ интыын. Крезьгуръя училищее кык экзамен сётӥ, куинетӥяз ӧз лэзе ни, общежитие сётыны ум быгатэм шуыса. Улон интыямы гожтӥськон (прописка) понна котькуд адямилы укмыс квадрат метр инты луыны кулэ, нош милям солэсь ичигес - прописать уг каро. Мыноно луи 7-тӥ училищее, автослесаре дышетски. Училищеын кык ар дышетскыса, Володя кошке армие (Германие).

Шуд

Школаын дышетскыкуз ай, Володя синмаськыса учкылӥз гуртысьтызы ик мусо Майя нылаш шоры. Таизлэн но сюлэмыз пирсэкъялляз, лэся. Но ог-огзылы яратэмзэс вераны ӧз дӥсьтылэ. Майя, школаез йылпумъяса, Глазовысь пединститутэ кошке.

Кылдэмезлэсь нокытчы уд пегӟы, шуо. Володя, армиысь отпуске бертылыкуз, Майялы шуиз: «Тынад вылӥ образованиед луоз, мынам - ӧвӧл. Монэ ултӥ ӧд кары ке, кузпалъяськомы».

Армиын Владимирез туж куризы Германие кыльыны, луонлык вал уксё жильдыны. Со тодаз вае:

- Майялы гожтэт лэзи: соглаш ке бызьыны, институтэз йылпумъяса, татчы ужаны лыктод шуыса. Гожтэтме малы ке басьтымтэ. Мыным иворез ӧз вуы. Бертоно кариськи. 1969-тӥ арын Майяен гожтӥським.

Майя Сергеевна Ижысь 64 номеро школаын ӟуч кылъя но литературая урокъёсты нуыны кутскиз.

Семьяез возён - тэк пукон ӧвӧл. Владимир Белых Ижысь политехникумысь ӝыт люкетаз пыриз, сое горд дипломен йылпумъяз. Чертёжъёсыз адӟем карымонэсь, тодон-валанъёсыз муресь. Татчы ик кыльыны ӵектӥзы. Владимир Васильевич политехникумлэн директорезлэн воштӥсез луиз. Лыдӟе сюрес вылын шудтэм учыръёслэсь утиськон сярысь лекциос. Бӧрысь Белыхез ӧтизы монтажъя 23 номеро управлениысь отделэн кивалтыны. Пиосмурт та удысын вить ар тыршиз.

Выльдӥськон аръёсы управлениын коньдон ичигес сётъяны ӧдъязы. Эшез дэмлаз «Росгосстрахлэн» филиалаз ассэ эскерыны. Владимир Васильевич татын кык ар ужаз транспортъя инженерын. Собере ини басьтӥськиз дирекциысь хозяйствоя люкетэн кивалтыны. Та удыссэ воргорон дас куать ар пала нуэ ини.

Кырӟан

Володялы нотаосты дышетыны ӧз кылды ке но, кырӟанъёс со борды туг кадь бинисько. 1978-тӥ арын, политехникумын дышетскон вакытаз, ӵужодӥгъёсыз Иже дышетскыны лыктӥзы. Ӝытъёсы мӧзмеменызы, «Тюрагай» хоре вуизы. Соос Володя Белыхлэн арганэн шудыны но кырӟаны быгатэмез сярысь отын вераллям. Огпол хорлэн кивалтӥсез Валерий Митрофанов ӧтиз арганчиез репетицие. Белых лобӟыса сямен лыктӥз. Арганзэ кутӥз но кырӟаз:

- Мон бертӥ ужысь, пӧзьёсме куштӥ.

Киосме кужмысь посыса шунтӥ.

Гажанэ мынам, чебере мынам,

Туг кадь биниськы, биниськы бордам.

«Тюрагай» хорын та кырӟан валтӥсез луиз. Володя вуэмен, коллективын фольклорен герӟаськем нимысьтыз программаос кылдӥзы.

Солист вера:

- Кырӟасьёсмы пӧртэм районъёсысь, соин калык йылолъёсты возьматъямы. Али соос фольклоръя композициос нимасько. Куинь пол вуылӥм Россиысь телевиденилэн «Шире круг» передачаяз, Тула, Киров, Таллин, Пермь городъёсы. Ӵемысь ӧтчаллязы Правительственной шуиськись концертъёсы но.

Арганчи - кивалтӥсь

Нискыланы яратӥськод ке, ачид ик салазкидэ нуллы, шуэ ӟуч калык. Пӧртэм учыръёсы шедьылэ ансамбль. Тӧл-а пельтэ, лымы-а пурӟе, дэри-а пальккаське - артистъёс автобусэз донгало. Программалэсь пуштроссэ воштоно-а, концерт радъяно-а, репетиция ортчытоно-а, коллектив Белыхен кенеше. Концертъёсты но Владимир Васильевич ик ӵемысь нуэ.

Владимир Белыхлэн трос данъян грамотаосыз. 1990-тӥ арын солы «Удмуртиысь культура удысысь дано ужась» ним сётӥзы.

- Трос аръёс ӵоже «Тюрагайын» кырӟасько бере, тодон-валанъёсы, быгатонлыкъёсы люкаськизы ик. Асме туж капчиен шӧдӥсько калыкен пумиськонъёс дыръя. Дыши вольыт вераськыны. Шуом, кинлэн ке юбилеяз мыным капчи йӧтэ удмурт но, ӟуч но кылын ӟечкыланы. Собере сюлэмам улэ малпан: удмурт культураез, кырӟанъёсыз утён, азинтон, анай кылэз гажан. Асьме калык улэ гуртъёсын, клубъёс отын пичиесь, соин бадӟым коллективъёс куд-огаз уг но вуо. Ӵапак сыӵе интыосы ми ансамбленымы вуттӥськиськомы. Жаляса верано, Ижын культурая дворецъёсысь самодеятельной удмурт коллективъёс быризы, дворецъёс пӧрмизы ини вуз карон центръёслы. Тани милям но ансамбльмы интыяськемын вал «Ижмаш» дворецын. Отысь милемыз кошкытӥзы.

Али «Тюрагай» возиське Горький нимо садлэн одӥгаз юртаз, костюмъёсты возён инты ӧвӧл. Озьы ке но артистъёс люкаськыло, кырӟало, концертъёс возьмато. Соос асьсэос автобус понна но, шофёрлы но тыро.

- Милемды шуныт пумитамзы бере мылкыд бурдъяське, озьы ик учкисьёслэн сюлэмзы шуна. Со ик азьланяз ужаны кужым сётэ. Кӧня ке жаль потэ ик, профессиональной музыкант ӧй луы шуыса. Но мон аслэсьтым сюресме шонер бырйи, улонын инты шедьтӥ, семья кылдытӥ. Нош «Тюрагай» - шудбурелэн одӥгез люкетэз, одӥг пӧсь яркыт тылсиез: шунтэ, юрттэ мыло-кыдо ужаны. Мон кадесь ик та ансамбльысь ветеранъёс: Удмуртиысь культура удысысь дано ужась Валентина Кондратьева, Тамара Федотова, Серафима Андреева но мукетъёсыз. Соос вылын возиське хор, соослэсь дышетско егитъёс.

Егитъёс

2000-тӥ арын хорез кырӟанъя но эктонъя ансамбль нимазы. Эктӥсь коллективен азьвыл кивалтӥз А. Г. Щёчев. Со улонысь кошкем бере эктонъёсты ветеранъёс пукто. Ансамбле егитъёсты кыскыны шугъяськонъёс вань ик. Белых маде:

- Компартия вакытэ егитъёслы бадӟым саклык висъязы дышетскыны, уже интыяллязы. Нош али дышетскемзы бере но специалистъёс ас мылкыдзыя удыс уг шедьто. Егитъёс огыр-бугыр я отын, я татын тыршо. Ӟигарзы быре, ӝыт кырӟаны ветлэмзы уг поты ни. Тросэз коньдон поттон сярысь гинэ малпало, арысь аре котьмалы дун будэ бере. Но оскон котьку ик вань. Малпасько, азьланяз «Тюрагай» выль нылъёсты но пиосты будэтоз.

Крезьгур гожъясьёс но кырӟасьёс трос кадь. Но удмурт эстрада ӟучоме. Кырӟанлэн пуштросэз но, гурез но лябӟо, сюлэме уг лякисько. Асьме искусствомес, кырӟанъёсмес, калык йылолъёсмес азинтон потэ кивалтӥсьёс бордысь. Пуштросэныз, вылтусэныз удмуртлыкогес луиз ке элькунмы, калыклэн дӥсьтонэз но, данъяськонэз но вылӥынгес луозы.

Источник:

Белых В. В. Арганлэн эшез / В. В. Белых; записала Ю. Кузьмина // Удмурт дунне. - 2007. - 13 апр. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"