Редактирование: Сӥзьыл курбон куриськон

Остэ, Инмаре-Кылдысинэ-Куазе, Чола воршудэ! Учкы, Инмаре,

вылысен пиналъёсыд вылэ ӟеч синмыныд.

Ӟеч кидыс пазьгон дыръя сӥзем такапидэ сётыськом ни!

Тӧдьы дӥсен-кутэн, ӟеч бускелен, семьяен-ватагаен, одӥг кылысь-ымысь,

кылтэк-куаратэк, ӵош сиыса-юыса сётыськом! Кияд-пыдад басьты, Козма, Инмаре.

Вужзэ сииськом, выльзэ тынэсьтыд курыськом. Кизем ӟегмы ожо

выжы кадь мед выжыялоз, ӟеч мед толъёз, дас кык выжыен мед выжыялоз,

куатьтон куроем мед пушъёз; камыш куроен мед будоз, дас кык

ёзъем мед будоз; азвесь шепъем, зарни тысьем, син тырмымон, ки бырттымон

ик мед ӝутскоз. Куинь пол вандыса, кырым тырмымон мед луоз.

Культо урдсы культо, ючис урдсы ючис, кабан урдсы кабан мед пуксёз. 

Ӵукна-ӝытазе мылысь-кыдысь, кылтэк-куаратэк ужаны-люканы юртты, Инмаре.

Гужем лек тӧллэсь-зорлэсь возьма! Обиняд нуыны ӟеч валъёстэ

сёт! Куасьтыку тыллэсь-пулэсь, кыжлэсь-черлэсь, тушмонлэсь, 

Инмаре-Кылчинэ-Куазе, Чола воршудэ, возьма!

Ошмес воршуд, мувыр воршуд, тон но ӵашшанюня, Илья Пророк,

Кузьма-Демьян ӵош сиыны-юыны лыктэ, козмалэ. Сябась!!!

Ӟеч животмес но сьӧсьлэсь-кыжлэсь, черлэсь-тушмонлэсь, вуэ-нюке

усемлэсь, писпу пограмлэсь возьмалэ, Инмаре-Кылдысинэ-Куазе, Чола воршудэ.

Ӵукна живот сюдыкузы, пиналъёс юрго валэн, зӧк сюро ошпиен, 

зарни сюро, азвесь гонъем такаен мед пумиськозы. Сёт, Инмаре!

Ми, пиналъёс, ичи тодыськом, тон ачид, Инмаре, тод но, шонерты но. <ref name="r2">[http://elibrary.unatlib.org.ru/handle/123456789/1403 Ингур : удмурт фольклоръя лыдзет : шор ёзо школаослы / люказ, радъяз но валэктонъёссэ гожтиз Т. Г. Владыкина. - Ижевск : Удмуртия, 2004. - С. 265-266.]</ref>

''Глазов у.''

=Литература=

<references />