Редактирование: Кузнецова Валентина Владимировна

='''Кыллэн дуныз – эрик'''=
[[Файл:Kuznecova_V.jpg|thumb|left|]]
'''Валентина Кузнецова судэ ужаны лыктӥз 40 ар талэсь азьвыл. Ижысь Индустриальной ёрос судысь секретарьысен кутскыса, 1998-тӥ арын луиз Удмурт Республикаысь Вылӥ судысь судья, али сэрттэ секыт уголовной ужъёсты. Валентина Владимировна пусъемын «За заслуги перед судебной системой», «150 лет судебной реформы в России» медальёсын, «За усердие» гадьпусэн.'''

'''Кибридлэсь вожъяськыса'''

'''- Валентина Владимировна, удмурт кылэз тодэмды суд дыръя огпол ке но юрттӥз-а?'''

- Тодӥськоды, Россиын суд мынэ ӟуч кылын. Адӟись-а, адвокат-а сое уг валало ке, судын луыны кулэ кылысь кылэ берыктӥсь. Но ӟуч сямен вераськыны табере шугъясько на пыдлось гуртысь песянайёс гинэ. Огпол эскеримы пичи нылъёсты сантэман учырез. Соослэн песянайзы, ӟуч но удмурт кылъёсты сураса, мырдэм но кызьы валэктыны выре адӟемзэ. Мон ваньзэ валай, шуисько, переводчик кулэ ӧвӧл, судэ пыриськись мукет муртъёслы но валэктӥ песянайлэсь ма вераны выремзэ. Судебной заседанилэсь азьвыл, коридоретӥ ортчыкум, куд-ог дыръя кылылӥсько судэ лыктэмъёслэсь удмурт сямен вераськемзэс, соос ке кожало, шып-шып выремзэс валась ӧвӧл шуыса. Озьы залэ пырисько ини, ма но со кылыса но тодыса.

'''- Кызьы тӥ, Ижын будэм мурт, удмурт сямен вераськыны дышиды?'''

- Зэмзэ ке, мыным ӟуч сямен вераськыны дышетсконо луиз. Нош удмуртэз анай йӧлын пыӵаз. Малы ке шуоно вордӥськи Пичи Пурга ёросысь Кечейыл гуртын Агичевъёслэн семьяязы. Анае Нина Николаевна школаын дышетӥз, атае Владимир Максимович колхозын ужаз. Бусьтыр улӥмы, муш вордӥмы. Но бубилэн, ӟечгес улон утчаса, дыр, городэ кошкемез потӥз. Кызьы ке но паспорт но басьтыны быгатэм ведь - соку колхозникъёсты музъем борды кужмысь думыса возё вал. Тӥни озьы 6 арескам мон вуи Иже, ӟуч сямен пал кыл но тодытэк. Ар ӵоже мон сое дышетӥ но школае, чылкыт вераськыса, мынӥ ини. Анае городысь пиналъёсты дышетыны ӧз кариськы ни. Атаеным ӵош ужаз радиозаводын.

'''- Заводчиослэн пиналзылэн йыраз кызьы лыктӥз юристэ дышетскыны малпан?'''

- Мыным туж кельше вал «Следствие ведут ЗнаТоКи» фильм. Синмаськылӥ Знаменский следовательлы, уголовной розыскысь Томин инспекторлы, нош визьмо, чебер Кибрид шоры учкыса, эксперт-криминалист луэме потэ вал. Атае, китӥм кутыса, монэ вайиз Индустриальной ёрос судэ. Совето вакытъёсы судьяосын ӵош ужъёсты сэртто-пертчо вал калык заседательёс. Соосты зэмзэ но быръе вал калык. Озьы атаелы заводысь рабочийёс оскиллям адямиосты янгыше уськытъяны яке шонере поттылыны.

Соку юристэ дышетскыны ужамтэ муртъёсты ӧз кутылэ, 2 ар стажед ӧвӧл ке, студент луон сярысь эн ик малпа. Соин ик мон соглаш луи машинисткаын ужаны. Нош аслам туж потэ тодэме, кызьы усьяське Удмурт кун университетлэн ӧсэз. Соин ик кунгожсьӧр кылъёсъя факультетэ экзамен сётӥ, отчы пырон понна юрфаке кадь ик экзаменъёс сётоно вал. Пыри ведь, иське, тодон-валанэ тырмыт, буйгай мон. Индустриальной ёрос судын быдэс ар ӵоже текстъёсты печатласа пукеме бере мыным оскизы архивариус луыны, собере 10 ар ӵоже судебной заседаниосын секретарь вал - судлэсь ортчемзэ гожъяса пукылӥ. Со вакытэ ик тодон-валан люкай УдГУ-ысь юридической факультетын.

Сыӵе бадӟым опытэн ини 1987-тӥ арын Индустриальной ёрос судын калык судья луи. Соку судьяосты но калык быръе вал, али депутатъёсты сямен ик. Ужась коллективъёс судьяосты дэмлало вал. Лекос бадӟым луэм Индустриальной район ӵапак со аре люкиськиз кыклы - кылдӥз Устинов ёрос. Мон шеди выль районлэн судаз. Со судэз кылдытӥсьёс пӧлысь луэменым данъяськисько. Мыным, соку гинэ партие пырем муртлы, 30 арескам дэмлазы партийной организацилэн секретарез луыны. Мынам стаже пичи со быдӟа кыл кутонэз вылам басьтыны, ӵыжаськисько. Тон малпаськод, революция бере кинлэн ке стажез вал, индылӥзы пересь коммунистъёс, большевикъёс быдэс странаез ӝутӥзы. Нялтас вераса, комсомол, профсоюз, партия билетъёсме мон ӧй сэрпалты, али но, ӝикыт утялтыса, возисько, внукъёсылы возьматыны яралоз шуыса.

'''Нуналысь нуналэ кыл кутон'''

'''- Судья луэмды бере нырысетӥ судады янгыше уськытоно адямиез тюрьмае келяды-а, шонере поттӥды-а?'''

- Нырысетӥ судме али кадь ик тодӥсько на. Кызьы вунэтод: судэз ог 10 минут ӵоже нуэме бере шӧдтэк шорысь йырам шуккиз, солэсь радлыксэ тӥяй шуыса. Вераны кулэ: суд ортче Уголовно-процессуальной кодексъя. Отын бӧрсьысь бӧрсе гожтэмын, ма но ку вераны кулэ судья. Мон сое, 10 ар ӵоже секретарьын ужатозям, оло, сю пол ортчи, уйин сайкатӥзы ке, могатэк вераны быгато. Но ачим судья интые султӥ но куалекъянъям, лэся, огзэ куронэз вунэтыса кельтӥськем. Так, шуисько, эшъёс, эн шугъяське, судэз выльысь кутскиськом. Калык кылзӥськиз ведь. Соку мон адямиез янгыше уськытӥ - секыт йыружез понна тюрьмаын пукиз.

'''- Адямилэн улонэз понна кыл кутыны секыт, дыр?'''

- Туж секыт. Со понна кышкасьтэм луоно. Озьы нуналысь нуналэ, арысь аре. Судын дыр туж ӝог ортче. Азьвыл ёрос судьяос туж трос ужъёсты эскерылӥзы, угось гражданской но, уголовной но ужъёс соос вылын вал. Нуназеозь учкиськод вал алимент тыронэн, ужысь уллянэн, штраф тыронэн герӟаськем юанъёсты, ӝыт пал эшшо 2-3 секыт йыружъя решение кутӥськод на. Озьы толэзьскын ог 40 гражданской но 24 уголовной уж люкаське вал. Али капчиоссэ гражданской но уголовной ужъёсты йылаз-пумаз вутто миръясь судьяос. Районъёсысь судьяосын ӵошатыса, Верховной судысь судьяос секытгес уголовной ужъёсты сэртто. Мынам, кылсярысь, контингентэ - адями виисьёс, взятка басьтӥсьёс...

'''- Соосты малпаса, пеймыт ульчаостӥ огнады ветлыны юзыр-кезьыр ӧвӧл-а?'''

- Мон аслэсьтым ужме врачлэн уженыз ӵошатӥсько, оло, соин но: Любовь Владимировна сузэре эмъясь луиз. Со, яраын копаськыса, вӧсь карыса адямилэсь мугорзэ бурмытэ, нош мон лулзэ эмъясько, озьы ик висьытыса - куректон, шуг-секытъёс пыр потон луэ чылкытатӥськон выллем. Котькудӥзлэсь йыруж лэсьтэм муртлэсь янгышсэ мертаськод но соя наказание сётыны тыршиськод, со алама вамышсэ мед валалоз но мед тупатскоз шуыса. Жаляса верано, ялан озьы уг луы. Куд-огез выльысь но выльысь ми доры вуэ. Адямилэн визез дорозь сузьтӥськыны ум вормиське-а, мар-а.

Огпол мон зэмзэ но туж зол кышкай. Со вал йыружьёсын тырмем 1990-тӥ аръёсы. Ужысь бертӥсько. Пыри подъездам. Лампочка бус пыртӥ кадь гинэ пиштэ. Со пиосмурт сьӧрам лыктӥз, вылды. Малы ке шуоно кытысь потэмзэ валаса ик ӧй вутты, кыкеныз ик киосыныз чырты котырам ур-вар мерске. Кутӥськиз цепочкаосы борды но золтэ-золтэ… Пель сьӧрам секыт шокамез кылӥське. Мон ӵыжаськисько, кесяськисько. Малы со пиосмурт монэ лэзиз, кин тодэ. Бандитъёслэн монэ кышкатыны ыстэм гыжкалзы вал меда? Соку троссэ йыружъёсты, уллёе огазеяськыса, лэсьтылӥзы. Мон но ӵапак со нуналъёсы кышкыт бандитъёслэсь йыружзэс эскерисько вал. Яке огшоры лушкаськисьлэн зарниен узырмемез потэ вал-а? Утчаса-утчаса милиция сое ӧз шедьты, ма, утчаны но кинэ паймод, со шуралилэсь ымнырзэ ӧй адӟы бере.
Мукетъят судэ, кабинетам, пыриз воргорон.

- Тӥ монэ уд тодӥське ни, дыр. Монэ тюрьмаысь лэзизы, но мон янгыш ӧвӧл, ужме выльысь учкыса потэ! - лекъяське.

Зэм но, кин тодэ, ма солэн йыраз. Мукет пукон вылэ, кыдёкегес, пукси. Нимтулъёсты, ымныръёсты малы ке тодам уг кельтӥськы, нош сэрттэм ужъёсме одӥгтэм тодӥсько. Лякыт куараен курисько:

- Законъя улӥсь адямиез кечат-вамат укно сьӧры уз келялэ. Вералэ ай, ма понна пукиды? Кӧня ар но кыӵе статьяя? Озьы но озьы, пе, мон янгыш ӧй вал, кышное юри чагиськиз, монэ мед пуктозы но кыдёкегес мед келялозы шуыса. Тодам вайи мон со ужез. Отын вань экспертизаос, адӟисьёслэн верамъёссы пырак возьмато вал, воргорон янгыш шуыса.

- Асьтэдыз шонере поттыны тӥляд одӥг гинэ амалды вань, - валэктӥсько, - кузпалды мед лыктоз но заявление мед гожтоз, чагиськонэз шонер ӧй вал шуыса.

Воргорон, мынэсьтым лад-лад вераськемме кылзыса, буйгаз. Таки кышноез заявление гожтыны ӧз ветлы.

'''Шыпыт судья'''

'''- Ӵошатыны луэ-а азьвыл но туала йыртэмасьёсты?'''

- Туалаосыз дотово визьмоесь луэмын. Соос лыдӟо законъёсты - юридической литератураез шедьтыны табере нокин уг шугъяськы. Йыружзэс лэсьтэмлэсь азьвыл пыр-поч дасясько, соин янгышсэс шарае поттыны туж секыт. Прокурорлы зол пумитъясько. Куд-огез адвокатлэсь ӟечгес вераське. Сыӵе дыръя юристъёс понна ӝож ик луэ, угось али котькуд кыкетӥез егит адями адвокат луон сярысь малпаське, юристэ дышетскыны мерске. Но адвокатлэн но, прокурорлэн но ужзы ваньмызлы капчиен уг сётӥськы. Та кык адямиос куспын кыл вылын аспӧртэмлыко ожмаськон ортче. Вераськыны быгатон - сыӵе ик талант, сцена вылын шудыны я роман гожъяны быгатон кадь ик. Нош судья законэз быдэсъя, солы трос вераськыны уг яра, со судэ пыриськисьёсты сак кылзэ.

Кыл сизьым шур йылэ гинэ уг вутты. Милям удысамы со эриклэсь люке. Кызьы, кыӵе кылъёсын гожтэмын экспертизалы заключение, янгыше уськытоно адями огпол яке 2 пол мыжгиз, огназ вал яке кӧня ке кузя... Сыӵе нырысь учкыса чыры-пырыослэсь потэ эриклэн дуныз.

Вот со понна ик судьяос вань: ми чакласьком, законъя-а сэрттэм-пертчем йыружез следователь, янгыше уськытоно муртлэн но следствие пыриськем мукет адямиослэн правооссы тӥямын ӧвӧл-а...

'''- Детективъёсты но тӥ озьы ик, законэн ӵошатыса, учкиськоды-а? Шуом, Анна Ковальчукез «Тайны следствия» сериалын 15-тӥ сезонзэ.'''

 - Мон уг вогъяськиськы ук, татӥ Уголовно-процессуальной кодексэз суразы, отӥ Административной кодексысь статьяез шонер ӧз вералэ шуыса. Мон, огшоры учкись сямен ик, валаны турттӥсько, кин лэсьтӥз йыружез. Со, кроссвордъёсты куадан сямен ик, йырвизез лэчытомытэ. Уг яратӥськы «Час суда» выллем телешоуосты гинэ - соос пӧясько, нош калык кожа, суд озьы ик ортчыны кулэ. Анна Ковальчуклэн Мария Швецова героиняез сярысь ке... Мон сое туж зол гажасько. Малы ке шуоно милям удысамы нылкышнолы будыны, карьера лэсьтыны, эшшо ке воргоронъёсын кивалтыны туж секыт. Миръясь судьяос пӧлын - судебной системалэн нырысетӥ тубатаз - нылкышноос трос. Татын угось ужез трос, нош уждунэз туж ик бадӟым ӧвӧл. Нош ёрос судъёсын пиосмуртъёс кузёясько ини, Вылӥ судэз веранэз ик ӧвӧл. Пӧлазы ужась нылкышноосты пиосмурт судьяос туж гажало.

'''- Кылем арын СМИ-осын огпол гинэ вераськон ӧз ӝутскылы, судебной заседаниосты видеое гожтоно шуыса. ЕГЭ сётыкузы, пиналъёсты гинэ но сак синъёс чаклало, соос номыр уродзэ ӧз лэсьтэ на ке но. Нош тӥляд законэз тӥям муртъёс пуко.'''

- Мон видеокамераос пуктылонлы пумит. Малы? Ваньмызлэн-а судэ пыриськисьёслэн потоз, соосты мед тодмалозы шуыса? Шуом, мон адӟисьлэсь юалляськисько. Нош солэн уг ке поты ымнырзэ возьматэмез? Кыӵе ке шӧртчиос судысь записез кайпалтӥзы но вузазы яке адӟисез соин кышкатыны кутскизы ке? Мыным потэ, видеокамераос пуктылэмын луизы ке, присяжнойёс воксё пумитъяськозы судъяны. Сотэк но ми мырдэм но кызьы шедьтӥськом правосудиез ортчытыны мылкыд карисьёсты. Вань на кышкан но: котьку кылдо судлэн решениеныз соглаш луисьтэмъёс. Видеосуредэз учкыса, сыӵеос чиньыенызы возьматозы: тӥни соиз присяжной мыным пумит вераськиз, пунэмзэ берыкто ай мон солы... Озьы ик преступникъёслэн ки улазы шедьылэмъёс но (пострадавшийёс) видеое гожтӥськыса вераськыны пумит луозы, малпасько.

'''Кивоштӥсьёс'''

'''- Тӥ семьяяды но шыпытак гинэ кивалтӥськоды, дыр?'''

- Семьяын мон одӥг адями, ужын - чылкак мукет. Судэ лыктэме берегес ай судьяын кема ужам кышномурт нодъяз: семьяяд шудо луэмед, нош ужад карьера лэсьтэмед потэ ке, ужысь кошкыкуд, ӧстэ лач ворса но кодексъёстэ-статьяостэ вунэты, нош ӵукна ӧс сьӧры кельты картэныд керетэмъёстэ. Тау солы, озьы ик улыны тыршисько.

Картэным ми тодматским Пичи Пурга ёросысь Брангуртын. Отын улӥз ӵужанае. Гужем отын милям югмы но, санаториймы но вал. Ӵужатайме мон тодыса ӧй вутты. Войнае кошкемез бере со вылэ похоронка вуэм, озьы ке но со ож бусыысь берытскем, зэм, зол висьыса. Соин кема улымтэ ни. Кулыкуз анаелы 14 арес вылэм. Ӵужанае ыж вордылӥз, солы гужемъёсы юрттӥськонъям турнаны дыши. Ӝытазе шудыны потӥськод вал. Озьы тодматски брангурт пияшен. Вася армиысь бертэмын вал ини. Ар ортчыса, семья кылдытӥм. Василий Павлович азьло автозаводын, собере механической заводын электрогазосварщикын ужаз. Стажез кык полэс мынӥз бере, пенсие потӥз ини. Но ужез лачак: Воткинск ёросысь огаз гуртын лэсьтыса быдтымтэ пичияк корка басьтӥм, сое бадӟыматэ, музъем ужен выре. Со мынам зэмос воргорон.

1990-тӥ аръёсы улон капчи ӧй вал. Соку судьяос милиционеръёслэсь куанергес улӥзы. Заводын но йӧнала ӧз тыре. Нош милям 2 пиналмы вал ини. Нылы школае уг ветлы на, пиелы 1 но ӝыны арес. Нылпиосме кутыса, Индустриальной судэ утялтӥськыны ветлӥсько вал. Юляе зол юрттӥськиз: олокытӥ-мартӥ жуг-жагез куштэ, ӝӧкъёсты ӵушалтэ. Денис викышъяны кутске гинэ, коляскаез доры бызьыса кошке. Катанчи сьӧрын будэм пинал актёр луэ, атаеныз ӵош тракторен ворттылэмез нянь будэтэ. Мынамъёсыз улон сюрессэс судын выж миськон бордысен кутскизы бере, кыкназы юристъёс луизы. Мынам шутэтскыны потон вакытэ вуэ - озьыен, кивоштӥсьёс шедёзы.

'''Источник:'''

Кузнецова, В. В. Кыллэн дуныз - эрик / В. Кузнецова ; записала О. Вахитова ; фот. А. Горбунова // Удмурт дунне. - 2016. - 15 янв. - С. 10, 15. - (Тӧр шорын).

'''За предоставление материала выражаем огромную благодарность редакции газеты
[http://www.udmdunne.ru/ "Удмурт дунне"]'''

[[Категория:Удмуртские звезды]]