Веднамез пеллян кыл

Инмын Илля Пыролоклэн ворттылон уробоез вань. Куке Илля Пыролоклэсь

та уробоысьтыз пазьгем луозэ кылыныд нюлыштыса басьтыны

шеттод, сокы та адямиез [татын пелляно адямилэсь нимзэ верано]

ведна! Илля Пыролок ворттыкы, тулка пыртӥз пот; сотэк

веднамед уз лу!

Волгалэн-моралэн пыдсысьтыз кылыныд луозэ нюлыштыса потты,

оӟы картэк веднамед уз лу!

Кыйлэн сюлмытӥз куке потэмед луоз, сокы та адямиез ведна, оӟытэк

веднамед уз лу!

Кыд чорыгез куке шеттэмед луиз, солэн бурд улаз пырса ветлӥд

ке, сокы та адямиез ведна; сотэк веднамед уз лу!

Инмарен но пилемен вискын зарни бурдо душес улэ, куке та зарни

бурдо душесэз веднад ке, сокы та адямиез ведна!

Берган кӧ пыртӥ изыкыз пыраны- потаны ке шеттӥд, сокы та адямиез

ведна, сотэк веднамед уз лу!

Дас кык собор-черкез куке отказтӥд ке веднаса, сокы та адямиез

но ведна.

Дас кык собор-черклэн йылаз дас кык мульыез вань. Куке со мульыез

сиса кӧттэ тырид ке, сокы та адямиез сиса-юса ведна!

Дунне вылын сюрс иськем нюр вань. Песокез гозы пунса, со гозыеныд

та сюрс иськем нюрез котырты-квасьты-бытты; сотэк та адямиез

веднамед уз лу!

Волгалэн-моралэн вожаз вож кыз вань. Со кызлэн выӝыяз тӧдьы

ошмес вань; куке со тӧдьы ошмесэз быттӥд, сокы та адямиез ведна!

Ин пилем вылын пар ӵуж уж вань. Со ужез куке веднаны шеттӥд,

сокы та адямиез ведна!

Мунчо аӟе куштэм сэрегпумдэ адями карид ке, сокы та адямиез

ведна!

Ӟырдам изэз адями карид ке, ӟырдам изэз ачид сиид ке, сокы та

адямиез но сиса-юса ведна!

Сизьымдон но сизьым кыл вань. Куке со кылэз отказтӥд ке, сокы

веднаськы!

Сизьымдон но сизьым пӧртэм адями вань. Куке со адямиез веднаса

быттӥд ке, сокы та адямиез ведна!

Ин кизилилэсь сюроссэ эктыса-чапкыса сины - юны ке быттӥд,

сокы си-ю та адямиез!

Ӟырдам из, ӟырдам корт пыртӥ потса быгатӥд ке, тушмон-аман,

сокы сины-юны быгаты та адямиез.

Уллань кошкись ӧро вуэз куке выллань берыктыны быгатӥд ке,

сокы ведна та адямиез!

Ву-ошлэн сюр куспаз куке пуксьыса ветлыны шеттэмед луоз, сокы

си-ю та адямиез!

Сьӧд гондырлэн гыжы йылаз куке висён ӝуӝатэмед ке луиз, сокы

та адямиез ведна!

Сьӧд кечлэн сюр йылаз куке висён ӝуӝатэмед ке луиз, сокы та

адямиез сиса-юса ведна!

Кӧс камыӝез сиса кӧттыр каремед ке луиз, кӧс кыйбодӥез сиса

кӧттыр каремед ке луиз, кӧс пушнерез сиса кӧттыр каремед ке луиз,

тушмон-аман, сокы та адямиез сиса-юса ведна; сотэк веднамед уз лу!

Вуж Ӟумъя (Новый Сентег), Сарапул у., Вятка губ.