Вордӥськем нуналэн ӟечкыланъёс

Пиелы ӟечкылан

Ӟечкыласько тонэ, мусо пие!

Югыт, шудо, вордскем нуналэныд!

Дас сизьымед туннэ тырмеменыд!

Со туж чебер арлыд, сяська вакыт.

Дуно кузьым уг быгатскы басьтын,

Чебер кылъёс уг шедьтӥськы веран

Туннэ таӵе кылъёс потэ верам:

«Инмаред мед утёз леклэсь но каслэсь,

Янгыш ужлэсь, черлэсь но дышмонлэсь!»

Эн ош йырдэ, сӥяз ке осконэд.

Эн сётӥськы! Лябӟиз ке кужымед!

Эн усь! Зориз ке йӧ сюрес вылад.

Сэзь лу! Йыгмыт вамыш лёг улонад.

Сӥзисько азинлык, юн тазалык,

Капчи мылкыд,

Йырвизь – чылкыт, сайкыт.

Ӟеч эшъёс, яратон – чебер, лякыт!

Улонэд медло шудбурен тырмыт!

Ганькова Любовь. Пиелы ӟечкылан // Ганькова Любовь. Мон кышномурт. Ижевск: Инвожо, 2012. – 14-тӥ б.

Вордӥськем нуналэн!

Вордӥськем нуналэн!

Лыз синмо зангари!

Уйвӧтын но пиштод,

Ворекъясь кизили!

Та шудо улонэд

Туж яркыт мед луоз,

Сӥзьыл куазь но югыт

Зарниен маялтоз.

Небыт тол тулкымен

Веша лоз мусоен.

Вордӥськем нуналэн!

Чупасько ӟырдытэн.

Яратон мылкыдыд

Сюлэмад уй-нунал.

Пичи дыр мылкыдыд

Лэсьтӥське ни, ай-кай.

Яратон тылгизьы

Азвесё тулкымен,

Вордӥськем нуналэн,

Зангари сяськаен!

Васильева Любовь Николаевна. Вордӥськем нуналэн! // Сяська дыр малпанъёс = Цветы моей души : [сборник стихов и песен / Любовь Васильева]. – Ижкар : [б. и.], 2018. – 16-тӥ б.

Зарезь быдӟа шудбур,

Гурезь ӝужда ваньбур,

Кӧльы кадь тазалык,

Сяська кадь чеберлык,

Сандык тырос ваньбур,

Ӝӧк выл – котьку но тыр,

Сюлэмад – шулдыр крезьгур

Ми сӥзиськом тыныд,

Мед яратоз калык.

Васильева, Людмила Васильевна.

Зарезь быдӟа шудбур... // Шур сьӧрын / Людмила Васильевалэн кылбуръёсыз. – Ижкар : [б. и.], 2018. – 193-тӥ б.

Жильыртӥсь ошмес син кадь

Мед пӧзез мылкыдыд,

Ӝог кошкись тулыс ву кадь

Мед ортчоз шуг-секыт,

Возь вылысь горд узы кадь

Луозы бамъёсыд,

Тэшкамтэ пияла кадь

Улонэд – туж вольыт.

Жильыртӥсь ошмес син кадь... // Шур сьӧрын / Людмила Васильевалэн кылбуръёсыз. – Ижкар : [б. и.], 2018. – 193-тӥ б.