Смагина Светлана Николаевна

Ма сярысь мадиз уӵы?

Смагина С. Н.

Фольклор кырӟанъя «Айкай» удмурт театрез тодӥсьтэмъёс вань на меда? Шаерамы гинэ ӧвӧл, кунсьӧрын но уно ини солэн матысь эшъёсыз, тодмоосыз. «Айкай» - со эктонъёсын, кырӟанъёсын яркыт, шулдыр спектакль, вуюись кадь дӥсьёс, капчи мылкыд, марӟан выллем чебер куараос. Ваньмыз сямен кырӟась-эктӥсьёссы - зэмос кизилиос. Но пӧлазы тужгес яркытъёсыз, чеберъёсыз пумиськыло. Тазьы ик вераны луэ «Айкайысь» одӥгез «уӵы» - Светлана СМАГИНА сярысь.

Светлана вордӥськемын Алнаш ёросысь Кузьыли гуртын 1966-тӥ арын. Жингрес куараеныз, чебереныз пичиысен ик висъяськылӥз. Соку ик тодэ вылэм ини артист луонзэ но.

- Гуртоосы но, дышетӥсьёсы но дэмлаллязы, ачим но со сярысь ик малпалляй. Кырӟаны-вераны туж яратылӥ уго. Ай куинь арес дыръям ик, радиоысь кырӟасьёсты кылыса, «мон отчы пыро» шуыса бӧрдылӥськем. Школаысен хоре мылысь-кыдысь ветлӥ: дэмен но, огнам но кырӟалляй. Концертъёсын бускель гуртъёсы, пӧртэм ӵошатсконъёсы поталлямы. Нимазы кырӟасьёс пӧлын ёросамы вормись луылӥ. Талы луыса ик, оло, Выль аре Лымы нылэ но монэ бырйылӥзы. Гуртоосы фермаын кырӟаллямме но серекъяса тодазы вайыло. Школаын дышетскон вакытам анаелы юрттӥськыны фермае поталляй. Отын утыр ӵыж-ӵаж йӧл кыскисько, утыр гид тырос кырӟасько вал.

- Школа бӧрсьы сюресты кызьы азинскиз?

- Школаез йылпумъян арам «Советской Удмуртия» газетысь ялонэз адӟи: Ижевскысь Крезьгуръя училище нылъёсты но пиосты, пе, дышетскыны кутэ. Мынӥ. Зэм, соку нотаосты-мае тыро-пыдо уг тодӥськы вал, номыр инструментэн но ӧй шудылы. Но вокальной (кырӟан) отделенияз басьтӥзы. Дышетӥсьёс куараме, кылон саклыкме эскеризы но куспазы верасько: таидлэсь, пе, ӟеч колоратурной сопрано пӧрмоно, лэся. Сопрано - векчи куара, колоратурной - узыр буёло шуэмез возьматэ вылэм. Тае берло тодӥ ини. Экзаменъёсты умой сётӥ, студент луи. Училищеын крезьгур удысъя тодон-валанъёс люканы, быгатонлыкъёсме волятыны тыро-пыдо быгатӥ ини. Фортепьяноен но шудыны дышетсконо луиз, классикаез но трос кылзӥмы. Озьы ик куараме волятон бордын но ужазы на, академической хоре кырӟасе дасязы. Дышетӥсе вал Евгения Пахомова. Выпускной экзаменамы группаысьтымы огнамлы гинэ кырӟанъя (со валтӥсь специальность лыдъяськылӥз) «вить» пуктӥзы.

- Училищеез йылпумъяса, соку ик сцена вылэ вуиды-а?

- Со бӧрсьы консерваторие ыстыны ӧдъяло вал. Но пумит кариськи: сцена вылын кырӟаме, артист луэме ӝоггес потӥз. Дышетсконмес йылпумъян азьынгес милемыз Мамонтов кылзӥз: эшеным кыкнамес кутӥзы «Италмасэ». Со гужеме татысь артистъёс гастрольёсы потӥзы. Милемыз, егитъёсты, кельтӥзы, репертуарез мед дышетомы шуыса. Мыным Анатолий Васильевич нимысьтыз уж но сётӥз на: «Дас сизьым арес» кырӟанэз дасяны куриз. Озьы сӥзьылаз мон соло номереным сцена вылэ поталляй ни. Бӧрысь но нимаз номеръёс оскылӥзы. Кылсярысь, «Салья сюанын» бызись нылэз шудӥ.

- «Италмас» - бадӟым коллектив. Секыт ӧй-а вал нырысь вакытаз, кыӵе мылкыдын пумитазы выль адямиез?

- Шуныт пумитазы. Мылысь-кыдысь юрттӥськизы. Нырысь нуналъёсысеныз ик монэ бурд улазы басьтӥзы Серебренниковъёс. Алнашысь шуыса, оло, Валентина Михайловна Серебренникова ачиз но отысь уго. Куараме калык гуръёслы матэгес карон бордын выльысь ужано луиз на, училищеын академической хорлы шуыса дасязы вал бере. Озьы ик сцена вылтӥ ветлыны быгатэм но кулэ луиз. Училищеямы солы ӧз дышетэ вал. Мукет чыры-пыры шугъяськонъёс, ӵемтонъёс но шедьылӥзы. Тодӥсько на: огпол выль дышетэм кырӟанэным сцена вылэ потӥ. Анатолий Васильевич залысен учке. Мон сое ӧй адӟы вал, собере синйылтӥ но, шуак луыса, кылъёсме ик вунэтӥ. Нырысь-валысь сыӵе учыръёс но тӥни вал. Отӥяз ини сцена вылын асме эркынгес возьыны дыши, арлыдо эшъёсмы сюлмысь юрттӥськизы. Соин ик «Италмас» ансамбльын ужам аръёсме туж шунытэн тодам ваисько, тау карисько: тросэзлы дыши отын.

- Дышем гинэ ӧвӧл, татын ик, тодӥсько, пумитады ас улон шуддэс но. Кузпалды сярысь верасько...

- Кузпалы Леонид Смагин, зэм, туннэ ке но «Италмасын» эктэ. Удмуртиысь дано артист. Эшъёсыз пӧлын соку огназ гинэ удмурт вал. Солэсь азьло эктӥсьёс пӧлын удмуртъёс чик вылӥллямтэ.

- Кема-а ужады «Италмас» ансамбльын?

- Куинь ар гинэ ужаса вуи. Отӥяз пинал ваи, собере «Айкае» выжи ини. Коллектив кылдыку, милемыз кузпалэным ӵошеннамес ик отчы ӧтизы вал. Но солэн «Италмасэ» ик кылемез потӥз. Мон выжи: выль интыын артистлы усьтӥськыны луонлыкъёс но паськытэсьгес адскизы. «Айкайын» милям котькудӥз - кырӟась но, эктӥсь но, шудӥсь но. Со гинэ ӧвӧл, вань программаосмес, эктон-кырӟанъёсмес кутсконысеныз пумозяз ас кужыменымы дасяськомы. Дӥсь куись-вурисьёсмы гинэ но пӧламы. Татчы выжи шуыса уг жаляськы.

- «Айкайлэн» нимыз туж аспӧртэм. Кытысь сыӵе ним бырйиды, кудды?

- Ним бырйыны юрттӥз Кузьма Куликов. Камсьӧр удмуртъёслэсь Айкай нимо нылаш сярысь синмаськымон чебер вашкала мадёссэс вераз со. Нылашлэн нимыз туж яркыт, вунонтэм чузъяське кадь потӥз. Синмаськимы солы. «Инвожо», «Марӟан» но мукет та выллем нимъёсын коллективъёс соку вал ини.

- Выль коллектив кылдытон пумысь малпан кинлэн йыраз лыктӥз?

- Кичӧлтӥсьёс вал арлыдо эшъёсмы: Серебренниковъёс, Кузнецовъёс, Прокопьевъёс... Соку улосамы, «Италмас» сяна, мукет профессиональной коллективъёсмы ӧй вал уго. Вань гуртъёсы поталляны «Италмас» ӧз вутскылы. Куд-огаз солы тупамон бадӟым, эркын клубъёс но ӧй вал. Соин ик тӥни пичигес коллектив кылдытон сярысь малпан кылдӥз.

- Артистэз, сцена вылын кырӟан-эктон сяна, пӧртэм шаеръёсы вуылыны луонлык но синмаськытэ, дыр. Кытчы вуылыны быгатӥды ини?

- Ми быдэс Удмуртимес котыръямы ини. Бускель улосъёсын но арлы быдэ концертъёс пуктӥськом. «Италмасэн» Тулае, Москвае нӧ Уй пал Кореяе потамы. «Айкайын» дыръям ветлыны кылдӥз ини Монголие, Венгрие, Финляндие, Швецие, Италие, Швейцарие.

- Кунсьӧры потамды кудӥз, маиныз тодэ ваёнъёсады кылиз?

- Нырысьсэ кунсьӧры Кореяе потамы. Туж кемалась ке но вал ини, али ке но син азям на: Ким Ир Сенлэн тусбуйыз котькытын ошылэмын вал. Но тужгес вунонтэм кылизы ковёръёссы. Соос синмез вандымон яркыт буёлъёсын, бадӟым-бадӟым сяськаосын куэмын. Огез катанчи интые ошемын вал, мукетыз выж вылэ вӧл-вӧл валемын, быдэс заллэн быдӟалаяз, туж чебер адске. Вылаз лёгиськыны ик кепырано. Такем чеберез кин меда лэсьтэм шуыса юамы вал берыктӥсьмы пыр. Валэктӥзы: таӵе ковёръёссэс, пе, соослэн дэмен лэсьтыло... Озьы ик ветлӥмы спектаклязы. Туж паймытӥз отын тыл техникаез быгатыса уже кутэмзы. Тыл югдэ но, сцена выл син куспын пӧрме льӧльмыт-юг тӧдьы сяськаосын пурӟись улмо садлы. Соос пӧлтӥ кырӟаса вамышъя нылаш. Вунонтэм яркыт, чебер суред. Отӥяз синэз кыньыртыса но уд вуттӥськы: со улмо сад интые гыась ю-нянь бусы кылдэ. Техникалэн ӟечлыкез мукетъят но туж шӧдӥськылйз. Концерт пуктыку, cин шорам йӧтӥз: микрофонъёсын нимысьтыз выронэз, тупатъянэз татын ӧвӧл. Кулэ луыку, соос асьсэ коже сяськаос сямен ӝутӥсько но усьтӥсько. Бадӟымесь ӧвӧл, син шоры уг йӧто, нош куараез котыр куто. Концерт пуктон залзы асьме куинь-ньыль «Металлургмы» быдӟа вал ке но, куара туж ӟеч кылӥськиз. Паймытӥз на соиз но: нылкышноос йырсизэс одӥгтэм вакчи ӵышкыса ветло. Артистъёссылэсь гинэ кузь йырсизэс синйылтӥ.

Кунсьӧры кыкетӥзэ потамы Монголие. Татын шӧдӥське, ыж вордонэнгес выро шуыса. Сиён-юонзы но туж аспӧртэм. Милемыз ыж кӧен-а, маин-а дасям чаенызы куноятӥзы. Зэм, мыным солэн шӧмыз туж ик ӧз яра. Тодматӥзы кырӟась усточиосынызы но. Соослэн ас манерзы: «гульыметӥ кырӟан» шуон. Нырысьсэ тазьы улэпкын кылзӥмы сое. Чебер аспӧртэм чузъяське.

Италиын толэзь пала, Швейцариын толэзен ӝыныен улӥмы. Италиын гань-гань, шыпыт вераськисьёссэс ӧм пумиталлялэ: артэ пукись муртъёссы но ымтросазы бадӟым куараен кесяськыса выллем верасько. Виразы та сям пыӵамын, лэся. Укыр ӵаш карись калык - дышымтэ вылысь акыльтоно, жадёно. Асьмелэн вераськонмы гинэ ӧвӧл, кырӟанъёсмы но гань-ганесь, шыпытэсьгес. Инкуазьзы, городъёссы чебересь. Котькудаз сьӧр кунэ потаку милемыз одно ик экскурсиосы нуллӥзы, чебер интыоссэс, вашкала сэрегъёссэс возьматылӥзы.

Венгриысь инбам улын ужась музейзы тодэ лыктэ. Со вуж хутор выллем лэсьтэмын. Вашкала улон-вылонзы, киужъёссы возьматӥсько. Нимысьтыз ужасьёссы вань: соос, куноослы возьматыны шуыса, юри керттӥськыса, куиськыса татын пуко. Асьмелэн соку озьы ӧй вал на. Финляндие потакумы, Санта Клауслэн «резиденцияз» пырамы. Финнъёслэн Тол Бабаенызы артэ туспуксим. Клауслэн юртъерез туж бадӟым. Пужейёсыз отын вань, ужасьёсыз - гномъёс. Быдэс дуннеысь пиналъёслэсь мешокен-мешокен гожтэтъёс вуо татчы (ми ветлыкумы, Удмуртиысь но одӥг гожтэт вал). Швецие но вуылӥмы. Отысь «Филокорос» коллективзы Удмуртие ветлӥз вал. Соосты удмурт сяммыя ми огмы дорысь огмы доры пыратыса куноятыса нуллӥмы. Швециысен собере асьмелэн но соослэсь улэм-вылэмзэс адӟеммы потӥз. Отысь огезлэн эшмылэн вордскем нуналыз ӵапак тупаз но, куное ӧтиз. Корказы бадӟым, но соослэн асьмелэн сямен ӝӧк выл тыр сиён-юонэн куно пумитан сямзы ӧвӧл: юон дыръёссэс ресторанын ортчытъяло. Милемлы эшмы торт но быдэн стаканэн морс ӝӧк вылэ пуктӥз.

- Кунсьӧры потакуды, удмуртъёсын пумиськылыны кылдылӥз-а?

- Ӧз, ӟучъёс вазиськылӥзы, нош удмуртъёс ӧй вал.

- Кунсьӧры трос потады ини, синмаськымонэз но трос вал, шуиськоды. Кыльыны быгатысалды-а кудаз ке, улон инты, уж ӵектысалзы ке?

- Ӧй, мон вань сюлэмыным удмурт адями. Палэнын чебер, шулдыр интыос вань ке но, асьме шаермылэсь, удмурт кырӟанъёмылэсь мусоез, дуноез ӧвӧл кадь потэ. Дор палъёсмылэсь палэнын кемагес улыку, мӧзмыны кутсконо.

- Вордскем гуртады концертэн ӵемысь-а вуылӥськоды?

- Ӵем шуыны уз лу, одӥг-ог.

- Анай-атайды, сузэр-вынъёсты сярысь ӧм тодэ на. Кытын кин луыса ужало соос? Такем ик чебер кырӟало-а?

- Атае Климкин Николай Максимович быдэс улонзэ комбайнерын ужаз. Атае кырӟаны туж ик мыло-кыдо ӧй вал, такмакъёсты, зэм, одӥг-ог нёжъялляз ик. Нош эктыны чебер пӧрмытэ вылэм: вынмылэн сюаназ эктыны потӥз но - синмаськымон, йӧно адскиз. Анае Надежда Ивановна кырӟаны туж яратэ. Куараез но чебер, буёлэзъя мынам выллемгес ик. Сузэръёсылэн, вынылэн куараоссы синмаськоно кадь. Семьяямы ми куинь сузэръёс будӥмы, мон пичиез. Вынмы (куспамы шумес пыдэс шуылӥськомы сое) арганэн но шумприч шудэ. Сузэръёсы но, выны но вордскем гуртамы улыны кылемын. Максиммы - шофёр, апаймы - пудо утись, шоретӥез - бухгалтер. Дор палъёсамы ялан вуылӥськомы. Школае мынытозяз, нош отӥяз - гужем шутэтсконъёсаз нылмы анай-атае дорын улӥз уго. Концертъёсы кошкылыкум но анае юрттӥськылӥз, сое Иже вайылоно луылӥмы. Солы луыса, нылмы но удмурт кылын чебер вераське. Али Танямы 8-тӥ классын ини.

- Шудо-а тӥ? Кызьы валэктысалды: ма со - шуд?

- Ог-огдэ яратон ке вань, уж дурад кивалтӥсьёсыд, эшъёсыд гажало, дунъяло ке, тазаесь ке выжы-кумыосыд, матысьёсыд... Одӥг кылын гинэ солы валэктон сётыны уг луы, дыр.

- Вераськонмес йылпумъяса, лыдӟисьёсмылы, оло, маке нимысьтыз веранды вань на?

- Соослы но шудбур, тазалык сӥземе потэ.

Источник:

Смагина С. Н. Ма сярысь мадиз уӵы? / С. Н. Смагина ; записал Владимир Возняков // Удмурт дунне. - 2002. - 15 нояб. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"