Титова Елена Михайловна

Мынӥсезлы Инмар бакельзэ сётэ

Титова Е. М.

Титова Елена Михайловна – экономика наукаосъя кандидат, Ижысь гурт удысъя академиысь доцент. Вордӥськиз Пичи Пурга ёросысь Гожня гуртын. Гурт удысъя институтысь зооинженерной факультетэз йылпумъяса, ужаны кутскиз Пичи Пурга ёросысь «Молния» колхозын зоотехник-селекционер луыса, собере «Уромское» ОПХ-ен кивалтӥсьлэн юрттӥсез вал.

1987–1990-тӥ аръёсы Елена Титова Москва улосысь Балашиха городысь Гурт удысъя институтын аспирантураын дышетске но, диссертацизэ утьыса, Ижысь гурт удысъя институтын ужаны кутске.

- Елена Михайловна, кин со, мар со экономист, школаын дышетскыкуды тодӥськоды вал-а?

- Уг. Соку мынам туж зол потэ вал студентка луэме: котькытчы дышетскыны мед мыном, одно ик вылӥ образование мед басьтом.

Атай Гожня дорысь чугун сюрес станциын кивалтӥсь вал, мемее отын ик кассирын ужаз ке но, вань гурт калык сямен ик пудо-животэн улӥм. Ми – куинь пиналъёс, мон – самой бадӟымез. Бадӟымезлы уж сюре ини. Мемее-атае уже кошко, пудо утён, корка утялтон, сузэр-вынъёсме учкон – ваньмыз мон вылын. Мемей, шуисько вал, дунне вылын мукет улон но вань ведь. Та бакча, пудо-живот чырты выжые вуымон ук. Соингес но, дыр, пичиысен ик дышетскон сярысь малпаськыса улӥ.

- Нош маке гожъяськонэн вырыны мылкыдды ӧз ӝутскылы-а?

- Ӧз. Мон школаын математикаез, физикаез туж яратӥ. Ёрос олимпиадаосы школаысьтымы ньыль пиос пӧлын огнам пыриськылӥ, нырысетӥ интыосыз басьтылӥ. Ӧжытак суредаськыны выри. Школаын суредаськисьёслэн адӟытоназы вормеме но вань.

Ноку но уг вунэтӥськы нырысетӥ классэ мынэмме. Мугорын эшъёсылэсь ӝужыт вал ке но, сентябре вордӥськемын шуыса ӧз басьтэ. Бӧрдыса куриськи. Мемее мыным курень басмалэсь дэрем, тӧдьы бӧзлэсь, дуръёссэ чебер пеперъяса, айшет вуриз, йырам – бантикъёс. Одӥг пол школаысь дэмен бертӥськом. Сюрес вылысен чугун сюрес тупатъясьёслэн бригадиренызы Шундӥ агаен пумиським. Со милемыз дугдытӥз но юа:

- Ну-ко вералэ ай, пиналъёс: курег, кык пыд йылаз сылыкуз, кык килограмм кыске, нош пал пыд йылаз султӥз ке, кӧня кыскоз?

Эшъёсы чал-чал сыло, мон шуи:

- Кык килограмм ик кыскоз.

- Вот тынэсьтыд пӧрмоз, быгатод дышетскыны, - шуиз.

Со Шундӥ агайлэсь верамзэ ноку но уг вунэтӥськы.

- Малы нош одно ик Гурт удысъя институтэз бырйиды?

- Ма, классысьтымы куать кузя пиос отчы мынӥзы но, мон но сьӧразы калъяськи. Атай косэ вал мыныны Ульяновске яке Горькие чугун сюреслы инженеръёсты дасясь институтэ. Гуртысь нокытчы но потылэмын ӧй вал бере – кышкай, чутрак пумит кариськи. Гурт удысъя институтын соку куинь гинэ факультет вал: механизация, агрономия но зооинженерия. Табере институт олокыӵе но специалистъёсты дася ни. Соку мон бырйи зооинженерной факультетэз, нош али басьтыны турттысал кык но, куинь но специальность. Институтын нырысь арзэ дышетскыны секыт йӧтӥз. Ми вакытэ ведь школаын географиез но, историез но, физикаез но, математикаез но удмурт книгаосъя дышетӥзы. Ӟуч кыл кунсьӧр кыл кадь вал. Институтысь вылӥ математикаен дышетӥсьмы сюлмыз вӧсь луыса ик шуылӥз:

- Леночка, дышетскы ук вераськыны ӟуч кылын!

Ваньзэ умой верасько но, ачим но шӧдытэк, кыл вискам удмуртсэ пыртӥсько. Дышетӥсь мыным, «5» интые, «4» пуктыса лэзе. Ачиз нош дорам заочникъёсыз лэзёз вал: со, пе, тӥледлы ваньзэ умой валэктоз, контрольнойёстэс но лэсьтыны юрттоз. Трос юрттӥ. Со понна студентъёс конфет басьто ке, сыӵе шумпотӥсько вал.

Аслым ачим шуи: одно ик ӟуч кылэз ӟеч тодыны тыршо. Быдэс ар гуртам ӧй бертылы, ӟучен гинэ вераськи. Собере трос лыдӟиськисько вал. Озьы чаляк дыши, дыг-мог ӧй луылы ни.

Институтын дышетскон вакытам, отысь преподавательёс сыӵе йӧноесь, визьмоесь, интеллигентноесь вал. Мыным туж удалтӥз. Ижысь гурт удысъя академия ведь кылдӥз Москваысь вал вордонъя институтлэн базаез вылын. Отысь профессоръёс, тодосчиос ваньмыз сямен Иже лыктӥзы. Вашкала, зол калык. Лекциоссэс сыӵе тунсыко лыдӟылӥзы – ыммес усьтыса кылзылӥм. Туж гажаськом вал соосты.

Институтын мон комсорг но вал, спортэн но выри. Бызьылонъя нырысетӥ интыосыз но басьяме вань. Улонэ весяк бызьылыса ортче ни. Азьвыл вожъяськылӥ гань-гань, дыртытэк ветлӥсьёслы. Малпалляй: мӧйыми ке, мон но сыӵе ик луо. Кыӵе вал, сыӵе ик кыли. Весяк мае но лэсьтыны-вуттыны турттыса бызьылӥсько.

- Туннэ лэсьтэменыз буйганэз уд тодӥське угось.

- Калзы быриз ини, удмурт кадь зӥбытгес лу шуыса. Ма, кызьы мон зӥбытгес луом, шуисько, монэ еврей но ӟуч выжыос дышетӥзы бере. Студентка дыръям ик туж потӥз Москваын дышетскеме. Заочно ӧвӧл – очно. 1980-тӥ аръёсы аспирантурае пырыны туж секыт вал. Целевой направлениен. Экономика удысэ направление одӥг интылы гинэ, нош мыныны малпасез – дас одӥг. Мон отчы сюри! Бадӟым тау кареме потэ дышетӥсьмылы Револьд Семёнович Трикозлы. Со монэ трос студентъёс пӧлысь синйылтӥз, мынэсьтым пӧрмоз шуыса, тодосчиослэн кенешазы оскытӥз. Аспирантурае ми пӧртэм интыосысь 15 кузя пырим вал, 5 мурт гинэ диссертацизэ утьыны кылиз на. Соос пӧлысь куинез - профессоръёслэн нылпиоссы. Озьы йырыным но, пыдыным но наукае выйи. Сыӵе со мыным яраз, тунсыко потӥз.

- Диссертациды мар сярысь вал?

- Гуртын сӥль-йӧл-нянь будэтӥсьёс, со ваньбурлэсь сиён-юон лэсьтӥсьёс, собере соин вуз карисьёс куспын герӟетъёс сярысь. Совето власть вакытэ экономика одӥг программая ужаз. Туала кылын вераса – холдинг компания выллем, но соосын государство кивалтӥз. Рынокъя экономика вакытэ со ваньмыз куашказ. Табере кызьы луыса кошке: сӥлез, йӧлэз, нянез сиён-юонлы дасясьёс но соин вуз карисьёс туж умой уло, нош самой кырсь ужзэ быдэсъясьёс – гурт калык – туж урод. Та куинь удысъёс одӥг уставен, ӵош ужасалзы ке, ваньмыз интыяз пуксьысал.

- Со сярысь кӧня верасько ини но, уж интыысьтыз уг вырӟы.

- Крестьян калыклы государство золгес юрттыны кулэ. Огъя программа кутоно. Посредник шуонъёс соосты алдаса-зӥбыса медаз возе. Тани Европаын, кылсярысь, бюджетысь 48 процент коньдон висъяло гурт удыслы, нош асьмелэн – 16 процент гинэ. Америкаын но правительство фермеръёслы зол юрттэ.

- Туэ гужем гуртысь пудо-животъёсты лыдъян ортчиз. Тодмо луиз: гуртъёс кӧшкемано кадь куашкамын. Табере со сярысь вылӥ чиновникъёслы лыдпусъёс верало ини. Оло, азьланяз маке но малпалозы.

- 1980-тӥ аръёслэн пумазы ведь гурт калык кыӵе умой улыны кутскиз вал. Малы? Гуртын поттэм ваньбурез 85-90 процентсэ государство басьтылӥз. Одно ик чаклалоз вал ваньбурез поттыны кӧня кужым понэмез. Табере нянез басьтыны кылдӥзы аграрной биржаос. Соос нокыӵе налог уг тыро, барышсы 100 процент пала луэ. Кытын, ку вал сыӵе мыдланес ужан? Татын югдурез ӝегатскытэк тупатыны кулэ.

«Уромское» ОПХ-ын ужакум, кыӵе отын ӟеч техника вал. Сое ваньзэ государство басьяз. Калык тыршыса, сюлмысь ужаз. Табере сыӵе ӟеч хозяйство но куашкамын.

- Институт бере кӧня-о ужады гуртын?

- Арлэсь кема гинэ. Институтлэн кафедраяз кельто вал но, гуртэ куриськи. Малпай: гурт ужез умой-умой тодытэк, кызьы-о студентъёсыз дышетод. Шумпотӥсько: шонер лэсьтӥськем.

- 15 ар ӵоже ини институтын дышетӥськоды. Студентъёс зол-а воштӥськизы?

- Зол. Ми азьвыл, дышетсконамы сяна, мукет интыысь но тросгес тодон-валан басьтон сярысь сюлмаськиськом вал. Театръёсы, пӧртэм ӝытъёсы ветлӥмы. Нош али соку ик адӟемзы потэ дышетскемзылэсь пайдазэ: кыӵе специальностья кыӵе ужын тросгес уждун басьтыны луоз. Мар карод: улон озьы дышетэ.

- Лекциостэс тӥ Гурт удысъя академиын гинэ лыдӟиськоды-а?

- Уг. «Азвесь» банк усьтэме монэ туннэ ке но сюдэ. Банк ужъя лекциосме Тюмень улосын но, мукет интыосын но лыдӟылӥсько.

- Мон али ке но паймисько на тӥледлы банк усьтыны дӥсьтэмдылы.

- Институтамы ужаны кутскыкум, уждунъёс туж ичиесь вал. Кызьы ке но улоно ук. 1992-тӥ арын выльдӥськон кутскиз, ваньмыз маке но лэсьто. Банкъёс трос усьтӥськылӥзы. Малпай: удмурт калык понна банк усьтоно. Тау карисько Гурт удысъя но сиён-юонъя министерствоысь финансъёсъя отделэн кивалтӥсьлы Николай Илленковлы. Солы вазиськи но, банк усьтыны бюджетысь коньдон висъяз. Изёнэз но тодытэк ужай. Лицензилы Москвае Центральной банке ветлӥ. Сётытэк кема возизы - кузьмаськоно луиз. Котырам удмурт ужбергатӥсьёсты люкай. 18 муртэ шедьтӥ вал но 5-сэ гинэ кутӥ. Соос банке коньдон сётыса пыризы, учредитель кариськизы.

Кык ар ужаз банкмы. Ёросъёсын но ньыль филиал усьтӥм. Понэм коньдонлэн процент барышез мукет банкъёсын сярысь ичигес ке но вал, калыклэсь уксёзэ дырыз дыръя, ӝегатэк берыктылӥ. Кыӵе мыным тау карылӥзы. Соку ведь сыӵе вакыт луиз - банке понэм коньдон процентэн гинэ но улыны луиз: дивидендъёс 200 процент тырылӥм. Банкмы коньдонэн юрттӥз Кузебай Герд но Ашальчи Оки нимо премиос кылдытыны, «Удмурт кенеш» огазеяськонэз возьыны.

Удмуртиын со вакытэ 28 банк лыдъяськиз ке но, «Азвесь» банкамы трос коньдонэн пырыны медо вал ни «Удмуртнефть», «Пермь-сайгас» холдинг но, мукет узыр компаниос но. Ужбергатӥсьёсы-учредительёсы ужаны ӧз сётэ: пумит луизы, кышказы. Кӧня соослы валэктыны выри - ӧз кылзӥське. Али ке но банкмы улысал ай, удмурт калыклы кӧня юрттысал. Туж алама со - асьмелэн кышканмы.

Банкез быдтыны туж секыт. Ми усьтӥським вал 1992-тӥ арын, нош ворсазы 1998-тӥ арын гинэ. Мон кошкем бере куать ар ӵоже сое возьыны выризы на. Ма, банк ужез ӟеч валась муртъёсты ужбергатӥсьёс уллязы но, кызьы сое возьыны быгатод на?

Банкен выреме чик уг жаляськы. Верай ини: монэ со туннэ ке но сюдэ. Огвакытэ сбербанкъёсын ужасьёс но тросэз лекциосам ветлӥзы. Мон ведь табере со ужез гожъямъя гинэ уг тодӥськы.

- Кузпалды но экономист ӧвӧл-а?

- Ӧвӧл. Инженер. Нылмы мынам сюрестӥм мынэ: Ижысь гурт удысъя академиын экономикая факультетын ньылетӥ курсын дышетске. Школаысен юрист луэмез потӥз. Сюлмаськисько вал: юристлы ведь сомында законъёсты йырын возёно, нош со, мон сямен ик, дышетэм кылбурзэ гинэ но вунэтэ. Кужмысь ӧй кары. Улонын ведь ӵемысь малпамтэ шорысь луись учыръёс но юртто. Экономика наукаосъя кандидат луыны гожтэм уже мынам киысь кие ветлӥз. Кин куре - сётӥсько. Тросэз тау карылӥзы: туж ӟеч, валаса гожтэмын, пе. Совето власть вакытэ ведь аспирантъёслэсь тодон-валанзэс зол эскеризы, соос азе бадӟым куронъёс пуктылӥзы. Соин ик тодосчиосты гажазы, сӥлы каризы. «Азвесь» банк усьтыкум но, тодосчи луэме туж юрттӥз. Кин-о ай мыным, егит кышномуртлы, сюрес сётысал. Жаляса верано луэ: али тодосчиослы куронъёс улӥынгес ни.

Нылы сярысь ке верано, мон гуртын ӧвӧл дыръя кандидат ужме кин ке ваем. Нылы сое лыдӟем но мынэсьтым юа:

- Мама, кинлэн-о та гожъямез?

- Ма, тани ук гожтэмез - мынам.

- Ой, кыӵе тунсыко! - шуиз.

Озьы нылылэн мылкыдыз ӝутскиз экономист луыны. Умой: дышетсконаз мон но юрттыны быгатӥсько.

- Банк усьтэм сяна, тӥ Кун кенеше депутат луон понна но нюръяськыны дӥсьтӥды.

- 1994-тӥ арын «Удмурт кенеш» огазеяськон отчы пыриськыны куриз. Соку монэ трос калык тодӥз. Жаль, гурт калык пӧлын ортчыны инты ӧз сётэ: одно ик вормысал. Ма, городын но кыкетӥ интые потӥ. 2003-тӥ арын эшшо пыриськи на. Но соку ини быръёнъёс кырсь луизы - трос коньдоно муртъёс вормизы. Но мыным со нюръяськон туж трос сётӥз. Городысь огшоры калыклэсь кызьы но маин улэмзэ ӟеч валай. Асьмелэн политика но экономика ог-огенызы туж юн герӟаськемын. Урод со. Ма, пе, со луоз: одӥг мурт ик кытын ке генеральной директор но, депутат но. Конечно, со аслыз тупась законъёсты гинэ кутыны сюлмаськоз.

- Соин но, дыр, асьмелэн экономикамы ляб азинске?

- Одӥг мугез со бордысь но потэ.

- Политикаен выремды потэ на-а?

- Уг. Но татын мон маке ӟечсэ лэсьтыны быгатысал. Мон ведь калыклэсь но, ужбергатӥсьёслэсь но маин улэмзэс ӟеч тодӥсько, соосты валасько. 1993-тӥ арын монэ куро вал экономикая министр луыны. Но соку коньдонэн югдур секыт луиз. Кун кенешысь удмурт депутатъёс шуизы: вань янгышъёсты, пе, вылад куштыны быгатозы, эшшо удмурт карозы на. Мыноно вылэм. Сыӵе дыръя вӧзын ӝуткась, юрттӥсь кулэ.

- Мукет кунъёсы вуылӥды-а?

- Финляндие, Югославие, Америкае вуылӥ. Нокытын но асьме удмурт калык кадь чидась, ужаны быгатӥсь калык ӧвӧл. Сюлмы ик вӧсь луыса верасько: сыӵе мон сое яратӥсько но жалясько. Мукетъёс азьын асьмеды возьматыны ум быгатӥське. Со потэ, дыр, дӥсьтымтэмы бордысь. Тани монэ ведь нокин но ӧз косы банк усьтыны но, депутат луон понна нюръяськыны но. Тау Инмарлы: кутӥсез ӧй вал. Быгато-а, уг-а - мынӥсько. Атае мыным пичиысен шуылӥз: «Мын, нылы, быгатод».

- Нош асьмелэн ӵемысь кылыны луэ «пӧрмытод меда, нылы», «эшъёсыдлэсь пӧртэм эн выры» шуэмъёсты.

- Пиналлы ноку но озьы вераны уг яра. Озьы солэн аслыз ачиз осконэз кысэ. Мон туж шумпотӥсько нылпиоссэс дышетыны сюлмаськись анай-атайёслы. Вылӥ дышетскем - котькуд калыклэн самой дуно капиталэз, ваньбурез. Макем трос луозы визьмо, дышетскем адямиосмы, сокем асьмеды дунъялозы, гажалозы.

- Одӥг гинэ ныл вордӥды шуыса, уд жаляське-а?

- Туж жалясько. Одно ик куинь пинал ваё шуисько вал. Но люкетӥзы дышетскон, банк усьтон, политика. Ваньмаз ик вутскыны уг луы вылэм. Озьы ке но малпасько: политикаын кышномуртъёс тросгес мед луысалзы, соку улонмы но йӧнгес луысал. Кышномурт ведь дунне шоры туж паськыт учкыны быгатэ: нылпиезлэн но, картэзлэн но, эшезлэн но, бускелезлэн но синмынызы.

- Америкае малы ветлӥды вал?

- 1999-тӥ арын «Школа лидерства» шуон программае сюри. Со - США-ысь библиотекаослэн конгрессылэн программаез. Туж узыр огазеяськон. Россиысь отчы 2 сюрс 500 мурт мынӥз. Пӧртэм юан-веранъёсты ортчыса, мон но сюри. Асьмелэн со ужрадэз тодосчи Людмила Христолюбова радъяз. Со юрттӥз.

- Америкаын малы тужгес но паймиды?

- Отын музъемлэсь пайда басьтыны туж быгато. Паймыса быри: совето власть вакытэ музъем ужын мар вал ӟечез, азьмынӥсез, отын ваньзэ сое куто. Чаянов, Мальцев академикъёслэсь но кылдытэм амалъёссэс куто. Асьмелэн нош со ваньмыз вунэтэмын.

- Елена Михайловна, кӧня мон тӥледыз тодӥсько, сыӵе ик весяк шаплы, котькытчы вутскыны тыршись адскиськоды, пельпум вылысьтыды аръёслэсь зӥбемзэс чик уд шӧдӥське на кадь.

- Пинал калыкен ужасько ук, ачим но пиналмисько. Наукая ужам но весяк азьлань мыныны сюлмаськоно луэ - бере кылем уг поты. Котькытчы вутскон понна азьвыл пыдын бызьылоно луылӥз, табере машина руль сьӧрын синтэм-пельтэм ветлӥсько.

Источник:

Титова Е. М. Мынӥсезлы Инмар бакельзэ сётэ / Е. М. Титова ; записала Галина Романова // Удмурт дунне. - 2006. - 15 сент. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"