Редактирование: Пономарёв Алексей Михайлович

==Удмуртлэн пушказ удмуртэз сайка пумен==

'''Удмурт учёнойёс пӧлын философия наукаосъя докторъёс кӧня ке сяна ӧвӧл. Огез соос пӧлысь – Россиысь Наукаосъя академилэн Философияя но правоя институтэзлэн Удмурт ёзэзлэн директорез Алексей Михайлович Пономарёв. Востэм, сабырлы воргорон шоры учкыса, паймо – но, ку со вуттӥз 60 научной статья, 3 монография гожтыса.'''

'''– Алексей Михайлович, кин тӥледлы наукае сюрес возьматӥз?'''

Анна Кирилловна песянае, шуыны луоз. Со сюлмаськемен, Михаил Павлович тятяе образование басьтыны быгатӥз. Азьвыл аръёсы дышетскон понна коньдон тыроно вал. Пиез Дэбесысь педучилищее пырыны мед быгатоз шуыса, песянаймы турын дасям, сое вузам. Крестьянлэн озьытэк уксё поттон амалыз ӧй вал уго. Отӥяз тятяе стипендия басьтӥз ни. Но песянаймы ӧй тыршысал ке пизэ калыке поттыны, кин тодэ, кытын али улысал выжымы.

Тятяе педучилище бере дышетӥсьын ужаны кутскиз вал. Но совето вакытэ, ужам сяна, тросэз общественной ужен выризы. Соин ик тятяме райкоме басътӥзы. Отын ужаны быгатэмзэ, визьзэ синйылтӥзы, лэся – ӧтизы Иже. Михаил Павлович луиз СССР-ысь Министръёслэн Советысьтызы Религия ужпумъёсъя кенешлэн Удмурт АССР-ысь оскем муртэз. Совето власть куашкам бере но тятя ужаз на. Но мон ӧй верасал, со черке пыра, Инмарлы оске вал шуыса.

'''– Кызьы атайды тӥледыз черк шоры учкон ласянь будэтӥз?'''

Оскон пумысен милям соин вераськеммы ӧвӧл. Школаын со вакытэ Инмарлы пумит дышето вал. Мон верало тазьы: кинлэн черке пыремез потэ, мед пыроз. Философиен вырисьёс богословиез ӧжытак мукетгес валало. Черке валаса пыроно. Быдэс улонэз воштоно ук со понна. Зэмос оскись адями аслаз улонэныз улэ. Кирос ошем, сюсьтыл пуктэм гинэ ӧвӧл со. Куд-огез жожтӥське: черкын нуны вӧсям, кулэм муртэ берпуметӥ сюресаз келям понна коньдон курыны кутскизы ни, мар луоз со! Нош зэмос оскись мурт воксё но озьы уг йыркуръяськы, со уксёзэ сюлмысь сётэ.

Мон светской адями. Улонме воштытэк, йылолъ ёсты чаклан понна гинэ черке пыри ке, ачим азьын пӧяськись луо.

Кышное шоры учкыса. шӧдӥсько: со оскон пала кариське ни, воштӥське. Со нылпиосмес но черке пыртӥз. Дунне шоры учкон воштӥське ке, соку черке ветлэмлэн пайдаез вань, дыр.

Собере, мынам дышетскеме но черклы пумит. Дипломея – научной коммунизмлы дышетӥсь. Сыӵе тодон-валан сётӥзы Москваысь кун университетын.

'''– Кызьы тӥ дышетскыны Москвае шедиды?'''

– Мон котьку умой дышетскисько вал. Зэм, ӟуч кылын «ньыле» аттестатам вань ик. Эшшо ке школаын асме воземме дышетӥсьёс малы ке ӧз дунъялэ, ноку жугиськеме но, урокъёсысь пегаме но ӧй вал ке но. Мултэс востэм вал, дыр. Эшъёсын шудон но тодам ӧй вал. Мон историен герӟаськем книгаос котырысь ӧй ваньмылы. Удмурт кун университетысь историяя факультетэ пырыны малпасько вал. Но отчы сюрес оз усьтӥськы. Чыжы- выжыосме но, монэ но чакласа возё вылэм партилэн обкомаз. Ма, монэ гинэ шат?

Совето вакытэ национальной кадръёсты дасян пумысен политика туж зол радъямын вал. Дышетон вылысь егитъёсты ысъязы Удмуртилэн палэназ. 1983-тӥ арын мон борды но жабырскизы. Общественной наукаослы дышетскисьёс, пе, кулэ. Эшшо 6 выпускникъёсты шедьтӥзы на. Пӧламы кык гинэ удмуртъёс вал. Но юлтошъёсме Свердловске келязы. Мыным огнамелы сюрес усьтӥськиз Москвае. Семьяям шуизы: пиез дышетоно, МГУ-ысь визьмогес луыса потоз. Аслам кытчы ке палэнэ кошкыны мылкыды воксё ӧй вал. Эшшо ке созэ но тодӥ: МГУ-э дышетскыны тросэз пиос армия бере лыктэмын.

Курсысьтымы эшъёсы мынэсьтым ньыль-вить ареслы бадӟымесь вал. Котьма ке но соослэсь бере ӧй кыльы, таин сэрен но, оло, монэ «Михалыч» гинэ шуылӥзы.

'''– Но удмурт кылдэс, удмурт луэмдэс, Москваыи дышетскыкуды гинэ, возьматӥллямды. Кез ёросысь Кабалуд леспромхозын будэм пиосмурт малы палэнын гинэ анай кылзэ гажаны ӧдъяз?'''

Семьяямы удмурт сямен верасько ке но вал, асме рос- прос удмуртэн шӧдӥ 14 арескам. История книгаосысь калыкъёслэсь картазэс адӟи. Кама шур вадьсын удмуртъёс уло шуыса, гожтэмын вал. Соку ик тунсыкъяськонэ бугырскиз. Кылэз, литератураез умой тодэме потыны кутскиз. Но школаямы удмурт кылэз ӧз дьппетэ, кружокъёс но ӧй вал.

Зэм, анай кылын вераськыны кепырайгес. Удмурт кылэз ноку ӧй дышеты бере, чебер вераськись удмурт калык пӧлын анай кылын бӧтьыртыны туж возьдаськи, кылы сьӧлтаськылӥз. Пичи дыръям уго улон интымес, тятялэн вылэгес но вылэгес ӝутскеменыз, ялан вошъямы. Школаме воксё но Ижын быдэстӥ.

Москваын мон кадь возьдаськисьёс, анай кылын шенгыль-пенгыль вераськисьёс уно люкаськемын вал. Со вакытэ столицаын уло вал 2 но ӝыны сюрс удмуртъёс. Соос выжызэс медаз вунэтэ, ог-огенызы пумиськыны мед бьггатозы шуыса, люкаськылӥм Удмуртилэн Москваын ужась представительствояз. Соку представительствоен кивалтӥз Анатолий Ковин. Милемыз огазеям, пӧртэм ужрадъёс радъям сяна, со регистрациен но тросэзлы юрттӥз. Татын ик кылы ӧръяськиз. Котьма шуэ, но вераськыны кулэ среда!

Удмурт кылмы пумысен сюлэмы туж висе. Жаль, калык уггес вала, кыӵе со узырлык. Сое асьмелы выжыысь выжые сётӥзы, пычатӥзы, соин ик сое утёно. Малпасько, семья но школа пыр одно ик кылэз возёно. Тодэ лыктэ Библиысь притча: чечевица понна вузамын вал первородство. Асьмеос али ӵапак вузчиос кадесь.

«Удмуртиысь дышетон удысысь полномочиосты быдэсъян сярысь» законэз юнматон пумысен Кун Кенешысь депутатъёс вераськон сӥзьыл жутӥзы. Туэ феврале сессиын сое эскерозы. Огаз кылзонъёсы монэ но ӧтчазы, малпанме юазы. Нырысь-валысь, вань школаосысь покчи классъёсын удмурт кылэз одно ик урок чот нуоно шуыса, вераськизы. Но туннэ талы пумитъяськисьёс сюро удмуртъёс пӧлын ик.

Огез шумпоттэ: Ижын удмурт кылын шара вераськисьёс тросгес но тросгес луо. Анай кылмес но культурамес гажасьёс но сое азьланьтӥсьёс вань. Азьло транспортын но удмуртэн вераськисез кылыны ут луы валт. Туннэ талы мукет выжыысь калыкъёс но уг паймо ни – пумен дышизы. Но кылмес вӧлмытыны, соин вераськыны луонлык сётон вылысь пӧртэм пумиськылонъёс, ужрадъёс, курсъёс радъяно. Таин вырыны кулэ «Удмурт Кенеш» огазеяськон.

Кылмы уз быры. Удмуртъёс али выль вакытын сыло. Урбанизация мынэ. Ӝутскыны турттӥськом, асьмемыз возьматэммы потэ: ми нимаз калык, милям вань правоосмы. Та жутӥськон, калыке потыны тыршон секыт нюръяськонлы пӧрме. Соин ик 20-25 ар ӵоже асьмелы капчи уз йӧты. Отӥяз тросэз буйгалоз, кылэз утён пумысен зол бӧрдэмысь дугдоз. Кылэз тодӥсез но валасез пумен воксё ичи кылёз.

'''– Асьтэлэн нылпиосты удмурт сямен верасько-а?'''

Мынам кышное зуч. Вордӥськемын Наталья Якшур-Бӧдья ёросысь Лынга гуртын. 32 арес дыръям кузпалъяськимы. Отчыозь аслым пар ӧй шедьты. Котькинлэн аслаз адӟонэз, шуэ калык но, философиысь дышетон но. Ку вордскыны- кулыны, кыӵе бадӟымесь воштӥськонъёс пыр потыны, кинэн кузпалъяськыны кулэ – ваньмыз азьло ик гожтэмын. Мыным шудме пумитаны бергес тупатэмын вылэм, лэся.

Куспамы ӟуч вераськимы бере, нылмы но ӟуч будӥз. Со али Ижысь техникая кун университетын дышетске. Но дас куинъ аресъем пимы удмурт. Тазэ будэтыкум, шуи: удмурт выжымес утёно. Кузпалы но ӧз пумитъяськы. Психологъёс но шуо: кык-куинь аресозь пинал огдыре быгатэ ньыль-вить кылэз дышетыны. Созэ но, тазэ но умой мед тодоз шуыса, одӥг куронэз гинэ чаклано: нылпи мед валалоз, кинэн удмурт кылын, кинэн ӟучен, кинэн англи сямен вераськоно. Соин ик мон пиеным удмурт кылын гинэ вераськи. Соин ик монэн со анай кылмы вылэ выже. 97 номеро школаын начальной классъёсын но удмурт кылэз дышетӥз. Но бератаз кышное шуиз: окмоз пиналэз курадӟытыны. Школаез уго улон интымылэсь туж кыдёкын вал. Жалямы пимес но школазэ воштӥмы.

'''– Москва улонэз веръям мурт бадӟым город пумысен туннэ уг уйбырты-а?'''

– Москваын улон туж огыр-бутыр. Адямиос ялан кытчы ке дырто-бызё. Мон дыртытэк улонэз утчась мурт. Соин ик, Удмурт шаере берытски шуыса, воксё уг жаляськы.

Мынам олокытчы но кошкыны луонлыкъёсы вал. Сузэре Турциын улэ. Нырысь- валысь Индиын тыршиз. Иже туж шер вуылэ.

Москваын аспирантураын дышетскон аръёсы секытэн сётӥськизы. 1990-тӥ аръёсы улон капчи ӧй вал. Коньдон поттон понна куинь ужын тырши.

'''–1993-тӥ арын Москваысь Белый домез ыбылыкузы, кыӵе мылкыдын улӥзы аспирантъёс? Тӥ бутыръяськонъёсы пыриськиды-а?'''

Бугыръяськонъёсы ӧй ветлы. 1991-тӥ арын ГКЧП дыръя мон дась вал: пыӵал кутыны ӧтизы ке, мыно. Нош 1993-тӥ арын Борис Ельцин но Руслан Хасбулатов политикъёс пӧлысь кин ке пала кариськоно ке, огзэс ке но гажано ук. Мон огзы понна но огпол но куараме ой сёты. Собере, валамон вал, кытын люкаськыло Ельцин пала дурбасьтӥсьёс. Нош кытын пумиськыло солы пумитъяськисьёс – тодмо ӧй вал. Пумитъяськисьёслэн люкаськонъёссы тодмо луысалзы ке, оло, пӧлазы сюрысал. Эшъёсы ветло вал баррикадаосы. Мон комнатае кылисько, сиён пӧзьтӥсько. Соос берто, пӧрамме сиё но нош ик кошко. Консерватор вал мон котькугес ик, лэся. Совето Союз куашкам бере но паспортме туж кема ӧй вошты.

'''– Удмурт шаерын тӥледыз, научной коммунизмен дышетӥсез, соку нокин но уг возьма ни вал, дыр...'''

– Зэм, Совето Союз куашкамен, научный коммунизм предметэз быдтӥзы. Со интые социология, политология потӥзы. Аспирантураез йылпумъям муртлы уж ӧй вал. Кытчы но отчы куриськылӥ ик. Но мынам кадь специальностен муртъёс шоры философъёс гинэ но кырыж учко вал. Али но сое шӧдӥсько. Соин ик милиционеръёсты дасянъя школае (калык верамъя, «Антоновкае») мынӥ. Татын дышетӥсьын дас ар ужай. Но ялан одӥг интыын нокыӵе воштӥськонъёстэк улыны секытгес ик. Коньдон но тырмемысь дугдӥз. Малпай: улонэз воштоно. Ужбергатон борды басьтӥськи. Пӧрмыто, тросгес коньдон потто, малпай. Но лыдӟиськыны, гожъяськыны дышем адямилы ужбергатонэн вырыны секыт вылэм. Куддыр толэзяз 70 сюрс но потэ вал, нош куддыр кык-куинь толэзь ӵоже одӥг копейка но ӧй адӟылы. Ӧз кельшы. Ӵапак аслым ачим йыркуръяськон вакытам улонам потӥз Россиысь Наукаосъя академилэн Философияя но правоя институтэзлэн Удмурт ёзэзлэн директорез Михаил Иванович Шишкин монэ ас дораз ужаны ӧтиз. Со кошкем бере директоре пуктӥзы асме.

'''– Удмуртстат верамъя, 2012-тӥ арын Удмуртиысь кошкиз наукая 11 доктор но 43 кандидат. Нош тӥ йырыныды наукае выйиды.'''

Физикъёслы, химикъёслы ужъёссэс азьланьтон понна материально-технической база кулэ, со дунтэм ӧвӧл. Вузъёслы висъям коньдон тырме коммунальной услугаосты тырыны гинэ. Зэм, луэ пӧртэм грантъёсты утон понна олокытчы но пыриськыны. Ужан, рос-прос азинскон понна федерал центр но коньдон висъя ик. Но солэсь быдӟалазэ чаклало, улослэсь позицизэ лыдэ басьтыса. Тани асьме республикамы валля арын наукаен вырыны висъяз вал 1 миллион манет. Сомындазэ ик будэтӥз федерал центр но. Нош Пермь улос шедьтӥз 36 миллион, сомындаез ик вуиз федерал центрысь! Екатеринбург оглом 126 миллион манет бергатыны пӧрмытӥз. Асьмеос но тазьы ужаны быгатысалмы ке, мар но лэсьтыны ӧй пӧрмытысалмы, технической базамы но юнмасал. Но ваньмыз потэ вузъёслэн кивалтӥсьёссы, соослэн учконъёссы бордысь. Асьмелэн егит учёнойёсмы 15 сюрс манет толэзьлы быдэ басьтон понна нуналлы быдэ студентъёслы лекциос лыдӟоно луо. Наукаен вырыны соослэн дырзы уг кыльы ни. Югдур мукет луысал ке, Удмурт шаерысь одӥг учёной но ӧй кошкысал.

Академической уреждениослы наукаен вырыны капчигес ик, вузъёслы сярысь. Академиысь уг кошко. Зэм, реформа ортчемен, югдур олокыӵе но луыны быгатоз ай. Академиын мӧйыос пуко, таослэсь лыдзэс кулэстон бордын ужано, шуо. Мон быдэс ар утчасько ни социологиен, юрисируденциен, политологиен, философиен научной ужзэс герӟаны мылкыд карись 30 аресозь егитъёсты. Сыӵеос сюрысалзы ке, туннэ ик уже кутысал.

'''– Вождэс эн вае, но философия наука шоры куд- огез воксё но наука шоры кадь уг учкы...'''

Ванъ сыӵе малпанэн улӥсьёс. Но вунэтоно ӧвӧл: философия туж зол герӟаськемын логикаен. Логика математикаын но ванъ. Логика быре ке, наука но быре.

'''– Нош тӥ мае усьтӥды?'''

Кандидат луон понна калыкъёслэн улонысьтызы дунъетъёсты чакланы выри. Этнографъёс, историкъёс со дунъетъёсты сиёнэн, дӥсен, семьяен герӟало. Удмуртъёс понна кыл но туж дуно, нош англи калыклэн дунъетазы кылзы воксё но уг пыры. Зэм, вакытысь вакытэ со дунъетъёс воштӥсько. Но соосты шедьтон понна критерий утчано вал. Со бордын ик ужай.

Доктор луон понна уже герӟаськемын ни теориен, доктор луо уго кыӵе ке концепциез, теориез усьтэм понна гинэ. Соин ик эскероно кариськи, кызьы юридической кылын кутӥське соиз я таиз валан, кыӵе солэн лексикаез. Тазэ ужазы историкъёс кутозы.

'''– Мар тужгес секытэн сётӥськиз улонады?'''

Улонам ваньмыз ик огсыр мынэ. Кышноосын кивалтыны ке шат секыт. Али валасько ни: соослэн психологизы мукет. Нылкышно эш ке тыныд, со умой, тушмон ке, бырид. Одӥг визьмо веран вань: кьшномуртлэн кышномурт логикаез, пиослэн соиз но ӧвӧл. Куддыръя, ачид но валатэк, маке вераськод, нош нылкышноез со туж вӧсь каре, йырысьтыз уг поты ни.
'''
– Шутэтскон дыръяды мар кариськоды?'''

Лыдӟиськисько – аслам удысэя ялан визь люкасько. Библиотекае пичи ӧвӧл. Зэм, сое рос-прос радъяны быгатымтэе понна кузпалылэсь кыл кылӥсько ик. Со дышетскемезъя библиотекарь, ужа Ижысь Некрасов нимо библиотекаын. Мынэсьтым литератураме уггес лыдӟы. Мон уго люкасько шер пумиськылӥсъ книгаосты. Кылсярысь, Быдӟым ожлэсь азьвыл потэ вал «История зарубежной философии» серия. Огез книга мон киын утиське.

Маркаосты люкасько на пичи дырысен. Узыргес луысал ке, коньдон люкасал (серекъя).

'''– Пичи дырысьтыды вань льӧль малпанъёсты быдэсмизы-а?'''

Еж дыръям малпасько вал: луо лесник. Кельше вал сикети поръяны, ас поннам малпаськыны. Зэм, огласянь удалтӥз ик: кышноелэн агаез егерь. Со сьӧры сике ветлӥсько. Но киям пыӵал кутылэме ӧвӧл. Визнан гинэ но сьӧрам уг басьтӥськы. Пукисько, котыр ваньзэ чакласько. Сыӵе дыръя номыр но кулэ ӧвӧл.

'''– Асьтэлы асьтэос туж примерной уд потӥське-а?
'''
Янгышъёсы вань. Дунне вылын нырысьсэ улӥсько бере, кызьы сьӧлыкъёстэк? Но туннэ ваньзэ шара вераме уг поты. Тятяе но анае улэпесь на. Статьяез лыдӟозы но куректонэ усёзы. Еж дыръя, азьланез сярысь воксё малпаськытэк, оло, зульысал но.











Пономарёв Алексей Михайлович. Удмуртлэн пушказ удмуртэз сайка пумен : [беседа с доктором философских наук, директором Удмуртского филиала Института философии и права УрО РАН о пути в науку, о финансировании научных исследований в республике, о сохранении удмуртского языка] / А. М. Пономарев ; записала Е. Сараматова // Удмурт дунне. - 2014. - 17 янв.- С.10, 15.
@@ Строка 1: / Строка 1: @@
 ==Удмуртлэн пушказ удмуртэз сайка пумен==
-[[Файл:Ponomarev Aleksey.jpg|thumb|left|Пономарёв А.М.]]
+'''Удмурт учёнойёс пӧлын философия наукаосъя докторъёс кӧня ке сяна ӧвӧл. Огез соос пӧлысь – Россиысь Наукаосъя академилэн Философияя но правоя институтэзлэн Удмурт ёзэзлэн директорез Алексей Михайлович Пономарёв. Востэм, сабырлы воргорон шоры учкыса, паймо – но, ку со вуттӥз 60 научной статья, 3 монография гожтыса.'''
-Удмурт учёнойёс пӧлын философия наукаосъя докторъёс кӧня ке сяна ӧвӧл. Огез соос пӧлысь – Россиысь Наукаосъя академилэн Философияя но правоя институтэзлэн Удмурт ёзэзлэн директорез Алексей Михайлович Пономарёв. Востэм, сабырлы воргорон шоры учкыса, паймоно, ку со вуттӥз 60 научной статья, 3 монография гожтыса.
 '''– Алексей Михайлович, кин тӥледлы наукае сюрес возьматӥз?'''
@@ Строка 100: / Строка 99: @@
 Янгышъёсы вань. Дунне вылын нырысьсэ улӥсько бере, кызьы сьӧлыкъёстэк? Но туннэ ваньзэ шара вераме уг поты. Тятяе но анае улэпесь на. Статьяез лыдӟозы но куректонэ усёзы. Еж дыръя, азьланез сярысь воксё малпаськытэк, оло, зульысал но.
-'''Источник:'''
-[http://elibrary.unatlib.ru/handle/123456789/18548 Пономарёв Алексей Михайлович. Удмуртлэн пушказ удмуртэз сайка пумен : беседа с доктором философских наук, директором Удмуртского филиала Института философии и права УрО РАН о пути в науку, о финансировании научных исследований в республике, о сохранении удмуртского языкa / А. М. Пономарев ; записала Е. Сараматова // Удмурт дунне. - 2014. - 17 янв.- С.10, 15. : фот. - (Тӧр шорын). ].
-'''За предоставление материала выражаем огромную благодарность редакции газеты
-[http://www.udmdunne.ru/ "Удмурт дунне"]'''
-[[Категория:Удмуртские звезды]]
+Пономарёв Алексей Михайлович. Удмуртлэн пушказ удмуртэз сайка пумен : [беседа с доктором философских наук, директором Удмуртского филиала Института философии и права УрО РАН о пути в науку, о финансировании научных исследований в республике, о сохранении удмуртского языка] / А. М. Пономарев ; записала Е. Сараматова // Удмурт дунне. - 2014. - 17 янв.- С.10, 15.