Редактирование: Ручкина Светлана Владимировна

== Удмурт чика ==

Туала удмурт культураысь яркыт кизили, кырӟась Светлана Ручкина (Лади Свети) дышетскемезъя психолог. Со УдГУ-ысь педагогикая, психологияя но социальной технологиосъя институтэз но удмурт филологияя магистратураез йылпумъямын. Азьланяз та удыс борды, оло, кутско, психологлэн ужез мыным тунсыко, шуэ кырӟась. 

Светлана Ручкина «Егит куараос», «Ӝужась кизилиос», «Устоесь кырӟась» но мукет конкурсъёсын вормылэмын. Ачиз верамъя, со понна тужгес дуно вормонэз – «Сайлент Ву Гур» группаезлэн пичи калыкъёслэн «Евровидениязы» 2-тӥ инты басьтэмез.

'''– Светлана, мар бордысен кутскиз крезьгуре нуись сюресэд?''' 

– Мон вордӥськи Алнаш ёросысь Асан совхоз-техникумын. Отын ваньмыз сямен нылпиос крезьгуръя школае ветлӥзы, мынам Андрей агае но Марина сое йылпумъямын. Отын чебер номеръёс пукто вал, дышетӥсьёс но мукетэсь потылӥзы. Крезьгуро школаын вал прослушивание. Дышетӥсьмы Татьяна Борисовна Меркушева бырйиз, кин солист сямен кырӟалоз. Витьтон нылпи пӧлысь бырйизы монэ но эшме Юлия Гоголеваез. Вот озьы кутскиз крезьгуро сюресэ. Кӧня ке дыр ортчыса, нимаз кырӟасьёс сямен конкурсъёсы ветлыны кутским. Но артист луон сярысь мон ӧй малпаськылы. Шонерзэ вераса, ӧй тоды, кин луэме потэ. Мон востэм, шыпыт нылпи вал. Мамае, Людмила Николаевна, но папае, Владимир Аркадьевич, дышетӥсьёс бере, йыртэманы, ӧч карыны ӧй ик дӥсьтылы. Но сцена вылэ нырысьсэ потэме бере ик валай: мыным татын кельше, татын эрико. Мон сценалэсь ӧй возьдаськы, ӧй кышка. Огпол дышетӥсе Татьяна Борисовна шуиз: тон сцена вылын улыны кулэ. Мынам со пелям пыриз. Но сцена вылэ потыса мон асме мукет сямен возьматыны яке воштӥськыны ӧй тыршылы. Кыӵе вань – сыӵе. 

Семьяямы трос ӧз ушъяллялэ. Мон пиелы али олокӧня пол верало: «Елисей, тон молодец, тон быгатӥськод». Но мон шӧдӥсько вал анай-атаелэсь юрттэтсэс. Вакытэз сыӵе вал: костюм вурыны кулэ – уксё ӧвӧл. Конкурслы фонограмма гожтоно – уксё ӧвӧл. Папа мыным спонсоръёс утчалляз. Соку возьдаськылӥ, папа монэн йырин уксё юаса ветлэ шуыса. Али малпасько: со бадӟым быгатонлык. Ваньмыз озьы уз пӧрмытэ, коньдон утчаны-курыны туж секыт. Но куке тодӥськод, мар понна со лэсьтӥське, возьыт луыны кулэ ӧвӧл. Мон али тае туж умой валасько, угось ас вылам, Лади Свети сольной проект бордын, ужасько. Куке тон артист сямен гинэ кырӟаськод, кызьы мон «Шулдыр ӝыт» ансамбльысь «Малпан» группаын ужай, фонограмма, костюм, выступление сярысь уд малпаськиськы. Нош куке огнад, нимаз кырӟась сямен ужаськод, ваньмызлы ачид уксё утчаськод. 

'''– Ӵапак уксё утчан сярысь ик юаме потэ. Кык ар талэсь азьло тон Интернет вотэсын вазиськид: выль кырӟан гожтэме потэ, кинлэн мылкыдыз вань мыным юрттыны, тани карта номере. Коньдон лэзисьёс сюризы-а?''' 

– Мон соку «Сайлент Ву Гур» группамылы кырӟан гожтыны уксё утчасько вал. Кӧня ке нунал куспын 30 сюрс манет люкаськиз. Ми кырӟан гожтӥм, нимаське «Анай-атаелы», вылбам но дасямы. Но «Сайлент Ву Гурен» ми сыӵе шер люкаськылӥськом, весь дырмы уг шедьы. Но та кырӟан кылзӥсьёслы тодмо ини, азьланяз сое альбомен поттыны тыршомы. Альбом поттон но – дуно уж. 

– Мыным потэ, тыныд кулэ кырӟан гожтон, концерт радъян, Интернетын бам нуон ужъёсты быдэсъясь адями, нош тон вырод творчествоен гинэ. 

– О-о, со туж бадӟым но быдэсмонтэм малпан ай. Сыӵе адями ӧвӧл на, мынам но луонлыке ӧвӧл аслым директор яке юрттӥсь кутыны. Угось урамысь муртэ уд ӧтьы. Сыӵе адями кулэ, кудӥз тынэсьтыд творчестводэ яркытгес ӝуатыны быгатоз, кудӥз шӧдэ но вала, мар сярысь тон кырӟаськод, быгатэ вузаны кырӟанъёстэ. Со калыкен вераськыны но мед быгатоз, финансовой грамотаез но мед валалоз. Но сыӵе адями сюрысал ке, мон тросгес дырме кырӟан гожъянлы сётысал. Тани крезьгурдэ стриминг-сервисъёсы пуктэмед потэ ке, отын 1 анкетаез гожтыны гинэ сомында дыр кошке. Сыӵе дыръя малпаськод: малы мон талы дырме быдтӥсько, эсьмаса, али кырӟано вал. 

'''– Малы тонэ адӟыны уг луы удмурт концертъёсысь? Тон гонорар бадӟым куриськод-а яке тонэ отчы уг ӧтё-а?''' 

– Монэ уг ӧтё. Мон со удмурт концертъёслэн форматсылы уг тупаськы «Сайлент Ву Гур» группаен но, Лади Свети кырӟась сямен но. Мукет артистъёслэсь висъяськисько, мон – неформат. Кылсярысь, туж яратӥсько Ваня Белослудцевез, но сое тожо «Аксионын», Удмурт театрын ортчылӥсь удмурт концертъёсы уг ӧтё. Вань мукет амал – квартирник ортчытыны. Кык ар талэсь азьло «Сайлент Ву Гурен» ми сыӵе концерт сётӥмы. Но радъяны уксё чотаны кутскиськод но малпаськод: со мыным кулэ-а? Рос-прос концерт радъян понна коньдон но команда кулэ. 

'''– «Удмурт чика» клипед бордын быдэс команда тыршиз. Дуно усиз-а сое малпан-гожтон?''' 

– «Удмурт чика» клип кылдӥз шуыса, тау кароно удмурт егитъёслэн «Куара» огазеяськонлы но солэн кивалтӥсезлы Влад Степановлы. Соослэн клип кылдытонъя «ПУС» проектсы чотын мынам кырӟанэлы но туала клип вордскиз. Уго сценарий, клип гожтон инты, студия, операторъёс, режиссёр, костюмъёс утчано, нылъёсты буяны гинэ но коньдон кулэ. Ми Ижысь студиын но картэлэн, Сенялэн, гуртаз снимать каримы. Съёмкаос вазь ӵукнаысен бер ӝытозь мынӥзы. Гуртоос паймизы, сомында калык вуиз шуыса. Клип лэсьтон, концертын кырӟан сямен ик, тонэ кырме, бергатэ, жадемдэ, кынмемдэ-пӧсямдэ, кӧт сюмандэ уд шӧдӥськы. 

'''– Тон али эрико тылобурдо кадь: уже уд ветлӥськы, тросэзлэн сыӵе луонлыксы ӧвӧл.''' 

– Мон туэ сӥзьылысен дорын пукисько. Отчыозь ужай Удмурт филармониын рекламая менеджер луыса (ялонъёсъя огкылъёс, аренда пумысен кенешонъёс мон вылын вал). Та уж тунсыко но пайдаё вал, мон валай, кызьы концертъёс радъясько, законъёсты тодӥ, калыкен огкыл шедьтыны дышетски. Нылме вордэме бере декретысь уже потӥ но валай: мон одӥг интыям сылӥсько. Та мыным уг кельшы ни, мае ке воштоно. Соку Сеня шуиз: пук дорын, выр соин, маин выремед потэ, азинты творчестводэ. Мон солы шуисько: кинлы кулэ мынам крезьгуре, кин кылзоз, мар пӧрмоз? Нош со пумитам: адямиослы кулэ. Собере монэ выльысь ӧтё вал «Шулдыр ӝыт» ансамбле но. Али татысь артистъёс зол азинско, зэмос шоуос лэсьто. Но мон валасько вал, отчы мынӥ ке, аслам творчествоеным вырыны дыры воксё уз ни кыльы. Собере, отын туж ик бадӟым коньдон уд басьты. Картэ уждунзэс тодӥз но юаз: тыныд со кулэ-а? Вот озьы мон уже ветлонлэсь мозми. Сеня оскиз мыным. Шуиз: маке ӧз пӧрмы ке, али пӧртэм курсъёс вань. Астэ эскерыны, тодон-валандэ будэтыны луонлыкъёс трос. Мон вӧзад, мон юртто. 

'''– Мон «ВКонтакте» бамысь адӟи, кызьы тон куарадэ пуктыны дышетскиськод, кыӵе ке курсъёсын али быгатонлыкъёстэ волятӥськод.''' 

– Мон онлайн курсъёсын эстрадая вокаллы дышетскисько. Мон крезьгуръя школаын академической вокалъя тодон-валан люкай. Эстрада вокалэн но выри, со ваньмыз ас шӧдэмея гинэ вал. Соин ик куддыр ӧй валалля, кызьы созэ яке тазэ куараез поттоно, шугъяськылӥ вылӥ нотаосты басьтыны, мон уг валаськы вал, кызьы артистъёс соосты кырӟало. Али валай, дыши ни, кызьы ымез усьтоно, куараез пуктоно, шонер шокано. Дышетскон мылкыдэз бурдъя ук. Адями азинскыны кулэ, удмуртъёс юнме шуиллямтэ: пукись ву зынме. Собере, пиосмуртлы кулэ, дыр, шудо кышно. Мыным потэ, Сенялы аслыз но туж кельше, куке мон пальпотӥсько, куке ми нылпиосынымы кырӟаськом-эктӥськом. 

Мынам картэ – туж аспӧртэмлыко адями, дышетскемезъя со выж, чугун сюрес лэсьтонъя инженер. Берло дыре ужа ас вылаз. Сеня – котьмаин тунсыкъяськись адями. Кылсярысь, кылем арын со мыным шуиз: ӵектӥсько 2023-тӥ арез семьяямы дышетскон арен ялыны. Мон но дышетски. Сеня но ветлэ англи кыллы дышетскыны. Адями азинске ке, сыӵе муртэн вераськыны тунсыко ук. 

'''– Вуоно ардэс кыӵе арен ялоды?''' 

– Ӧм на кенеше, оло, выль проектъёсмес улонэ пыӵатонъя ар луоз. Мон юнме ӧй дышетскы ук. Кылсярысь, малпанэ вань адямиосты кырӟаны дышетыны. Со мыным тунсыко кырӟасьлы но психологлы сямен. Кырӟаку туж трос эмоциос пото ук. Психологъёслэн верамзыя, вань сыӵе валан – вокалотерапия, со юрттэ адямилэсь тазалыксэ но юнматыны, сюлэмшугзэ, кышканзэ но вормыны, урод мылкыдлэсь, кӧтӝожлэсь куштӥськыны. Адямиослы та кулэ, потэ мыным. Тани мамае но клубе кырӟаны ветлэ, со отчы артист луэмез потыса ӧз мыны ук. Со ветлэ эшъёсыныз пумиськыны-вераськыны, ӟеч мылкыд басьтыны. Кырӟаны быгатэ котькудӥз, но одно ик котькудӥз ик артист уг луы. Артист луон – вокал бордысь гинэ уг поты. Артист со – харизма, мылкыд но валан: мае тон лэсьтӥськод но мае тон быгатӥськод учкисьёслы сётыны. Мон асме возьматон понна гинэ сцена вылэ уг потӥськы ук: учке, кыӵе мон чебер. Мон турттӥсько адямиослы сётыны дартме, кужымме, мылкыдме. Соос шудогес мед луозы, шумпотонзы мед йылоз, умой ужъёс лэсьтыны малпанзы мед кылдоз шуыса. Учкисьёслы сётыны энергиед ӧвӧл ке, кулэ-а меда астэ возьматон понна, сцена вылэ потыны? 

'''– Семён Павлов Света Ручкиналэн кырӟамезлы синмаськиз-а?''' 

– Со уг тоды вал, мон кырӟасько шуыса. Сеня Интернетысь адӟем «Сайлент Ву Гурлэсь» фотосессизэ, кытын ми ӟег бусыын сылӥськом. Соку Москваын дышетске, общагаын улэ вылэм. Фотоысь монэ адӟыса, эшъёсызлы шуэм: та мынам кышное луоз. Со дырысен 2 ар ортчиз. Огпол адӟисько солэсь туспуктэмзэ Интернетысь, кыӵе ке удмурт тусовкаысь. Малпай, швед тусо, чебер, тунсыко пиосмурт. Но тодматскыны малпанэ ӧй вал, малы ке шуоно мон бызьын дасяськисько ни вал фин пияшлы Симолы. Дышетскыны кошки Финляндие, Хельсинкиысь университетэ. Но кӧня ке толэзь ортчыса, Симолы зундэссэ берыктӥ. 

Со вакытэ ик конкурсэ пыриськи: Финляндилэн посольствоез фин-угор калыкъёс пӧлын крезьгуръя вожвылъяськон ортчытӥз. Отын ми Удмуртиысь Николай Анисимовен вормимы. Милемлы кузьым сётыны кулэ вал Москваын, Финляндилэн посольствояз. Мон Москвае вуи, ӵапак соку Щепкин нимо выли театральной училищеын спектальзэс пукто вал Удмуртиысь студентъёс. Мон Юля Гоголеваен отчы мынӥ. Театре вуим но... отын Сеня. Но мон ӧй возьматы, та адямиен тодматскеме потэ шуыса. Со ачиз нырысетӥ вамыш лэсьтӥз. Соку эшелы шуи: мон али вуоно картэным тодматски кадь, но со та сярысь уг тоды на. 

'''– Кузпалэныд Елисей пидэс но Мия нылдэс будэтӥськоды. Кыӵе тон анай? Нылпиосыд крезьгурен эшъясько-а?''' 

– Мон нылпиосылы пумтэм-йылтэм яратонме верась-кузьмась анай. Кыкетӥ декретын пукыны капчигес вал. Мон аслым потӥсько вал, ваньзэ-ваньзэ вуттӥсько шуыса: аслым но дыр висъяны, крезьгурен но вырыны. Елисей вордскем бере мон туж шудо вал, но мукет ласянь, нылпиме гинэ адӟылӥ, ачим кытчы ке ыши кадь. Нош Мия вордскем бере мон анай луыны дышемын вал ини. Куддыръя Сенялы сое кельтӥсько, ачим спортзалэ яке басьяськыны мынӥсько вал. Елисеез кырӟаны дышетэме уг луы. Со шуэ: мама, мон кырӟасько ни. Но мынам уг поты, азьланяз со творчествоен гинэ мед выроз шуыса. Мон малпасько, творчествоен вырись адямилэн но одно ик рос-прос профессиез луыны кулэ, уката ик пиосмуртлэн. Елисей мон кадь, гань-ганьгес, нош Мия – черс кадь бергась. Со пичи ук ай, но туж яратэ эктыны. 

'''– «ВКонтакте» бамад вуоно арлы тон аслыд ачид сӥзид выль кырӟанъёс, выль клипъёс но выль кылзӥсьёс. Маке быдэсмыны кутскиз-а ни?''' 

– Выль кырӟанъёс кылдо. Тани «Ӟеч лу. Good Bye» кырӟанэ Интернет вотэсын пуктэмын ини. Ми картэным машинаен мынӥськом вал, шуак кылъёс лыктӥзы: ӟеч лу – гуд бай. Со одно ик нылкышно но пиосмурт кусыпъёсын гинэ «ӟеч лу» шуон ӧвӧл ук. Урод мылкыдэдлы, акыльтэм ужедлы, курадӟытӥсь яратонэдлы «ӟеч лу» вазьыны быгатон но азьлане вамыштон. Мон вазиськи Мария Галеева кылбурчилы, со гожтӥз та чуръёсы вӧзы кылбур. 

Тросэз мынэсьтым юало: кызьы тон кырӟан гожтӥськод? Огшоры. Лыдӟисько кыӵе ке кылбурез но, гур ачиз со кылъёс вылэ ваське. «Удмурт чика» кырӟанлы гуре вал ини, нош кылъёсы ӧвӧл. Анастасия Шумиловалы гожтӥ, таӵе гурлы сыӵе пуштросэн кылбур кулэ шуыса. Со одӥг час ортчыса, мыным кылъёс лэзиз ни. Али но тани одӥг кырӟан дуннее куриське ини. Припевез соку ик кылдӥз. Мон сое дорын кырӟасько ини, картэ но, нылпиосы но монъя нёжъяло. Но со кисьмамын ӧвӧлгес на. Собере возьмасько, ку ми сое тодмо саунд-продюсерен Дмитрий Якимовен гожтыны быгатом. Дима дорын кырӟан гожтон понна кузь черод. 

'''– Нош мар сӥзьысалыд кылзӥсьёсыдлы-учкисьёсыдлы, лыдӟисьёсмылы?''' 

– Кылзӥсьёсылы тау шуисько. «Яндекс Музыка» платформаын 10 сюрлэсь трос адями толэзьлы быдэ мынэсьтым кырӟанъёсме кылзэ. Удмурт артист понна со трос. Нош ваньмызлы сӥзьысал шуд. Котькуд адями «шуд» кылэз ас сяменыз вала. Мон понна картэныд, нылпиосыныд, семьяеныд, асэныд, эшъёсыныд ортчытэм дырлэн шумпотонэз, шунытлыкез – со шуд. Мон улонам пумиськем котькуд адямилы тау карисько, уго котькудӥз монэ малы ке дышетӥз. Асме, шудме, матысь адямиосме дунъяны, уродзэ вунэтыны, тросгес адямиосты яратыны… Соин ик ваньмызлы сӥземе потэ: сюлмады яратон мед кузёяськоз.
@@ Строка 1: / Строка 1: @@
 == Удмурт чика ==
-[[Файл:Ladi sveti.jpg|thumb|left|Светлана Ручкина]]
+Туала удмурт культураысь яркыт кизили, кырӟась Светлана Ручкина (Лади Свети) дышетскемезъя психолог. Со УдГУ-ысь педагогикая, психологияя но социальной технологиосъя институтэз но удмурт филологияя магистратураез йылпумъямын. Азьланяз та удыс борды, оло, кутско, психологлэн ужез мыным тунсыко, шуэ кырӟась.
-'''Туала удмурт культураысь яркыт кизили, кырӟась Светлана Ручкина (Лади Свети) дышетскемезъя психолог. Со УдГУ-ысь педагогикая, психологияя но социальной технологиосъя институтэз но удмурт филологияя магистратураез йылпумъямын. Азьланяз та удыс борды, оло, кутско, психологлэн ужез мыным тунсыко, шуэ кырӟась.'''
 Светлана Ручкина «Егит куараос», «Ӝужась кизилиос», «Устоесь кырӟась» но мукет конкурсъёсын вормылэмын. Ачиз верамъя, со понна тужгес дуно вормонэз – «Сайлент Ву Гур» группаезлэн пичи калыкъёслэн «Евровидениязы» 2-тӥ инты басьтэмез.
@@ Строка 62: / Строка 60: @@
 – Кылзӥсьёсылы тау шуисько. «Яндекс Музыка» платформаын 10 сюрлэсь трос адями толэзьлы быдэ мынэсьтым кырӟанъёсме кылзэ. Удмурт артист понна со трос. Нош ваньмызлы сӥзьысал шуд. Котькуд адями «шуд» кылэз ас сяменыз вала. Мон понна картэныд, нылпиосыныд, семьяеныд, асэныд, эшъёсыныд ортчытэм дырлэн шумпотонэз, шунытлыкез – со шуд. Мон улонам пумиськем котькуд адямилы тау карисько, уго котькудӥз монэ малы ке дышетӥз. Асме, шудме, матысь адямиосме дунъяны, уродзэ вунэтыны, тросгес адямиосты яратыны… Соин ик ваньмызлы сӥземе потэ: сюлмады яратон мед кузёяськоз.
-'''Источник:'''
-Ручкина, Светлана Владимировна. Удмурт чика / Светлана Ручкина ; Галина Семёнова // Удмурт дунне. - 2023. - 28 дек. - С. 10, 23 : фот. - (Тӧр шорын).
-'''За предоставление материала выражаем огромную благодарность редакции газеты
-[http://www.udmdunne.ru/ "Удмурт дунне"]'''
-[[Категория:Удмуртские звезды]]