Солдат пи келян гур

Дас тямыс арес, ой, луиз но — приём корка ӧтизы.

Приём корка ӧтизы но вес вылэ султыны косӥзы.

Вес вылэ султыны косӥзы но "годен!" шуса чабкизы.

"Годен!" шуса чабкизы но Горд армие басьтӥзы.

Горд армие басьтӥзы но — ульча шуддыртӥсь мон луи.

Ульча шулдыртӥсь мон луи но, калыкез бӧрӟытӥсь мон луи.

Калыкез бӧрӟытны мар гинэ но — сузэре-быратэ бӧрдозы.

Сузэре-быратэ мар гинэ но — дядяе-нэнэе бӧрдозы.

Горд Армие басьтӥзы но — горд чук шуккыны косӥзы.

Горд чук шуккыны косӥзы но вань тодэм калыклы адӟыны.

Вань тодэм калыклы мар гинэ но — сузэре-быратэ мед адӟоз.

Сузэре-быратэ мар гинэ но — визь сётӥсь дядяе мед адӟоз.

Визь сётӥсь дядяе мар гинэ но — яратон нэнэе мед адӟоз.

Та пала ке берытсконо — та пурт ныр йылаз мед усёз.

Бертом али, бертом али — пуртмы ныр йылаз бышкалскиз.

Сьӧд ивор но кылӥськиз ке, сюсьтыл ӝуатса вӧсяське.

Умой ивор кылӥськиз ке, — мульы басьтыса тӥсялэ.

Шуккем тугам тузон ке пуксиз, укнодэс пась карса тӧлатэ.

Тӧлэд тузонзэ ӧз ке басьты, тӧдьы тылыен маялтэ.

Та шуккем но, ой, чукъёсме ачим берттозь возелэ.

Ачим бертгозь возиды ке, салдат пиньыным ишкалто.

Ожмос-Пурга, Завьял ёрос.

Пырем потӥз, мылкыд кыскиз, пыратэк кошкем ӧз поты.

Ми пырем но, ой, понна но вожъёстэс тӥ эн вае.

Вожъёстэс ке тӥ ваиды, пыд улады лёгелэ.

Вожъёстэс ке тӥ ӧд вае, йыр йылады ӝутэлэ.

Йыр йылады ӝутэлэ но карманной час карелэ.

Карманной час карелэ но минутлы быдэ учкелэ.

Ӟеч мурт доры пырем бере, пуксён инты но дась вылэм.

Часэд ветлэ борддор кузя, уйзэ-нуналзэ чотаса,

Нош ми ветском коркась корка, кошкон нуналмес чотаса.

Вае али, сётэ али ныл дыр буртчин лентадэс.

Ныл дыр буртчинэз ке ӧвӧл, простой басмады но яралоз.

Простой басмады ке ӧвӧл, дэрем сӧзул но яралоз.

Вае али, сётэ али зарни ныдо молотгэс.

Зарни ныдоез ке ӧвӧл, пу ныдоез но яралоз.

Пу ныдоез ке, ой, ӧвӧл, пу пилён нушы но яралоз.

Вае али, сётэ али кортэн кыскам пукондэс.

Кортэн кыскамез ке ӧвӧл, пу пукон но яралоз.

Пу пуконды ке, ой, ӧвӧл, вандэм пуклё но яралоз.

Ой, секыт ук, туж секыт ук та молотэз ӝутканы!

Та молотэз, ой, ӝуткатозь, плитьтон пилаез кыскасал.

Плитьтон пилаез кыскасал но, сиён ческыт кошкысал.

Сиён ческыт кошкысал но, небыт валесын изьысал.

Небыт валесын изьысал но, ӵукна меми сайкатсал.

Ӵукна меми сайкатсал но — "султы, пие!" — шуысал.

"Султы, пие!" — шуысал но — "уже мыноно!" — шуысал.

Та чук вылам тузон ке пуксиз, ӟазег тылыен ӵушалтэ.

Монэ адӟемды ке потӥз, та чук шорам учкелэ.

Монэ адӟемды ке ӧз поты, ишкалтыса куштэлэ.

Ишкалтыса куштэлэ но тулыс ву сьӧры лэзелэ.

Тулыс ву сьӧры лэзиды ке, со мон доры вуылоз.

Со мон доры вуылоз но ӟеч ивордэс вайылоз.

Ӵошкыт-а но веськыт-а но та Кабыста ульчае.

Марӟан весь ке, ой, кисьтылӥд, одӥгез но уз ышы.

Шунтэм вӧй ке, ой, кисьтылӥд, няпыляк, ой, басьтылоз.

Льӧмпу садо, кызьпу садо та Кабыста ульчае.

Льӧмпу садо ке но, кызьпу садо ке но, со но кылёз ук мынэсьтым.

Оло кылёз, оло уз но — нарошно кылъёсме верасько.

Нарошно кылъёсме уг вераськы — верано кылъёсме верасько.

Жильыр-жильыр, ой, васькылоз Чимошур но вуосыд

Вож шашы но, ой, улъёстӥд, векчи из но вылъёстӥд.

Быльыр-быльыр, ой, васькылоз пӧсь синкыли вуосыд

Тӧдьы кышет, ой, улъёстӥд, ӵыжыт бам но вылъёстӥд.

Кабыста ульча улланес но — яблок ваське питраса но,

Яблок ваське питраса но, туган кыле бӧрдыса.

Вылэтӥ лобась сьӧд кырныжлэсь пыдзэ адӟись вань меда?

Сӥзьыл кошкись пинал пилэсь сюлэмзэ тодӥсь вань меда?

Убоен-убоен вож сугонэз йырыныз ишкыны туж ведь жаль.

Оген будэтэм пинал пиез гуртысьтыз поттыны туж ведь жаль.

Ой, алама, алама но вордӥськылэм юртьёсы,

Алама ке но, жаль потэ ук потылыса кошкыны.

Шурлэн кузялаз, ой, бакчае, солэн кенерез — вож бадьпу.

Куартэм кылёз, куартэм кылёз мерттылэм но садъёсы,

Питэм кылёз, питэм кылёз вордӥськылэм мемие.

Га-гак шуоз, ой, ӟазегед, пизэ душес, ой, басьтыку,

Ой-ой, шуоз, ой, мемиед, пизэ соддатэ келякуз.

Тулыс кошкись солдат пиез чырс кубистаен келяло,

Сӥзьыл кошкись солдат пиез кӧйӵыжыен келяло.

Ой, шар берга, шар берга но, лыз пияла шар берга,

Лыз пияла шар бергамъя берга та пинал сюлэмы.

Эмезь тылое пырид ке, чидалод-а сиытэк?

Туганэныд люкиськыкуд, чидалод-а бӧрдытэк?

Эмезь тылое пыри но мон ӧй чида сиытэк,

Туганэным люкиськыкум мон ӧй чида бӧрдытэк.

Ӝӧк вадьсады лампочкады ӵукна ӝужась шунды кадь,

Ӝӧк вылады ӝӧккышетты ӵукна усем пужмер кадь,

Ӝӧк вылады сиён-юонды шаерысь ваем емыш кадь.

Ӧм ведь пуксе, ӧм ведь пуксе ваньлэсь ваньзэ быдтыны.

Ӝӧк котыре пуксем бере ӟеч кыл вераны кулэ, дыр.

Нош ми, пинал, ой, визьтэмъёс, ӟеч кыл вераны ум тодке.

Пуксьыны ке ми валамы, потыны но мед тодом.

Меми, чаед пӧсь ӧвӧл шат, кызьы ымыд уг суткы?

Меми, мон тынад ӧвӧл шат, кызьы-о жаль уг поткы?

Луд кеч вордэм, ой, пиоссэ сиклы быдэ люкылэ,

Меми вордэм, ой, пиоссэ городлы быдэ люкылэ.

Жаль ук, жаль ук векчи изэз вал пыд улын костаны.

Жаль ук, жаль ук пинал йырез мурт дуннеын костаны.

Ӵоге ошем сьӧд пальтоме ӵогысь ӵоге вошъялэ,

Мынэсьтым кылем, ой, эшъёсме мон кадь потса учкелэ.

Лызо-вожо, ой, лемлето киям сэзъян чукъёсы,

Чаль али-ко, ой, мемие, кошкон чаркаме юыны.

Юэмед но потоз ай но, уд шедьты ни тон монэ.

Чале, чале, ой, эшъёсы, кошкон чаркаме юыны,

Юэмды но потоз ай но, уд шедьтэ ни тӥ монэ.

Ӟеч малпасез ми пала но, урод малпасез — ӧс сьӧры.

Усьты, меми, капкадэ но, кыткы, дядяй, пар валдэ:

Мон кошкисько, ой, табере жингыртӥсь езо сюрес кузя.

Ой, паськыт ук, туж паськыт ук та Кабыста ульчае.

Паськыт ке но, веськыт ке но, со но кылёз мынэсьтым.

Оло кылёз, оло уз но — веран кылъёсме верасько.

Ньыль сэрего, вить сэрего та Кабыста ульчае.

Кудаз меда, ой, сэрегаз кылёз яратоно туганэ?

Кабыста, Пичи Пурга ёрос.

Ӵукна-ӵук но потылӥд ке,

Пыддэ лысвуэн коттылод.

Со лысвуэз лысву ик но

Эн кожа тон, мемие:

Со, пе, луоз ялан ик но

Пиедлэн бӧрдылэм но синвуэз.

Чукна-ӵук но султылӥд ке,

Вуз-вуз вузоз пуныед.

Со пуныез пуны ик но

Эн кожалэ, нэнӥе:

Со, пе, луоз ялан ик но

Пиедлэн бӧрдылэм куараез.

Люкшудья, Завьял ёрос.

Из но, му но пилиське но —

Адямилы чидано.

Сьӧдо-сьӧдо пилемъёсыд

Васько, васько Кам кузя.

Эх, мемие, ой, дядие,

Мон но озьы ик кошко.

Уг лу ни мыным татын улны,

Туж ик мӧзмыт луиз ин.

Толэд ортчоз, гужемед вуоз,

Тылобурдо чир кароз.

Поезд лыктэ, туж зол шултэ,

Солдат вите дыртыса.

Ой, секыт ук, туж секыт ук

Та коркась но потонэд.

Ой, секыт ук, туж секыт ук

Та семьяен люкиськон.

Суронгурт, Шаркан ёрос.

Сьӧд нюлэстӥ

Сьӧд нюлэстӥ, ой, потыны

Сьӧд атас кадь вал кулэ.

Та даурме ортчытыны

Ачим кадь туган кулэ.

Сьӧд нюлэскы пырем бере,

Эх, сюлое кылиз усьыса.

Ой, сюлое ӧз кыльы усьыса но,

Ой, туганэ кылиз бӧрдыса.

Сьӧд нюлэскы пырем бере,

Бур кие кожем бере,

Ӟеч лу, ӟеч лу, яратонэ,

Люкиськиськом, лэся, ни.

Сьӧд нюлэс шоры, ой, учкыса

Сюлмы чутырак чиге.

Та сьӧд нюлэс, ой, сюрестӥ

Туганэ келяз армие.