Редактирование: Турын-куарен эмъяськонъёс

'''Турын-куарен эмъяськонъёс'''

Вашкала дырысен калыкъёс эскеризы но люказы трос пӧртэм турын-куаръёсты. Соос уго трос пӧртэм висёнъёс дыръя адямиослы юрттылӥзы. Тросэз али но турын-куарлэн кужымезлы оске, но сое туж валаса бичано. 

'''Вождэ эн вайы…''' 

Турын-куар бичан борды басьтӥськем адями оскыны кулэ, со одно ик юрттоз шуыса. Ӧд ке оскы, пайдаез уз луы. Кытысь бичано турын-куаръёсты? Турын-куар бичано ӧвӧл сюрес дуръёсысь, шай вылъёсысь, сутскем бервылъёсысь, кырсь интыосысь. Кылсярысь, нылкышно висёнъёсты эмъяны малпась мурт турын-куар бичаны кулэ отысь, кытысен уг кылӥськы атаслэн чоръямез. Вашкала дырысен удмуртъёс туж бадӟым саклык висъязы та ужлы. Угось асьме калыкын вань таӵе сям: турын куарез ишкалтыкуз, адями вазиське солы юрттэт курыса, «вождэ эн вайы» шуэ вылэм. 

Ку бен бичаны кулэ турын-куаръёсты? Умой луоз, куке турын куар басьтыны быгатэ тросгес кужым. Кылсярысь, кызьпулэсь пучыоссэ бичаськомы март, апрель толэзьёсы. Соку соос бычыяло, но будыны уг кутско на. Писпу сулэз бичало апрель-май толэзьёсы, пушкысьтыз вуэз вырӟон вакытаз, 20- 30 см кузьдалаен. Куаръёсты бичаны кулэ будос сяськаяськыку, быръёно улысь куаръёсты гинэ, турын куарез вӧсь каронтэм вылысь. Сяськаосты бичано турын сяськаяськон вакытэ. Емышъёсты бичало вуэм беразы гинэ. Турын-куар выжыосты бичало сӥзьыл яке тулыс, будыны кутскемезлэсь азьло.

Бичам турын куарез быгатоно куасьтыны но. Соос уго узыр пӧртэм витаминъёсын, эфирной вӧйёсын… 

Калыкын верало: ӵукна бичам эмъюм турын пайда тросгес вае. Уг лэзё пересьёс бичаськыны зорыку но чилекъяку. Писпу сулъёсты но выжыосты бичаны умой луоз 16-18 часъёсы, нош куд-ог турынъёсты уйин бичало. 

Милям гуртамы улӥсьёс турын-куар бичаны тыршо Иван Купалалэсь (7 июльлэсь) азьло, со бичам эмъюмез ӝыт гуждор вылэ вӧлдо. Ӵукна лысву со ваем турын вылэ усе ке, озьыен, ваньмыз умой луоз. 

Эмъюм турын бичаны мынӥсь мурт одно ик мунчое пырыны кулэ. Мунчоын веникен шуккиськыса, чылкыт дӥсь дӥсяса дасясько вылэм. Пересьёслэсь тазьы верамзэс но кылэме вань: вашкала дыръя эмъюм турын бичаны косо вылэм быдэ вуымтэ пинал нылэз яке пиосмуртэн улӥсьтэм пересь кышномуртэз. Нылкышнолэн вир кошкон нуналъёсыз дыръя но эмъюм бичаны уг лэзё вылэм. Унябей (мать-и-мачеха), матой (мята) бичало вал Иван Купала нуналэ. Абагысяська (папоротник) бичало вылэм Тросинь (Троица) нуналэ но со бӧрсьысь нуналэ. 

Турын-куаръёс сярысь тросгес тодыны мыным юрттӥзы Салья гуртысьтымы кык Саняпайёс: Бегӟан Саняпай (Петухова Александра Егоровна, вордскемын 1930-тӥ арын ) но Сюкась Саняпай (Федотова Александра Васильевна, вордскемын 1926-тӥ арын). Бегӟан Саняпайлэн верамысьтыз: 

''– Пинял дыръям йырвесчие висьыны кутскиз. Векчи ньӧрен кокам кадь вӧсь луэ, мыкыртӥськыкум йыры кисьтӥське. Соин ик мыным Вужгуртысь Бибарыс доры ветлыны косӥзы. Кытчы пырод, мынытэк ӧйлась. ӧстӥ пырыкум ик, со шуиз:''

''«Э, нылы, тонэ тупатӥллям ук. Соин ик бадӟым ву сьӧры пота, йырыд висемысь дугдоз». Висемелы чидатэк Пельгала мынӥмы. Отын Кондӥ Марья доры пырамы. Марьяпай милемлы эмъюм лэсьтон валэктӥз: «Тани та турынэз (ӟуч сямен сое «каменная полынь» шуо) бича, лапас улад куасьты. Собере чай интые тырыса ю. Йырыд бурмоз».'' 

''Гуртэ бертыса тодӥ: со турынэз милям гуртамы зоятурын шуо. Нырысьсэ та эмъюмез бичаны кутскем Падей Гиршалэн кышноез Зоя. Вот тӥни озьы ним но кылдэм.'' 

''Трос аръёс ортчизы ке но, со верам кылъёсты али но уг вунэтӥськы. Со дырысен ик турын-куар бичаны кутски.'' 

''Тулыс ке вуэ, мон нырысь ик бичаны кутскисько '''кечсинсяськаез (подснежник)'''. Со умой юрттэ пыэдлэсь, кынмамлэсь, сутскемлэсь. Чаез сямен пароно но юоно.'' 

''Туж тунсыко верамзэс кылэме вань '''абагысяська (папоротник)''' сярысь. Со, пе, 7 июле, уйшоре сяськаяське. Кин солэсь сяськазэ ишкалтыны вуэ, адӟиськисьтэм луыны быгатэ. Со сяська дорын, пе, кыйёс трос, писпуос но пограло.'' 

'''''Тӧдьысяська (ромашка)''' юрттэ тӧдьы ӵужектонлэсь (желтухалэсь). Адямилэн ымнырыз дэра кадь тӧдь-тӧдь луэ ке, та эмъюмез юыны косо. Кызьы ӵукна чаез париськом, озьы ик куасьтэм тӧдьысяськаез но юоно. Вань на ӵужсяська (ромашка), таиз юрттэ ӵуж ӵужектонлэсь (желтухалэсь), адямилэн ымнырыз ӵуж-ӵуж луэ. Ӵужектонлэсь озьы ик умой юрттэ сьӧдкызьпу мульы. Со ачиз ческыт. Парыса сиё, но трос сиыны уг яра.'' 

''Нош '''девясил''' – ӵуж сяськаосыз туж бадӟымесь, гоно выллемесь – со юрттэ кызэмлэсь, кӧт висёнъёслэсь. Пыэдэн курадӟыку, умой юртто мыным виртурынэн (зверобой), пыштурынэн (душица), мушматоен (мята), сирень сяськаен, льӧмпу сяськаен чай паросъёс.''

'''''Рактурын (ракошейка)''' кык турлы луэ. Пиосмуртэз – лыз, нош нылкышноез – лемлет сяськаё. Пиосмурт лыз сяськаёзэ юыны кулэ, нош нылкышноос – лемлет луисьсэ. Кызьы чайлы парисько, озьы ик юисько.'' 

'''''Ӟазегсӥтьсяська (тысячелистник)'''. Тае юиськом пуш висёнъёслэсь. Со но кык турлы луэ. Пиосмуртэз – тӧдьы сяськаё, нош нылкышноез – лемлет сяськаё. Та парос нылкышно висёнъёсты эмъяны юртто.'' 

''– Ми палан будэ '''«кулытон-улӟытон» турын (живая трава)'''. Со турын будэ Суллё ӧрын, Юрмалай гопын. Та турынлэсь выжызэ бичано. Ляб пиосмурт кужымен воргоронъёс юыны кулэ та эмъюмез. Та турынэз пумитаны луэ куакъёс вӧзысь но. Будэ со одӥген-одӥген гинэ. Выжызэ поттӥськод ке, отысь соку ик адӟод кык турлы выжыоссэ. Кулытонэзлэн выжыосыз пурысь луо, нош улӟытонэзлэн – тӧдьы. Пиосмуртлы тӧдьы выжыензэ шыдазы но, огшоры но сётъяло.'' 

Сюкась Саняпайлэн верамысьтыз: 

''– 7 июле турын-куаръёс вуо ини соосты бичаны. Тыршисько котькуд ар мар ке но выльдыса кельтыны. Тани туэ но '''люгы''' куар бичай. Со умой юрттэ потос висёнъёсын курадӟисьёслы. Со сяна, сое кутӥсько на пидэс, йыр висьыку. Йырам но бинялтыса нуллӥсько. Умой каре кадь мыным. Яратӥсько '''гуждорез''' но бичаны. Гуждорын, пе, трос витаминэз. Умой куасьтэм бере, сое чай интые юисько.'' 

''Вирез напчытыны умой юрттэ '''пушнер'''. Потосъёсын курадӟись муртъёслы бичасько '''шырбыж (подорожник)'''. '''Пиньтурынэн (белена)''' яратӥсько ӵынатӥськыны. Со сяна, со юрттэ на киосы зыр потыку, гижлоосын курадӟыку. '''Виртурынэз''' бичасько вир кошкемез, кинлэн пушкыз пота, сыӵе муртъёслы. '''Вишня''' куарез куасьтыса юисько. Со давлениез умой каре. Туж узыр витаминъёсын '''люцерна''' но к'''левер'''. Куасьтэм бере сое чай интыын туж умой юыны.'' 

''Кулылыса усьылӥсьёслы умой луоз ӟуч сямен вераса «'''гергтевские кудри»''' турын-куар. Бичано, куасьтоно, собере сое яралоз чаен сямен юыны но йыр улад миндэр интые поныса но юрттэ кадь потэ.'' 

''Валя нылы '''кирен куарен''' настойка но лэсьтэ. Кирен куарез спиртэн сурано. Но нырысь со куаръёсты чылкыт миськоно. Сое дас нунал пукетоно, собере сӥсъяно, со суретэз одӥг чечы пуньыен нуналаз куинь пол юисько. Мугорез юзмыт каре. Собере со суретэн ик суйёсме, пыдъёсме зырасько.'' 

''Адями висьыны усе ке, коргид сиге тубо но турын пыртыса паро вал, собере вань семья сое чаез интые юэ вал. Милям ӵем дыръя озьы каро вал.'' 

'''''Булык''' '''турын''' юрттэ кӧт висьыку, дизинтерияен курадӟыку.'' 

'''''Лобась булык турын''' Суллёын будэ. Сое сяськаяськон вакытаз бичано. Та турынэз выжыеныз бичало, соин ик со туж ӧжыт кылиз ини. '''Улэп турын''' умой юрттэ пӧртэм пумо чигемъёсты бурмытыны. Кинлэн пыдыз, киыз чигыны шеде ке, та турын бадӟым юрттэт сётоз.'' 

'''''Сутэр куар, эмезь куар''' юртто пыэдэн висьыку. Мон яблок кӧмез но уг куяськы. Сое нимаз бичасько, куасьтӥсько но кӧт висемлэсь но юрттэ кадь потэ. Кӧт висёнлэсь умой юрттэ '''уйпу''' гуры. Мылкыдэз умой каре '''муш матой'''.'' 

''Сюлэм висисьёслы юрттоз '''гондыр гумы (пустырник)'''. Сое чаез сямен юоно, сиськон азьын нуналаз куинь пол.'' 

''Кин бронхитэн курадӟе, тыосыз висё, соослы юрттыны кулэ '''веник куар'''. Мунчо эстэм бере, веникез быректэм вуэн пылатӥськом. Со вуэз огшоры эн кисьтэ, со туж умой эмъюм.''

''Камай Вася милемыз ваньмес секта вал. Кин веник куарез парыса юиз, солэн кызонэз но ортчоз. Озьы ик кызонэз эмъялозы '''вукуарез, унябеез''' чай сямен парем сурет. Нимаз вераме потэ '''алясь турын (мокрица)''' сярысь. Пыдъёсы, кускы висьыку, мон та турынэз ыль дыръяз но кутӥсько. Висись интые керттылыса возисько. Со мынэсьтым висёнме аслыз каре кадь потэ. Висёнэз губка кадь басьтэ. Эмъяськемды бере тыршелэ со алясь турындэс палэнэ куштыны, малы ке шуоно со турынэз пудо сиыны учыраз ке, пудо но тӥ сямен ик висьыны усёз. Мон ачим но ӵем дыръя, ньылоны пыктыку, та турынэз бинялтыса возисько но, соку ик юрттэмзэ шӧдӥсько. Озьыен, та турын юрттоз тӥледлы кызьы ке ыль куен, озьы ик куасьтыса но. '''Тыпы сулэз''' юиськом кӧт висемлэсь.'' 

Турын-куарен эмъяськоно туж чакласькыса, нырысь-валысь эмчиен кенешыса.

<ref name="turyn"> Вахитов Семён. Турын-куарен эмъяськонъёс// Вахитов Семён Сергеевич. Олле Сальяла. – Ижкар: Йӧскалык прессалэн юртэз, 2022. 119-тӥ – 124-тӥ б.</ref>.

==Литература==

[[Категория:Кияса ёросысь Салья гурт котырысь фольклор]]
[[Категория:Удмуртская народная медицина]]
[[Категория:Удмурт калыклэн эмъяськон амалъёсыз]]