Фёдоров Леонид Павлович

Йыбырттӥсько дышетӥсьёсылы

Фёдоров Л.П.

1981-тӥ арын Удмурт радиоысь ужан кабинетам пыриз лякыт сямо воргорон, шыпыт гинэ вазиськиз, адӟисько, пе, выль ужасез. Озьы тодматским. Со вал Леонид Павлович Фёдоров, Удмурт Республикаысь сӥё-дано журналист, дышетон удысысь отличник, вань улытозяз гожъяськись, удмуртлыкез утись адями.

- Леонид Павлович, 30 ар тырмоз ни тодматскеммы дырысен, нош улон-вылонды пумысен татчыозь ӧм кенеше на, отын котьмаиз вал, дыр, ук?

- Озьы. Мон, вань удмурт гожъяськисьёс сямен ик, потэмын гуртысь, крестьян семьяысь. 1928-тӥ арын кышкыт Лудорвай уж бӧрсьы кулак каремын вал трос калык. Со вакытэ Дэри ёросысь ик та гуртысь музъемлы ёрмись дас сизьым семья, нюлэсэз кораса, починка кылдытэ. Вить иськемлы палэнын интыяськем гуртэз удмурт сямен Лудорвай починка шуиллям, ӟуч сямен - Крестьянка, нош колхозлэн нимыз - «Новая крестьянка». Мон отын вордски 1934-тӥ арын 28-тӥ декабре.

Дядяе колхоз валъёсты сюдӥз-утялтӥз, анае но фермаын ужаз.

Пичи дыры секыт вакытэ учыраз. Война кутскиз гинэ, атайме мукет гуртоосын ӵош войнае басьтӥзы. Озьы ми пичи сузэреным пыраклы кылим атайтэк. Со ӧз берты ни.

- Нош кышкыт сюрес вылэ келямзэс тодӥськоды на-а?

- Бус пыртӥ кадь, но тодӥсько на. Вань гурт калык люкаськиз. Пичи коркаямы шоканы ик секыт. Дядяе, пукон вылэ султыса, чук шуккиз, пал кияз монэ возе, мӧзмыт кырӟан улсын бам вылтӥз синвуосыз бызё, чупа но чупа монэ. Сомында аръёс ортчыса но, та суред али но син азям. Войнаен сэрен школае мон ас дыраз ветлыны ӧй быгаты. Туж урод улӥм: коркамы начар, дӥськут ӧвӧл, сиён уг тырмы, тазалык лябгес. Лудорвае дышетскыны ветлӥсь эшъёсылэсь вожъяськисько вал, кенер вискытӥ яке укноетӥ лушкем учкылӥ соос шоры. Нош нырысетӥ классэ кутӥзы ай 1943-тӥ арын гинэ, укмыс аресам потӥ ни вал.

- Секытэн-а сётскиз дышетскон ӧре пырон?

- Ӧз. Лыдӟиськыны мон куать аресысен ик быгатӥ. Нырысетӥ классын дышетӥз туж егит нылмурт Анна Семёновна Петрова. Солы 17 арес гинэ вылэм. Классын ми куамын пала - мынэсьтым пичиос букваосын тодматско, нош мыным мӧзмыт, ваньзэ тодӥсько бере, урокъёс уг кельшо. Сое валаса, дышетӥсе нимысьтыз гожъяськон-лыдӟиськон сётылӥз.

Куинетӥ классысен мукетыз егит дышетӥсь вуиз - Валентина Ивановна Лебедева. Лудорвай школае со лыктӥз 16 арес дыръяз, Якшур-Бӧдья педучилищеез йылпумъяса. Удмурт газетъёсты-журналъёсты со али но яратыса лыдӟе. Табере ми дасо аръёс ӵоже ини гожтэтъёс пыр кусып возиськом. Солы туэ 80 арес тырмиз. Туж шунытэсь, сюлмысьтыз потэм кылъёсын гожтэтъёс ысъя. Тодэмез потэ котькуд вамышме. Кызьы уд йыбыртты сыӵе дышетӥсьлы!

Ньылетӥ классын дышетӥз удмурт кылэз валась ӟуч кышномурт Нина Ивановна Шутова. Со аре милемыз огазеязы нылпи юртын улӥсь пиналъёсын - Удмуртие война бервылъёсысь вуэмъёсын.

- Лудорвай школа бере дышетскондэс кытын азьланьтӥды?

- Соку школа сизьым классъем гинэ вал, йылпумъяй сое 1950-тӥ арын.

Умой дышетски, школаез ушъян листэн йылпумъяй бере, дышетӥсьёс тодон-валанме будэтыны ӵектӥзы Иж педучилищеын. Тросэз асьсэос та дышетсконниез йылпумъямын вал. Озьы ик кари, педучилищее документъёсме нуи, пыри, 1-тӥ сентябрёзь колхозын ужай. Гуртысен городэ вуэмлы, мыным, ваньмыз паймымон потылӥз. Тунсыко урокъёс, шулдыръяськон ӝытъёс, удмурт артистъёсын пумиськылонъёс, цирк, театр - йыр берга. Дышетскыкум ик ветлӥ Иван Кудрявцев артистлэн драмкружоказ. Иван Иванович ӟечгес вераськыны, сцена вылын астэ возьыны дышетӥз.

Училищеез горд дипломен йылпумъяса, экзаменъёстэк пыри пединститутэ. Вис карытэк 9 ар дышетски. Та вузэз но горд дипломен потӥ.

- Нош кытчы ужаны ыстӥзы?

- Куриськи вал аслам Лудорвай школаям ик анаелы Мария Ивановналы матэгес. Ӧз пӧрмы. Ӟуч кылэз но литератураез дышетыны отчы ыстӥллям ни вылэм Глаз пединститутэз горд дипломен йылпумъям нылмуртэз. Нош ик юан - кытчы мыноно? Номыр умойзэ ӧз вералэ роноын но.

Комсомолын берганы туж ик бадӟым мылкыды ӧй вал ке но, ужаны кутски ВЛКСМ-лэн Ижысь райкомезлэн секретарез луыса. Нырысь арняяз ик ӧтизы комсомол секретарьёслэн семинаразы. Пӧламы вал Флор Васильев писатель но. Соку Флор Иванович кивалтӥз комсомоллэн Глаз горкоменыз. Вал мукет тодмо адямиос но. Бӧрысь но милемыз трос пол люкаллязы на…

- Пайдазы вал-а сыӵе ужрадъёслэн?

- Али уноез со аръёслы мукет сямен дунъет сёто. Мон сямен, комсомол туж кулэ вал. Егитъёсты огазеям сяна, со дышетӥз ужаны, дисциплинаез возьыны.

Огъя вераса, комсомол трос сётӥз мыным - ушъяллязы но, пыкылӥзы но, куд-ог дыръя гордэктыса потылӥ кивалтӥсьлэн кабинетысьтыз. Гуртысь бертӥсько ке, ёрос газетын ужасьёс ёрто ни вал, ивор курыса.

- Озьыен, комсомолэн ик герӟаськемын гожъяськыны кутскемды?

- Озьы, шуыны луоз. Никита Хрущёвлэн реформаосыз дыръя огазеязы ёросъёсты. «Ленинец» газетмы потыны кутскиз Иж, Дэри, Кияса, Пичи Пурга, Вотка но Якшур-Бӧдья ёросъёсын улӥсьёс понна. Таяз газетын одӥг гужемзэ гинэ ужай, собере куриськи Лудорвайысь школае. Дышетӥ 5-тӥ, 7-тӥ, 10-тӥ, 11-тӥ классъёсын. Урокъёслы дасяськыса, пумтэм жадёно вал, озьы но ӝыт школаын ужай на. Кык ар ортчыса, Шабердые вуи. Отын нуи ӟуч кылъя но литературая урокъёсты, воштылӥ удмурт кылъя дышетӥсез.

- Быдэсмиз, шуыны, луоз, Леонид Павлович, кема аръёс ӵоже пушкады нуллэм - дышетӥсь луон сярысь - малпанды?

- Кемалы ик ӧз. 1965-тӥ арын тулыс вал со, пыри «Ленинец» газетлэн редакцияз. Интыяськемын Ижысь Пастухов урамын. Редакторез вал Василий Рысьев, адӟиз монэ но шуэ: ужась кулэ, ӵуказе ик лыкты, возьмасько.

Но газетын нош ик кема ужаны ӧз кылды. Дэри но Иж ёросъёсты огазеямен валче редакциез выжтӥзы Дэри черкогуртэ. Мон отчы ӧй мыны ни. 1967-тӥ арын сӥзьыл ужаны кутски Удмурт радиоын. Нырысь берыктӥсь вал, собере - иворъёс дасясь, со бӧрсьы кивалтӥ гожтэтъёсъя ёзэн. Монэн ӵош ужазы Александр Вотяков кылбурчи но вуоно прозаик Никвлад Самсонов. 8 ар ужаме бере улон вуттӥз «Дась лу!» газетэ. Татын туж юрттӥзы мыным эшъёсы, тужгес но Григорий Симаков писатель.

Отын 14 ар ортчемез ик ӧй шӧды кадь. Ужай наукая, ужъя но спортъя ёзын. Пӧртэм темаосъя гожъяй: Атыкай музъемез яратон, туризм, инкуазез утён но ужлы дышетон. «Дась лу!» ачиз радъялляз газетлэн призэз понна биатлонъя ӵошатсконъёс.

Со аръёсы ик бускель республикаосысь пионер газетъёслэн кичӧлтэмзыя арлы одӥг пол ортчылӥзы нылпиослэн шахматэн шудонъя ӵошатсконъёссы. Пинал спортсменъёс кудаз ке но шоркарын арня ӵоже кужымзэс мерталлязы. Котькуд команда сьӧры нылпи газетысь корреспондент ветлэ вал. Мон шахматистъёсмы сьӧры куиняз сыӵе ӵошатсконъёсы вуылӥ - Йошкар-Олае, Чебоксарые но Уфае. Пиналъёслы но, мӧйыослы но со пумиськонъёс эшъяськон урокъёслы пӧрмылӥзы. Газетъёсын ужасьёс ог-огзылэсь ужан амалъёссэс тодыны-валаны тыршылӥзы.

1989-тӥ арын выжи «Советской Удмуртия» («Удмурт дунне») газетэ. 1994-тӥ ар пумын отысь пенсие потӥ, но гожъяськемысь ӧй дугды.

- Тӥ мыло-кыдо пыриськиськоды удмуртлыкез ӝутонэ. Со пумысен сюлэмшугъяськонъёстэс, шумпотонъёстэс вераськоды, газет баме гожтӥськоды…

- Зэм ик, со мынам улонам бадӟым инты басьтэ. 1990-тӥ аръёсы удмурт культурая огазеяськонэз кылдытон монэ бугыртӥз кадь, удмуртлык шоры учконэ воштӥськиз. Кыӵе ке бурдъёс будӥзы кадь - луэ ук ваньмылы ӵош огазеяськыны, ог-огмес, сямъёсмес, йылолъёсмес утьыны. Ушъяськон медаз луы со, но мон удмуртъёслэн вань ӧтчамъёсазы пыриськисько, быгатэмея вуыны тыршисько вордскем Дэри ёросам но али улон интыям, Ижысь Устинов ёросын ортчылӥсь удмурт ужрадъёсы.

Аслам ужамелы, улэмелы мон уг ӝожтӥськиськы. Трос ӟеч адямиосын тодматски но эшъяськи, соослэсь улыны но ужаны дышетски, озьы ик уно школаосы вуылӥ, нылпиосын, дышетӥсьёсын пумиськылӥ. Улонам «тӧдьыез» но, «сьӧдэз» но трос вал. Сюлэм вӧсь луэ удмурт журналъёслэн но газетъёслэн лыдзы кулэсмем пумысен. Нош Удмурт радиоез быдэсак сямен быдтон, ӟеч программаосты ворсан но быгатӥсь репортёръёсты ужысьтызы мозмытон - со зэмос шуккет луиз вань удмурт калыклы.

- Тӥ трос гожъяськоды удмурт писательёс сярысь, маин со герӟаськемын?

- Мон асьме писательёсын пичи дырысеным ик тунсыкъяськисько. Соосын тодматылӥзы дышетӥсьёс. 1949-тӥ арын, 6-тӥ классын дышетскыкум, Лудорвай школае лыктӥз «Советской Удмуртилэн» корреспондентэз, кылбурчи Тимофей Шмаков. Со вал улэп писателен нырысетӥез тодматскеме. Тимофей Иванович со вакытэ солдат дӥсезлэсь люкиськемын ӧй вал на. Пионервожатоенымы но удмурт кылъя дышетӥсенымы кенешыса, пӧртэм классъёсысь пиосты но нылъёсты пионер кабинетэ люказ, школамы сярысь гожто но милесьтым гожъяммес газетэ потто шуыса валэктӥз, темаос бырйыны дэмлаз. Озьы со гожъяськыны мылкыдооссэ утчаз. Монэ туспуктэме пуктӥз. Со арын ик 6-тӥ феврале «Советской Удмуртиын» потӥз элькунамы, оло, нырысетӥез пионер бам, огъя йыръянэз вал «Лудорвай школаысь гожтэтъёс». Со бамын ик вал мынам тусбуйы но. Бадӟым шумпотон вал школамы понна.

Отӥяз писательёсын монэ ачиз улон тодматӥз ни. Дышетскон аръёсы дырын-дырын пыралляй редакцие - отын Александр Вотяков ужаз (атаелэн выжыысьтыз вал). Писательёсын пумиськылӥ, ачим редакциосын ужакум. Озьы табере «Удмурт дунне», «Ӟечбур!», «Герд» газетъёсын, «Кенеш», «Вордскем кыл» журналъёсын потылэмын тодэ ваёнъёсы Александр Вотяков, Григорий Симаков, Герман Ходырев, Геннадий Красильников но мукет гожъяськисьёс сярысь, Зоя Богомоловалэн куремезъя дасяй куинь Самсоновъёс сярысь материал. Соосты, одӥг герӟетэ люкаса, поттоно вылэм. Малпанэ озьы ик-а, мар-а быдэсмытэк кылёз ини.

Туэ ар пумын Л. П. Фёдоровлы тырмоз 75 арес. Со трос малпанъёсын улэ на. Оскем потэ, соос быдэсмозы шуыса.

Источник:

Федоров Л. П. Йыбырттӥсько дышетӥсьёсылы / Л. П. Федоров ; записал Иван Аркашев // Удмурт дунне. - 2009. - 11 сент. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"