Редактирование: Трофимова Маргарита Евстафьевна

='''Лобаме потэ!'''=
[[Файл:Трофимова.jpg|thumb|left|]]
1-тӥ сентябрез  дышетӥсьёс Выль арлэсь но бадӟым праздникен лыдъяло.  Нош Селта районысь  Югдон школаысь  дышетӥсь Маргарита  Евстафьевна Трофимова понна  таиз сентябрь  кык полэс пусйымон – туэ со зарни  юбилейзэ пусъе. 
Дышетон удысысь дано ужась данъяськыны уг яраты.  Нош мугез вань -  кылем дышетскон аре  республикаямы ортчем  «Арлэн дышетӥсез»  конкурсын со  супер-финалэ сюриз.  Вормиз Ижевскысь етӥз нылмурт, но асьме понна куать устоосыз пӧлы сюрон  но бадӟым вормон ни – азьвыл та  быдӟа конкурсъёсы  удмурт кылъя дышетӥсьёс  пыриськылыны ик ӧз дӥсьтылэ.
 
'''Пудолэсь юрдод – дышетӥсь луод'''

Семьяын ньыль нылпи будӥз.  Атайзы комбайнёр вал,  анайзы школаын выж миськиз. Гуртазы трос пудо вордӥзы на.  Сое сюдыны капчи ӧй вал – соку али сямен гектарен  турнан возь ӧз сётъялэ уго.  Пудо сиён утялтыны нимысьтыз  нунал но нокин ӧз сётъя. Озьы анайзы вань гурт  пӧр ужез быдэстэм бере  пиналъёссэ кутыса  нюлэскы, нюре мынылӥз  Отысь соос узыез-борыез  музэн бичаса, сюрлоен араса  турын поттылӥзы.  Турын калтон бырылӥз гинэ, картош бичано луылӥз. Озьы огзэ ужез мукетыз воштылӥз.   Риталэн солэсь синмыз ик кыниськылӥз – шуиз,  будӥ ке, яке медик, я дышетӥсь луо,  ноку но пудо уг ворды.  Соку дышетскем адямиос уксёлы ӧз ёрмылэ, ваньмыз соос шоры синмаськыса учкылӥзы уго. Ма, анайзылэн-атайзылэн  но туж потылӥз нылзы   мед дышетскоз шуыса, семьяын лыдӟиськыны яратылӥзы.  Доразы вань удмурт газет-журналъёс вуылӥзы. Соин тямыс классэ быдтыкуз,  йырзэ укыр тӥяно ӧз луы ни.  Вылаз ик со вакыт  Дэбес педучилищеын ӵыжы-выжы  нылзы дышетске ни вал.  Отчы ик кариськиз. 

Дышетскон каньыл сётӥськиз.  Егитъёс дасяськизы пионервожатой луыны.  Но училищеын суредасьёсты дасян  ёз но вылэм  шуыса тодэмез бере  мылкыдыз куашказ.  Туж вожъяськылӥз соослы: часэн-часэн суредъёссы  шоры учкыса улӥз,  маке-маке ачиз но  тетрадьёсаз гожмалляз.  Но быръем сюресысьтыз  кожыны ӧз дӥсьты.  Ньыль ар ортчыса,  со училищеысь покчиосты  дышетӥсь, пионервожатой луыса потӥз. 

Но  отчыозь вал ай  ужан инты люкон (распределение). Кужмысь  кытчы ке нокинэ  ӧз келяллялэ, егитъёслэсь мылкыдзэс юазы.  Маргарита сыӵе эриклэсь  шуге-леке вуиз: кытчы мыноно?  Дор палъёсам туж уг поты,  мукет интыосты адӟем потэ.  Мар карыны паймеменыз,  карандаш кутӥз,  синзэ кыниз но, йыр ке йыр, пыд ке пыд шуыса, списоке бышкалтӥз.  Карандаш ӵабтӥз Селта районэз. 

'''Карандашлэн сюрестӥз'''

Али со дыр куспын Москваозь вуод, дыр,  - серекъя Маргарита Евстафьевна. – Туж-туж  кема мынӥ, лулы  потӥське вал. Ма, та Селта Удмуртиын ик вал кадь но… Автобус кыӵе ке гуртэ дугдэ ке, усьтыр-дабыр потӥсько, но Селта весь ӧвӧл – то Нылга, то  Ува.  Артэ пукись кышномуртъёс  серекъяло:  дышод ай, оло нош  ми палъёсты воксёлы кельшытод…
Райцентр туж ӧз кельшы.  Одӥг гинэ из юртсы,  сюрес но ӧвӧл.  Юмга уката ик.   Ульча шоры ик дэрие выёд.  Школазы вуж,  ӧсъёссы ӟукырто.  Но дышетӥсьёс умой пумитазы.
 
Училище бере йырын сомында малпанъёс, собыдӟа мылкыд  - ужа но ужа.  Маргарита Евстафьевна ужаз, но пумен юнгес вожъяськылӥз классэн  ужась эшъёсызлы. Вот мынам ке аслам пиналъёсы,  аслам кабинетэ луысал! Али ужрадъёс но ортчытъяны нокытын. 
Малпанэз быдэсмиз куинетӥ араз. Со классысь пиналъёссэ али кадь ик тодэ ай.  Туж визьмоесь,  кырӟаны устоесь вал.  

'''Шырем бурдъёс'''

Со вакыт туж  данъяськыны ӧдъязы вылӥ образованиен адямиос.  Дышетӥсьлы трос тодон-валан уката  кулэ. Маргарита Евстафьевна ваньмон дыръяз  географиез йырйиз.  Одӥг пол озьы  дасяськемзэ арлыдогес дышетӥсь  адӟиз.  Географ луыны уд-тэ  дасяськиськы? – паймиз со.
- Бен. 
- Визьмыд ке ӧвӧл, дышетскы.  Бӧрысь ма карыса улыны  малпаськод -  географъёслэн кӧня гинэ чассы? Мын филологе. 
- Дасяськыса уг вутты, экзаменъёс матын ни. 
- Вуттод!
Университетэ вуыса ни со тодӥз, филологияя факультетын  нимысьтыз удмурт  люкет  но вань шуыса.  Удмурт литературая экзаменын Даниил Майоровлэн творчествоез сюриз.  Мар бен, биографизэ тодэ,  огзэ кылбурзэ тодэ… ӝыныё.  Мар кароно? Кутскиз но берло чуръёссэ ачиз малпаз.  Комиссия ӧз вала,  ӟеч дунъет пуктыса  келяз. 

Покчи классъёсты  дышетыны оскемзы бере,  Маргарита  Евстафьевна ассэ туж  шудоен лыдъялляз, нош удмурт кылъя урокъёсты  нуыны кутскемез бере валаз – таиз, оло,  эшшо тунсыкогес но кулэгес.  Озьы ик вылэм.  Удмурт кыллэсь грамматиказэ капчи уд шуы.  Ма, лыдӟиськыны но  ваньмыз пиналъёс уг ярато.  Но соос муш  палэп  музэн  котыртылӥзы Маргарита Евстафьевнаез. «Ма,  мыло-кыдо дышетӥсьёс мон сяна но туж  трос, малы мон борды тэбиниськоды?» – паймылӥз со. 
- Ми тӥледын  удмурт сямен вераськыны  быгатӥськом,  мукетъёсыз ӟуч сямен косо.  Сэре шӧтэм вераськиськом шуыса  тышкасько. 
- Тӥ-ӥ-ни мар. Ма, пыралэ-пыралэ – урок вискын но, урок бере но, кружоке но лыктэ…

Со аръёсы политика сыӵе вал.  Ма, мон ачим но (авт.)  тодӥсько ай, кызьы  одӥгаз линейкаын  директор ялӥз:  школаын ӟуч сямен вераське,  а то роноос  ветлыкузы куаретӥзы, нылпиосты, пе,  базарын сямен  удмурт сямен верасько.  Ми вӧжоесь ни вал,  ӟуч сямен  ӟучъяськись  эшъёсмылэсь но  чылкытгес  вераськылӥм, нош мар кароно покчиослы? Соос гуртсылэсь, анай-атайзылэсь   кыдёкын (интернатын улӥзы).  Сыӵе пиналлэн аслэсьтыз  сюлмаськонъёссэ  вераны нокинлы  луылӥз:  ӟуч дышетӥсьлэсь  со куалекъяз, удмурт сямен  вазисьёсыз ӧжыт вал.  Озьы удмурт кылъя урокъёсын  гинэ со ассэ дораз  кадь шӧдылӥз. 

Маргарита Евстафьевна вань сюлэмзэ  сётылӥз  со вакчи дырез  туж но туж  тунсыко карон понна.  Кылъя урокъёсты  тросгес  шудон пыр  ортчытъяз,  литератураын сюлмысь  вераськон ӧръяськылӥз. Кыӵе ке нимысьтыз методистлы синмаськонэз  ӧвӧл.  Зэмзэ вераса,  котькудӥз  дышетӥсь ужатозяз  аслэсьтыз методиказэ  кылдытэ.  Ӵемысь со вошъяське но. 

- Мон азьвыл малпасько вал, пинал одно ӟеч тодыны кулэ  произведениез,  критикъёслэсь со пумысен малпанзэс.  Али со шоры ӧжыт мукет синмын учкисько.  Кужмысь лыдӟыны уг косӥськы,  но произведенилэн пуштросэныз  гочатӥсько (соку амалтэк лыдӟо) но солы  асьсэды  анализ лэсьтыны курисько.  Пиналлэн одно ик аслаз малпанэз луыны кулэ.  Тросэзлы со кельше, кудӥз шуо:  мон писатель луысал ке,  татӥзэ озьы гожтысал, отӥзэ  - тазьы.  Озьы соос  малпаськыны,  малпанзэс  шара ӧръяны дышо. 

Ужан методиказэ  чутрак  воштоно луиз М. Е. Трофимова дасо ар талэсь азьвыл но.  Солэсь азьвыл уго  Югдон школаын  ваньмыз умой ни вал -  вераськемлэсь алэм гинэ ӧвӧл, эсьма, удмуртлыкез ӝутон  сярысь но   вераськыны кутскизы.  Маргарита Евстафьевналэн  пиналъёсыз мукетъёсызлы  вожъяськымон луизы, ассэ ӵем данъяны ӧдъязы. 

Кытысь – кыӵе тӧл пельтӥз -  удмурт кылэз татын нош ик  гажамысь дугдӥзы.  Пиналъёс  урокъёслы  тунсыксэс ыштӥзы. Шуг луиз на соин но -  пиналъёс кулэсмемен,  удмурт но ӟуч классъёсты  огазеязы.  Озьы удмурт кылъя  урок мыныку,  ӝыныез 16 падежез  дышетӥз, ӝыныез  кырын юмшаз.  

'''Арлэн дышетӥсез'''

Выль бурдъёс  кылдӥзы  туэ тулыс пал.  Селта районысь  Югдон  школаысь удмурт  кылъя но литературая  дышетӥсь Маргарита Евстафьевна Трофимова республикаямы ортчем  «Арлэн дышетӥсез» конкурсын  финалэ потӥз.  Шаерысьтымы куать тужгес  кужмо дышетӥсьёсты  сӥлы кариз  Удмуртилэн  Президентэз.
 
… Конкурсэ пыриськыны  нокыӵе мылкыдыз ӧй вал. Но директор  косӥз бере, номыр уд кары.  Школаын ортчоно  конкурслы ӧз дасяськы,  но дунъясьёс сое устоен лыдъязы.  Табере, пе,  школалэсь данзэ  районын утёно. Мыноно ке,   каникул быре.  Берпуметӥ нуналъёсаз  ни мырдэм  соглаш кариськиз: ньӧмыз понна  ветло ке, ветло.  Культура юртлэн сцена вылаз  райцентрысь дышетӥсьёс  туж шукрес выризы.   Но жюри нош ик бырйиз Трофимоваез.  Бырйиз но, ӧз янгыша.  Селта дышетӥсьёс  туж йыркуръяськизы: кытчы, пе,  со песянай  нырзэ чуртна?

Табере – всё.  Берлань сюрес ӧвӧл ни.  Уть районэдлэсь данзэ. 
- Ижын конкурс пыр ортчемме тодам ваисько ке, али но юзыр-кезьыр луисько на, -  тодаз вае Маргарита Евстафьевна.  – Сомында  нерваме, тол,  улытозым ӧй быдтылы кадь.  Реферат гожъяса, уйшор бере 3 часозь пукылӥ,   креслоын ик умме усьылӥськем. 
Мукет,  тодмотэм классын урок сётонлэсь мон ӧй кышка -  сомында ар ӵоже школаын ужатозям , нылпиосын огкыл  шедьтыны дыши ини.  Сюлмаськытӥз мукетыз – шедьтозы-а удмурт пиналъёсты? Кышканэ ӧжыт гинэ ӧз зэма. – Кузебай Герд нимо  гимназиысь пиналъёсты  ваизы урокозь  кык минутлы гинэ вазь! Кезьытысь пырем пиналъёслэн шокамзы но уг луы ай, нош мон усто урок сётыны кулэ.  Юрттӥз Василий Широбоковлэн зарисовкаез.  Кызьы ортчытэмме рос-прос уг тодӥськы ни,  но жюри ӟеч дунъет пуктэм. 
Собере вал пресс-конференция.  Журналистъёс финалэ потэм  дышетӥсьёслы вожмаськыса  юан сётъяло (жюри со дыре валэктонъёслы балл пуктылэ). Эшъёсы мыло-кыдо  ушъясько,  мон мӧзмыса пукисько – удмурт  кылъя дышетӥсь  адямиосты туж  уг тунсыкъяськыты, лэся.  Гурт школалэн  сюлмаськонъёсыз  пумысен гинэ  ма но со верай. 
- Конкурслэн берпуметӥ ӝытаз  ивортӥзы: ӵуказе  тӥ быдэс зал  азьын таӵе-таӵе  темая урок сётыны кулэ.  Синъёсын пеймыт луиз.  Дыр сизьым  час ини  -  материал ӧвӧл.  Мар кароно?  Жингыртӥ издательствоын ужась  Валентина  Уразаевалы: книга кулэ.  Ӵукна тямыс часэ вутто, шуиз.  Нош отчыозь ма кароно?  Йыре одӥг  малпан но уг лыкты.  Нош син азьтӥ солань-талань ветло-шоголлясько  банкетэ дасяськись дышетӥсьёс. 

Майбыр  финалэ  сюрымтэослы.  Кыӵе  гань-гань, ӝытбыт сиёзы-юозы,  шулдыръяськозы,  уз керӟегъяське ни, - малпаз Трофимова. 
Я, одӥг уй гинэ чида на, - кияз кутыны  выриз ассэ.  Но жадем йырыз маке выльзэ  малпаны пумитъяськиз.  Дас минут шутэтско шуыса, йырзэ миндэр вылэ понӥз. Сайказ… сизьым часын ӵукна.  9 часлы  уроке мыноно ни. 

Ашальчи Окилы  сӥзем урокез нош ик  ушъязы.  Но жуммем дышетӥсь  кулэезъя шумпотыны но ӧз вала кадь – солэн ӝоггес дораз бертэмез потӥз ни. Вылаз ик банкет ӝытын  ик дышетӥсьёс куспазы  шыпыртӥллям ни вормисьлэсь  нимтулзэ. 
Одӥг муртлы квартира но, машина но  сётэмзы ӝож  ик – финалын соос ваньзы огмында  кужымзэс сётӥзы ук,  нош таоссэ телевизорен алдазы. Но соин йырин ӧвӧл ни -  бертоно, укыр изем потэ. 
- Сомында ар  ӵоже школаын  ужатозяды, кӧня пол нылпиос шоры   кесяськылӥды? – меӵак  юасько дышетӥсьлэсь. 
- Огпол но ӧй. 
-  Тӥ  зэмзэ но  усто дышетӥсь, но вань, дыр, ук маке но шугъяськытӥсез – аръёс ортчыса, номыр сярысь уд жаляське-а?
- Жалясько. Жалясько бырем пиналъёсме.  Тросэз дышетэм пиосы гозые пыризы. Малы?
Бен, та улонын астэ шедьтыны  туж шуг,  но чидантэм ӧвӧл ук. Куректӥсько,  соосты кулэезъя улонэз дунъяны,  кые ке вамыш лэсьтон азьын  малпаськыны ой дышеты шуыса. Кӧня пол  индылӥ – эн дыртэ. Маке лэсьтонды азьын,  ваньзэ сизьым пол мерталэ, но…
- Адямилэсь  секыт мылкыдзэ шӧдыса,  кыӵе  юрттэт ӵектысалды тӥ?
- Кылбур лыдӟыны сётысал, дыр.  Мыным котьку юрттэ  Флор  Васильев.  Пуксьыкум сыӵе секыт кадь, кӧня ке кылбурзэ  лыдӟисько но  выльысь лобаме потыны ӧдъя.

'''Источник:'''

Рябинина, Зинаида. Лобаме потэ! / Зинаида Рябинина // Удмурт дунне. - 2003. - 29 авг. - (Удмурт кизилиос).

'''За предоставление материала выражаем огромную благодарность редакции газеты
[http://www.udmdunne.ru/ "Удмурт дунне"]'''

[[Категория:Удмуртские звезды]]