Редактирование: Ачиз корась тӥр

Кыӵе ке но царствоын улэм-вылэм куанер крестьян. Вань улытозяз, со нокыӵе шулдырез но, шудэз но адӟылымтэ. Солэн куинь пиез вылэм: бадӟымез Иван, шоретӥез Павол, покчиез Петыр. Ӝуждалаен пӧртэмесь вылӥллям та вынъёс: Иван ӝужыт, Павол шоро-куспо, Петыр лапег.

Нэнэзы вазьгес кулэм. Бубызы, кулонзэ шӧдыса, пиоссэ дораз
ӧтем но тазьы верам:

— Пиосы, мусоосы. Мон быдэс даурме куанер улӥ, тӥледлы номыри но уг кыльы. Умой но шудо улонэз асьтэос утчалэ.

Бубызэс ватыса, та куинь вынъёс коркасьтызы кошкиллям. Сюрес кузя мыно, мыно — кытчы мынэмзэс асьсэос но уг тодо.

Тани соос бадӟым гурезьдоры вуиллям. Гурезь йылын кораськем
куара кылӥське. Вынъёс тамак кыскыны пуксиллям.

— Ойдолэ гурезь йылэ тубалом, кин меда озьы кораське? — чортэм Петыр.

Агайёсыз ӧвӧл но вырӟылӥллям. Петыр огназ тубем. Адӟем но
паймем: тӥр огназ кора, писпуосты погыръя.

— Эй, тӥр, тонэ учкыны луоз-а? — юам Петыр.

— Тани мон, учкы, — со доры лыктыса вазем тӥр.

Петыр тӥрез кутэм но мешоказ месэм. Гурезьысь васькемез бере,
агайёсыз юало, пе:

— Кин озьы кораське вылэм?

— Олокин, мон ӧй тоды, — шуэм Петыр.

Вынъёс азьлань вырӟо. Мыно, мыно — азьпалазы нош ик гурезь
кемдэ. Та гурезь выжые соос кӧлыны интыяськиллям. Гурезь йылын
кин ке из пильылэ: из пырыос уллань но палдыло.

— Ойдолэ учком, кин озьы из поттэ? — агайёссэ нош ик чортэм
Петыр.

— Ӧд ке жадьы, ветлы, — шуэм солы Иван. — Ми шутэтском.

Петыр гурезь йылэ тубем но паймем: кайло огназ гудӥське, из
поттэ.

— Учкыны луоз-а тонэ, кайло? — юам Петыр.

Кайло солэн матаз лыктэм: чук-чок! чук-чок! Петыр сое кутэм
но мешоказ месэм.

Васькемез бере агайёсыз юало талэсь:

— Мае бен отысь адӟид? Кулэтэм интые юнме бызьылӥськод.

— Отын кин ке из поттэ Кинзэ-марзэ ӧй тоды, — шуэм Петыр.

Ӵукна султыса, вынъёс азьлань вырӟиллям. Мыно, мыно — шур
дуре вуо. Учко, шӧмъяло: вуэз туж ческыт, пе.

— Ойдолэ та шур кузя тубом, кытысь потэмзэ утчалом, — чортэм
Петыр.

— Ку вуод шур йылэ? Тон шузи ке, мын, утча, — шуэм Павол.

Петыр кошкем. Мынэм, мынэм но шур йылэ вуэм. Адӟе: шур
пушмульы кӧмысь потэ.

— Ой, пушмульы кӧм, учкыны луоз-а тонэ? — юам Петыр.

— Учкы, — вазем кӧм.

Петыр сое кутэм но мешоказ месэм. Агайёсыз доры вуэмез бере,
солэсь юало:

— Я, мае адӟид?

— Шур йылэ ӧй вуылы, — шуэм Петыр.

Вынъёс нош ик вырӟиллям. Мыно, мыно — городэ вуо. Татын
огпумысь вераськем кылӥське: эксэйлэн азбараз бадӟым лабрес тыпы
сылэ, пе, — дворецез пеймыта. Сое кораса погыртыны быгатӥсь муртлы эксэй уно кузьым сётоз но сое эмеспи кароз, пе.

— Асьмеос ум быгатэ меда? — агайёсызлэсь юам Петыр.

— Ойдо бен учком, оло, удалтоз, — шуиллям соосыз.

Вынъёс эксэй доры мынӥллям. Татын, азбарын, калык туж трос
вылэм ини. Уд но вала, мар таӵе: огезлэн нырыз вандэмын, мукетызлэн — пельыз, куинетӥезлэн синмыз пыльтчытэмын.

— Нош малы тӥ сыӵеесь? — юам Иван.

— Ми та тыпыез вандыны кутскеммы вал но — ӧм быгатэ. Тӥни
со понна милемды эксэй тазьы сӧсыръяз.

Соку Иван вынъёсызлы верам:

— Асьмеос но ум быгатэ, йыр быгылес дыръя ӝоггес кошконо
татысь.

— Быгатом, ум кошке! — пумит луэм Петыр.

— Ма тон вераськод, зырымесь! — ӝож серектэм одӥгез ныртэм
кылем пи. — Уть ай, кыӵе тазаесь пиос татын, соос но та тыпыез
погыртыны ӧз быгатэ. Тод тон: одӥг улзэ ӵогид ке, со интые сю
улвай потоз. Кытын ай тыныд, ляб луллы, таӵе батырез погыртыны!

Петыр, номыр куаретытэк, эксэй доры пырем, "ми со тыпыдэ
погыртом" шуэм.

— Учке бен асьтэос: ӧд ке погыртэ, мон тӥледды но уг жаля,
озьы ик ныртэм, пельтэм кошкоды, — тодытэм эксэй.

Иван тӥрзэ кутэм но одӥгзэ улваез палгытэм. Со интые сю выль
улвай потэм. Павол ӵогем — нош ик сю улвай ӝужам. Эксэй таослэсь нырзэс вандыны дасяськем ини.
Петыр сюлворем:

— Вить ай, эксэй. Мон ӧй кутскылы на. Ӧй ке быгаты, соку
котьма кар ини. Агайёсме со дырозь эн йӧтылы.
Петыр мешокысьтыз ачиз корась тӥрзэ поттэм но тыпые ӵогыса
косэм:

— Кора, тӥре!

Тӥр кутскем ук кораны!
Ачиз ик кора, пильылэ, артанае люка. Вань калык паймыса сылэ:
ма та таӵе? Дворецаз югыт луэмез шӧдыса, эксэй но учкыны потэм.
Со ас синмыныз адӟем, кызьы лабрес батыр тыпы зыб! пограз. Соку
Петыр кыллись писпу шоры возьматэм:

— Тани, эксэй, косэмдэ быдэстӥ. Сӥземдэ сёт ни табере.

Эксэйлы ваньбурез жаль потэм. Уката ик нылзэ олокинлы, куанерлы, сётэмез уг поты.

— Кылзы ай, Петыр, — шуэм солы эксэй. — Та азбар шорам ик
ноку куасьмисьтэм колодча гудыны быгатӥд ке, нылме но, ӝынызэ
царствоме но сёто.

— Та ужед понна гинэ дун басьты но, татысь кошком ини, —
вынызлэн гырпумаз мырӟылэм Иван. — Кызьы тон таӵе гурезьысь
ву поттод?

— Ум, ум кошке, гудом но ву поттом, — бадӟым агайзэ буйгатэм
Петыр.

Мешокысьтыз кайлозэ поттыса, со муэз гудӟалтэм но косэм:

— Ойдо гуд, кайлое!

Уж пурӟем ук! Кайло гудэ, сюй гинэ пазяське, изъёс гинэ палдыло. Гудӥз, гудӥз, нош вуэз ӧвӧл. Петыр кайлозэ дугдытэм, мешокысь пушмульы кӧмзэ поттэм но сое колодча пыдэсэ куштыса косэм:

— Азвесь вудэ потты, трос потты, пушмульы кӧмы!

Со кӧмысь синкыли кадь чылкыт ву потыны кутскем. Ӝоген быдэс
колодча вуэн тырмем, пачыл потыса, азбаре ӧръяськем.

Азбарысь вань люкаськемъёс пыд йылысьтызы пограмоназы паймиллям, нош эксэйлэн синъёсыз кымесаз тэтчиллям. Тазьы луонэз со уг малпа вылэм угось, нош сӥземзэ сётэмез потымтэ.

— Эшшо одӥг ужез лэсьты на, — Петырез косэм со. — Тазэ быдэстӥд ке, вань сӥземме сёто ини. Кылзы: татын, кыдёкын ик ӧвӧл, нюлэс вань. Отын одӥг великан кузёяське, нюлэскы пыраны нокинэ
уг лэзьы. Сое вормид ке, мыным эмеспи луод.

Петыр чоз-чоз кариськем но вамыштэм. Эксэй шумпотыса киоссэ посэ, пе: "Я, табере тон великан ки улысь луло уд поты ни!"

Петыр, нюлэскы вуыса, тӥрзэ косэм:

— Кора, тӥре, юн кора, писпуосты погыръя!

Нюлэс куашетыны кутскем. Пужымъёс, кызъёс, сильтӧл дыръя
кадь, тучыр-тачыр пограло.

— Кин вуиз мон котырам? Тараканэз сямен паньгато! — бурсэ
великан, Петырез лёганы выре. Петыр шулё музэн палэнске.
Нош тӥр кора но кора, писпуос куашкало но куашкало. Map
карыны ёрмыса, великан сюлворем:

— Дугды, Петыр, нюлэсме корамысь, добраме быдтэмысь! Мон
тыныд сётскисько.

Петыр эксэй доры берытскем но верам:

— Великанэз мон ворми. Табере тон ас кылдэ быдэсты. Ӧд ке
быдэсты, мон тонэ куинь кусӥн куасало.

Эксэй ляльчиоссэ нюлэскы тодыны ыстэм.

— Кин тӥледды татчы лэзиз? — юам великан.

— Петырен эксэен лэзизы, — шуиллям ляльчиос.

Великан, йырзэ ошыса, мур лулскем:

— Я, табере пу ворттэ ини. Петыр монэ вормиз.

Ляльчиос пуэн бертӥллям.

— Иське, Петыр зэмзэ ик вормем! — дыректэм эксэй.

— Вормем. Ачиз великан вераз.

Эксэй сётэм кылзэ быдэстэм: Петыр солы эмеспи луэм. <ref name="r1">[http://elibrary.unatlib.org.ru/handle/123456789/3895 Удмурт калык выжыкылъёс = Удмуртские народные сказки / суредъёсыз Менсадык Гариповлэн ; люказы но азькылзэ гожтӥзы Д. Яшин но Р. Яшина. - Ижевск : Удмуртия, 2000. - С. 101-105.]</ref>

=Литература=

<references />