Григорьев Анатолий

Анатолий Леонтьевич Григорьев - удмурт драматург но данак серемес веросъёслэн авторзы, Россиысь гожъяськисьёслэн огазеяськонзылэн ёзчиез, Удмурт Элькунысь искусство удысысь сӥё-дано ужась.

Улон сюресэз

Тодмо удмурт драматург но данак серемес веросъёслэн авторзы Анатолий Леонтьевич Григорьев вордӥськиз 7-тӥ гудырикошконэ 1952-тӥ арын Можга ёросысь Бадӟым Сибы гуртын. Гуртысьтызы 4 классъем школа бере Можга черкогуртысь шор ёзо школаын дышетскиз.

Толя пичи дырысеныз сцена вылын. Удалтӥз дышетӥсьёсын. «Мон малпамъя, ваньмыз дышетӥсь бордысь потэ…» – шуэ А. Григорьев. Покчи классъёсын дышетӥз соку гинэ Можга педучилищеез йылпумъям Печникова (али Петрова) Елизавета Владимировна. Котькыӵе праздниклы концертъёс дасяллязы, эктонъёс, удмурт писательёслэн произведениоссыя сценкаос пуктылӥзы, куштӥськем кагаз, корт бичаллязы, возь вылын яркыт тылскем дурын пукылӥзы. Можга черко гуртын дышетӥз Анна Николаевна Шутова, кудӥз ас дыраз Михаил Коноваловен но мукет тодмо адямиосын дышетскем. Вордскемын но со Пётр Блиновен одӥг гуртын. Туж визьмо кышномурт.

Со сюлмаськемен ик пияш туж яратӥз удмурт кылэз но литератураез. Туж яратылӥз пӧртэм мадиськонъёс кылдытъяны: соос понна котьку «вить» басьтылӥз. Пичи дыръяз Толя артист луыны малпа вал. «Советской Удмуртия» газетысь огпол лыдӟиз таӵе ялон: Удмурт егитъёсты Б. В. Щукин нимо Вылӥ училищелэн кыкетӥ курсаз артистэ дышетскыны куто. Гуртысьтыз ик кык эшъёсыныз кужымзэс эскероно кариськизы. Толяез но Мишаез ӧз кутэ. Нош Германлы одӥгаз экзаменын «кык» пуктӥзы. Но пинал мурт йырзэ ӧз ошы: дораз бертса, документъёссэ сётӥз Удмурт кун пединститутлэн кылъя но литературая факультетлэн удмурт люкетаз. Солы отчы пырыны чик шуг ӧй вал: вань удысъёсъя ӟеч тодэм-валамзэ возьматӥз.

Пединститутын дышетскыкуз ветлӥз драмстудие. Отысен ик тодматскиз но отӥяз ӟеч эшъёс луизы тодмо писателен, артистэн Василий Гаврилович Гавриловен (соос одӥг гуртысь потэмын). Берлогес соослы Драмая удмурт кун театрын но ӵош ужаны кылдӥз. 1974-тӥ арын УдГу-ысь филологической факультетлэсь удмурт ёзэтсэ йылпумъяз.

Со аре ик телевиденилэн Ижысь студияз ужаны пыриз, ӟуч кылын иворъёс дасяз. Но кык толэзь гинэ ужаса вуттӥз, военкоматэ ӧтчаны кутскизы. Сӥзьыл басьтӥзы армие. Шедиз Хабаровске. Отын кияз котьма – автомат но, пулемёт но, гранатомёт но – кутылыны кылдӥз. Библиотекарьлэсь ужзэ но оскыны малпало вал, но солдат пумит луиз. Ӧз поты ӝокыт, книга тузоно юрт пушкын пукемез. Армиын эшъёсыз Анатолиез ярато вал: соослы пӧртэм серемес учыръёс сярысь мадьылӥз, тумошо суредъёсын шумпоттылӥз…

Служба бере кылдытӥз семья: кузпалыныз, Евгения Гурьяноваен огвакытэ дышетскизы университетын. Со вакытэ ик ветлӥз Драмая удмурт кун театре. Татын возьматъяськись спектакльёсыз артистъёс, писательёс, журналистъёс дэмен сэртто-пертчо вал соку. Отысен ик тодматскиз Александр Блинов режиссёрен. Соиз А. Григорьевез ӧтиз ужаны театре.

Гожъямъёсыз сярысь

"Пужмерен ӵуштаськем яратон" спектакль

Гожъяськыны А. Григорьев кутскиз студент вакытаз. Солэн вакчиесь серемес веросъёсыз, зарисовкаосыз печатласькизы «Советской Удмуртия» газетын.

Нырысетӥ пьесазэ кызь вить аресын театрез тодытэк-валатэк гожтӥз. Со «Кесэг пилемъёс» нимаське вал. Сое театрын но лыдӟиз. Но валаз: пьеса ляб, трос мултэсэз, геройёсыз но осконтэмесь. Та пьеса борды медам берытскылы ни шуыса, сое кесяса куштӥз.

Нырысетӥ бадӟым ужез – «Лысву сямен уг тӧлӟы синкыли» драмаез - удмурт кун театрлэн сцена вылаз пуктэмын вал 1985-тӥ арын. Та спектаклез туж шумпотыса пумитазы театрез яратӥсьёс, учкисьёс азьын возьматэмын вал ог 230-лэсь трос пол. Удмуртиын гинэ ӧвӧл, палэнын, Татарстанын, Башкириын, Перьм улосын улӥсь удмуртъёс но адӟизы спектаклез. Автор та ужаз нырысьсэ удмурт литератураын кутӥське Афган тема борды.

"Матронлэн егит картэз, яке Атас Гири-2" спектакль

«Со вакытэ Афганистанын тылож мынэ на вал. Со сярысь гожъяны но ӧз лэзьылэ. Пьесаям но Афганистан кылэз ӧй пырты: эскерись-чаклась муртлэн синмыз туж лэчыт вал ук», – вера Анатолий Леонтьевич. Та пьеса ожмаськонлы пумит пафосъем луэ.

Ар ортчыса «вордӥськиз» «Атас Гири» комедия. Таяз пьесаяз автор серекъя азгынмемъёсты, мурт чотын улӥсьёсты, дуно ваньбурез капыръясьёсты…

«Котькуд ролез пьесаысь нырысь ик ачим шудӥсько. Ачим ик актёр кариськисько но корка пуштӥ солань-талань лёгаськисько: таиз тазьыгес луоз, таиз – тазьыгес, таиз – тазьыгес шуисько», – ужез сярысь вера Анатолий Григорьев.

А. Григорьевлэн пьесаосыз пуктэмын вал мукет элькунъёслэн театръёсаз но. «Эмезь кисьмаку» спектаклез – Саранскын, «Парсьпи но эмеспи» – Коми театрын, «Пужмерен ӵуштаськем яратон», «Парсьпи но эмеспи» пьесаосызлы ӟеч дунъет сётӥзы вал Йошкар-Олаын финн-угор калыкъёслэн драматургияя семинарзы дыръя.

Аслаз пьесаосаз Анатолий Григорьев возьматэ туннэ нуналэз, усьтэ туала улонлэсь могӟетъёссэ.

А. Григорьев трос ужа кылысь кылэ берыктон бордын. Со удмурт кылэ берыктӥз даслэсь трос кунгож сьӧрысь классикъёслэсь ужъёссэс, ӟуч но мукет калыкъёсысь драматургъёслэсь произведениоссэс (Ж.-Б. Мольер, А. Макаёнок, В. Винниченко но мукет). Туннэ нуналлы Анатолий Леонтьевич Григорьев Удмуртиын валтӥсь драматург луэ. Солэн пьесаосызъя пуктэм спектакльёс кема уло сцена вылын, калык яратыса, мыло-кыдо выльысь но выльысь лыктэ театре та авторлэсь ужъёссэ учкыны.

Библиография

Статьяосыз

Банкир: сценка / иллюстрациез Е. Каракуловалэн // Кизили. – 2009. – № 10. – С. 8–9 : цв. ил.

Быжо терапия: кык действиен комедия // Удмурт дунне. – 2007. – 14 авг. – С. 6–7.

Висись Васи: сценка / иллюстрациез М. Водикинуслэн // Кизили. – 2006. – № 9. – С. 4–5.

Гондырез мыжгай: серемес веросъёс // Кенеш. - 2013. - № 9. - С. 53-58. - Пуштросэз: Картошка; Скал; Гондырез мыжгай

Картошка; Коньяк: серемес веросъёс // Кенеш. – 2009. – № 10. – С. 105–109.

Лысву сямен уг тӧлӟы синкыли // Молот. - 1988. - № 3. - С. 9-21.

Опаленные инеем: пьеса в двух действиях // Венок родной земли: пьесы фин.-угор. драматургов России. – Сыктывкар, 2008. – С. 336–357.

Парсьпи но эмеспи: кык ёзэн комедия // Кенеш. - 2002. - № 8. - С. 8-32.

Поросенок и жених: комедия в двух действиях // Венок родной земли: пьесы фин.-угор. драматургов России. – Сыктывкар, 2008. – С. 358–385.

Пужмерен ӵуштаськем яратон: кык люкетэн пьеса // Кенеш. - 2012. - № 7. - С. 6-30.

Скал но кунян: серемес веросъёс // Кенеш. – 2006. – № 4. – С. 101–105.

Эмезь кисьмаку: кык ёзэн комедия-фарс // Кенеш. - 2000. - № 2. - С. 28-40.

Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.