Ыргон коньдон

Улэм-вылэм одӥг пиосмурт. Пичиысен со анай-атайтэк кылем, сирота будэм. Трос шаеръёстӥ ветлэм со, трос шуг-секытъёсты адӟоно луэм. Берытскем со вордӥськем гуртаз. Татын умой нылмуртэз пумитам. Кузпалъяськиллям соос. Корка пуктӥллям. Бускельёссы но иськавын-бӧлякъёссы соослы юрттӥськиллям: кин кунянзэ кузьмам, кин — ыжпизэ, кеч, ӵӧж-ӟазег но ваиллям.

Вордӥськем таослэн пизы. Кытчы карыны но уг валало ни, пе, пиналзэс: вешаса гинэ возё. Чебер, таза будэм пизы. Анай-атаез сое эркияса гинэ возиллям, номыр ужаны но косӥллямтэ. Быдэс нунал ульчаын шудыса ветлоз вылэм. Тужгес но яратоз вылэм со, шур дуре мыныса, «ву табанен» шудыны. Кисы тросаз кӧльы дасяса возем. Нош одӥг пол со атаезлэсь шыкысэ ватэм коньдонзэ курем. Аиз азвесь коньдонзэ лыдӟем но юам, кӧня-о, пе, кулэ. «Ваньзэ вай»,— курем пиез. Аиз паймем но номыр но верамтэ. Оло, пе, гуртэ вузчиос вуиллям но пиезлэн маке басьтэмез потэ. Пиез нош «шудыны мынӥсько» шуыса верам. «Шудоз но берен ваёз»,— малпам аиз.

Васькем та пи ву дуре, кутскем шудыны. Кыӵе гинэ, пе, азвесь коньдонэз ву вылтӥ тэтчаса кошке! Ӝыт буш киын дораз бертэм. Паймем аиз. Туж йырыз кур луэм, но пиезлы пал кыл но верамтэ. Нош кӧня ке нунал ортчыса, пизэ узыр адями доры ужаны нуэм. Тон, пе, табере бадӟым ини, сиёно няньдэ ужаса потты. Нунал лумбыт ӵоже пукcьылыны но, пе, дыр ой вал кутсаськон доразы. Со пи культо но пыртылэм, курозэ но мажсам, ю тысьсэ одӥг интые киськам. Тышкам кадь жадьыса но кӧтыз сюмаса бертэм со дораз. Ымныраз, пе синъёсыз но пиньёсыз гинэ чиляло на: сокем тузонӟем.

«Пие, - шуэм аиз, - ӝӧк сьӧры пуксемлэсь азьло пыласькыны кулэ вылэм. Ойдо ӵошен ик шур дуре васькалом». Ву дуре вуэм беразы, аиз юа ни, пе, пиезлэсь: «Я, пие, возьматы али коньдондэ, трос-а ужад?» Кисы пыдэсысьтыз ик поттэм пиез ӝик-ӝик утялтэм бинетсэ. Сое пертчылэм но сыномем вить копейка коньдонзэ аизлы сётэм. Аиз коньдонзэ басьтэм но вуэ куштон вылысь шоналскем. Пиез ки бордаз ӝабырскыса вуэм но черетскем: «Маар дауртӥськод тон, атай?! Та коньдонэз мон быдэс нунал ужам понна басьтӥ. Нош тон сое вуэ куштыны малпаськод!»