Редактирование: Герасимова Александра Васильевна

=Мон ялан асме утчасько=

'''Россиысь но Удмуртиысь национальной проектъёслэн вормисьсы, 7-тӥ-8-тӥ классъёслы удмурт кылъя учебникъёслэн соавторзы, анай кылъя устоез дышетӥсь луон понна конкурсын «Эссе» номинациын вормись, оскымон анай но кузпал, Пичи Пурга гимназиысь удмурт но англи кылъёсъя визьнодась Александра Васильевна Герасимова ачиз сярысь шуэ: «Огшоры дышетӥсь, шаерысьтымы уно сю педагогъёс кадь». Но ма меда солэн лул-сюлэмаз?'''

'''- Асьмеос ог-огмес кемалась тодӥськом ини. Соин но паймисько: тӥ улондэс школаен герӟаны воксё уд малпаське вал ук?'''

— Озьы. Укмысэтӥ класс бере документъёсме сётӥ Сарапулысь совхоз-техникуме бухгалтере. Но одӥгез эше шуэ: дыр вань ук ай, ойдо Можгалась педучилищее ветлом. Ма, ветлом ке ветлом. Озьы мон шӧдтэк шорысь педучилищее экзаменъёс сётӥ, пыри, нош эше — ӧз. Меӵак верасько: дышетӥсь луэме воксё уг поты вал! Яке экономист, яке юрист луо, шуылӥ. Атае, быдэс улонзэ экономикаен герӟам адями, шуиз: экономика — со нылкышно уж ӧвӧл, кышномуртлэн ужез — гурт, корка, семья. Нош анае азьвыл но шуылэ вал: тани школаын кыӵе умой, быдэс гужем тон аслад нылпиосыныд ӵош луиськод, соосты кытчы кельтон сярысь сюлмаськонэз ӧвӧл. Школаын адӟод, кызьы аслад но нылпиосыд будо, азинско, нылкышно уж — школаын.

Анай-атае котьку огкылысь улӥзы, соослы пумит мыныны секыт вал. Кузпалъяськизы но соос туж вазь. Анае УдГУ-ын история факультетын дышетскиз, атае ИжГСХА-ын инженере тодон-валан люказ. Вордӥськи мон, собере сузэре. Студент дыръязы ик корка пуктыны кутскизы. Юрттӥськыны нокинлы вал: атае — сирота, будӥз песянаеныз, анае но туж вазь атайтэк кылиз, сое, агайзэ но эшшо кык сузэръёссэ ӵужбабамы огназ будэтӥз. Сессиос дыръя милемыз нялтас шедем машинаосын Пурга кемысен Кез ёросысь Дырпа гуртэ келяло вал. Али но тодӥсько на Дырпаысь пересь-пересь бабушенымы гур вылын кыллеммес. Ӵужбабамес туж юн яратылӥм. Бананъёс, дуно шоколад-канфетъёс — ваньзэ со вайылӥз.

Атае мон понна — туж бадӟым авторитет. Со милемыз, кык нылзэ но пизэ, ачиз дышетӥз руль сьӧрын ворттылыны. 14 арескам мыным мотоцикл басьтӥз. Сыӵе зол оскемезлы али но паймисько. Та улонын со ачиз ассэ шедьтӥз кадь потэ. Котькудӥз туж зол дышетскем инженер но аслыз уж кылдытыны уз быгаты. Нош мынам атае секыт 1990-тӥ аръёсы быгатӥз аслэсьтыз автомастерскойзэ усьтыны, али вӧзаз магазинэз но вань ини, адямиосыз ужало. Атай туж ӟеч вуриськиз, пичиысен солэн пӧрмытэм дӥсеныз ветлӥм: кофтаос, ветровкаос, чебер дэремъёс, ку изьыос. Ӝытазе бертыса, ми, куинь нылпиос, куашканы кутскем пыдкутчанмес, кесиськем портфельмес, штанимес папалы гинэ куштӥськом вал. Ӵукна султӥськом но — ваньмыз вуремын, тупатэмын ни. Нош анаймы ялан школа уже выемын. Ӝытазе бер бертэ, нош ик тетрадьёсты эскерон борды пуксе…

'''- Мыным потэ: та улон радлык асьтэ семьяды вылэ но выжиз.'''

— Быдэсак! Картэлэн киосыз — зарни! Со вань сюлэмзэ сётэ пиосмес будэтонлы, котькыӵе ужез быдэсъя, пулэсь мебель но лэсьтоз, ма кулэ вуроз, техникаез туж вала — ас киосыныз кык снегоход лэсьтӥз ни! Нош мон — школа котырын.

Семья кылдытӥ вазь, УдГУ-ысь удмурт филология факультетысь фин-угор ёзын дышетскыкум, 18 арескам. Сашаен тодматыкузы, син шорам ӧз но усьы вал. Но кыкетӥзэ шӧдтэк шорысь пумиським но общежитиысь комнатаямы куное ӧти. Милям улон сэрегамы трос тунсыко студентъёс люкаськыло вал, удмурт сямен кырӟаськом-вераськом, пӧртэм ужпумъёсъя вераськиськом. Али егитъёс сое пати шуысалзы. Вот сыӵе патие психология факультетын бадӟым курсын дышетскись Саша Герасимов вуиз. Тӥни со дырысен ми Сашаен ӵош. Котькытын.

'''- Вераны кулэ, Александр — шаерысьтымы туж тодмо дышетӥсьлэн, Пичи Пурга ёросысь Гожня гуртысь школалэн азьвыл директорезлэн Р. П. Герасимовалэн бадӟымез пиез. Анаез кивалтэм улсын гуртысь школа Россиысь устоосыз пӧлы пыриз. Герасимовъёс — дышетӥсьёслэн кужмо династизы. Секыт вал, дыр, сыӵе семьяе кен луыса пырыны?'''

— Вуоно картэлэн анай-атаез дышетӥсьёс шуыса, нырысь ӧй но тодылы. Саша монэ синмаськытӥз рос-прос луэменыз, корка пуктэме потэ шуыса верамъёсыныз. Мынам но чагыр малпанэ вал — аслам пуктэм коркаям улыны. Но со вакытэ мон туж эрико, бубыли кадь лопыръяськыса, улӥ. Малпай: ярам, бызё, нош марысь мар ке, ваньзэ воштыны но выль сямен кутскыны луоз ук…

Картэлэн со вакытэ Яр педучилищеез йылпумъямез сярысь горд дипломез вал ни, УдГУ-ын со технологияя дышетӥсьлы дышетскиз. Бӧрысь, ӵош улыкумы, УдГУ-ысь ик экономика ёзэз йылпумъяз на.

Быземе бере утыр ик вордскиз пимы, утыр ик корка пуктыны кутским. 1990-тӥ аръёслэн пумзы — котыр кузёяське ёрмон. Тӥни соку гинэ валай кытчы сюремме. Кулэ вал семьяез возьыны. Эркын бубылилы — секыт. Туж юрттӥзы ӵош дышетскись эшъёсы. Кызьы ке вутскылӥ бадӟым кӧтын но, пичи пиналын но конференциосы, удмурт дискотекаосы пыриськыны. Эсьма, эшъёсы монэ, зэмос удмурт кышномуртэ сямен, айшонъёсын дӥсяло-чебермало, мылкыдме ӝуто вал.

Со вакытъёсы кылдэм студент семьяосты чакласько ке, туж шерез быдэс кылизы. Соос ӧз быгатэ шуг-секытъёс, ёрмон пыр потыны. Туж жаль…

Дышетсконме горд дипломен йылпумъяса, Пургалась школае интыяськи. Нырысетӥ уждунэ — 600 манет. Со мырдэм но кызьы тырмиз некондиция шуиськись унитаз басьтыны, нош азьпалан ай быдэс толэзьзэ кызьы ке улоно. Картэ но школаын дышетӥсь луыса ужаз. Нош ӝытъёсы, уйёсы мурт бакчаосты гырылӥз, мунчо, корка пуктыса, ветлӥз. Инмарлы тау шуисько, со вакытъёсы адями трос картошка мерттэ вал, соослэсь бусыоссэс кинлы ке гыроно ук. Мон базарысь ӧй пыралля, картошка, кубиста, йӧл вузалляй. Школаын урокъёсмес йылпумъяськом но, вуж «Уазик» машинамес картошкаен тырмытыса, городэ вузаны нуиськом, уйин бертӥськом но урокъёслы конспект гожъяськом. Тӥни сыӵе дышетӥсьёс… Нош али улон капчигес луиз ни: адямиос лавкаысь басьто дуно сиён. 

'''- Паймисько: эшъёсты гинэ но ноку тӥлесьтыд ӝож мылкыддэс ӧз адӟылэ. Котьку шунды кадь пальышась. Зэм, мон одӥг пол адӟылӥ ик, но со герӟаськемын вал воксё мукетыныз: удмурт кыл сярысь сюлмаськемен…'''

— Мар вал со — 15 ар талэсь азьло ёрос центрын удмурт кылъя дышетӥсь луон? Нылпиос воксё ӟучомемын, удмурт кылэз анай-атайёсынызы ӵош адӟемпотостэм каро. Мон уйёссэ иземысь дугдӥ. Ӟучомем нылпиосын ужаны учебникъёс ӧвӧл. Завуч куаретэ: малы пиналъёсыд удмурт кылын умой уг гожъясько, уг лыдӟисько? Но ма лэсьтыса вуттод арняяз 2 час ӵоже? Соин ик ас азям ужпум пуктӥ: нылпиос удмурт кылэз гажаны, яратыны коть мед кутскозы. Ужам тросгес удмурт кырӟанъёс пыртыны кутски, удмурт сямен вераськись тодосчиосын, кунсьӧрысь адямиосын пумиськонъёс радъялляй. Мед адӟозы: сыӵе визьмо адямиос удмурт сямен верасько, уг возьдасько. Ми быдэс дуннелы тунсыко луиськом удмурт луэменымы. Ялан валэктылӥ: удмурт кыл — луло. Кызьы азинске, улэ — адӟыны луоз, удмурт изданиослы гожтӥськыса гинэ. Туннэ нуналлы Пичи Пурга гимназиямы 191 пинал «Кизили» журнал басьтэ.

Ма кароно на, удмурт кыл мукет предметъёс радэ коть мед ӝутӥськоз шуыса? ЕГЭ ӧвӧл… Озьы ӟучомем нылпиослэн удмурт кылъя олимпиадаязы пыриськыны кутским. Пиналъёс адӟизы, удмурт кылъя но кытчы ке потыны луэ, тонэ данъяло, ёрослэн йырыз доры пумиськонъёсы ӧтчало, УдГУ-ысь удмурт филология факультетэ, экзамен сётытэк, пырыны быгатӥськод. Табере удмурт кылъя олимпиадае ветлыны — черод.

Собере «Выжы» ассоциацилэн кивалтӥсезлы [[Ангелина Ефремовна Решетниковалы|Решетникова Ангелина Ефремовна]] луыса элькунамы ортчись удмурт дебатъёсы пыриськыны кутским. Отын но вормонъёсмы вань. Али Пичи Пурга гимназиямы 762 пинал дышетэ удмурт кылэз. Нош 15 ар талэсь азьло ӝыныез но уг дышето вал. Бадӟым тау кареме потэ школалэн азьвыл директорезлы Галина Алексеевна Кирилловалы. Со сюлмаськиз, анай-атайёсын вераськиз, ӟеч кадръёс люказ. Азьвыл удмурт кылэз Екатерина Ермолаевна Соколова но мон гинэ нуиськомы вал, часъёс озьы но ӧз тырмылэ, нош табере сомында удмурт кылъя дышетӥсьёсмы! Ваньзы туж визьмоесь, огъя командаен ужаны быгатӥсесь. Соин ик пичияк буйгатски, тросгес урокъёс англи кылъя нуисько ни. Азьвыл трос ужай на шаертодонъя, нылпиосты олимпиадаосы дасялляй. Али шаертодонъя кружок но уг ни нуиськы, но анай-атайёс вазисько ке, пумит уг луиськы. Озьы кылем арын дасям пиналы Роман Иванов вузъёс куспын радъяськись конференциын нырысетӥ инты басьтӥз. Туж шумпотӥсько со понна.

'''- Буйгатски, шуиськоды, нош зэмзэ ке — басьтӥськиды удмурт учебникъёс дасян борды.'''

— Учебникъёстэк курадӟизы нылпиос но, анай-атайёс но, дышетӥсьёс но. Мон покчи классъёсын завучлэсь ужзэ но быдэсъяй на, шокчыны дыры воксё ӧй вал. Малпалляй, тани дышетскон ар йылпумъяськоз но, удмурт кылъя учебникъёс бордын ужась [[Надежда Прохоровна Боталовалы|Боталова Надежда Прохоровна]] жингырто ни ай: басьтэ монэ но бордады, мон но быгато юрттыны… Шӧдтэк шорысь жингыртэ Дышетон удысын национальной ужпумъёсты тодон-эскеронъя институтлэн директорез [[Надежда Ураськина|Ураськина Надежда Ивановна]]. Удмурт учебник бордын ужамды уг поты-а, пе. Ма, воксё малпанъёсме лыдӟиды ук, шуисько!

Надежда Ивановналы туж бадӟым тау кареме потэ: со оскиз мыным, тодматӥз туж быгатӥсь, визьмо дышетӥсьёсын, басьтӥз аслаз командаяз. Валамон, учебникъёс бордын ми ужаськом ваньмон вискамы: шутэтскон нуналъёсы, каникулъёсы, отпускъёсы. Гожтӥм ини 7-тӥ, 8-тӥ классъёслы книгаос, ужан тетрадьёс, али ужаськом 9-тӥ класс бордын. Та учебникъёс лэсьтэмын, кунсьӧр кылъёсты дышетон методикаосты кутыса. Оло, ваньмызлы соку ик валамон уз луэ.

Ми тыршим, туала пинал сад-бакча котырын гинэ медаз берга шуыса, удмурт кыллы луыса мед тодоз историысь, географиысь тунсыко иворъёсты. Ужамы трос кутӥмы улонэн ӵош вамышъясь «Удмурт дунне» газетэз, «Инвожо» журналэз. Книгаосмы туж яркыт но туала пӧрмизы. Али адӟисько ни куд-ог янгышъёссэ. Но азьланяз соос тупатэмын луозы, соин ик кинлэн кыӵе малпанъёсыз, дэмланъёсыз вань — мед вералозы, ми шумпотыса кылзӥськом.

'''- Тӥ ӵемысь потаськоды кунсьӧры. Фин-угор кунъёсы ветлэмды валамон кадь, но семьядэс кельтыса, 2 толэзьлы Индие кошкылон… Мар вал со?'''

— Кыкетӥ пиеным декретысь потыса, туж секыт вал англи кылъя урокъёсты нуыны. Сюлмаськи: шонер-а дышетӥсько? Вераськемме кин ке вала-а? 10 ар талэсь азьло Интернет сокем азинскемын ӧй вал на. Тодӥ, вань сыӵе калыккуспо конкурс, отын вормисьёс Индиын уло но дышетско шуыса. Индиын огез кун кылзы — англи. Конкурсэ пыриськи но ворми. Индие вуыса, воксё пайми: Россиысь ми 2 кузя гинэ. Группаямы ваньзы кыӵе ке бадӟым адямиос, посолъёс, депутатъёс, правительствоын ужасьёс — Непалысь, Сириысь, Афганистанысь, Киргизиысь, Узбекистанысь, Эстониысь, Гватемалаысь но трос-трос мукет кунъёсысь. Мыным, гуртысь адямилы, пӧлазы шедемелы паймылӥзы.

Вань лекциос мынӥзы англи кылын. Нырысь вакытаз туж секыт вал. Но со ветлэмелэсь пайдазэ аръёс ортчемъя юнгес валасько. Тау карисько семьяелы, картэлы, пиосылы. Пичиез пие соку валаз: мамаез огинтыяз пукыны чидасьтэм, нош атаез котьку вӧзаз луоз.

Тодам лыктэ одӥг учыр: Ильяелы 2 аресъёс вал. Мон школаын 2 сменаен ужасько, вазь ӵукнаысен бер ӝытозь, утренникъёсаз но ветлыны уг ваньмиськы. Выль ар празднике мон пумаз гинэ вуи. Учкисько но, пиелэн ымнырыз ӧвӧл. Дорам лыктӥз но шуэ: тодӥськод-а, мама, мон быдэс праздникез тонэ гинэ возьмай, нош тон ӧд лыкты… Соку малпай: классам 20 пинал, соослэн ваньмызлэн вань анайзы но атайзы, нош мынам пиналылэн одӥг анаез, со но — ӧвӧл. Нош кин дорын мон пересь вакытме ортчыто? Мон тонэ будэтӥ шуыны ымы пыроз-а? Мукетаз утреннике, вань ужъёсме куштыса, мынӥ. Нылпиослы канфет сётъязы. Ваньзы соку ик сиыны кутскизы, нош мынамез дорам лыктӥз, мыным сётӥз… Со дырысен вань бадӟым ужрадъёсаз, ӵошатсконъёсаз кыкнамы но картэным ветлыны тыршиськом.

'''- Ӵемысь озьы пӧрме: вань сюлэмзэс ужлы сётэм адямиослэн асьсэ нылпиоссы аналтэмын луо. Но тӥляд пиосты вормонъёсынызы али ик паймыто.'''

— Ваньмыз асьсэлэн тыршемзы, ужез яратэмзы бордысь потэ. Бадӟымез — Даниил — астмаен туж курадӟиз. Кӧня уйзэ ӧй изьы, кӧня бӧрдӥ, та висён сярысь кӧня книга лыдӟи! Вазиськимы куасэн бызьылӥсьёсты дасясь тренерлы Василий Трошкинлы. Али но солы музъемозь йыбырттӥсько: ӧз кышка, котькыӵе адямиез спортсмен карыны луэ, шуиз. Зэм, бадӟым спортэн вырон понна трос коньдон но кужым кулэ. Но пие тыршиз, висёнэз но пумен палэнскиз. Даниил пыриськылӥз республикаямы но Россиын ортчылӥсь ӵошатсконъёсы. Дышетскыны но вуттӥськиз, химияя олимпиадаосы пыриськылӥз. Соку сое синйылтӥз Ижысь 41-тӥ лицейысь директор, дораз дышетскыны ӧтиз, но спортэз пие куштоно луиз. Дасэтӥ классын дышетскыкуз, химия предметъя республикаямы 3-тӥ инты басьтӥз, нош ӟуч кылъя дебатъёсын лицейысь командаен ӵош — 1-тӥ инты. Солэн мукет вормонъёсыз но трос, но тужгес бадӟымез — туэ Уфаысь нефтегазовой университетысь химия технологиосъя ёзэ дышетскыны пыриз. Ильяе шудэ шахматэн, бызьылэ куасэн. Туэ нырысьсэ пыриськиз Анапаын ортчем Россиысь шахматистъёслэн ӵошатсконазы, аслаз ёзъёсыз пӧлын 3-тӥ инты басьтӥз. Пиосы кыкназы но анай кылынызы умой верасько, котькыӵе удмурт ужрадын — мынам нырысетӥ юрттӥсьёсы, сотэк кыӵе мон удмурт кылъя дышетӥсь луысал?! Малпасько, удмурт кылъя дышетӥсьлэсь вормонъёссэ чаклано зэмос патриотъёсты будэтыны быгатэмезъя. Кӧняез гажаса дӥсялозы удмурт дэремез, валаса вераськозы удмурт кылын, котькытын дӥсьтозы вераны, мон удмурт шуыса.

Улонын мыным удалтӥз: Пичи Пурга школаын дышетскыкум, ветлӥ «Вуюись» ансамбле, соин ас вакытаз туж быгатыса кивалтӥз Людмила Михайловна Маркова. Россиысь кӧня городъёсты удмурт концертъёсын ортчим! Можга педучилищеын туж зол дышетӥсьёсы вал. Ваньзы — удмуртъёс! Соин ик удмуртлык лул-сюлэмам мур пыӵаз.

'''- Али тӥляд ваньмыз вань: яратоно ужды, сяськаосын котыртэм бадӟым коркады, валась семьяды, дорады ӵемысь вуыло шаерысьтымы но кунгожсьӧрысь эшъёсты, соосты котьку асьтэ ческыт пӧрамъёсын пумитаськоды, мунчое пыртӥськоды… Мар уг тырмы?'''

— Тазалык. Аслым но матысь адямиосылы. Собере, мон ялан ачим асме утчасько. Одӥг ласянь, со умой. Мукет ласянь, аръёс ортчемъя валасько ни: быгатоно гань-гань но улыны, нуналмысь улонлэсь аспӧртэмлыксэ, чеберлыксэ адӟыны.

'''* * *'''
Толон гинэ тодмо луиз, А. Герасимова УдГУ-ысь магистратурае менеджмент удысъя дышетскыны пыриз. Озьыен, огсыр улыны солы вазь на…

[http://elibrary.unatlib.org.ru/handle/123456789/23642 Герасимова А. В. Мон ялан асме утчасько/ А. В. Герасимова; записала Елена Миннигараева // Удмурт дунне. - 2015. - 2 октября. - С. 10,15. - (Тӧр шорын).]

'''За предоставление материала выражаем огромную благодарность редакции газеты
[http://www.udmdunne.ru/ "Удмурт дунне"]'''

[[Категория:Удмуртские звезды]]