Нянькина Лидия

Лидия Степановна Нянькина — удмурт гожъяськись но берыктӥсь, Россиысь гожъяськисьёслэн огазеяськонзылэн ёзчиез.

Улон сюресэз

Лидия Нянькина вордскиз Алнаш ёросысь Серп гуртын 1965-тӥ арын 23-тӥ куарусёнэ.

Апаезлэсь но солэн эшезлэсь адӟем карыса, пичи дырысеныз ик гожъяськыны кутске. Ужъёссэ «Дась лу!» газетэ ысъялля. Солы кылбуръёс, веросъёс гожъяны кельше. Озьы нылаш та газетлэн одӥгез азьветлӥсь юнкорез луэ. Школаысен туж яратыса литературно-творческой кружоке ветлэ.

М. Горький нимо литературной институтлэн удмурт ёзэтаз дышетскисьёс. Москва, 1986

Тямыс классэз йылпумъяса, Можга педучилищее дышетскыны пыре. Отысен но литературно-творческой кружоке ветлэ, гожъяськонзэ уг аналты. Ужъёссэ синйылтыса, сое егитъёс понна Удмуртиысь Писательёслэн огазеяськонэнызы радъям литературной семинаръёсы ӧтчало. 1984–1986-тӥ аръёсы Завьялово ёросысь школаын ужа, пичи классъёсысь пиналъёсты дышетэ. Нялтас одӥг ар Удмурт кун университетлэн удмурт филология ёзэтаз дышетске. 1986-тӥ арын Удмуртиысь гожъяськисьёслэн огазеяськонзы сое ыстӥз Москваысь М. Горький нимо литературая институтэ удмурт чеберлыко произведениосты ӟуч кылэ берыктон ужлы дышетскыны. Татысен кылбуръёс гожъямысь дугдэ, веросъёс бордын тырше, удмурт писательёслэсь произведениоссэс ӟуч кылэ берыктонын ассэ эскере.

Дышетсконзэ 1991-тӥ арын йылпумъяса, одӥг арзэ "Кизили" журналын валтӥсь редактор луыса тырше, 1992-тӥ арысен кема аръёс ӵоже «Инвожо» журналлэн редакцияз публицистика, поэзия но проза ёзэтъёсаз тырше.

2009-тӥ арысен «Кенеш» журналын ужаны кутске.

2003-тӥ арын Тюмень улосысь Ишим карын радъям егитъёслэн Всесоюзной литературной семинаразы пыриське. Солэсь прозазэ вылӥ дунъяло но, отысен ик Россиысь гожъяськисьёслэн огазеяськоназы куто.

Лидия Нянькина чеберлыко произведениосты удмурт, ӟуч кылэ берыктон бордын тыршонзэ азьланьтэ. Тужгес но со финн-угор авторъёсты удмурт лыдӟисьёс доры вуттон понна сюлмаське, озьы ик шаерысьтымы культура, искусство но литература удысын ужасьёс сярысь, гуртъёсын улӥсь огшоры, но калыклэсь маин ке висъяськись тыршисьёс сярысь статьяос, ваче син вераськонъёс гожъя, соослэсь улон-вылонзэс, сюлэмшугъяськонъёссэс сэрттэ-пертче.

Авторлэн куд-ог веросъёсыз 2002-тӥ арын удмурт литературая дышетскон программае пыртэмын.

Гожъямъёсыз сярысь

Туж тунсыко но аспӧртэмлыко солэн гожъяськон манерыз, сюжетъёсыз но геройёсыз.

Егит дырысеныз ик Л. Нянькина кылбуръёс но веросъёс гожъяны кутскиз. 1978-тӥ арын нырысетӥ ужъёсыз потӥзы "Дась лу!" ("Ӟечбур!") газетын. Озьы ик печатласькиз «Советской Удмуртия», «Удмурт дунне», «Удмуртская правда» газетъёсын, «Кизили», «Кенеш», «Инвожо», «Ашальчи», «Луч» журналъёсын.

1990-тӥ арын "Инвожо" журналын печатламын вал Лидия Нянькиналэн нырысетӥ повестез — "Небесная лилия". Озьы ик веросъёсыз пыртэмын егит гожъяськисьёслэн "Инӟарекъян" (1991) бичетазы но туала удмурт веросъёсын "Быльырам синкыли" (1997) антологие.

1996-тӥ арын "Ваёбыж кар" нимо веросъёсын книгаез потэ. Егит прозаиклэн та нырысетӥ бичетэз. Геройёссэ автор дуно Алнаш палъёсысьтыз шедьтэ, отчы сое котьку но кыске чылкыт сюлэмо, ужез гажась, шулдыръяськыны быгатӥсь, визьмо но нодлыко калыкез. Ужъёсаз тунсыкоесь витьымтэ шорысь пумиськись кылъёс, ӵошатонъёс, ваче пумит пуктылонъёс, калыклэсь мудрон кылъёссэ ас сяменыз кутон.

Лидия Нянькина XX даурлэсь берпуметӥ аръёссэ аслаз мертэтэныз мерта, сюлэмыз пирсэкъяса, шоканэз пытсаськымон лулӟылыса но жаляса гожъя со асьме каръян вакытмы сярысь, адямилэн сьӧд вирын сурам-пожам визь-лулыз сярысь, огназ улонэ ӝимем муртлэн шал-шал бушесь но кезьытэсь уй-нуналъёсыз сярысь. Прозаиклэн быдэс творчествоезлы инъет выллем луо кык пӧртэм улон интыос: бадӟым город аслаз валэктыны луонтэм сямъёсыныз, выросъёсыныз, катъёсыныз, лек но жоб кылъёсыныз, ог-огзылэсь палэнскем, or-огзэс ыштэм адямиосыныз («Мынам мусо папа Карлое», «Лара», «Ой, буралоз, буралоз...») но вордэм музъемезлэн гогы бордаз бурмем пичи удмурт гурт («Ваёбыж кар», «Шуд пуйы», «Шузи-Мази», «Имитация»). Автор шӧдэ, татын но адями кусыпъёс тэшкало ни шуыса. Пичи дырзэ тодаз вайыса, азьлозэ туннэеныз ӵошатыса, табере ни гуртсэ жалян мылкыдъёс улӟо. Нылкышно гожъясь созэ но, тазэ но улон интыосты валаны тырше, ӟиго-ӟуго учыръёсы шедем адямиослэсь малпан-мылкыдъёссэс сэрттэ-пертче. Кылсярысь, городысь яратонэз суредакуз, Л. Нянькина ӵем выже эротикае, юромо шудтэм, палдурес, мӧзмыт, осконтэм, воштыны луонтэм учыръёсты быръе. Нош гуртысь яратон сярысь со гожъя шыпыт-шуныт кылъёсын, коня ке серемпыр но вожъяськыса, малы ке шуоно прозаиклы татын ваньмыз валамон но оскымон потэ.

Лидия Нянькина одӥг кадь ӟырдыт мылкыдын суреда пиосмуртъёсты но нылкышноосты, пересьёсты но егитъёсты, гурт калыкез но творчествоен герӟаськем адямиосты. Но вань солэн тужгес но яратоно героез — гуртын улӥсь арлыдтэм воргорон («Шузи-Мази»). Со кӧня ке шузи-мази, котьмалы оскись, юмокъёсы шедись, ас вактаз усем мурт, ӵемысь чылкак огназ. Нош ассэ авторез но лыдӟисьёсты паймытэ котыр улосэз юн яратыны быга-тэменыз, эрико луэменыз, инкуазьлэн куронъёсызъя каньыл но огшоры, мултэссэ курытэк но керӟегъяськытэк улэменыз. Та бадӟым дуннеын солы туж пичи инты кулэ — аслаз коркаез. Лидия Нянькиналэн асьсэды йӧн-йӧн возись геройёсын таӵе веросъёсыз туннэ удмурт гуртлэсь пуш кужымзэ, ӵуказе нуналлы осконзэ шараяло, луоз. Кузёосын вунэтэм пичи гуртъёсын улӥсь таӵе адямилыко воргоронъёс вылын возиське на, дыр, каръян дуннемы но.

Лидия Нянькиналэн гожъяськон ӧрез но быдэс творчествоез эрико лобанлы кельше. Лыдӟисеныз со шара но меӵак вераське, котыръятэк но ватытэк, капчи маде (ӵемысь «мон» шуыса) туж пыдло ватэм лул-сюлэм яраос, адӟонъёс сярысь, улон но кулон вискы пачкатэм мылкыдъёс сярысь, сьӧлыке но пож вуэ выем дунне сярысь. Авторез тазьы гожъяны косэ ачиз улон, туала вакыт.

Веросъёс гожъям сяна, егит автор кылбуран удысын но быгатэмзэ возьматӥз ини. 2004-тӥ арын потӥз "Синучкон" сборникез. Лидия Нянькина кылбур яратӥсьёслы выль образъёс вае, тодмо малпанъёсты выль сямен пертче, мукет сяменгес усьтэ. Солэсь чуръёссэ нокинэн уд сура: соку ик шӧдӥсько аслаз тусыз но куараез.

Удмурт поэзие вуиз выль героиня – гетера. Ку вал со, куке возьдаськись, кепырась, кышкась, ненег удмурт нылаш калык кылымон ачиз сярысь озьы вераны быгатысал? Удмурт поэзиын ӧй вал на сыӵеез. Л. Нянькиналэн кылбуръёсыз зол ик палдыса кылё огъя нылкышно кылбуран сюреслэсь. Та поэтесса туж музон луэ. Лирической героиняез солэн быдэс дунне литературае потэ.

Йӧскалык библиотекаын Л. Нянькинаен пумиськон ӝыт

Инбам – будуаре мынам – сыӵе татын шуныт.

Огпол но мон ӧй юы на татын курыт эмъюм.

Огпол но мон ӧй кылы на татын секыт кылъёс.

Огпол но мон ӧй адӟы на уйжомымон вӧтъёс.

«Синучкон» бичетэ пырем кылбуръёслэн син шоры тужгес йӧтӥсь тодметсы ӵапак синучконэн герӟаськемын. Нырысетӥ кылбурез («Нырысетӥ яратон») лыдӟыку ик шӧдӥськод, кытын ке но татын синучкон вань шуыса. Бичетысь кылбуръёсыз бӧрсьысь бӧрсе лыдӟемея синучкон сярысь шӧдонэ уг быры, юнманы кутске. Озьы тунсыко кылбур дунне – Л. Нянькиналэн кылбураса кылдытэм дуннеез – син азям пуксьыны кутске. Валамон ини, та дуннелэн шораз лирической героиня улэ аслаз сюлмаськонъёсыныз, куректонъёсыныз но шумпотонъёсыныз. Аспӧртэмлыко сямъёсыныз-выросъёсыныз но дунне шоры учконэныз со туж эрико егит нылкышно….». «Нянькиналэн кылбуръёсыз пичи спектакльлы укшало. Улонлэн кыӵе ке но чалепез синучкон азьын возьматӥське. Валтӥсь ролез котьку сямен ачиз героиня шудэ, учкисез – со ик. Спектакльын геройёслэн мылкыдъёссы но малпанъёссы сярысь, кылъёсын верамъёсысьтызы сяна, выросъёссы, дӥсьсы, котырысьтызы арбериосын но адямиосын кусыпъёссы пыр тодӥськомы».

Л. Нянькиналэсь кылбуръёссэ эскерыку, син азе йӧтэ авторлэн котькуд кылбурын, котькуд стофаын куара тупанэз чакланы тыршемез («Нош азьвыл…», «Тани мон Тӥледын…», «Кык пол уг пыласько одӥг шурын…», «Мон анайлэн лудмем нылыз…», «Сюлэмлэн вурысэз» но мукет).

Л. Нянькиналэсь кылбуръёссэ эскерыса, оглом шуыны луоз: солэн кылбурет дуннеез – аспӧртэмлыко литературной выжыкыл дунне, отын пумисько принцессаос, лордъёс, Дюймовочкаос, мусо Чёртъёс, батыръёс но мукет улӥсь-вылӥсьёс. Нош малы выжыкыл дунне? Малы ке шуоно, солэсь кылбуръёссэ лыдӟыку, зэмзэ но, сюриськод кадь кыӵе ке но мукет, паймымон интые, кытын котькинлэн но котьмалэн вань лулыз но луонлыкез адями чотэ султыны, улэпъяськыны. Соин кылбуръёсысь пумитъяськом улэпъяса возьматэм шудбурез, мӧзмонэз, музаез, лираез, кайгуэз, льӧль малпанэз.

Озьы ик Лидия Нянькина алигес тодмо луиз нылпиослы гожъяменыз но. «Косьтэй но кыстыбей» но «Ческыт кӧмеч» пичиослы сӥзем кылбуръёсыныз бичетъёсыз потӥзы «Удмуртия» книгапоттониын. Кылбуръёслэн задор мылкыдзылы, шуныт кужымзылы луыса, книгаос пичи лыдӟисьёсты гинэ уг, бадӟымъёсты но бордазы кыско. Пичи геройёссэ Л. Нянькина яркыт суреданы быгатэм. Автор ваньзэ сямен кылбуръёссэ лирической героезлэн нимыныз гожтэ. Нянькина кылбуръёсаз пичи адямилэсь дунне шоры учкемзэ зэмос мастер сямен возьматэ. Со пичи пинал понна тужгес дуно макеослы бадӟым саклык висъя. Кылбуръёсын пичи муртлэн пуш дуннеез усьтӥське, озьыен автор нылпиослэсь но психологизэс туж умой вала.

Туннэ шуыны луэ: Лидия Нянькиналэн удмурт литератураын аслаз куараез, аслаз манерез. Со дӥсьтӥсь, выльзэ утчась но шедьтӥсь.

Наградаосыз но премиосыз

Ашальчи Оки нимо премия, 1998.

Библиография

Книгаосыз

Ваёбыж кар : веросъёс, повесть. – Ижевск : Удмуртия, 1996. – 176 с.

Косьтэй но кыстыбей / суредаз М. Вахрин. – Ижевск : Удмуртия, 2009. – 23 с.

Синучкон : кылбуръёс. – Ижевск : Удмуртия, 2004. – 159 с.

Ческыт кöмеч / суредаз М. Вахрин. – Ижевск : Удмуртия, 2009. – 24 c.

Cтатьяосыз

Вайёс вылын эктэ крезьгур : кылбуръёс // Кенеш. – 2005. – N 2. – С. 25-28. – Содерж.: Кион но ныл ; Льӧль малпанэ ; "Эн вожъяськы мыным, калык..." ; Кылбурлэн вордскемез ; Тон ӧвӧл со... ; "Вайёс вылын эктэ крезьгур..." ; "Кытын ке синмаськон, синмаськон..." ; "Тём-тём уй. Мынэ куине..." ; "Нуналлы быдэ роман..." ; "Йырсие азвеся, пужмера-пурысьта..." ; Яратон ; "Ворсамын ни катанчи..."

Вордӥськем нуналэн ; Витьтон арес тырмемен ; Витьтон вить арес тырмемен ; Сӥзён ; Пенсие потон ужрадын куноослы тау карон ; Выль кенлы но эмеспилы ; Сюан дыръя кудолы, туклячилы вазиськон ; Коркатуйлы ; Школалэн юбилеезлы : кылбурен ӟечкыланъёс, сӥзёнъёс // Кенеш. – 2010. – № 9. – С. 15-20.

Гондыр агайлэн куноосыз ; Кызьы вегин ныл адями луиз : выжыкылъёс // Удмурт дунне. – 2010. – 20 янв. – С. 7.

Зоя Трухиналы ; Василий Глушковлы : эшлыко чуръёс // Кенеш. – 2009. – № 7. – С. 107.

Кенак : верос / иллюстрацез Галина Ивановалэн // Кизили. – 2012. – № 3. – С. 6-7 : цв. ил.

Кырси : верос / иллюстрациез Марина Гузаевалэн // Кизили. - 2013. - № 9. - С. 10-11.

"Лыктӥськод но кошкиськод..." : кылбур // Удмурт дунне. - 2014. - 16 сент. - С. 4. - (инГОЖ)

Люля : нылпиослы верос // Удмурт дунне. - 2010. - 1 июня. - С. 7.

Мар-о кароз Вадике? ; Саламъёс : кылбуръёс / иллюстрациез Василий Мустаевлэн // Кизили. – 2005. – N 4. – С. 8.

"Мон анайлэн лудмем нылыз..." = Ma võõrdund tütar emale... ; Кион но ныл = Hunt ja tüdruk ; Тон ӧвӧл со... = Pole sina see... // Kuum ӧӧ : suome-ugri ranvaste tanapaeva luulet. – Tallinn, 2006. – С. 426–429. – На удмурт. и эст. яз.

Писпу йылын возьмаськон : верос / иллюстрациез Галина Ивановалэн // Кизили. – 2011. – № 4. – С. 6-7 : рис.

Тол Бабайлэн саламъёсыз : верос / иллюстрациез Марина Гузаевалэн // Кизили. – 2012. – № 11/12. – С. 7-8.

Чупа-чупс ; Косьтэй но кыстыбей ; Ческыт кӧмеч // Алнаш куара. – 2009. – 4 мая.

Эшлыко чуръёс : кылбуръёс // Кенеш. - 2007. - N 1. - С. 40, 45, 67, 103. - Пуштросэз: Галина Романовалы ; Татьяна Черновалы ; Елена Виноградовалы ; Римма Лаптева-Игнатьевалы ; Любовь Тихоновалы ; Светлана Арекеевалы ; Вера Пантелеевалы

Ярам вань ай тон, ёлка! ; Гочасько / иллюстрациез М. Водикунуслэн // Кизили. – 2006. – № 11/12. – С. 2.

Берыктэмъёсыз

Ашальчи Оки. Соль // Луч. – 2008. – № 3/4. – С. 83–88. – (К 450-летию присоединения Удмуртии к России).

Беляева С. Тол бабайлэсь СМС / иллюстрациез В. Михайловлэн // Кизили. – 2011. – № 1. – С. 2 обл. : цв. ил.

Валтари Мика. Лыз уй / чурулзэ дасяз Е. Севастьянова // Кенеш. – 2010. – № 7. – С. 97.

Владимиров А. Адӟон ; Вож син : веросъёс // Кенеш. - 2010. - № 11/12. – С. 34–42.

Ворончихин А. С. "Тём-тём уй..." ; "Эн кузьма мыным дэремъёс, бриллиантъёс..." // Кенеш. – 2010. – № 4. – С. 34.

Гаврилов, Игнатий Гаврилович. Ловушка : рассказ // Луч. - 2012. - № 3/4. - С. 49-55.

Демьянов, Анатолий Илларионович. Чибинь : выжыкыл / иллюстрациез Вася Мустаевлэн // Кизили. - 2008. - № 2. - С. 10-11.

Ермолаева, Нина. Зарезь пӧртэм луэ : веросъёс // Кенеш. - 2012. - № 9, 10. - С. 83-88 : фот. - (Нылпи дунне). - Пуштросэз: Ваньмызлы - губиос, ваньмызлы - сяськаос ; Тӧдьы гондыръёс ; Нюшалэн тылобурдоез ; Сяськаос уз шуялэ ; Азбарын ; Золгес ворттылэ ; Кудӥз ёлка умойгес? ; Ӟеч пытьы ; Медаз мӧзмы ; Милям кармы ; Выль эшъёс ; Кудӥз куара умойгес ; Матрёшкаос - физкультурницаос ; Ноку но бӧрдыны уг яра ; Умой синъёс ; Часъёслы беромыны уг яра ; Эшъяськон корка ; Вань атайёс понна уйвӧт ; Атасэн ӵош чоръяськом ; Шундыез кутылӥськом ; Паймымон ву ; Ваньмыз бӧрдо ; Кызьы мон песянаез пӧяй ; Ӵукнаысен ужано.

Ермолаева, Нина. Чорыгтэк ум кылиське ; Чимаса шудӥськом ; Кызьпулэн уйвӧтэз : веросъёс // Ӟечбур!. - 2013. - 31 янв. - С. 5.

Кайава Вильо. "Мон – гитара..." / чурулзэ дасяз Е. Севастьянова // Кенеш. – 2010. – № 7. – С. 97.

Киви Алексис. Мӧзмон / чурулзэ дасяз Е. Севастьянова // Кенеш. – 2010. – № 7. – С. 98.

Лассила Майю. Шырпулы : кузьмадёсысь люкет // Кенеш. – 2010. – № 7. – С. 100–103.

Мерилуто Аля. Асьме бӧрсьы... / чурулзэ дасяз Е. Севастьянова // Кенеш. – 2010. – № 7. – С. 98–99.

Миккола Марья-Леена. Кулэм гажанэ сярысь кырӟан / чурулзэ дасяз Е. Севастьянова // Кенеш. – 2010. – № 7. – С. 98.

Полугрудов, Алексей. Бус : верос // Удмурт дунне. - 2012. - 21 нояб. - С. 7.

Саарикоски Пентти. "Мон яратӥсько тонэ..." / чурулзэ дасяз Е. Севастьянова // Кенеш. – 2010. – № 7. – С. 99.

Тунни Аале. Зор / чурулзэ дасяз Е. Севастьянова // Кенеш. – 2010. – № 7. – С. 97.

Кырӟанъёсыз

Волкова, Людмила. Яратон : "Яратон луэ пӧртэм буёло, пӧртэм буёло..." / крезьгурез Людмила Волковалэн ; кылъёсыз Лидия Нянькиналэн // Кенеш. - 2011. - № 5/6. - С. 84-85.

Ганьков Г. Н. Эн курадӟыты монэ : "Адӟеме тустэ-буйдэ..." // Кенеш. – 2009. – № 3. – С. 109. – (Жингырты, удмурт кырӟан).

Кириллов С. К. Выль арлы : "Пазясько чильк-валь лымы пырыос..." // Удмурт дунне. – 2010. – 22 дек. – С. 7. – (Шудэлэ тӥ, серектэ).

Кузнецов, Пантелей Николаевич. Песяе : "Песяе тон мынам, песяе..." / крезьгурез Пантелей Кузнецовлэн ; кылъёсыз Лидия Нянькиналэн // Кенеш. - 2011. - № 5/6. - С. 4-5.

Постников Н. Е. Мынам Дуннее : "Нокинэ но уг лэзь мон аслам Дуннеям..." // Малпасько тонэ = А мне бы увидеть тебя : кырӟанъёс / Н. Постников. – Ижевск, 2010. – С. 100 ; Кенеш. – 2008. – № 5/6. – С. 6.

Старших, Василий Еремеевич. Гочасько : "Ӟеч-а, бур-а, Тол бабай!.." / крезьгурез Василий Старшихлэн ; кылъёсыз Лидия Нянькиналэн // Кенеш. - 2011. - № 5/6. - С. 38-39.

Старших, Василий Еремеевич. Пепей Барби : "Ульчаын зоре кап-кап!.." / крезьгурез Василий Старшихлэн ; кылъёсыз Лидия Нянькиналэн // Кенеш. - 2011. - № 5/6. - С. 39.

Старших, Василий Еремеевич. Саламъёс : "Апе-апе-апельсин..." / крезьгурез Василий Старшихлэн ; кылъёсыз Лидия Нянькиналэн // Кенеш. - 2011. - № 5/6. - С. 38.

Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.