Редактирование: Поторочина Светлана

Поторочина Светлана Юрьевна (1980-тӥ арын 9-тӥ шуркынмонэ, Эгра ёрос, Чумой гурт) – кылбурчи, журналист.

=Улон сюресэз=

Поторочина Светлана Юрьевна вордскиз 1980-тӥ арын Эгра ёросысь Чумой гуртын. 
Дышетскиз Дэбес педучилищеын удмурт группаын. Бертыса, Эгра ёросысь Чумой школаын дышетӥз. Ужаз ГТРК «Удмуртия» телерадиокомпаниын диктор луыса.  2003-тӥ арын «Ингур» радиоын удмурт эфирез нуиз. Оксана Бисарен валче нуизы «Уйлы пумит» егитъёслы шоу-программаез. 

Заочно Удмурт кун университетысь удмурт кылосбур факультетын дышетскиз. Ужаз «Удмурт дунне» газетлэн редакцияз. 2003-тӥ арын семьяеныз улыны выжиз Чутыр гуртэ. Ужаз Мазьги (Лонки-Ворцы) школаын, Чутырысь нылпи садын. 

Собере Чутырысь культура юртлэн чеберлыкъя кивалтӥсез вал. 2020-тӥ арын Чутыр муниципал кылдытэтлэн кивалтӥсез Василий Корепанов ӵектӥз Светлана Поторочинаез «Удмурт дунне» газетлэн «Гурт адями» премиезлэн «Выжыоссэ утись» номинацияз вожвылъяськыны. В. Корепановлэн ивортэмезъя, «Деревенька моя» улоскуспо конкурсын «Тужгес азинлыко улос» номинациын вормиз, 2019-тӥ арын С. Поторочиналэн дышетэм пиналъёсыз фольклоръя Россиысь улосвыл конкурсын 3-тӥ инты басьтӥзы. Чутырын гуртоос пӧлын сям-йылолъёсты утён бордын тыршиз. 

Али Ижкарысь Н. А. Некрасов нимо библиотекаын удмурт кылъя курс нуэ, «Иднакар» издательствоын ужа.

=Гожъямъёсыз сярысь=

Кылбур гожъяны кутскиз 15 арескысен. Ачиз пусъе, «удмурт литературае но бадӟым улонэ сюрес усьтӥз Ирина Фёдоровна Тимирзянова» шуыса. Дэбес педучилищеын удмурт группалэн кивалтӥсез И. Ф. Тимирзянова бурдъяз С. Поторочинаез литературной творчествоен вырыны. Удмурт университетын дышетскыкуз, печатласькиз «Удмуртский университет» газетын, «Инвожо» журналын. 2003-тӥ арын «Вордскем кыл» журналын «Тодосэ – нырысетӥ вамышъёс» рубрикаын С. Поторочиналэн «Ах, кылбурчи, ӵуж уӵы» нимо Михаил Федотовлэн улонэзлы но творчествоезлы сӥзем статья печатлаз. 

Чумой гуртын 2 ар ӵоже ужакуз, пиналъёслы веросъёс гожъяз. Чутырысь нылпи садын ужан вакытаз, ас мылкыд каремезъя ӟучомем пиналъёслы удмурт кылын нимысьтыз занятиос ортчытӥз, нылпиослы кылбур малпалляз.  Гожъяськиз, статьяосыз потазы Эгра ёросысь «Светлый путь», «Вакыт» ёрос газетъёсын.
Кылбуръёс гожъяз ас понназ, шараяз кылбуръёссэ 2019-тӥ арын, писателен Алексей Коробейниковен тодматскыса. Соин валче С. Поторочина поттӥз книгаос – «Игры без игрушек» (2020) пьесаосын сборник, ӟуч но удмурт кылын «Удм точка ру» (2021) кылбур бичет, берыктэм кылбуръёсын «Классики» (2022) сборник. «Игры без игрушек» (2020) пьесаосын сборнике С. Поторочиналэн 3 пьесаез пыриз. 

2021-тӥ арын кылбуръёсыз пыризы «Нылкышно дауре» бичетэ. Бичетэз дасясьёс – «Удмурт дунне» газетысь редакторъёс Е. В. Миннигараева, А. П. Шумилова гуртысь удмурт кышномуртъёслэсь кылбуръёссэс огинэ люказы.

2022-тӥ арын «Удмурт дунне» газетлэн «Атай» конкурсаз пыриськыса, «Папа ныл» эссе гожтыса, нырысетӥ инты басьтӥз. 2023-тӥ арын Удмуртиысь Писательёслэн союззылэн ёзчиез луиз.

=Уже кутэм литература=

<references />

[[Категория:Современные удмуртские писатели |Поторочина Светлана]]