Пужейёс, меньёс но пелёос

Котькуд ёрослэн вань аслыз гинэ тодмо, аспӧртэмлыко йылолъёсыз. Со йылолъёс юн герӟаськемын котырысь гуртъёсын. Тани басьтом Кияса ёросэз ик. Татын тросгес ӟучъёс уло ке но, чылк-чылк удмурт гуртъёс но вань. Тани соос: Салья (Старая Салья), Нӧднюк, Вужгурт (Нижняя Малая Салья), Починька (Верхняя Малая Салья), Куӵос (Кады-Салья), Уддяди (Карамас-Пельга), Вуж Тӥгырмен (Калашур), Выль Тӥгырмен (Дубровский).

М. Г. Атамановлэн «Удмуртская ономастика» книгаяз пусъемын куинь воршуд нимъёс: Салья, Мӧнья но Пельга. Салья воршудэ пырись гуртъёс пӧлы пыртыны луоз Сальяез, Вужгуртэз, Починькаез, Куӵосэз. Мӧнья воршудэ пыро Выль Тӥгырмен но Вуж Тӥгырмен гуртъёс, нош Пельга воршудэ пырисьёс уло Уддяди гуртын.

Туж тунсыко потӥз мыным та воршудъёслэн мае возьматэмзы но. Салья воршуд сярысь куинь тодосчи валэктон сётэ. Этнограф Д. К. Зеленин «салья» кылэз герӟа «сяла» кылын. Нош М. Г. Атаманов но В. Е. Владыкин тодосчиослэн малпамзыя «салья» тужгес вашкала кыл луэ. Со кылдэмын огъя уральской вакытэ. Пӧртэм финн-угор кылъёсты ӵошатыса, соос манси кылысь шедьто «сале» кылэз. Ваньды тодӥськоды Салехард карез. «Сале» люкетэз возьматэ, пе, «пужей» (олень) шуэмез. Озьыен, салья воршудэ пырисьёс «пужей» яке ӟуч сямен «олень» выжыысь калык шуэмез возьматэ.

Мӧнья выжы сярысь веракузы, та кылэз герӟало «мень» кылэн. Тани ӵыжы-выжы нимъёсын но кутӥське «ичимень» яке кен шуэмез возьматӥсь кыл. М. Г. Атамановлэн малпамезъя, Мӧнья воршудэ пырисьёс уло Вуж Тӥгырмен но Выль Тӥгырмен гуртъёсын. Озьыен, «мӧнья» кыл возьматэ ӵыжы-выжы нимез.

Пельга кылэз герӟало «пелё» кылын, ӟуч сямен сое «сыч», «сова», «филин» шуэмез возьматэ. Ёросысьтымы Уддяди гуртын улӥсьёс Пельга воршудэ пыро шуыса валэктэ М. Г. Атаманов. Вераны кулэ мукетсэ но. Революцилэсь азьло Уддяди гурт дорын вал на Уддяди-Салья гурт. Со сярысь гожтэ венгер тодосчи Бернат Мункачи. Солэн гожтэмысьтыз тодмо луиз, Нырысетӥ мировой война вакытэ Австро-Венгрие пленэ шеде та гуртысь солдат Евдоким Биктимиров. Солэсь со гожтэ фольклор материал. Со гурт сярысь материалъёс вань ёрос архивын но. Вераны кулэ, Салья гуртысь ньыль агай-вынъёс асьсэлы отчы корка пукто но улонзэс выль интыын азьланьто.

Историысь та чуръёс кылемын Уддяди гуртлэн Сальяпал нимыныз. Али со ульча ним выллем кылемын. Кияса ёросысь удмурт гуртъёс ог-огзылы кыдёкын ке но, та воршудъёсы пырись калык ог-огеныз кусып возе вылэм ини вашкадла дырысен. Со сярысь верало календарь нимъёс но. ? — тӥ декабре ми палан пусъё Сӥзьыл юон (ӟуч сямен Катерин) сэбедэз. Та нуналэ удмурт гуртъёсысь ӵыжы-выжыос Сальяе куное лыкто вылэм. Куное ӧтьытэк уг вуо, сальяос одно ик ӧтён ивор ысто.

19-тӥ декабре — Микола нуналэ — куноос мыно Уддядие. Ымусьтонэ — 7-тӥ январе — ас доразы куноосты возьмало вылэм Тӥгырмен гуртъёсын улӥсьёс. Тӥни озьы, вашкала дырысь та йылол вунымтэ, али но куноос гуртазы потало. Будӥсь нылпиос но мед азьланьтозы вылэм та ӟеч сямез .