Редактирование: Куанерлы удалтӥз

Починкае кык удмуртъёс улыны лыктӥзы: одӥгез куанер, мукетыз — узыр. 
Огпол куанер мурт узыр доры тыл курыны мынӥз.
Узыр мурт сое тышкаськиз, тыл сётытэк, дорысьтыз улляз. 

Куанер йырзэ ошыса кошкиз. Вукоысь тылэз адӟыса, со отчы вамыштӥз.
Вуко корка доры вуиз но кылзыны кутскиз. Ӵапак соку отын куинь
вумуртъёс пуко но верасько вал. Одӥгез соос пӧлысь шуэ:

— Адямиос ялан татчы ветло, нош кирос пуктыны вунэто. Со
понна мон вуколэсь тыметсэ кырылӥсько.

Мукетыз шуэ:

— Гуртын куинь вын-агайёс огазьын уло. Котькудӥзлэн быдэн
корчага коньдонэз вань. Со коньдонзэс мон корказь выж улэ ватӥ.
Табере уг шедьто ни!

Ваньзэ тае куанер удмурт кылӥз но шыпытак гинэ дораз бертӥз.
Ӵуказеяз гуртэ мынӥз но вера:

— Вукоез мон тупато, тыметсэ солэсь огпол но уз кыры. Кӧня со
понна коньдон сётоды?
Солы веразы.

Сьӧраз кӧня ке ужасьёсты басьтыса, тыметэз со тупатӥз, вылаз
кирос кораз. Со дырысен тыметэз ӧз ни кырылы.

Тыметэн ужез быдтыса, воргорон куинь вын-агайёс доры лыктӥз
но шуэ соослы:

— Мон тодӥсько, тӥляд куинь корчага коньдонды вань. Но тӥ уд
тодӥське, кытчы ватэмын соос. Одӥгзэ корчагаез мыным сётӥды ке,
кыксэ тӥледлы вутто.

Братъёс кӧня ке малпаськизы но соглаш луизы. Воргорон корказь выж 
пулъёсты ӝутӥз но соку ик коньдон поттӥз. Кызьы вераськемын вал, 
озьы ик каризы. Огзэ корчагаез басьтыса, куанер удмурт
дораз, починкае, бертӥз. Со-та басьтӥз, хозяйствозэ тупатӥз, собере
дораз куное узыр бускельзэ ӧтиз. Соиз шӧдӥз вал ини, куанерлэн
ужъёсыз тупатскизы шуыса, соин ик бускелез доры мыноно кариськиз. 
Корка пыриз но чылкак абдраз: куанерлэн оломаиз но вань.
Соку юа со куанер удмуртлэсь:

— Кытысь сомында коньдон шедьтӥд?

Куанер шуэ:

— Ваньзэ мыным Инмар сётӥз. Тон кадьёслэсь ӟечсэ уд возьма
ук, тылзэс но жаляло бере.

Та дырысен узыр воргорон куанер азьын пыриськыса улыны кутскиз, 
сое шудоен лыдъяз. Ачиз солы туж вожъяськиз ке но, лекъяськыны но 
вожвылъяськыны ӧз дӥсьты. Со но Инмарлы оске вылэм уга. <ref name="r1">[http://elibrary.unatlib.org.ru/handle/123456789/3895 Удмурт калык выжыкылъёс = Удмуртские народные сказки / суредъёсыз Менсадык Гариповлэн ; люказы но азькылзэ гожт?зы Д. Яшин но Р. Яшина. - Ижевск : Удмуртия, 2000. - С. 147-149.]</ref>

=Литература=

<references />