Редактирование: Бухарин Семен Викторович

== Ужлы шумпотэ, уженыз шумпоттэ ==

[[Файл:Bukharin.jpg|thumb|left|Бухарин С.В.]]

'''Ог 5 ар талэсь азьло вотэсын вӧлмизы Ижкарысь 25-тӥ лицейын дворникын ужась Семён Бухаринлэн лымы вылын лэсьтэм суредъёсыныз туспуктэмъёс. Со дырысен «суредаськись дворник» быдэс Россилы тодмо луиз, дораз Москваысь но, Санкт-Петербургысь но журналистъёс вуыло. 2016-тӥ арын Семён Викторович Le Courrier de Russie француз газетлэсь «Сирано» премизэ басьтӥз. Со сярысь французъёс вакчи документальной фильм лэсьтӥзы. Таяз арын Семён Викторович Выль ар шутэтскон нуналъёсы ижкаръёслы кузьым лэсьтӥз — Ижкар прудлэн ярдураз суредаськиз. Семён Бухарин Ижкарлэн одӥгез символэз луиз ини, нош ачиз со вордскиз Пичи Пурга ёросысь удмурт семьяын. 31-тӥ толшоре Семён Викторовичлы 57 арес тырме.'''

'''Тундраысь аспӧртэм университет'''

— Мон вордски Пичи Пурга ёросысь Гужношур (Поӵыш) гуртын, — тодаз вае Семён Бухарин. — Школа бере дядяе (атае) дорын стройкаын ужай, со стройбригадалэн бригадирез но звеньевоез вал. Атае чурыт, йыгмыт адями вал, солы тау шуисько — сотэк мон адями ӧй луысал. Атае трактор уробое бадӟым коръёсты огназ ӝутъялляз — сыӵе кужмо вал. Анае быдэс улонзэ колхозын ужамын, солэн дышетскемез 3 класс сяна ӧй вал. Нош со институтын дышетскись сузэрелэсь задачаоссэ лэсья вал. Анай-атае, пинал дырзы сярысь веракузы, весь бӧрдо вал, малы ке шуоно соос война вакытэ будэмын, пичи дырысенызы ужамын.

Мон колхозын шофёре дышетски. Собере армие басьтӥзы, Камчаткае сюри. Отын туж шулдыр инкуазь. Шурысь маке быдӟа чорыгъёс кутылӥм.

Армиысь бертэме бере мыным 21 арес вал. Нош ик дядяе борды ужаны кариськи. Огпол со мон шоры кема учкыса сылӥз но шуэ: ӵуказе, пе, уже уд потӥськы. Дядяй, кытчы бен мыном мон, юасько, ужало ай. Уд, шуэ. Мемеед, пе, вераз вал, суредаськыны быгатӥськод, мын дышетскыны. Нош мынам рос-прос суредаськеме но ӧвӧл, гужем но быре ини. Кинэ-о гудырикошконэ дышетскыны кутозы на, университетъёс но училищеос тырмытэмын. Нош со шуэ: мын ветлы, кытчы ке но пыр.

Ярам, Чайковскийысь художественной училищее мынӥ. Отын шуо: азьлогес сюлмаськоно вал. Мон шуисько, дядяе ӝӧк вылэ шуккиз но бертыны ӧз лэзьы, мар каром табере? Мыным бумага но карандаш сётӥзы — суреда, пе, мар быгатӥськод. Суредме учкизы, малпаськизы но басьтӥськом, пе, ми тонэ. Озьы мон дышетскыны пыри, ми нырысетӥ студентъёс вал со училищеын. Пырыны пыри но соку ик сюрес лэсьтонын ужаны кутски анай-атайлэсь уксё куронтэм вылысь. Ми семьяын 6 нылпи вал ук. Озьы мон 2 ар сюрес лэсьтӥ, ас кожам ӝытазе дышетски. Преник басьтыса, ӵош дышетскись нылъёс доры мынӥсько вал но, соос мыным верало, кыӵе гуртэ уж сётӥзы, мае дышетоно. Училищеме «4»-лы но «5»-лы быдтӥ.

Ёросам бертӥ, Пичи Пургаысь культура юртэ декораторе ужаны пыри. Одӥг толэзь ужай но 90 манет басьтӥ. Ас поннам малпай: ма, мар таза воргорон сыӵе ӧжыт уксё басьтоз? Кошкыны малпай. Мемейлы весь верасько вал: мемей, мон кыдёке кошко. Нош со шуэ, кытчы кошкод, кин учкоз милемыз, корка но тон вылэ гожтэмын. Нош мон ялан одӥг кылын зулисько. Одӥг пол мемей йырыз курен «котькытчы кошкы, акыльтӥд ини!» шуиз.

Мон со дыре газетысь лыдӟи вал, Китаен граница дорысь чабанъёс трос уксё басьто шуыса. Отчы мынон вылысь Кировозь билет басьтӥ. Кировысь вокзалын адӟисько: Сыктывкарозь самолёт рейсъёсын мар ке быдӟа расписание ошемын. Мон соку малпай: басьто ай мон отчыозь билет. Тӥни озьы сюресэ копак мукет пала нуиз.

Сыктывкаре вуи, аэропортын пукисько, малпасько: ёшкин кот, кытчы-о мон сюри? Со дыре кассаос палан мар ке черекъяны кутскизы. Кассирша 2 нылъёсын керетэ. Мон лыктӥ но нылъёслэсь юай, мар луиз. Ми, пе, Сочиысь Воркутае бертӥськом, билетлы 2 манетмы уг тырмы, кассирша билет уг сёты. Мон шуисько, ярам, мон тӥледлы уксё сёто, нош тӥ мыным вералэ Воркута сярысь. Соосын ӵош Воркутаозь лоби. Отчы вуи но, дерматинлэсь пыдкутчанэ быдэсак пильылӥськиз: Удмуртиысь кошкыкум, дорын -1 градус вал, нош Воркутаын -22. Аэропортын тачак калык. Пайми сьӧд-сьӧд наштам синъёсын пиосмуртъёслы. Сэре валай: со шахтёръёс, ымныръёсазы эгыр тузон пуксемын.

Мон, гостиницае интыяськыса, аэропортлэн директорез доры мынӥ, юай, кызьы шахтае интыяськыны луоз. Со шуэ: кин тонэ уже басьтоз, шахтаын одӥг интые 6 адями куриське, тросэз ӵыжы-выжыоссы пыр гинэ уж шедьто. Эшшо одӥгез пияш Сочиысь вуэм, со, пе, 2 арня ини пуке аэропортын, нокызьы уж уг шедьты. Ми со пияшен мынӥм Воргашорской шахтае — со тужгес бадӟымез, быдэс Европалы тодмо вал. Вань 36 участоксэ ортчим — нокин милемыз уг куты. Мон малпай: татын ог 5 сюрс адями ужа, та быдӟа предприятиын, оло, суредаськисьёс кулэ. Художникъёс доры мынӥм, соос 5 кузя, милям, пе, асьмелэн али ужмы ӧвӧл.

Собере одӥг пиосмуртэз пумитай, со монэ жаляз-а, мар-а. Ойдо, пе, кадръёсын ужан отделэ, мон сьӧры ик пырод. Нош со отделэ Мавзолее кузьда черод. Мон со пиосмурт сьӧры пыри, со отысь директорлэн эшез вылэм. Мар, пе, быгатӥськод? Мон плотник, столяр, тракторист, шофёр, каменщик, строитель. Милям, пе, сыӵеосмы трос, мын, марысь-мар ке, тонэ шедьтом. Нош кызьы соос монэ тундраысь шедьтозы? Ӧсэтӥ потыкум ини, юасько: тӥледлы художникъёс кулэ ӧвӧл-а? Ворса, пе, ӧсэз. Жингыртӥз 3-тӥ участоке, шуэ: «Борода, татын суредаськись сюриз, кутод-а?» Соку участокъёс куспын вожвылъяськон ялэмын вылэм — кин участоксэ устогес чебермалоз. Борода (со пиосмуртлэн фамилиез вылэм) монэ ас дораз ӧтиз. Мон шуисько: мон выныным, сотэк уг быгатӥськы. Борода юаз, кышноосмы вань-а. Ми семьяостэк вал бере, общежитиын инты сюриз. Озьы милемыз Сочиысь пияшен уже кутӥзы.

Тросэз шахтаын кема ӧз чидаллялэ, 2-3 ар ужаса, кошкылӥзы — уж секыт угось. Но мыным та инты зэмос университет луиз, шуыны луоз. СССР-лэн вань республикаосысьтыз калык ужаз отын, пӧлазы дышетӥсьёс, тодосчиос, композиторъёс. Эрик пала кыстӥськись адямиос. Бен, коньдон понна вуэмъёс но вал. Но уксёлэсь кужымзэ котькудӥз ас сяменыз вала. Кин капчи улон понна сюлмаське, аламалы сое быдтэ. Мукетыз вала, уксё эрик сётэ шуыса, соос тыршо, пиналъёссы эрикогес мед улозы шуыса. Шахтаын ужаса, трос кужым быре ке но, мон Воркутаысь эктонъя но кырӟанъя ансамбле ветлӥ, спортэн выри: дзюдо, карате, самбо. Комилэн чемпионатаз но пыриськеме вань. Воркутаын мон 10 ар ужай.

'''Выль уж гочатэ'''

— Мыным телеграмма вуиз, мемеелэн тазалыкез урод луиз шуыса — соин мон бертӥ. Со раклэсь кулӥз, дядяе куректонэз ӧз чида — озьы анай-атайме ватоно луи. Кыкназылы ик 64 арес вал. Бакча, пудо сярысь сюлмаськоно луиз. Гуртын со вакытэ уж ӧй вал. Мон 1990-тӥ аръёсы лэсьтӥськонэн выри, собере малпай йӧнала уже интыяськыны. Пожарной охранае куриськи. Кадръёсын ужась подполковник шуиз: ми 35 арескозь пиосмуртъёсты кутӥськом, нош тыныд 36 ини. Шуисько: ойдолэ спортзалэ, тӥлесьтыд вань пожарнойёстэс вормо. Озьы Воркутаын спортэн выреме мыным юрттӥз.

Пожарной охранаысь пенсие потэме бере нош ик лэсьтӥськонэн вырыны кутски. Одӥг пол 25-тӥ лицейын бадӟым ужез быдэстӥ. Директор лицее кыльыны ӵектӥз. Мон соглаш луи, угось весь коркась корка ветлыса, акыльтоно. Со сяна, мон яратӥсько выль уж борды басьтӥськыны. Пиналъёс пӧлын ужаны шулдыр вылэм. Соослэсь ӟеч мылкыд басьтӥськод, ачид но соосты шумпоттӥськод.

Уг ни тодӥськы, ку лымы вылын нырысетӥ суредэ пӧрмиз. Али со вакытысь туспуктэм шоры паймыса учкисько: зэм ик-а мон тае лэсьтӥ? Мон ӧй ик малпа вал, лымы вылын сыӵе суредъёс пӧрмо шуыса, матысен умой уг адӟиськы ук. Нош пиналъёс 4-тӥ этажысен туспуктэмъёс лэсьто. Мон, кызьы ке ӝыны ар ортчыса, вылӥ этаже туби, учки суредме но пайми: зэм но чебер адӟиське вылэм. Мон пиналъёслы шуи вал: эн интыялэ суредъёсме вотэсэ, нош соос лыкто огпол мон доры: «Семён Викторович, нош тӥ суредъёстэс Интернетысь адӟиды-а?»

Суредъёсты соку ог 15-20 минут ӵоже быдэсъяй. Со мон понна шудон выллем вал ук, аслэсьтым ужме чеберъяса лэсьтыны тырши. Тани инкуазь ялан воштӥське, со шоры весь учкем потэ. Озьы ик улон-вылонын но, уж котырын но — котькуд нунал мар ке выльзэ адӟем потэ. Со монэ но шумпоттэ, пиналъёсты но. Кызьы «Мимино» фильмын шуо: «Если ты мне сделаешь приятно, я тебе сделаю приятно, и тогда ты мне сделаешь ещё приятнее, а я тебе так приятно сделаю, что тебе будет очень-очень приятно». Мынам потэ, егитъёс мед дышетскозы ужез гажаны, инкуазьлэсь чеберзэ адӟыны-шӧдыны, ог-огзэс валаны. Зэмзэ вераса, мыным саклык кулэ ӧвӧл, пиналъёслы гинэ мед умой луоз.

Огпол мон доры французъёс ветлӥзы, «Сирано» премия сётыкузы, вакчи документальной фильм лэсьтӥзы. Собере мыным 1-тӥ апреле жингыртӥсь луиз: Москвае, пе, премия сётыны ӧтиськом. Мон шуисько: уг оскиськы тӥледлы. Ми, пе, мукет нуналэ жингыртом на. Мынам премия басьтыны мынэме уг поты вал — уг тодӥськы, оло, со пересьмон ини. Школаысь дышетӥсьёс шуо: мын, пе, одно ик, пиед понна ке но — мыным самолётэ 2 адямилы билет басьтӥзы вал. Озьы пиеным ӵош мынӥ, со калыкез, шоркарез мед адӟоз шуыса. Со самолётэн нырысьсэ лобаз. Кыӵе, пе, умой, куке атаед — тодмо адями. Мон шуисько: мар тыныд сётэ тодмо луон? Пиелы али 20 арес, солэн 2 технической дипломез, УдГУ-ын заочно дышетске на. Солэн дизайнэн выремез туж потэ. Мон солы шуисько: Иван, котькытын астэ утча, озьы гинэ шедьтод аслыд тупась уж. Нырысь ик ачид понна, сюлмысь ужано. Нош ужед мукетъёсызлы шумпотон вае ке, озьыен, улонэд умой.

Радио пыр вераськемме кылыса, мемеелэн эшъёсыз сузэрелы жингыртӥллям, бӧрдыса, пе, верало. Мон соосын пичи дыръям ужалляй. Огазьын ужакумы, юри арлыдоосгес вӧзы кариськисько вал. Соос ужамзыя выжыкыл но мадё, оломар но верасько, ӵыдэтскыкузы но пӧртэм учыръёсты тодазы ваё.

Али мон Дэри ёросысь Италмас каргуртысь лицейын ужасько, юртэз но хозяйствоез котырын бергасько. Директормы шуиз, ойдо, пе, пиналъёслы суредаськонъя урокъёс нуод. Мон нырысь куалектӥ вал, собере малпасько: выль ужез утчано. Пиналъёсын сӥзьыл кырын суредаським, удмурт пужыос лэсьям, кезьыт кариськемен, подвалэ выжим, отын борддоръёс вылын суредаськиськом.

Коллектив мыным татын туж кельше. Удмурт калыкез но трос. Мыным потэ, удмуртъёс дунне шоры валасагес учко. Макем трос кылэз адями тодэ, сокем со узыргес.

'''Янгышъёстэк визь уз люкаськы'''

— Али куд-ог егитъёс асьсэзыз анай-атайёссылэсь визьмогес кожало, соосты «отсталоесь» шуо, нош асьсэос быдэ вуыса но соослэсь юрттэт возьмало. Нош тон ачид соослы юрттыны, будэтэмзы понна тау карыны кулэ ини. Тон ваньзэ быгатыны кулэ, анай-атаед тон понна мед шумпотозы шуыса.

Тодӥсько на, кыӵе ке праздник вал, дядяе малпаськыса пуке: выныдлы, пе, кунян сётоно, агаедлы мунчо лэсьтоно вал, соизлы парсь, таизлы ӟазег сётоно вал. Мон шуисько: дядяй, мон но вань на ай. Со мон шоры учкиз но вазиз: тон, пе, ачид ваньзэ быгатӥськод. Туж шумпотӥ вал дядяелэн озьы верамезлы — со мон понна вылӥ дунъет.

Мон малпаськыса уг пукиськы, мар луоз ӵуказе, туннэ нуналэн улӥсько. Ужад ке, кӧттыртэк уд кыльы. Огпол 1990-тӥ аръёсы — соку уксё поттыны туж секыт вал ук — эше дорам пыриз но шуэ: «Семон, одӥг копейка но уксёе ӧвӧл». Мынам но ӧй вал. Мон шуисько: али возьмато, кызьы уксё поттоно. Мынам выжез буян краскаосы, плинтусъёсы вал. ДВП вылэ грунт понӥм, мон чаляк гинэ со краскаосын суред пӧрмытӥ: ты но кызьпуос, плинтусъёслэсь багет лэсьтӥ. Эше юа: кин тае басьтоз? Мынӥм Татарбазарысь вуз карон интые. Ветлӥськом, возьматӥськом суредмес, 1 сюрс манет курим. Одӥг мурт, кузьымлы яралоз шуыса, 750 манетэн басьтӥз. Ӝынызэ уксёме эшелы сётӥ.

Удмуртъёслэн вань возьдаськон сямзы. Одӥг-кык адями мар ке куаретӥз ке, ужзэс кушто. Со мукет сямен луыны кулэ ук! Мыным мар ке алама шуо ке, йыры кур луэ. Бугырскисько, ӧч карыса умойгес лэсьтэм потэ. Маин выремед потэ, соин ик выроно, возьдаськоно ӧвӧл. Уг янгыша со гинэ, кин номыр уг лэсьты. Нош янгышъёсысь визь люкаське. Соин кышкаса пуконо ӧвӧл: пӧрмоз-а, уз-а? Таязэ ӧз ке пӧрмы — мукетаз учыре удалтоз. Улон огпол сётӥське.

Бухарин С. В. Ужлы шумпотэ, уженыз шумпоттэ / Семён Бухарин ; вераськиз Анастасия Шумилова // Удмурт дунне. - 2019. - 31 янв. - С. 10, 15 : фот. - (Тӧр шорын).
Текущая версия		Ваш текст
Строка 55:		Строка 55:
	Удмуртъёслэн вань возьдаськон сямзы. Одӥг-кык адями мар ке куаретӥз ке, ужзэс кушто. Со мукет сямен луыны кулэ ук! Мыным мар ке алама шуо ке, йыры кур луэ. Бугырскисько, ӧч карыса умойгес лэсьтэм потэ. Маин выремед потэ, соин ик выроно, возьдаськоно ӧвӧл. Уг янгыша со гинэ, кин номыр уг лэсьты. Нош янгышъёсысь визь люкаське. Соин кышкаса пуконо ӧвӧл: пӧрмоз-а, уз-а? Таязэ ӧз ке пӧрмы — мукетаз учыре удалтоз. Улон огпол сётӥське.		Удмуртъёслэн вань возьдаськон сямзы. Одӥг-кык адями мар ке куаретӥз ке, ужзэс кушто. Со мукет сямен луыны кулэ ук! Мыным мар ке алама шуо ке, йыры кур луэ. Бугырскисько, ӧч карыса умойгес лэсьтэм потэ. Маин выремед потэ, соин ик выроно, возьдаськоно ӧвӧл. Уг янгыша со гинэ, кин номыр уг лэсьты. Нош янгышъёсысь визь люкаське. Соин кышкаса пуконо ӧвӧл: пӧрмоз-а, уз-а? Таязэ ӧз ке пӧрмы — мукетаз учыре удалтоз. Улон огпол сётӥське.

−	~~[http://elibrary.unatlib.ru/handle/123456789/42351~~ Бухарин С. В. Ужлы шумпотэ, уженыз шумпоттэ / Семён Бухарин ; вераськиз Анастасия Шумилова // Удмурт дунне. - 2019. - 31 янв. - С. 10, 15 : фот. - (Тӧр шорын)]	+	Бухарин С. В. Ужлы шумпотэ, уженыз шумпоттэ / Семён Бухарин ; вераськиз Анастасия Шумилова // Удмурт дунне. - 2019. - 31 янв. - С. 10, 15 : фот. - (Тӧр шорын).