Редактирование: Анисимов Николай Владимирович


== '''Йырын – наука, сюлэмын – кырӟан''' ==

[[Файл:Анисимов.JPG|thumb|left|Н. Анисимов]]

'''Николай Анисимовлэн улоназ пӧлэстӥськыса кошко кырӟан но наука. Россиын со филология наукаосъя кандидат, Европаын – философияя доктор (фольклористика). Удмурт калык кырӟанъёсты люка, докторской ужаз эскериз, кызьы удмуртъёс валало тапал но сопал дуннеослэсь кусыпъёссэс. Али ужа Эстониысь литературая музейын но Историяя, кылъя но литературая Удмурт институтын. Со вакытэ ик калык пӧлын сое тодо но ярато кырӟасез сямен: Алёна Тимерхановаен ӵош «Улон дауръёс» бичетэз но Тартуысь АR-GOD этно-группаен крезьгуро дискез потӥзы.'''

'''– Тон пичи дыръяд ик кырӟан, сям-йылолъёс пӧлын будэмын?'''

– Туннэ шуг ни вераны, гуртамы (Кияса ёросысь Выль Тӥгырмен гуртын – авт.) сямйылолъёс вашкала сямен ик кылемын шуыса. Но пичи дыръям соос умойгес чакласько на вал, дыр: мон будӥ удмурт семьяын, отын котькуд юон дыр куноян кырӟанъёсын, удмурт сям-выросъёсын пыӵамын вал. Ваньзэ тае нылпи адӟе ук, пеляз понэ, йыраз кельтэ. Кыӵе ке кырӟанэз кылӥсько ке, со йырам берганы кутске ни вал. Папае вера, огпол, пе, сюанэ ветлӥм, мыным ог 5 арес вал, отын сюанчиос сюан гур кырӟаллям. Бертыкумы, пе, шуисько, потэ-а, мон али кырӟало? Кырӟа, пе. Мон сюан гурез мытӥськем. Папае, пе, воксё пайми. Сюан гур – со туж секыт ук. Экспедициын но пересьёсты сюан гурез быдэстыны косӥськод ке, соос соку ик уг но кырӟало ай, сурасько но ярашон яке вӧсь гуръёсты лэзё.

Мамае кырӟаны яратэ, ансамбле но ветлэ вал, ужа фермаын, ветыл сюдэ. Папа кырӟа, мылкыдыз луэ ке гинэ, со школа автобуслэн водителез луэ.

'''– Иське, пичи дыръяд артист луэмед потэ вал?'''

– Кырӟаны яратӥсько бере, быгатонлыкъёсме азинтэме потэ вал. Кызьы ке но 4-тӥ классъёсын, дыр, Киясае ёросысьтымы кырӟаны быгатӥсь нылпиосты люказы но, пӧлысьтызы устооссэ Ижысь крезьгуро школаысь дышетӥсьёс, пе, кылзӥськозы. Кудзэ ке дышетскыны басьтозы, кудзэ ке – уз. Мон мынӥ мамаен. Клубын ужасьсы баянэн шудэ, мон кырӟаны кулэ… Пичи удмурт гуртысь пияш бадӟым сцена вылэ потӥз, баянэн ноку но кырӟамын ӧвӧл… Конечно, нылпи кышкалоз – бадӟымъёс сое уг валало-а, мар-а? Мон но кышкай, кызьы кутскыны но уг валаськы ни, куарае быриз. Тынад вообще слухед ӧвӧл, мар татчы лыктӥд, – шуизы. Мамалэн но вожез потӥз: «Сомында дыр быдтыса ветлӥськом, эшшо кырӟамед уг луы, артист – со вообще не профессия! Мар со сыӵе луоз, соос доразы но, семьяязы но уг уло!» Озьы тышкаськыса лэзиз но, мон ӝожоми. Но Инмарен сётэм быгатонлыкез уд ваты ук, со вань ке, вань ини, гань-гань улыны маза уг сёты. Гурт клубамы но ӵемысь концертъёсын кырӟалляй, огнам но, коллективен но, ёросысь конкурсъёсы пыриськылыны кутски, кыӵе ке но интыос басьяй, собере элькунэ, калыккуспо конкурсъёсы потӥ. Мон вал туж востэм, дӥсьтӥсьтэм, берло со сямы ортчиз.

Мыным кельше вал история, психологе но мынысал, журналистика но тунсыко кадь. Университете пырон вакыт вуиз но, историклы но, психологлы но конкурс маке быдӟа вал. Кызьы мон отчы пыром? Соку удмурт филологияя факультетын милям гуртысьтымы дышетӥсь Дмитрий Анатольевич Ефремов ужа вал. Оло, соин но анай-атае ӵектӥзы та факультетэ пырыны. Отын дышетскеме сярысь мон чик но уг жаляськы, туж тунсыко но пайдаё вакыт вал. Удмурт факультетэ ӧй ке пырысал, кин мон али вань, ӧй луысал, дыр.

Дышетсконме Финляндиын азьланьтыны малпасько вал, малы ке шуоно, Сыктывкарын ӝыны ар дышетскытозям фин эше Нико Партанен кылдӥз. Со ик дораз чортӥз. Но 2012-тӥ арын Эстоние Кузебай Гердлы сӥзем нуналъёсы УдГУ-ысь «Чипчирган» ансамблен мынӥм. Отысь удмуртъёсын тодматским, соос ик дэмлазы Тарту университетэ лыктыны.

'''– Докторской диссертацияд эскериськод, кызьы удмуртъёс тапал но сопал дуннеослэсь кусыпъёссэс валало, кулэмъёссэс буре ваё. Маин та тема бордаз кыскиз?'''

– Нырысетӥ курсын дышетскыкум, пересь нэнэе кулӥз. Со сюлмам кыӵе ке но пытьы кельтӥз. Та учырлэсь азьло мынам ӧй вал кисьтонъёсы ветлэме, кулэм муртъёсты ватэме. Берло та сярысь трос малпаськи, пересь нэнэе сярысь вӧтъёс адӟыны кутски... Тунсыко потӥз: малы мон сое уйвӧтам адӟи? Мар верамез потэ вал пересь нэнэелэн? Бадӟымъёс но куспазы верасько: вӧтатӥз вал... Тодэм потон ик та темае вуттӥз. Тау карисько кивалтӥселы Галина Анатольевна Глуховалы, со мыным туж трос юрттӥськиз.

Университетын дышетскыкум, мон аслам гуртысьтым, ёросысьтым кулонэн герӟаськем сям-йылолъёсты эскери. Берло, эскеронме азинтыса, мукет ёросъёсын но улосвылъёсын улӥсь удмуртъёслэсь чаклай, кызьы кык дуннеос кусып возё. Диссертациям тросгес лымшор ёросъёсысь материалъёс пыризы, бадӟым инты басьтӥзы Башкириысь удмуртъёслэн сям-йылолъёссы. Ӵапак диссертация гожтон вакытэ, 2016-тӥ арысен, мон кутски ужаны француз тодосчилэн Эва Тулузлэн проектаз, соя эскериськом камсьӧр удмуртъёслэсь осконзэс, сям-йылолъёссэс, вӧсьёссэс, крезьгурзэс. Мыным шуизы вал, темаед туж сюбег. Но, мон малпасько, кызьы со сюбег луоз, кыӵе турлы ук со. Материал нош кудмында люкаськиз, ачим но пайми.

Кулэмъёсын кусып возёнэз мон нырысь ик чаклай дыръя но интыя. Кыӵе сям-йылолъёс, осконъёс кылдо, кык дуннеос матэктыку, кызьы та дуннеос асьсэдыз возё пӧртэм дыре но пӧртэм интыосын. Собере нимаз дугдӥ нылпи вордӥськон тема вылэ. Малы? Калык оске, нылпи вордӥськыкуз сопал дуннеысь лыктэ шуыса. Удмуртъёс оско вал, адямилэн лулыз кулэмез бере выль мугорын вордске шуыса. Нылпи лултэм вордӥське ке, пересьёс кулэмъёслэсь лул куро вал. Со сяна, оско на, нылпи 6-7 аресозяз сьӧлыктэм луэ шуыса, со сопал дуннеен кусып возе на. Нылпилэн кылыз зэма, шуо. Соин ик нылпилэсь юало, мар луоз азьланяз: ныл яке пи вордӥськоз. Война вакытэ нылпилы ӵемысь юан сётъяллям: синмам-а, пелям-а? Синмам ке шуиз, адӟиськыны кылдоз на, пелям ке – возьмано муртсы улэп ӧвӧл ни, дыр.

Ватонэн герӟаськем туала сям-йылолъёс туж ик умой эскеремын ӧй вал. Со сюлэмлы матын, лушкем тема, материал но люканы секыт. Ваньмыз уз но лэзе ватонэз снимать карыны, со умой но ӧвӧл.

Ӵемысь вераллязы, мар сыӵе егит мурт сыӵе кӧшкемыт темаез басьтоз шуыса. Таин тыныд вырыны уг яра! Ӵемысь кулон сярысь адями улонэзлэн пумаз гинэ малпаськыны кутске. Но со мыным тодосчилы кадь тунсыко вал, соин ик нокыӵе кышканэ ӧй вал. Тросэз шуо, диссертацидэ, пе, лыдӟиськом но уйзэ иземмы уг луы ни.

'''– Но удмуртъёс кулэмъёслэсь уг кышкало ук. Кулэмъёс матысь адямиоссэс, корка котырез утё... Кулэм муртлэсь кышкан со христианствоен герӟаськемын ни, дыр?'''

– Пӧртэм кулэмъёс вань ук: асьсэды быдтэмъёс, лултэм вордскем нылпиос, бертылӥсь кулэмъёс, кулэм ведӥнъёс… Соослэсь калык кышка, утиське, таӵеосты нимаз, мукет сямен вато, юромо сям-йылолъёс ортчыто. Зэм, огшоры кулэмъёслэсь сокем зол уг кышкало. Туннэ нуналлы мон валай, удмуртъёс Инмарлы сокем зол уг оско, кызьы кулэм муртъёссылы. Ӵемысь нырысь вазиськозы кулэм муртлы, собере Инмарлы. Удмуртъёслэн та туж зол возиське. Экспедициосы поталлякум но, ӧжыт ӧй пумиськылы таӵе веранэн: «Инмар чида, кулэмъёс уг чидало».

Куке вашкала сям-йылолъёс пӧлын улӥсь адямиослэн улоназы православие пыӵа, сураськон кылдэ. Черкын шуо: куяськыны уг яра, йыр-пыд сётыны уг яра. Кин кызьы выре ни. Али туж тунсыко вакыт, сям-йылолъёсты чакласа возисьёс пумен улонысь кошко ни, нош туала технологиос но городын улон адямиез вашкалаезлэсь ишкалто. Кызьы ваньмыз азьланяз мыноз? Соиз тунсыко.

'''– Малпаськод, йылолъёс улонысь кошкозы?'''

– Ваньзы ик уз кошке, воштӥськозы. Коронавирусъя али статья гожтӥсько: кызьы коронавирусэн йырин удмурт сямйылолъёс чакласько, адямиос асьсэдыз возё. Эпидемия тулыс кутскиз, со вакытэ ик Кулэм потон уй, Быдӟын нунал, Тулыс кисьтонъёс, Вӧсьёс вал. Кин ке но лушкемен ваньзэ ортчытъяз, кин ке сям-йылолъёсты лэсьтытэк кельтӥз, самоизоляциез чаклаз. Мукетыз учыр: быдэс гуртэн вань йылолъёсты ортчытӥзы, огогзы доры ветлӥзы, кунояськизы, вӧсяськизы, ӝук сиизы, нош Интернетын соос ик гожъязы: дорады пуке, дорын умойгес! Валамон ук, вашкала сям котькыӵе «короналэсь» кужмогес!

Удмуртъёс Интернетын ӵем гес адӟиськыны кутскизы, трос гожъязы, фото пуктылӥзы, кызьы дасясько праздникъёслы, кыӵе ӝӧк пукто, кызьы шулдыръясько. Мон ваньзэ тае эскерон вылысь аслым кельтӥ. Али Башкириын вӧсьёссы ортчо, отчы трос калык лыктыны уг быгаты, лыктэмез маскаосын вӧсясько. Огласянь, серем но потэ кадь, мукет ласянь, кышкыт но.

'''– Шуиськод, школа бере улондэ историен, журналистикаен, психологиен герӟамед потэ вал. Но научной ужад вань та 3 удысъёс огазеяськизы.'''

– Та сярысь ӧй малпаськы вал, но улон озьы карем, лэся. Конечно, материал бичаку, адямиен вераськоно адямиен сямен: астэ тодӥсь, дано мурт, артист сямен пуктоно ӧвӧл. Соку адями усьтӥське. Собере, монэ калык пӧлын тодо кадь потэ. Та туж юрттэ. Тонэн мукет сяменгес верасько ни, огкыл шедьтыны капчигес луэ. Адями ватон но буре ваён сярысь юалляськыны кутскиськод ке, ӵемысь адямиос бӧрдыны кутско, верамзы уг луы ни. Кулэ луэ мукет темае выжыны, собере пумен выльысь берытскыны. Татын тодосчилы психолог но луоно.

Уже мынам туж тунсыко, офисын пуконо ӧвӧл: пӧртэм адямиосын вераськоно, пӧртэм интыостӥ ветлоно. Огласянь, со, зарезь дуре ветлэм кадь, шутэтскон, мукет ласянь, трос выльзэ тодон, астэ узырмытон. Со сяна, удмурт калыкед сярысь тросгес тодӥськод: кытын но кызьы соос уло? Кылсярысь, толшоре ветлӥм Красноярск улосвылэ, Сибирьысь удмуртъёс доры. Мон пайми, отын но удмуртъёс уло шуыса. Тунсыко материал люкам. Тросэз соос Столыпинлэн реформаосыз дыръя отчы мынэмын, собере Сталин вакытэ келямын, мукетъёсыз, ог-огзылэсь тодыса, лыктэмын ни. Музъем трос, нюлэс, турын вань, налог ӧжыт – ул но ул. Тросэз лыктэмын Алнаш ёросысь, Эгралась, Глазов палась... Орловка гуртын одӥг урамзы Глазовская нимаське, со урамын копак удмуртъёс уло.

'''– Азьланезлы но ужед трос, дыр?'''

– Али 4-5 проект бордын огвакытэ ужано луэ. Со капчи ӧвӧл. Эшшо турттӥськомы эшъёсмылы юрттыны, общественной ужен вырыны: Башкириысь кылбурчилы Ирина Самигуловалы «Зангари пальпотон» кылбур бичет поттыны юрттӥм. Вань малпан туала удмурт фольклорез эскерыны – Эстоние вуыса, валай, татын кемалась туалазэ эскеро ни, нош асьмеос весь вашкалаез сярысь вераськиськом. Со но тунсыко, но туалазэ али ӧд эскеры ке, берло мар на? Соин сэрен туала удмурт культуралы сӥзем статьяосын бичетъёс дасям.

Озьы ик камсьӧр удмуртъёслэн сям-йылолъёссыя нимаз исследовательской бичет лэсьтоно, куриськонъёсын (вӧсяськон текстъёсын) но сям-йылолъёсын герӟаськем кырӟанъёсты поттоно на.

Со вакытэ ик мон али фольклор бичасько, удмурт этномузыкологен Ирина Пчеловодоваен 2 крезьгуро бичет поттӥм ни. Огез гуртысьтым но бускель гуртысь – Выль но Вуж Тӥгырменысь – сям-йылолъёсын герӟаськем кырӟанъёсын «Тӥгырмен гуръёс» бичет. Мукетаз пыризы Кияса ёросысь 6 удмурт гуртъёсысь сям-йылолъёсын герӟаськымтэ кырӟанъёс, али солэсь 2-тӥ изданизэ дасяськомы ни. Ми соосты 4 кылын поттӥм – удмурт, ӟуч, англи, эстон, бордаз дискез вань на. Туннэ нуналлы та выллем изданиос асьмелэн ӧвӧл.

Со сяна, Эва Тулузлэн проектэзъя бичаськом камсьӧр удмуртъёслэсь калык кырӟанъёссэс. Туннэ нуналлы 11 гуртысь кырӟанъёс вань ни.

'''– Бертыны уд малпаськы, иське, Тартуын наукаен вырыны луонлыкъёс тросгес?'''

– Мон озьы шуысал. Тросгес луонлыкъёс но, документъёсын, отчётъёсын выронэз но ӧжытгес. Асьмелэн со туж трос, ужаны люкетэ. Тодосчилы малпаськыны вакыт кулэ. Та ужын «мынӥд-лэсьтӥд» гинэ ӧвӧл. Но озьы ке но мылкыды Удмуртиын.

'''– Улонад сцена кыӵе инты басьтэ? Удмуртиын тон тросгес быдэсъяськод эстрадной кырӟанъёсты, нош Эстониын – калык гуръёсты?'''

– Нырысь мыным туж секыт вал артистысь тодосчие выжыны, тодосчиысь артистэ. Та 2 пӧртэм удысъёсын 2 пӧртэм адями луоно. Артист но тодосчи копак мукет сямен малпасько. Милям кылдэмын ни командамы: Андрей Корнилов, Иван Котельников, Алёна Тимерханова, Ури-бери Орина, соосын выступать кариськом. Удмуртиын эстрадной кырӟанъёстыгес быдэсъясько, но тыршиськом калык кырӟанъёсты но туала карыса кырӟаны. Нош Эстониын калык гуръёстыгес быдэстӥсько. Отысь ужрадэ вуиськом ке, ми нырысь ик возьматӥськом удмурт луэммес, калыкмес, удмурт лулчеберетэз, сям-йылолъёсмес.

Кырӟаны мыным кельше, со лул лэзён интыын. Нош тодослык – со нырысь ик уж. Но, мукет ласянь, артист луыны но капчи ӧвӧл. Куддыръя туж секыт луэ астэ адямиос азьын возьматыны. Сцена вылын капчи мылкыдо луоно, нош сцена сьӧрын кудбыдӟа уж берыктоно луэ.

'''– «Эктоника» проектлэн «Улон» сузьетысь передачаяз шуиськод: семья но кылдытысалыд ни, пи но вордысалыд ни.
'''
– Зэмзэ вераса, туж трос дыр басьтэ наукаен вырон. Табере валасько верамез: наукае эн мыны, огнад кылемед уг поты ке… Кулэ ни аслам улонэ сярысь но малпаськыны.

Источник:

[https://elibrary.unatlib.ru/handle/123456789/49039 Н. В. Йырын – наука, сюлэмын - кырӟан / Николай Анисимов ; [вераськиз Мария Векшина // Удмурт дунне. – 2020. – 11 июня. – С. 10, 23 : фот. – (Тӧр шорын)].

'''За предоставление материала выражаем огромную благодарность редакции газеты
[http://www.udmdunne.ru/ "Удмурт дунне"]'''

[[Категория:Удмуртские звезды]]