Корепанов Александр Геннадьевич

Александр Корепановлэн кужымез – Мувыр

Эгра ёросысь Александр Корепановез 1990-тӥ аръёсы кызьы но ӧз серекъялэ бырем Мувыр гуртэз улӟытыны выремез понна. Туннэ Мувырын 12 корка, 30-лэсь ятыр улӥсез ни. Тыл но, сюрес но, ву но ачиз Александр Геннадьевич кыскиз. Ёросын ужаны быгатэмез шоры синмаськыса учко: переработка усьтыны 10 миллион манет грант утӥз. Тазьы тыршемзэ дунъяло шаерысьтымы кивалтӥсьёс но. Но ушъямзылэсь воргорон керпотэ. Али одӥг малпанэн улэ: шур дуре вуко лэсьтэмез потэ.

Гурт быриз но улӟиз

Мувыр 1837-тӥ арын кылдӥз, бадӟым ноку ӧй вал. 1961-тӥ арын, Александр Корепанов вордӥськон аре, татын 25 корка гинэ сылӥз. Но ужазы медпункт, клуб но магазин. Лозо шур котырысь калык ӧз бырылы – сокем чорыганы яратылӥзы пичиез но, бадӟымез но. 1-тӥ классэ Мувыр гуртысь 4 кузя пиналъёс Зура школае мынӥзы. Но ветлонэз кыдёкын – 9 иськем. Соин ик Шурикез анаез Шоргуртысь школае выжтӥз, сузэрез доры улыны интыяз. – Нырысь-валысь «витьёслы» гинэ дышетски. Но пиосъёслэн аналскон сямзы вань. Асме ӧй вормы. Ижысь гурт удысъя институтэ агрономе пыроно кариськи но конкурс пыр ӧй ортчы. Сыӵе агроном луыса ужаме потэ вал! Атай вӧзын будӥ бере, со кадь, музъемен ужало шуылӥ. Зоотехнике пыри ик вал. Но дышетсконме пумен куштӥ но армие кошки. Уг жаляськы. Дипломе луысал ке, начальство пӧлтӥ тросгес ветлоно луысал, нош тазэ мон воксё уг яратӥськы, – вера Александр Корепанов. Армие Александр Геннадьевичез бӧрдыса келязы. Аслаз но сюлэмыз интыяз ӧй вал. Писпу борды ӵабъяса кельтӥз: кужыме – Мувыр. Александр Корепанов Дальний Востоке сюриз. 2 ар службазэ нуытозяз, гуртысьтыз юзырес гожтэт басьтӥз. Анаез ивортӥз: гуртэз, пе, быдто, калыкен ӵош Зурае вань котыръёсмес поттӥмы ни. Тракторен коркаосты, писпуосты донгало, электро езъёсты вандыло, сюресэз гыро...

– Армиысь 1982-тӥ арын февраль толэзе бертӥ, – тодаз вае воргорон.– Лымы шунатозь, оскытэк улӥ, гуртлэн бервылыз ӧвӧл ни шуыса. Тулыс Мувыре, нӧдэз коласа, лыктӥ но местаосты ӧй тодма ни. Льӧмпуос гинэ но порылэмын. Бусы уг окмы шуыса, гырыны-кизьыны кутскиллям. Пыдесъёсы шальтразы. Шур дуре васьки но синвуэн воньдылӥсько. Малы писпуосты ке но кельтонтэм? Мукет деревняосын льӧмпуосты кельто ук, корка бервылъёсазы сыло. Атаелы шуи: Мувыре берытско, отын уло, Зураын уг улы. Соку со шорам йыркуръяськыса учкиз: али гинэ быдэс хозяйствоез Зурае поттӥмы, курадӟыса выжыяськимы, улондэ ул бадӟым гуртын шуэмез потӥз солэн. Нош сюлэмен мар карод? Толэзьёс, аръёс ортчемъя ялан тодэ лыктылӥз Мувыр: отын азбарын вож-вож турын, песок – ноку нӧд уг луы.

Нош Зураын котьку дэри. Ӵужмуртэ ялан буйгатыса шуоз вал: ӧвӧл, пе, сю процент умой места но, сю процент умой адями но, чида но ул... Соку Александр Геннадьевич кузпалъяськемын ни вал. Артысь Шамардан гуртысь Ольга Рафаиловна кузпалызлэн мылкыдъёсыз пумитэ нырысь мар вазьыны паймылӥз. 2 нылзы будэ. Гольык бусы шорын тылтэк, вутэк, сюрестэк кызьы улод меда?

– Сыӵе ваменэс со. Кызьы пумитаз султод? – тодаз вае Ольга Рафаиловна. – Сюан бере но Мувыре сяська поныны ветлӥз. Сельсоветлэсь, ёрос администрацилэсь музъем курыса ветлысал ке, пуктӥськыны ӧй лэзьысалзы. Нокинлэсь юатэк, корка ӝутыны кутскиз. Атаеныз ӵош котырысь музъемъёсты арендае кутӥз, соосты утялтоно-кизёно кариськизы. Озьы кыкназы юрт пуктыны ӧдъязы. Со вал 1993-тӥ арын. Пуктӥськонэз чаклась, котыраз улӥсь ӧвӧл – инструментъёссэс но, материалъёссэс но вораны кутскизы. Соин сэрен но Александр Геннадьевич шуиз: корка вуттэмын ӧвӧл на ке но, отчы улыны пото ни. Со аръёсты кышноез синвуаськытэк тодаз вайыны табере уг но быгаты. Кӧня, пе, серекъяло вал адямиос, гольык бусые мынӥськоды, тӧл нуоз шуыса. Йыр котыразы чиньызэс бергатӥсез но шедьылӥз. Ваньзэ сое малпаса, туннэ Александр Геннадьевич шуэ: Ольга, декабристлэн кышноез кадь, сьӧрам мынӥз – яратэ вал, дыр, яратытэк кызьы бусы шоры улыны выжод. Корказэс югдытӥзы керосин лампаен, эстӥськизы пуэн. Ву ошмесысь ведраен тубтылӥзы. Трасса вылэ потаны мед быгатозы шуыса, вездеход басьтӥзы. Машина тӥяське ке, песятайзы валэн уробоен нылпиосты дышетскыны нуллӥз. Со но угось кузпалыныз пиез сьӧры Мувыре улыны лыктӥз. – Атае 10 ар улыса вуттӥз на Мувырын, – шуэ Александр Геннадьевич. – Вордскем местаяз тусыз ик воштӥськиз – шулдыргес луиз. Шумпотэ шуыса адӟиське вал. Сузэре нырысь-валысь Зурае ик кылиз вал. Али сое но Мувыре вайи ни.

Вуко пуктэмез потэ на

Кык арзэ Корепановъёс воксё огназы улӥзы. Ёрос администрация ласянь нокыӵе юрттэт ӧй вал, асьтэос ӟеч азьысь кошкиды ук, шуылӥзы. Александр Геннадьевич ваньзэ тае пеляз ӧз понылы. Аслыз шуылӥз: татын одно ик кылдоз гурт. Соин ик уждун тросгес поттон вылысь калымить карыса ветлылӥз. Люкам коньдонэныз из басьтӥз но сюрес вылэ вӧлдӥз. Шамардан гуртысь азьвыл подстанция дорысен корка дорозяз юбоос атаеныз ӵош пуктылӥз но тыл кыскиз. Кык пичи ӵыпет кыриз, сое чорыген тырмытӥз. Семьяеныз выль сад мерттӥзы. Александр Геннадьевичлэн коркаез туннэ ке но вылаз гожтэмын ӧвӧл. Пуктэмез бере соин йырин ӧй вал. Али но мукет ужъёсын йырыз пороме. Нош котыраз 12 корка ӝужаз ни. Отын 30-лэсь ятыр улӥсез. Соос пӧлысь 7-ез нылпиос. Таосты школае нуллыны автобус лыктэ. Пуктӥськыны куриськисез эшшо но вань. Но музъемен шуг-секытъёс кылдэмын ай. Со ужпумъёсын али ёрос администрация выре.

– Али нокызьы ӧй дӥсьтысал ни бусы шоры пуктӥськыны, – шуэ Александр Геннадьевич. – Соку, 30 арес дыръям, номырлэсь кышканэ ӧй вал, лэся. Деревня кылдытыны кутскеме бере весь малпалляй: мар кароно сое картаос вылэ пыртон понна? Кун Кенешысь депутатлы Софья Широбоковалы вазиськи. Со юрттӥз. Нырысь Депутатъёслэн ёрос Кенешазы, собере Кун Кенешын та юанэз эскеризы. Тужгес кема учкиз Россиысь Правительство – 3 ар. Сюлмы путоз ни кожасько вал. 2009-тӥ арын 9-тӥ августэ гинэ постановление потӥз Мувырлэсь нимзэ берыктон сярысь. Кин но со мукет ним ӵектылӥз. Но мон шуи: татын Мувыр вал, нимыз мукет луиз ке, пересьёс уз валалэ. Пӧрмиз. Та мон понна туж бадӟым вормон. 

Александр Геннадьевич таин гинэ ӧз буйга. Гуртсэс Инмар мед утёз шуыса, шур дуре часовня пуктоно кариськиз. Пуэз чебер пужъятыны аслам киы мырк, но юлтошъёсы котьмалы устоесь, шуэ. – Огназ адями номыр но уз кары. Семьяын, гуртын ваньмыз умой ке, туж жадьыса бертыку но, мылкыд соку ик буйга. Нош коллектив умой ке, уж капчиен ӧръяське. Юлтошъёсы туж умоесь – огез но ноку «уг» уз шуы. Сюресмы ӧвӧл дыръя но, толалтэ ӵукна султыкумы, воксё курытэк, лымы сузямын луэ ни вал. Огезлы юлтошелы огпол поттылӥ, труба кулэ вал шуыса. Жингыртэ: лыкты, пе. Кӧняен, юасько. Вазе: тон мыным быгатэмедъя дунтэк юрттӥськод но, мон тынэсьтыд коньдон куром шат? Огнам ӧвӧл шуыса, юн шумпотӥсько.

Анае но котьку вера вал: тон калыклы капчи кариськид ке, тонэн но капчи кариськозы. Со озьы ик луэ. Техника но тӥяське ке, вазиськисько но, шуо: лэсьтом. Тонъя карисько ке, ачид но – быгатӥськод-а, уд-а – соослы юрттӥськод, – шуэ Александр Корепанов. Часовняез дэмен пуктӥзы. Сое 2016-тӥ арын усьтӥзы. Гуртоос понна со зэмос праздник луиз. Табере отын службаос ортчыло – олокытчы кыдёке ветлонэз ӧвӧл. Черк котырысь шур дуре Александр Геннадьевичлэн вуко лэсьтэмез потэ на. Азьвыл асьсэлэн шур вылын ужась вукозы вал ук. Сое малпаса но, проект лэсьтон бордын выре. Отын ик пызь изысалмы, отын ик нянь пыжысалмы, шуэ. Пушказ ик музей кылдытэмез потэ.

– Куд-ог юлтошъёсы шуо: сюлмаськонъёсыд ӧжыт шат, малы тыныд оломар но кулэ? Уг тодӥськы, малы мыным вуко кулэ. Сюлэм куре, лэся. Семьяе но шуэ: азьвыл ваньзэ доре вайиськод вал, али ваньзэ дорысь поттӥськод. Гуртэз выльысь ӝутыны сомында коньдон кулэ – лыдъянтэм. Я кытын ке сюрес уродме, я электропроводка тӥяське, я кинлэн ке юртэз ланьыра. Корка но адямиослы пуктоно. Котькуд коркалэсь бугрозэ, мунчо но гид лэсьтыны материал дунтэк сётӥсько. Нош со коръёсты ваён аслым дунтэк уг усьы. Али но кинлэн ке мунчоез сисьме ке, нош ик бугро висъясько. Мед гинэ улозы. Соин ик коньдон шур кадь кошке.

Скалъёсмы ӧй луысалзы ке, мон кемалась банкрот кыльысал ни. Нылъёсылэн дӥсяськемзы потэ, дыр. Ярам коть, валало мылкыдме. Мар карод на, сямы сыӵе: калык понна, гуртэ понна маке лэсьтэме потэ. 2 внучкае, 1 внуке ни. Соослы но татын улоно, ужме азинтоно. Пичи дыръям ик, Мувыр гуртэ сярысь маке уродэн верало ке, сюлэм вӧсь луылӥз. Умоен гинэ мед вералозы кадь потэ вал. Соин но 2 ферма лэсьтӥ, отчы пудо пыртӥ. Калыклы уж кылдытэме потӥз.

Ферма пуктон макем секытэн сётӥськиз, ачиз гинэ тодэ. Сик 50 иськемысь нуллоно луиз – тэль пушкын улыса вылысь котырысьтыз писпуосты кораны ӧз лэзе. Али ке но пу дасяны 50 иськеме ветлоно луо. Али гидъёсаз 300-лэсь трос сюро таза пудоез, со пӧлысь кысконо скалэз 130 йыр. Табере Александр Геннадьевичлэн 14 ужасьёсыз ни. Гурт котырын возьёсыз пудо сюдыны уг тырмо – 50 иськеме турнаськыны, силос дасяны ветло. А. Корепанов отысь музъемъёсты арендае кутэ. Аслаз техникаез ялан тӥяськылэ. Выль трактор вылэ нокызьы ӧз вуы ни. Куд-огез пайме гинэ на, кызьы сыӵе техникаен ужаны луэ шуыса. Ярам ай, ужасьёсылэн киоссы зарниесь – тупато но выльысь бусые пото, шуэ фермер. Александр Геннадьевич али гуртазы йӧл, творог, йӧлвыл но йогурт лэсьтыны пичи завод пуктыны кутскиз. Дӥньзэ (фундамент) ӝутӥз ни. Вуоно арын ужаны кулэ ни, шуэ.

Асьсэ кыскем чылкыт йӧлзэс но солэсь лэсьтэм сиён-юонэз Москвае келяны медэ. Соку гуртазы эшшо 4 адямилы уж луоз. Уждунэз йылтыны но луонлык кылдоз. Али шоро-куспо уждунзы 17–21 сюрс манет. Со сяна, Мувырын ужасьёслы арлы быдэ дунтэк сётӥське 2 парсьпи, ю тысь, турын, толэзьлы быдэ 5 мешок посыпка. Таӵе юрттэтэн азьтэмез гинэ пудо уз ворды, шуо. Соин но Мувырысь котькуд коркан скал, ыж, парсь но тылобурдо возё.

– Ужась калыкез ӝож кареме уг поты. Уж луиз ке, гурт уз быры, – шуэ воргорон. Завод лэсьтон понна Александр Корепанов Гурт удысъя но сиён-юонъя министерстволэсь 10 миллион манет тыр грантсэ утыны быгатӥз. Сое резиденциын Удмуртилэн Тӧроез Александр Бречалов сётӥз. Тӧро соку шуиз: Александр Геннадьевич кадь адямиослы луыса гуртъёс выльысь улӟо.

10 ар

Александр Геннадьевич туэ гуртэзлы 10 ар тырмонэз сӥё-дано ортчытӥз. Празднике али улӥсьёс гинэ ӧз люкаське - татысь потэм адямиос но шумпотыса гуртазы берытскизы. Артысь гуртысь но вуизы. Тау каремысь уг дугдо. – Быдэс арня ӧй кӧлы, кызьы меда ортчоз шуыса, – тодаз вае пиосмурт. – Юонтэк но калыклы шулдыр мед луоз шуыса сюлмаськи. Со шулдыръяськон дыръя, калыкен вераськыса, валче пукыса, йырам мукет малпан лыктӥз: пичи гуртъёслы, выль улӟисьёсызлы сӥзем фестиваль радъяно, быдэс республикамес мед огазеялоз со. Пумиськон но шулдыръяськон гинэ медаз луы. Отын лэчыт ужпумъёсты ӝутоно.

Гуртын улӥсьёслэн шуг-секытъёссы лачак. Туж потэ, гурт калыклэсь ужзэ мед гажалозы шуыса. Гуртоослы туж секыт та улонын, соин ик егитъёс гуртэ уг кылё. Кин ке 30 градус пӧсь дыръя шурын пылаське, кин ке со дыре ик тракторен прессовать каре. Уждун но гуртоослы тросгес тыроно. Ваньзэ сое гурт удысъя но сиён-юонъя министрлы Ольга Абрамовалы верай. Малпанъёсме умоен лыдъяз. Александр Бречалов но вуоно арын фестиваль ортчытыны юрттом шуыса оскытӥз.

Йыры кур: Андрей Малахов аслаз передачаосаз гурт калыкез мыскыл карыса возьматэ. Кӧня пол жингыртӥ ни солы – уг шедьтӥськы. Мувырын одӥг мурт но уг юы. Малы соосты телевизор пыр возьматонтэмез? Будӥсь нылпиос умойзэ мед адӟозы. Уродзэ учкыса, кыӵеесь соос будозы? Мон, Николай Островскиез лыдӟыса, будэмын. Пичи дырысеным сюлэмам пыризы чуръёсыз: адямилы улон одӥг пол сётӥське, улонэз понна ноку возьыт медам луы. Мон озьы улыны тыршисько. Нылпиосылэн нылпиоссылы выжымы сярысь умоен гинэ мед вералозы. Гуртлэсь праздниксэ радъякум, арлыдо кышномурт дорам лыктӥз но шуэ: тынад песятаед войнае кошкемезлэсь азьло колхоз предын вал, соку ми туж умой улӥмы. Песятаелэсь ужзэ азинтӥсько. Музъем вылам жаглы ӝужаны уг сёты.

– Паймемысь уг дугдылӥськы папамылы, – вера Нина нылыз. –Кытысь солэн пуксисьтэм мылкыдыз? Котьку капчи кариськоз. Соин артэ ужаны туж лякыт. Со шутэтскыны но уг быгаты ук. Оло, жадёнэз но уг вала. 12 часын уйин тракторен вуэ. Синъёсыз жадемын-жадемын ни, нош ачиз данъяськыса но шумпотыса вера: мон, пе, сомында гыри туннэ. Музъемен ужа шуыса, сыӵе шумпотэ со! Огзэ малпам ужзэ лэсьтэ гинэ, соку ик мукетыз сярысь вераськон ӝутэ ни. Кытысь сомында малпанъёс йыраз пӧзё! Мон со кадь луыны уг быгаты, дыр.

Солы юрттӥськыса, валля арын чорыгасьёслы фестиваль гуртамы ортчытӥ. Соку 5 килограммлы восьми – сомында бызьылонэз, сюлмаськонэз вал. Ваньмыз ми чотын ук. Ми ум быгатӥське на, фестиваль ортчытыса, коньдон поттыны. Дышетэмын ӧвӧл – керпотоно. Адямиосты куноятӥм, шулдыртӥм. Кылем арын сыӵе фестиваль ортчытыны дӥсьтонэ но, кужыме но ӧз тырмы ни. Нош папалэн кужымез уг быры. Со доры кин гинэ, юрттэт курыса, уг вазиськы – ваньзылы юрттэ.

Выжыкылысь аслыз бичам яблокез эшъёсызлы люкылӥсь лудкеч выллем со. Коньдон басьтэ гинэ – сое гурт понна кутэ ни. Чорыгаса бертэ ке, чорыгзэ сюрес вылаз пумиськись адямиослы люкылэ, ачиз одӥг но чорыгтэк вуэ. Зэм, аслыз но собере калык озьы ик юрттӥське. Юлтошъёсыз пӧйшуранысь но, палэнысь чорыганысь но котьку салам ваё. Лекос трос ужаськод, озьы уг яра, ӵемысь вералля кузпалыз но. Мукет сямен Александр Геннадьевич уг быгаты. – Ӵош шутэтскем но куддыр потэ, но уг кылды. Азьло ягодаослы сике ӵош ветлӥськом вал, али уг вуы ни, – шуэ Ольга Рафаиловна. – Туж оскымон мужик со. Сяська но кузьмалоз, куаретоз но. Угось ми, кышноос, сыӵеесь: уж лэсьтэмын ке но, милемлы уг яра, лэсьтэмын ӧвӧл ке, эшшо но номыр уг яра. Воксё жадемез бере Александр Геннадьевич шур дуре ваське. Шур буйгатэ. Сюлэм лякыт луэ, пе. Соку ик выль малпанъёсыз но мылкыдъёсыз кылдо.

Источник:

Александр Корепановлэн кужымез – Мувыр / В. В. Абросимова ; записала Е. Сараматова // Удмурт дунне. - 2019. - 22 окт. - С. 6, 11. - (Тӧр шорын).

За предоставление материала выражаем огромную благодарность редакции газеты "Удмурт дунне"