Перевощиков Юрий Семенович

Адями – гурезь

Ю. С. Перевощиков

Пинал дыръяз, сютэм улыса, со ӧжыт гинэ ӧз кулы; МТС-ын дышетскыкуз, чылкак лябӟыса, паськыт шуре пичи гинэ ӧз выйы; тракторен ужакуз, мур канавае усьыса, быронлэсь утиськиз; заводын ужакуз, удмурт калыкъя лэчыт вераськемез понна сое пытсэт сьӧры келяны малпало вал; Вылӥ партшколаын дышетскыкуз, «диссидент» ним лякыса, партиысь куштыны выризы, но... Юрий Перевощиковез котьку но инмарез утьыса возиз.

Адями-гурезь (со сярысь мукет сямен вераны но уг луы) ваньзэ чидаз но экономика удысын Удмурт Республика но быдэс Россия понна вормонтэм трос лэсьтӥз.Ньыльдонлэсь ятыр предприятие солэсь эскеронъёссэ ужаз кутэ.

Юрий Семёнович Трудовой Горд Знамя орденэн, ВДНХ-лэн азвесь медаленыз, Сан-Францискоысь Фартлэн Данъян грамотаеныз дунъямын. Со СССР-ысь Кун премилэн, М. Т. Калашников нимо премилэн лауреатэз. Маргрит Кеннедилэн «Процентъёстэк но инфляцитэк коньдон» книгаяз (1995-тӥ ар) Юрий Семёновичлэн но ужез печатласькиз.

- Юрий Семёнович, пичи дыръяды кыӵе тужгес но сайкыт малпанды вал?

- Бусые сюрлоен араны ветлылӥ. Туж секыт йӧтэ вал. Мугоры ке но пичи, пыдесъяськыса ужалляй. Суйёс но, пыдъёс но, быдэс мугор но висё. Туж ӝожомисько вал: та уж куке быроз-а, уз-а? Ас поннам ялан малпаськылӥ: таӵе секыт ужез калык медаз быдэсъя шуыса, кызьы меда, мар меда лэсьтоно? Уй но, нунал но сыӵе сюлмаськонъёсын улӥ. Собере школае дышетскыны мыноно кариськи. Пичигес на вал, одӥг аресы уг тырмы. Мамаелэсь, тятяелэсь куриськисько:

- Лэзелэ монэ школае. Маке со лыдӟиськыны но коть быгато ни...

Книга лыдӟыны, суредъёссэ учкыны мылкыды туж бадӟым вал. Азьланяз мынам дышетскеме гинэ потэ, ужаме уг поты шуыса, соку ик малпаськыны кутски ни. Но, кӧня ке улыса (ньылетӥ классэз но ӧй быдты), школамес пытсазы. Чутыр гуртын дышетсконо луим. Мыным соку укмыс арес вал. Дас километрез пыдын ветлӥм. Но нуналлы быдэ озьы чидалод шат? Интернат ӧй вал. Чутырын мурт адямиос дорын улӥм. Анай-атай коньдонэн, картошкаен тырисько вал. Арняяз кык пол доре бертылӥм. Сиён аслыд ик лэсьтоно луылӥз. Соку мон малпай: дышетскон - но туж секыт уж, анае бордын ик, пӧй, улысал. Но тодон-валан басьтон мылкыды вормиз.

Чутырысь сизьым классъем школаез йылпумъяй. Отӥяз Играысь шор ёзо школае мынӥ. Дышетскыны гинэ кутски, вань калыкез войнае келяны ӧдъязы, нош егитъёсты - Ижевскысь ремесленной училищее. Районын мобилизационной план кутэмын вал. Соку ик Ижевск—Балезино сюресэз лэсьтыны кутскизы. Игра палтӥ вӧлдо ни вал. Монэ ремесленной училищее ыстӥзы. Но, мар шуод ни табере, отчы мон ӧй мыны - пегӟи. Малы?

Туж уг поты вал Иже мынэме. Гуртэ бертӥ но, анае ӧвӧл, Балезино сюресэз лэсьтонэ келяллям. Ми куать ареслы пичи выныным кылим. Ар пала ӵошен улӥмы. Мамае музъем нуллыса ужаз, сюрес лэсьтон доразы ик кӧлаз но.

- Семьяяды кык нылпи гинэ вал-а?

- Озьы, кык пиос. Та сярысь верано ке, анае ялан куректӥз:

- Э-э, малы меда Инмар мыным одӥг ныл но сётымтэ. Пиос гинэ потӥзы ук тани. Пересьми ке, кинэн мон уло? Тазьы ик куштыса кельтозы ук...

Жаляса верано, озьы ик луиз. Нуналлы быдэ улонын пиос анайзэс уг валало. Пушказы шӧдонзы вань ке но. Нылъёс анаенызы векчи сӥньысъёсын герӟаськемын. Ог-огзэс соос ӟечгес шӧдо. Соин ик анае но озьы шуэ вал, дыр.

- Нош атайды? - Со колхозлэн председателез вал. Вань ужзэ, сюлэмзэ гурт калыклы сётыны тыршиз. Пу яке куро ваёно ке, аслыз берлозэ гинэ ворттоз на. Пудоослы сиён сётъяку но, аслыз ӧз басья.

Атае бадӟым семьяын будэмын. Песянаелэн 14 пиналъёсыз вал. Мон вордӥськем бере, одӥг пичи коркан 18 кузя улӥмы. Пичиысен ик, кӧня асме тодӥсько, туж секыт вал. Нош война дыръя эшшо но уродгес луиз.

- Война вакытысь кыӵе суред син азяды тужгес но яркыт пуксе?

- Ремесленной училищеысь пегӟемме тодыса, монэ председатель доры ӧтизы. Ваньмыз фронтын вал бере, председатель интыын пересь мурт ужаз. Со анаелы шуэ:

- Татьяна, тынад пиед пегаса улэ ук, пытсэтэ келялозы...

Та верамзэ мон но кылӥ. Ӵуказеяз ик гуртысь кошки, Играысь МТС-э мынӥ. Трактористъёслэн курсазы мед басьтозы шуыса куриськи. Отысен монэ нокытчы но ӧз келялэ ни. Тракторен ужаны дышетски. Тужгес но секытэз вал - сиёнтэк ужан. Нокин нокытын уг сюды. Сепож гуртысь ик одӥг пияш вал. Ми соин ӵош дышетским. Одӥг пол ӝытазе укмыс часын мырдэм-мырдэм вамышъяса бертӥськом ни.

- Геннадий, - шуисько, - тазьы асьмеос ум быгатэ, быром...

Ог-огмес пыкъяса, кызьы ке вуимы ик. Куинетӥ нуналзэ сиськытэк ветлӥськом ни вал. Толэзьзэ но тодӥсько на - апрель. Соку одӥг кышномурт милемыз жаляз но кӧня ке пӧзьтэм картошкаен шыд нерге лэсьтыса сюдӥз. Мылкыд нош ик ӝутскиз.

Собере, таиз ини 1-тӥ май котырын вал, мамаелы кин ке верам: Юркаед, пе, кулэ ни ук, мырдэм ветлэ. Анае дорам, Играе, мыныны потэм. Нош мон гуртэ бертӥсько, но мукет сюрестӥ. Мынонъям шур дуре потӥ. Нош со паськыт вӧлскемын, ярдуръёсысьтыз потэмын. Малпасько: берлань ке кошконо, Играла уг ни вуы, кужыме уз тырмы. А, маке луоз лу ни - вуэтӥ пото. Шурлэн шораз вуи но шӧдӥсько: выисько ни... Кин ке утиз-а, мар-а, вай борды кырмиськи но потӥ. Котмем дӥсеным ик мынӥ. Но, бӧрысь малпасько ни: вот, пӧй, визьмо калык озьы ӧй лэсьтысал ук. Малы кылиськыса, дӥськутме- йыр вадьсам ӝутыса ӧй поты, али кӧс луысал...

Тямыс иськем пыдын мыноно луиз на. Гуртэ бертӥ но - анай но, сиён но ӧвӧл. Вылаз ик, мамае кошкем но, пичи выны огназ дыръя, кинъёс ке пыраса, ваньзэ нуыса кошкиллям. Мамае ӵуказеяз вуиз но - гуртын но сиён ӧвӧл... Тӥни сыӵе туж секыт тодэ ваёнъёс кылемын.

- Нош пичи дыръяды малпады-а, куке но дано адями луоды шуыса?

- Со сярысь соку нокин ӧз малпаськы. Кӧттэ тырон сярысь сюлмаськонэн улӥм. Но азьвыл но, али но шуыны луоз: улонын вань сыӵе адямиос, соосты «стрелочникъёс» ниманы луоз - улондэ воштӥсьёс, сюрес сётӥсьёс. Сыӵе адямиос шедё ке, улон но азьлань мынэ, нуналлы быдэ мар ке ӟечсэ лэсьтӥськод.

Мынам улонам шедьылӥзы умой уже ыстӥсь «стрелочникъёс». Тани, шуом, трактористэ дышетски, но кужыме ӧвӧл. Тракторез киын заводить кароно вал ук. Уг быгатӥськы. Бусыын гырыкумы, ӵош ужано эше шуэ: ойдо, пе, тон уйзэ кӧня ке гыр, нош мон мунчое ветло, ӵукна пал вуо. Мыным соку 14 арес-а, мар-а вал. Трактор огсыр мынэмъя, руль сьӧры ик умме усиськем. Монэ сэзъялтӥз. Куалектыса сайкай. Трактор ужамысь дугдӥз. Учкисько но, пичи канава сьӧрын, ог кык метр кемын туж бадӟым но меӵ нюк. Со пичильтык канава ӧй ке луысал, трактореным валче мур нюке лобӟысал ни. Соку но Инмаре-а, мар-а утиз. Нош тракторме выльысь ужатыны ӧй быгаты ни, кынары ӧз тырмы. Гуртэ но бертэм уг пот. Тракторме куштӥ но пырак МТС-э кошки.

Та учыр бере монэ общежитиос лэсьтонэ кор дасяны лэзизы. Кӧня ке ужай, собере конюхе пуктӥзы. Валъёслэн но кынарзы ӧвӧл, сютэм улыса туж зол восьмемын.Нош возьмаськисьын пукыку, уин изем потэ ук. Кыӵе ке тракторе кӧлан инты лэсьтӥ. Павел Кузнецов, МТС-лэн кивалтӥсез, валэн бертэ вылэм. Дораз пырыны косӥз. Азяз сылӥсько: гольык пыд, пыдъёсам «чипыос». Мон горд йырсиё вал, бамам - сӥтьпужыос. Директор шорам учкиз но юа:

- Кызьы озьы, война мынэ ук, нош тон кӧлӥськод?

- Умме усиськем...

Бумага сётӥз. Гожты, пе, куриськон: «Прошу принять меня на работу...»

Гожтӥ. Бумагаме учкиз, одӥг янгышез но, пе, ӧвӧл.

- Секретарь луыса дорам ужалод-а? - юа.

Тӥни озьы, аспӧртэм «стрелочник» сюриз. Та вакытысен «университетъёсы» кутскизы. Отысен ик бумага гожъяны но дыши, политикаез шӧдонэ но кылдӥз.

- Соку ик азьланяз дышетскыны рос-прос мылкыдды кылдӥз, дыр.

- Озьы. МТС пыр потӥ вал бере, гурт хозяйство удысъя ик дышетскыны малпай. Глазов ёросысь Парзи гуртын сельхозтехникум вал. Отчы мыно, пӧй. Но нош ик «стрелочник» шуон адями шедиз. Григорий Захариков - военкоматысь одӥгез кивалтӥсь. Дышетскыны мынон мылкыдме шараям берам со шуиз:

- Эн мыны отчы, Воркутае, шахтаосы келялозы. Ижевскысь индустриальной техникуме мын. Ужан вискам экзаменъёслы дасяськи. Пырыны быгатӥ.

Но нош ик сютэм улоно луиз. Базарын сиён-юон вал ке но, укыр дуно сылӥз. Урокъёс вискын пӧртэм интыосын ужалляй. Сютэм улэменым, висьыны кутски. Дышетсконме, оло, куспетӥ кароно ни шуыса, малпаськи. Тазьы улӥд ке, воксё куашкалод, пӧй. Туж ӟеч куратормы - Александра Шорина вал. Одӥг пол ас коньдонзэ но ӵектӥз. Пумитъяськи, ӧй басьты.

Группаямы Можгалась Николай Старков вал. Со умойгес улӥз, анай-атаез юрттӥзы. Дорам лыктӥз но шуэ:

- Тани, басьты 300 манет, пунэмен сётӥсько.

Николайлэсь басьтӥ ни. Нош солы куратормы сётэм вылэм.

Со вакытлы, сиськытэк улыса, синмы воксё адӟемысь дугдӥз. Александра Ивановна бызьылэмъя, санаторие путёвка сётӥзы. 20 нунал ӵоже отын эмъяськи. Сизьым килограмм люкай, ява. 26 аресозям малпаса улӥ вал: куке соку кӧттырозям нянь сиё-а меда? Ну, шуисько, табере сиськи ке сиськи ни.

- Сыӵе курадӟыса улоно луиз ке но, егит вакыт - со егит вакыт. Синмаськон, яратон но вал, дыр...

- «Правда» совхозэ картошка утялтыны ысъяло вал. Казанской вокзалын быдэс группаенымы сылӥськом. Мон - староста. Милемын ӵош ик лэзиллям на фельдшерско-акушерской школаысь нылъёсты. Соослэн пиоссы ӧвӧл. Поездэз витьыса сылӥськом. Кезьыт. Мон пияшъёслы шуисько:

- Ойдолэ коть нылъёсты ӝуткалом, шунтӥськом.

Доразы мынӥм но мон нырысетӥзэ ик ӝутӥ. Ну, со йыркуръяськыны кутскиз ук. Кивалтӥсьмы доры мыныса чагиськем. Дышетӥсьмы дораз ӧтиз.

- Юра, - шуэ, - мар тон дауртӥд?

- Шунтӥськеммы потӥз, - шуисько.

- Нош малы дышетӥсьсэс ки вылад ӝутъяд?

Вот тыныд... Мынэ, пе, али ик простить карыны куре.

Тӥни отысен ик мон одӥг нылашез синйылтӥ. Арня пала ужам, ӵошен шулдыръяським. Кинлэн ке кусыпез кӧня ке нуналлы тупаз, кинлэн ке - толэзьлы, нош мынам - 50 арлы.

Дышетсконэз йылпумъяськем бере, Лидияез Новосибирск областе фельдшер-акушер луыса ужаны ыстӥзы. Нош монэ техникумез йылпумъяме бере Ленинградысь военно-механической институтэ дышетскыны лэзё вал. Но отчы мыныны коньдонэ уг тырмы. Станокъёсты лэсьтонъя валтӥсь технолог Сергей Чичурин шуэ:

- Тыныд дышетскыны кулэ. Мон дорын толэзь но ӝыны пала ужаса, коньдон поттод.

Атаелы озьы улэме акыльтӥз ни вал. Кышно вайыны косэ. Нош мон дышетсконо кариськи на. Москваысь механизацияя институтэ мынӥ. Коньдонэ ӧвӧл, воштос дӥсь ӧвӧл, общежитие но ӧвӧл. 40 муртэ одӥг спортзалэ интыязы. Дышетскем потэ, нош мылкыд куашкамын. Вылӥ учебной заведениосъя министерствое пыри. Отысен одӥг мӧйы кышномурт шуэ: мар, пе, утчаськод? Вуоно арын Ижевскын но механикая институт усьтӥськоз. Одӥг арзэ ужалод, собере дышетскыны пырод. Тӥни озьы берен Ижевске бертӥ, механикая заводэ ужаны пыри. Соку ик гожтэт пыр Лидияез утчаны кутски ни. Но кулэ ук озьы луыны. Улонам нош ик аспӧртэм «стрелочник» сюриз.

Мастер луыса заводын ужасько ни вал. 1-тӥ Май праздник дыръя демонстрациысен комсомоллэн городысь комитетэныз кивалтӥсь Федя Паршин колоннаын мынэмме адӟем. Дораз ӧтиз но комсомол ужен вырыны дэмлаз. Тӥни озьы улонэ нош ик берытскиз. Ижевскысь комсомоллэн горкомаз вуи.

- Озьыен, валтӥсь интые общественной, партийной уж потӥз. Нош яратоно нылдэс вунэтӥды?

- Ой. Ог-огмылы гожтэт гожъям. Ужаны ыстэм интыяз солы, азьвыл куронъёсъя, ӧжытсэ куинь ар улоно вал ук.

Кышноме кураны огнам мынӥ. Анай-атайёсыз Воткинск городын уло вал. Утчаса-утчаса мырдэм шедьтӥ. Учкисько но... Корказы бадӟым, кык этажо, туж чебер. Эх, шуисько, Юрка, кытчы тон сюрид. Кин тыныд Лидиядэ сётоз? Тынад номырид но ӧвӧл ук...

Куинь нунал ӵоже доразы улӥ, куинь нунал ӵоже ик бӧрдӥзы. Ярам, атайзы туж умой вал. Со шуэ:

- Лидия соглаш. Солэн мылкыдызлы пумит ми мыныны ум быгатӥське. Но кылдэ сёт: бускельёсты доры сьӧднянь юдэс кураса потатэк улоды. Ӵектонэн соглаш луи.

ЗАГС-э мынӥськом ни, тубатэтӥ тубиськом. Одӥг пагӟа гинэ кылиз на.

- Лидия, - шуисько, - сыл али. Одӥг вамыш кылиз. Монэн улыны туж секыт луоз ук,оло, малпаськод на? Гожтӥським, нош бумага понна коньдон тыроно. Мынам ӧвӧл. Кышное тыриз. Собере столовое нуи. Сиським. Нош ик кышное тыриз. Пу баракын улӥм. Бӧрысь куинь кузёлы чаклам комната сётӥзы. Отын ик нылы но, пие но вордӥськизы. Механикая институтэ дышетскыны пыри.

- Паймоно кадь, мар тӥледыз ялан дышетскыны валтӥз? Кытысь кужым шедьтӥськоды вал?

- Азьвыл вакытысь идеология, дыр. Туж оскись адями вылӥськем-а, мар-а. 1947-тӥ арын, техникумын дышетскыкум, Ижевскысь Советской ульчаетӥ мынӥсько. Азям туж интеллигентной адямиос - пиосмурт но кышномурт - вамышъяло, удмурт сямен верасько. Кыкназы но чебересь, ӝужытэсь, воргоронлэн нырвылаз - пенсне... Кызьы озьы, малпасько, Ижевскын но удмуртъёс вань вылэм. Мышме кема учкыса сылӥ на. Бӧрысь тодӥ ни: Пётр Николаевич но Александра Ивановна Перевощиковъёс - тодмо тодосчиос - вылӥллям.

Ас поннам малпай: удмуртъёс пӧлын но сыӵе йӧно адямиос вань бере, маин мон пӧртэм? Озьы ачим асме узатӥ.

- Соин ик удмуртъёслэн лёгамтэ сюрестӥзы вамыштӥды, дыр. Бырйиды экономикаез. Та удысъя азьмынӥсь луиды. Кыӵе ужпумъёсты эскерон бордын тыршиды?

- Научной эскеронъёсы герӟаськемын адямилэсь ужзэ тодыны тыршонэн.

1966-тӥ арысен Ижевскысь научно-исследовательской технологической институтын ужай. Татын ик нимысьтыз лушкем лабораториен кивалтӥ. Аслам ужасьёсы вал. Обороная министерстволы вить аръем план дасямы. Собере 15 аръем планлы программаез кылдытонэн кивалтӥ. Лэсьтэм ужмылы 23 томъем йылпумъянъёс поттӥм. Но ваньмыз со - «секретно» пус улын, лыдӟыны уг луы.

Кемалась ик ӧвӧл, перестройка кутскем бере, мон со лабораторие вазиськи:

- Кытчы мынэсьтым ужъёсме кариды?

Соос мыным бадӟым сьӧд ящикез возьматӥзы. Вылаз «Ю. С. Перевощиков» гожтэмын, пушкыз буш. Ваньмыз архивын, пе.

Удмурт кун университетын дышетон уже кутскиз 1974-тӥ арын, политэкономияя кафедраын. Ужез наукая радъян (НОТ), промышленностьлэн статистикаез но калык хозяйствоя комплекслэн экономикаез, квалиметрилэн инъетэз удысъёсъя дышетӥ...

- Юрий Семёнович, тӥ партийной ужен но выриды. Мон малпмъя, азьвыл туж секыт вал, дыр, огвакыт ик партилэн нырысетӥ радъёсаз но мыныны, зол тодосчи но луыны.

- Озьы, дыр. Вылӥ партийной школаын дышетскыкум, Маркслэсь но Энгельслэсь ужъёссэс лыдӟылӥ. Соослэсь гожъямъёссэс тросэз уг валало яке туж сюбег учко.

Рос-прос эскереме бере мон валай: асьмелэн идеологимы быдэсак коммунистической ӧвӧл. Вылтусыз сыӵе, нош пуштросэзъя - мукет. Сыӵе система кемалы ӧвӧл, дыр ортчыса, со куашкалоз шуыса, вераськыны кутски. Собере партилэн ЦК-яз мынӥ но партийной уже берытскыны уг ни быгаты шуыса верай. Мыным «диссидент» ним лякизы. Та учыр бере мон быдэсак научной ужен выронэ кошки.

- Тӥ студентъёстэс узыр луыны дышетӥськоды, нош асьтэос узыр адями-а?

- Куанер шуыны уг луы, узыр но ӧвӧл, дыр. Улытозяд писпу мертты, корка пукты, нылпи ворды, шуо. Ваньзэ лэсьтӥ ни кадь. Но соин гинэ уг буйгаськы. 18 сотка садам кедр писпуэ но вань. 11-тӥ арзэ ни ас киыным корка пуктӥсько. Али корказьзэ чеберъяськом. Валтӥсь «архитекторе» - кузпалы. Со ик - кортӵог сётъясь но. Куддыръя пиналъёсы юртто. Кыӵе корказы вал, кышноме куракум, сыӵе ик лэсьтыны йӧндырисько.

Тужгес но бадӟым узырлыке - книгаосы. Соос историе кылёзы.

- Тодмо, дано адямиос пӧлысь кинэн эшъяськиськоды?

- Валентин Кельмаковен, Иван Таракановен, Владимир Владыкинэн. Кузьма Куликовен ӵош дышетским. Со но горд, мон но. Трос аръёс ӵоже милемлы коньдонэн юрттӥз Юрий Маслюков, удмурт экономистъёсты дасян ужын - Светлана Смирнова.

- Кызьы шутэтскиськоды?

- Научной уж бордын. Ӵукнаысен бер ӝытозь. Одӥг пол Сьӧд зарезь дуре, Сочие, путёвка басьтӥ. Ваньмыз пыласько, шунды шорын пыжо, нош мон - библиотекае вамыштӥ. Пыри но шуисько:

- Мыным вае Карл Маркслэсь сочиненизэ, 47-тӥ томзэ.

Библиотекарь дол-дол шорам учке. 25 ар, пе, ужасько ни, но таӵезэ нырысьсэ адӟисько. Шутэтскыны лыктэм адями, пе, Маркслэсь ужъёссэ куре...

- Тӥ кадь мыло-кыдо луонлы егит адями но вожъяськоз. Кытысь кужым шедьтӥськоды?

- Армие кошкон азяз тятяе ӵукна ик милемыз люказ. Шуэ:

- Юрка, пиосмуртъёсты войнае басьто, тон кылиськод. Ачид адӟиськод: воргоронъёс юо. Тон нош юиськод ке, ю, но ӵукна йырдэ эн веськаты.

Тӥни озьы. Али учкисько ке, егит дырысь вань эшъёсы сопал дуннее кошкизы ни. Улыны кужым кышное, семьяе сёто на. Котьку но ас азяд кыӵе ке ужпум луыны кулэ. Со ик тонэ улон кузя но азьлань валтоз.

- Нош азьланезлы кыӵе малпанъёсты?

- Быдэсак выль удыс кылдытыны малпасько; удмурт кылэз тодӥсь адямиослы экономика факультетэ пырыны дасясь курсъёсты кылдытӥсько. Научной эскеронъёсыя но уже трос, ваньзэ сое огазеяса, книгаос поттоно.

Но берло дыре удмурт калыклэн историезъя малпанъёс йырам пыризы но нокызьы уг пото ни. Туж вашкала сиосты копалтоно ке, удмурт калыклэн выжыез воксё Вашкала Греция пала кошке ук. Кызьы? Малы? Наука ласянь валэктонъёс (доказательствоос) но трос ни. Та удысъя рос-прос ужасьёс, эскерисьёс кулэ. Со бордысь ик, оло, калык но валаны кутскоз: удмуртъёслэн выжызы туж мур. Но та - аспӧртэм политика.

- Удмурт калыклэн улон шоры учконэз сярысь мар верасалды?

- Монэ туж сюлмаськытэ калыклэн вина борды кыстӥськемез. Асьмелэн, удмуртъёслэн, мугор пуштросмы мукетгес, вина юонлы уг тупа.

Удмурт адямилы ӟучлэсь вылӥе тубыны кышкано ӧвӧл. Бигеръёс, еврейёс озьы уло ук. Маин курадӟиськом на? Дипломатимы ӧвӧл. Соин ик тросэз удмуртъёс Удмуртиысь палэнэ кошкон мылкыдын уло.

Источник:

Перевощиков Ю. С. Адями - гурезь / Ю. С. Перевощиков ; записала Елена Миннигараева // Удмурт дунне. - 2002. - 30 апр. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"