Редактирование: Усто вуриськись

Улэм-вылэм одӥг адями. Солэн висись кышноез но пиез вылэм.
Улӥллям соос шулдыр, куспазы тэрыса, ог-огзэс яратыса, одӥг но
керетытэк, ог-огзэс пыӵкылытэк. Витьымтэ шорысь со адямилэн
кышноез кулэм. Ватӥллям кышнозэ, трос гинэ синвузэс кисьтӥллям, 
малы ке шуоно, та гуртысь самой умой, ужез яратӥсь, адямиез
гажась мурт вылэм со. Туж жаль потэм анаез яратоно пиезлы. Трос
синвузэ кисьтэм со вордэм анаез понна, ялан тодаз возем солэсь
визьмоесь кылъёссэ, дышетэмъёссэ. Кытчы гинэ мынэ, мар гинэ
кылэ, мар гинэ адӟе — котьку син азяз пуксе анаез, солэн гажась
тусбуез, серекъясь ымнырыз.

Кема ик улытэк, солэн атаез тупалась кыкетӥ кышно ваем. Сюранайзылэн 
нокытӥыз но пилэн аслаз анаеныз уг ӵоша вылэм. Ноку
но либытэсь кылъёсын уг вазьылы солы. Урод, ужез уг яраты. Соин
ик пичи пи сое яратымтэ. Малы яратоз сое, куке сюранаез солэсь
дӥськутсэ но уг миськы, сиён но уг пӧзьты.

Та кышноеныз улыса, атаез но вунэтэм аслэсьтыз пизэ, уг но
учкылы со шоры. Бертэм бераз кышноеныз серекъяса, ӝӧк сьӧрын
сиськыса пуко, шулдыръясько.

Тазьы улыса-вылыса, пичи пилэн сюранаез эшшо но уродгес луэм.
Пизэс кызьы ке но быдтон сярысь вераське. 

Одӥг ӵукна соос картэныз 
пилэн чаяз яд поныны вераськиллям но озьы ик лэсьтӥллям.
Пичи пи соослэсь вераськемзэс кылэм но чайзэ юымтэ. 

Кыкетӥяз вӧй интые табаняз яд поныны вераськиллям. Таяз но лушкем вераськемзэс 
кылэм пичи пи, соин ик табаньзэ сиымтэ. 

Куинетӥяз сьӧд нюлэскы нуыса кельтыны вераськиллям. Таяз но кылэм вераськемзэс 
пичи пи. Вазь ӵукна ик султэм но шур улэ векчи излы
васькем. Кисыоссэ изэн тырмытэм но берен гуртаз тубем. Бертэм
бераз атаеныз нюлэскы кошкиллям. Мыныкуз пичи пи кисыысьтыз
векчи иззэ куяса мынэм. "Пие, тон татын ул, мон отӥ пыдлогес
коран инты утчаны мыно, монэ вить". Озьы шуэм атаез но кошкем.
Нош пи сое витьыса улымтэ ни — куям изэз кузя дораз атаезлэсь
азьло бертыса вуэм.

Кӧня ке нунал ортчыса, пи аслыз уж утчаны кошкем. Вуэм одӥг
гуртэ, отчы ужаны кыльыны кариськем. Одӥг вуриськись дорын
дышетскем но туж усто вуриськись луэм. Мукет гуртэ но вуэм со
сярысь ивор. Та иворез кылэм солэн атаез но. Лыктэм со гуртэ,
пырем пинал вуриськись доры. Косэм сое дукес вурыны. Вуриськись 
соглаш луэм. Собере кунозэ ӝӧк сьӧраз пуктэм, ческыт сиёнъёсын куноятэм.
Сиськем беразы вераськыны кутскиллям. Пиез пырем бераз ик
тодмам атайзэ, нош атаез тодмамтэ пизэ, малпамтэ но, со пиез шуыса.
Вераськыны кутскем беразы тодазы ваиллям улэм-вылэмзэс. Пинал
дырыз сярысь верам но пияш, атаез соку ик бӧрдыны кутскем. Пизэ
простить карыны курем. Пиез простить карем атайзэ. Атаез умой
мылкыдын бертыса кошкем дораз. <ref name="r1">[http://elibrary.unatlib.org.ru/handle/123456789/3895 Удмурт калык выжыкылъёс = Удмуртские народные сказки / суредъёсыз Менсадык Гариповлэн ; люказы но азькылзэ гожт?зы Д. Яшин но Р. Яшина. - Ижевск : Удмуртия, 2000. - С. 141-142.]</ref>

=Литература=

<references />